நமசிவாய வாழ்க.. நாதன் தாள் வாழ்க..

நம சிவாய வாழ்க.. நாதன் தாள் வாழ்க..

நம சிவாய

பூ நாளும் தலை சுமப்ப - புகழ் நாமம் செவி கேட்ப - நா நாளும் நவின்றேத்தப் பெறலாமே நல்வினையே!..

உழவர் ஓதை மதகோதை உடை நீரோதை தண்பதங்கொள்

விழவர் ஓதை சிறந்தார்ப்ப நடந்தாய் வாழி காவேரி..

கந்தசஷ்டி லேபிளுடன் இடுகைகளைக் காண்பிக்கிறது. அனைத்து இடுகைகளையும் காண்பி
கந்தசஷ்டி லேபிளுடன் இடுகைகளைக் காண்பிக்கிறது. அனைத்து இடுகைகளையும் காண்பி

சனி, நவம்பர் 02, 2019

குருவாய் வருவாய்..

தீபாவளியைத் தொடர்ந்து
சூர சம்ஹாரப் பெருவிழா தமிழகத்தின் திருக்கோயில்கள்
பலவற்றிலும் சிறப்புடன் நிகழ்ந்து கொண்டிருக்கின்றது...

மாமன் அன்று நரகாசுர வதம் நிகழ்த்தினான்...
அவனது அன்பு மருமகன் இன்று பத்மாசுரனை வதைக்கின்றான்...

இன்று நிறைவான கந்தசஷ்டி..

ஆணவம் மாயா கன்மம் எனும் மும்மலங்களும்
வீழ்த்தப்படுவதே சூர சங்காரத்தின் தத்துவம்...

மும்மலங்களாகிய காரிருளை
ஞானம் எனும் பேரொளியாகிய வேல் கொண்டு வீழ்த்தினான் திருக்குமரன்...
சிக்கலில் வேல் வாங்கிச் செந்தூரில் பகை முடித்தான்!.. - என்பர் ஆன்றோர்...

வெற்றி வேல்!.. வீர வேல்!.. -
என்பது மெய்த் தமிழருடைய வீரமுழக்கம்...

நம்மைச் சூழ்ந்திருக்கும் மாயைகளை
முருகனின் வேல் கொண்டு - அவனது பேர் கொண்டு வீழ்த்துவோம்...

அது அவ்வளவு எளிதாக ஆகாது என்பதால்
சூர சங்காரம் செய்திட்ட சுப்ரமண்யப் பெருமானைச் சரணடைந்து

எம்முள் ஞானம் எனும் பேரொளி பெருகிட அருள்வாய் முருகா!..
என்று வேண்டிக் கொள்வோம்...

இன்றைய பதிவில்
திருக்கோயில்கள் பலவற்றிலும் நிகழ்ந்த
கந்த சஷ்டித் திருவிழாவின் சில காட்சிகள்...

நிகழ்வுகளை வலைப்படுத்திய
சிவனடியார் திருக்கூட்டத்தினருக்கு நெஞ்சார்ந்த நன்றி..

திருப்பரங்குன்றம்  
திருப்பரங்குன்றம் 
திருப்பரங்குன்றம் 
சுவாமிமலை  
சுவாமிமலை  
நாள் என்செயும் வினைதான் என்செயும் எனை நாடிவந்த
கோள் என்செயும் கொடுங்கூற்று என்செயும் குமரேசரிரு
தாளும் சிலம்புஞ் சதங்கையும் தண்டையும் சண்முகமும்
தோளுங் கடம்பும் எனக்கு முன்னே வந்து தோன்றிடினே... 
-: கந்தரலங்காரம் :-

குமரகோட்டம் - காஞ்சி 
மஞ்சக்கொல்லை - நாகை 
குமார வயலூர் 
குமார வயலூர் 
ஆலுக்கு அணிகலம் வெண்தலை மாலை அகிலம்உண்ட
மாலுக்கு அணிகலம் தண்ணந்துழாய் மயிலேறும் ஐயன்
காலுக்கு அணிகலம் வானோர் முடியுங் கடம்பும் கையில்
வேலுக்கு அணிகலம் வேலையும் சூரனும் மேருவுமே..
-: கந்தரலங்காரம் :-

ஸ்ரீ செல்வமுத்துக்குமரன்
வைத்தீஸ்வரன் கோயில் 
ஸ்ரீ சிங்கார வேலவன்
சிக்கல் 
சிக்கல் 
சிக்கல் 
சிக்கல் திருத்தேர் 
சிக்கல் ஸ்ரீ சிங்கார வேலவனின் சந்நிதியில் தீப ஆராதனை...


மாலோன் மருகனை மன்றாடி மைந்தனை வானவர்க்கு
மேலான தேவனை மெய்ஞான தெய்வத்தை மேதினியிற்
சேலார் வயற்பொழிற் செங்கோடனைச் சென்று கண்டுதொழ
நாலாயிரங் கண் படைத்திலனே அந்த நான்முகனே..
-: கந்தரலங்காரம் :-

வெற்றிவேல் முருகனுக்கு அரோஹரா..
வீரவேல் முருகனுக்கு அரோஹரா!...
ஃஃஃ 

வியாழன், நவம்பர் 15, 2018

கந்தன் கருணை 8

நேற்றைய பதிவின் கருத்துரையில்
மதிப்புக்குரிய கீதா சாம்பசிவம் அவர்கள்
தெய்வானை திருமணக் காட்சிகளைக்
காண விழைவதாகச் சொல்லியிருந்தார்கள்...

அவர்களுடைய ஆவலினை
ஐயன் முருகப் பெருமான் நிறைவேற்றித் தந்துள்ளான்...

இன்று காலையில் கிடைத்த
தெய்வயானை திருமணத் திருக்காட்சிகள்...

ஸ்ரீ தேவகுஞ்சரியுடன் - திருமுருகன்..
திருப்பரங்குன்றம்..
 
சந்ததம் பந்தத் - தொடராலே
சஞ்சலந் துஞ்சித் - திரியாதே
கந்தனென் றென்றுற் - றுனைநாளும்
கண்டுகொண் டன்புற் - றிடுவேனோ

தந்தியின் கொம்பைப் - புணர்வோனே
சங்கரன் பங்கிற் - சிவைபாலா
செந்திலங் கண்டிக் - கதிர்வேலா
தென்பரங் குன்றிற் - பெருமாளே...
-: அருணகிரியார் :-  
***

இப்போதெல்லாம்
திருக்கோயில் நிகழ்வுகளைக் காணொளியாக வழங்குகின்றார்கள்...

அது ஒரு விதத்தில் நல்லதென்றாலும் -
அதனை தரவிறக்கம் செய்து மீண்டும் வலையேற்றம் செய்வது
இணைய வேகம் சரியில்லாத நேரத்தில் மிகவும் கடினம்...

என்றாலும் -
நல்லதொரு பணியினைச் செய்வதாக
தளத்தில் பதிவிடும் வேளையில்
அடெல்லாம் ஒரு பொருட்டே அல்ல!...

வழக்கம் போல
படங்களையும் காணொளியையும் வழங்கியோர்
உழவாரம் சிவனடியார் திருக்கூட்டத்தினர்..
அவர் தமக்கு நெஞ்சார்ந்த நன்றி...

கீழுள்ள காணொளி -
சிக்கல் ஸ்ரீசிங்கார வேலனின் ஆனந்தக் கோலாகலம்...


சிக்கல் ஸ்ரீ சிங்காரவேலவன்..
ஸ்ரீ சிங்கார வேலவன் - ஸ்ரீ தெய்வயானை..
சிக்கல்.. 
ஸ்ரீ தெய்வயானை மணாளன்
குமாரவயலூர்..  
ஸ்ரீ வள்ளி தெய்வானையுடன் திருக்குமரன்
குமார வயலூர்.. 
சோலைமலை அழகன்.,
பழமுதிர்சோலை.,
தேவியருடன் திருமுருகன்.,
பழமுதிர்ச்சோலை..
திருப்பரங்குன்றம்.. 
செண்பகமாலைகளுடன் செவ்வேள் குமரன் - தெய்வானை
திருப்பரங்குன்றம்.. 
முருகா என்றதும் உருகாதா மனம் 
மோகன குஞ்சரி மணவாளா!..
உருகாதா மனம் உருகாதா!...
முறை கேளாயோ.. குறை தீராயோ...
மான் மகள் வள்ளியின் மணவாளா!...
உருகாதா மனம் உருகாதா!..
-: தஞ்சை ராமையா தாஸ் :-
*** 

கந்த சஷ்டி பதிவுகளின் போது
தொடர்ந்து ஊக்கமளித்த
அனைவருக்கும்
மனமார்ந்த நன்றி...

வள்ளி மணவாளனாகிய முருகப்பெருமான் 
தன் அடியார்கள் வாடும்படிக்குச் செய்ததேயில்லை...
தேவகுஞ்சரி கேள்வனாகிய கந்தப்பெருமான்
தன் அடியார்களை விட்டுப் பிரிந்ததேயில்லை!...

முருகா சரணம்.. முதல்வா சரணம்..
முத்துக் குமரா சரணம்.. சரணம்!.. 
ஃஃஃ  

புதன், நவம்பர் 14, 2018

கந்தன் கருணை 7

நேற்று கோலாகலமாக
சூர சங்காரம் நிகழ்ந்ததைத் தொடர்ந்து
இன்று திருத்தலங்கள் பலவற்றிலும்
ஸ்ரீ முருகப் பெருமானுக்கு திருக்கல்யாண வைபவம் நிகழ்கின்றது...

நேற்றைய வைபவத்தின் திருக்காட்சிகள் சிலவற்றை
இன்றைய பதிவினில் காணலாம்...

உழவாரம் சிவனடியார் திருக்கூட்டத்தினர் தமக்கு
மனமார்ந்த நன்றி...

ஸ்ரீ சிங்காரவேலன் - சிக்கல்.. திருஆரூர் (Dt)., 
ஆட்டுக்கிடா வாகனத்தில் சிங்கார வேலன்

தேவியருடன் ஸ்ரீ சிங்கார வேலன்..
காஞ்சி குமரகோட்டம் 
சங்கரன்கோயில்


குமார வயலூர் - திருச்சி..
பெருவாழ்வு பெற்ற சூரன்  
உருவாய் அருவாய் உளதாய் இலதாய்
மருவாய் மலராய் மணியாய் ஒளியாய்
கருவாய் உயிராய் கதியாய் விதியாய்
குருவாய் வருவாய் அருள்வாய் குகனே..
- அருணகிரியார் :-
***
இன்று அதிகாலையில்
கார்த்திகைத் தீபத் திருவிழாவிற்காக
திருஅண்ணாமலையில் திருக்கொடியேற்றப்பட்டுள்ளது...

காணொளிகளையும் படங்களையும் பகிர்ந்து கொண்ட
சிவனடியார் திருக்கூட்ட நண்பர்களுக்கு மனமார்ந்த நன்றி...





வந்தித்திருக்கும் அடியார்தங்கள் வருமேல் வினையோடு
பந்தித்திருந்த பாவந்தீர்க்கும் பரமனுறை கோயில்
முந்தியெழுந்த முழவின்ஓசை முதுகல் வரைகள்மேல்
அந்திப்பிறைவந் தணையுஞ் சாரல் அண்ணாமலையாரே.. (1/69) 
-: திருஞானசம்பந்தர் :-


ஓதிமா மலர்கள் தூவி உமையவள் பங்கா மிக்க
சோதியே துளங்கும் எண்தோள் சுடர்மழுப் படையி னானே
ஆதியே அமரர் கோவே அணிஅணா மலை யுளானே
நீதியால் நின்னை அல்லால் நினையுமா நினை விலேனே..(4/63)
-: திருநாவுக்கரசர் :-

ஓம் நம சிவாய சிவாய நம ஓம்.. 
ஃஃஃ

செவ்வாய், நவம்பர் 13, 2018

கந்தன் கருணை 6


இன்று ஸ்ரீ கந்த சஷ்டித் திருவிழா


ஸ்ரீ சிங்காரவேலன் - சிக்கல் - திருஆரூர்(Dt).. 
சிக்கலில் வேல் வாங்கி 
செந்தூரில் போர் முடித்த நாள்...

ஆணவ மாயா கன்மம் எனும் மும்மலங்களின்
மொத்த வடிவாய்த் திரிந்த அசுரர்க் கூட்டம் அழிந்த நாள்..

இன்றைய பதிவில்
அருணகிரியார் அருளிச் செய்த
கந்தர் அலங்காரத் திருப்பாடல்கள்..

ஸ்ரீ முத்துக்குமாரஸ்வாமி..
பண்பொழில் - தென்காசி.. 
பேற்றைத் தவஞ்சற்று மில்லாத என்னைப்ர பஞ்சமென்னும்
சேற்றைக் கழிய வழிவிட்ட வா - செஞ் சடாடவிமேல்
ஆற்றைப் பணியை இதழியைத் தும்பையை அம்புலியின்
கீற்றைப் புனைந்த பெருமான் குமாரன் க்ருபாகரனே..(001)

தேரணி யிட்டுப் புரமெரித் தான்மகன் செங்கையில்வேற்
கூரணி யிட்டணு வாகிக் கிரெளஞ்சங் குலைந்தரக்கர்
நேரணி யிட்டு வளைந்த கடக நெளிந்தது சூர்ப்
பேரணி கெட்டது தேவந்த்ர லோகம் பிழைத்ததுவே..(003)

குமாரகோயில் - வேளிமலை - கன்யாகுமரி..
மொய்தா ரணிகுழல் வள்ளியை வேட்டவன் முத்தமிழால்
வைதா ரையுமங்கு வாழவைப் போன்வெய்ய வாரணம்போற்
கைதான் இருப துடையான் தலைப்பத்துங் கத்தரிக்க
எய்தான் மருகன் உமையாள் பயந்த இலஞ்சியமே..(022)

நீலச் சிகண்டியி லேறும் பிரானெந்த நேரத்திலுங்
கோலக் குறத்தி யுடன்வரு வான்குரு நாதன்சொன்ன
சீலத்தை மெள்ளத் தெளிந்தறி வார்சிவ யோகிகளே
காலத்தை வென்றிருப்பார் மரிப் பார்வெறுங் கர்மிகளே..(026)

ஸ்ரீ சுப்ரமண்ய ஸ்வாமி - எண்கண் - திருஆரூர்(Dt).. 
பத்தித் திருமுக மாறுடன் பன்னிரு தோள்களுமாய்த்
தித்தித் திருக்கும் அமுதுகண் டேன்செயன் மாண்டடங்கப்
புத்திக் கமலத் துருகிப் பெருகிப் புவனமெற்றித்
தத்திக் கரைபுர ளும்பர மாநந்த சாகரத்தே..(047)

நெற்றாப் பசுங்கதிர்ச் செவ்வேனல் காக்கின்ற நீலவள்ளி
முற்றாத் தனத்திற் கினிய பிரானிக்கு முல்லையுடன்
பற்றாக்கை யும்வெந்து சங்க்ராம வேளும் படவிழியாற்
செற்றார்க் கினியவன் தேவந்த்ர லோக சிகாமணியே..(058)
*** 
திருச்செந்தில்நாதன்.. 
சேந்தனைக் கந்தனைச் செங்கோட்டு வெற்பனைச் செஞ்சுடர்வேல்
வேந்தனைச் செந்தமிழ் நூல்விரித் தோனை விளங்குவள்ளி
காந்தனைக் கந்தக் கடம்பனைக் கார்மயில் வாகனனைச்
சாந்துணைப் போது மறவா தவர்க்கொரு தாழ்வில்லையே..(072)
-: கந்தர் அலங்காரம் :- 
*** *** *** 

ஸ்ரீ வள்ளி ஸ்ரீ தெய்வானையுடன் ஸ்ரீ சுப்ரமண்ய ஸ்வாமி - விராலிமலை.. 
ஆறிரு தடந்தோள் வாழ்க அறுமுகம் வாழ்க
வெற்பைக் கூறுசெய் தனிவேல் வாழ்க குக்குடம் வாழ்க
செவ்வேள் ஏறிய மஞ்ஞை வாழ்க யானைதன் அணங்கு வாழ்க
மாறிலா வள்ளி வாழ்க வாழ்க சீர் அடியாரெல்லாம்..
-: கந்தபுராணம் :-  
******

ஆன்றோர்கள் அருளிய உரை வழி நின்று
கடந்த ஐந்து நாட்களும்
கந்தனின் கருணை சிந்திக்கப்பட்டது...

மனமறிந்த திருப்பாடல்களைப் பகிர்ந்த வேளையில்
மேலும் விவரங்கள்
அவர் தமக்கு நெஞ்சார்ந்த நன்றி..

நாளும் தளத்திற்கு வருகையளித்து
ஊக்கப்படுத்திய தமிழ் நெஞ்சங்கள் 
அனைவருக்கும் வணக்கம்..
***

முருகா சரணம்... முதல்வா சரணம்...
முத்துக் குமரா... சரணம் சரணம்...

வெற்றி வேல்.. வீரவேல்.. 
ஃஃஃ

திங்கள், நவம்பர் 12, 2018

கந்தன் கருணை 5


அரகர சிவனரி அயனிவர் பரவிமுன்
     அறுமுக சரவண - பவனேயென்

றநுதின மொழிதர அசுரர்கள் கெடஅயில்
     அனலென எழவிடு - மதிவீரா

பரிபுர கமலம தடியிணை அடியவர்
     உளமதி லுறவருள் - முருகேசா

பகவதி வரைமகள் உமைதர வருகுக
     பரமன திருசெவி - களிகூர

உரைசெயும் ஒருமொழி பிரணவ முடிவதை
     உரைதரு குருபர - உயர்வாய

உலகம னலகில உயிர்களும் இமையவர்
     அவர்களும் உறுவர - முனிவோரும்

பரவிமு னநுதின மனமகிழ் உறவணி
     பணிதிகழ் தணிகையில் - உறைவோனே

பகர்தரு குறமகள் தருவமை வநிதையும்
     இருபுடை யுறவரு - பெருமாளே..


ஹரனாகிய சிவபெருமானும்
ஹரியாகிய பரந்தாமனும்
அயனாகிய நான்முகப் பிரம்மனும்
அவர்களுடன் ஏனையோர்களும் கூடி நின்று
அறுமுகனே.. என்றும் சரவணபவனே.. என்றும்
உனைக் கொண்டாடித் துதித்து நிற்க

அசுரர் கூட்டம் கெட்டு அழியுமாறு
காலாக்னி போல் விளங்கும் கூர் வேலினை
விடுத்த வீரனே.. வெற்றி வடிவேலனே...

சிலம்புகள் சிலம்பும்
உனது தாமரைத் திருவடிகள்
பக்தர்களுடைய உளந்தனில் என்றென்றும்
பதிந்திருக்க அருள்பவனே முருகனே... ஷண்முகனே...

இமவானின் திருமகளாகிய
தேவி பராசக்தி அருளிய அழகனே.. குகனே...


பரம்பொருளாகிய ஈசனது
திருச்செவி குளிரும் வண்ணம்
ஓம் எனும் ப்ரணவ மந்த்ரத்தின்
உட்பொருளை உரை செய்தருளிய ஞானபண்டிதனே..

இவ்வுலகினில் உள்ள அனைத்து உயிர்களும்
இமையவர்களும் முனிவர்களும் நாளும் நாளும்
உனைப் போற்றித் துதிக்கும்படிக்கு
வாசுகியாகிய நாகம் பணிந்து நின்ற
திருத்தணிகை எனும் திருமலையில்
உறைபவனே க்ருபாகரனே...

ஞான குருபரனாகிய நினது வலப்புறம்
இச்சா சக்தியாகிய ஸ்ரீ வள்ளி பிங்கலையாகவும் -
கிரியா சக்தியாகிய ஸ்ரீ தேவகுஞ்சரி இடகலையாகவும் - விளங்க
அடியவர் தம் குறை தீர்க்க மாமயில் ஏறி வரும் பெருமானே!..

நின் திருவடித்தாமரைகள் சரணம்.. சரணம்!...
*** *** ***  

ஆன்றோர்கள் அருளிய உரை வழி நின்று
எனது சிற்றறிவுக்கு எட்டியபடி
திருத்தணிகை திருப்புகழினை
இப்பதிவில் சொல்லியிருக்கின்றேன்...

குற்றங்குறைகளைப் பொறுத்தருள்க..

முருகா சரணம்... முதல்வா சரணம்...
முத்துக் குமரா... சரணம் சரணம்...

வெற்றி வேல்.. வீரவேல்.. 
ஃஃஃ

ஞாயிறு, நவம்பர் 11, 2018

கந்தன் கருணை 4

என்ன சார்!... நேத்து உங்களை எங்க தெரு பக்கம் பார்த்தேன்!...

ஆமா!.. இப்போ கந்த சஷ்டி விழா இல்லையா!..
அதான் முருகன் கோயிலுக்கு வந்தேன்...
சாமி தரிசனம்... திருப்புகழ் விரிவுரை...
கண்ணுக்கும் காதுக்கும் விருந்து...
சொன்ன மாதிரி கோயிலுக்குப் பக்கத்தில தானே உங்க வீடு!...

இருந்தாலும் நமக்கு அந்தப் பழக்கம் எல்லாம் இல்லை!..
அது சரி!.. முருகனப் பத்தி என்ன சொன்னார் உங்க பாகவதர்!...

பாகவதரா!?.. சின்ன வயசு தான்.. தமிழ் வாத்தியாராம்!...

இப்போ சின்ன வயசு பசங்களும்
கிளம்பிட்டானுங்களா பஜனை பாட்டு..ன்னு!...

இந்த காலகட்டத்துல
இவ்வளவு ஆர்வமா இருக்கிறது அபூர்வமாச்சே!...


அது இருக்கட்டும்.. முருகனப் பத்தி உங்களுக்குத் தெரியாதா?...
அந்தப் பையன் சொல்லித் தான் தெரிஞ்சுக்கணுமா?...
புதுசா என்ன சொன்னான் அந்தப் பையன்?...

சரி... நீங்க தான் தமிழ்ப் பிரியர் ஆச்சே!?...
உங்களுக்கு என்ன தெரியும் தமிழ் முருகனைப் பற்றி...

அது... வந்து.. முருகனுக்கு ஆறு தலை...
ரெண்டு பொண்டாட்டி.. அதுல ஒன்னு லவ்வு!...
அப்புறம் பதினெட்டுக் கை... ஏகப்பட்ட எக்ஸ்ட்ரா பிட்டிங்ஸ்!..

பதினெட்டுக் கை இல்லை.. பன்னிரண்டு!...

ஏதோ ஒன்னு!... நார்மலுக்கு மேல இருக்கா இல்லையா!..
ஏன்.. சார் நீங்க வேற!... பக்தி.... பஜனை....ன்னுக்கிட்டு!..
இன்னைக்கு தேவையான விஷயம் உங்க முருக பக்தியில என்ன இருக்கு?...

என்ன இல்லை... ங்கிறீங்க!...
இன்றைய தேவை நல்ல ஒழுக்கம்...
அது வேண்டுமா.. வேண்டாமா!...

வேணுந்தான்!... ஆனா எவன் ஒழுங்கா இருக்கான்?...
காலையில மேலுக்கு பட்டை அடிக்கிறான்...
சாயங்காலம் ஆனா உள்ளுக்குப் பட்டை அடிக்கிறான்!...

நிஜந்தான்... எங்கேயோ ஒரு சில பேர் அப்படி இருக்கலாம்!..
அதுக்காக எல்லாரையும் குறை சொல்லக் கூடாது!...

நம்ம கை விரல் எல்லாம் ஒரே மாதிரியா இருக்கு?...

உங்க அண்ணன் நல்லா படிச்சிட்டு உத்யோகத்துல இருக்கார்!..
ஆனா - நீங்க!... உங்கப்பா ரெண்டு பேரையும் தானே படிக்க வெச்சார்!...

சரி.. சரி... அதை விடுங்க...
முருகனப் பத்தி என்ன சொன்னார் - 
அந்த வாத்தியார்.. அதச் சொல்லுங்க!...

ஸ்ரீ வள்ளி ஸ்ரீதேவயானை உடனுறை ஸ்ரீ சுப்ரமண்ய ஸ்வாமி -.,
பெரியகோயில் - தஞ்சை.. 
அஞ்சன வேல்விழி - மடமாதர்
அங்கவர் மாயையில் - அலைவேனோ

விஞ்சுறு மாவுன - தடிசேர
விம்பம தாயருள் - அருளாதோ

நஞ்சமு தாவுணும் - அரனார்தம்
நல்கும ராவுமை - அருள்பாலா

தஞ்சென வாம் - அடியவர்வாழத்
தஞ்சையில் மேவிய - பெருமாளே!...

தஞ்சையில் மேவிய பெருமாளே... அந்த வரி மட்டும் புரியுது!...
மத்ததெல்லாம் ஒன்னும் விளங்கலையே!...

இந்தத் திருப்புகழ் -
தஞ்சை பெரிய கோயில் முருகனைப் பற்றியது....ன்னு சொல்வாங்க!...

இந்தப் பாடலுக்கு என்ன அர்த்தம்...ன்னா -

மை பூசிய கண்ணால அழகு காட்டி மனசைக் கெடுத்து 
மாயவலை விரிக்கிற பெண்களும் இருக்காங்க...
அவங்க பின்னால என்னோட மனசு அலைஞ்சி திரிஞ்சி 
அடையாளம் இல்லாம அழிஞ்சி போகாதபடிக்கு
என்னை நீ காப்பாத்தக் கூடாதா!...

எனக்கு நல்ல புத்தியக் கொடுக்கக் கூடாதா!..
நான் நல்லவன் ஆகறதுக்கு ஒரு வாய்ப்பு தரக்கூடாதா!..

இப்படியான ஆசையோட உன்னைய
தஞ்சம் அடையறவங்களைக்
காப்பாற்றிக் கரை சேர்க்கிற பெருமானே!...

அரனும் அம்பிகையும் பெற்றெடுத்த அழகா!...
தஞ்சையம்பதியில குடி கொண்டிருக்கிற முருகா!...

சரி.. இதுக்கும் நல்லொழுக்கத்துக்கும் என்ன சம்பந்தம்!...

நல்லொழுக்கத்துனால தான் 
நம்மைப் பெத்தவங்களுக்கு நல்ல பேரு வாங்கித் தரமுடியும்!..
அண்ணன் தம்பி கூடப் பொறந்தவங்களுக்கும் மரியாதை!..

..... ..... ..... ..... .....!....

நீங்க இந்த எண்ணத்தோட கோயிலுக்குப் போறீங்க!...
ஒரு மாசம்... ரெண்டு மாசம்... ஒரு வருசம்!...
உங்களுக்கு....ன்னு ஒரு தோற்றம் வந்துடும்!...

பக்தியை ஆற்று இன்ப வெள்ளம்... ன்னு சொல்றார் மாணிக்கவாசக ஸ்வாமி...

ஆற்றுத் தண்ணியில குளிக்க குளிக்க கரையேற மனசு வராது...

அது மாதிரி உண்மையான பக்தி வந்துடுச்சி... ன்னா
தப்பு செய்யிற எண்ணம் மனசுல வரவே வராது!...

நீங்க சிவ பக்தனா!.. கிருஷ்ண பக்தனா!.. யாரா வேணாலும் இருக்கலாம்!...

அப்போ பக்தனா இருந்துக்கிட்டு தப்பு செய்றவங்க!?...

அவங்க எல்லாம்... பக்தர்கள் இல்லை... பதர்கள்... போலிகள்!...

பதர்... ன்னா நெல்லுத் தூசி.. காத்துல பறக்கும்!..
கருங்கல் துண்டு காத்துல பறக்குமா?...

பலகீனமான உடம்பு தானே நோய்க்கிருமிக்கு இஷ்டம்!...
அதுபோல உறுதி இல்லாத மனசு தான் மாயைக்கு இஷ்டம்!...

அப்போ பக்தி இல்லாதவங்க நல்லவங்களா இருக்க முடியாதா!...

ஏன் முடியாது!... இருக்கலாமே அவங்க வீட்டுக்கு மட்டும்!..
சாமியாவது... பூதமாவது.. ந்னு சலங்க கட்டி ஆடுறான்...
ஊரைக் கொள்ளை அடிச்சி மாட்டிக்கிறப்ப மானங்கெட்டு ஓடுறான்!...

மனசு..ங்கறது முல்லைக் கொடி மாதிரி...
பக்தி அதுக்கு பந்தல் மாதிரி...

பந்தலுக்கு முல்லைக் கொடி தேவை இல்லைதான்...
ஆனா, அந்த முல்லைக் கொடி பந்தல்...ல படர்ந்தது...ன்னா
அது பொறந்த நோக்கத்தை அடையுது...
இல்லேன்னா.. சின்ன பின்னமாகி சீரழிஞ்சு போகுது!...

..... ..... ..... ..... .....!....

என்ன தம்பி!.... ஒன்னும் பேச்சைக் காணோம்!...

நீங்க சொல்றது மனசை என்னவோ பண்ணுதுங்க!...

இந்த மாதிரி ஆயிரத்து முன்னூறுக்கும் மேற்பட்ட திருப்புகழ்...
இருந்தாலும் இன்னொரு திருப்புகழையும் கேளுங்க!...

சொல்லுங்க அண்ணா.. எனக்கு கண்ணு தெறந்த மாதிரி இருக்கு!..

ஸ்ரீ ஸ்வாமிநாத ஸ்வாமி..
நிறைமதி முகமெனும் - ஒளியாலே
     நெறிவிழி கணையெனு - நிகராலே

உறவுகொள் மடவர்கள் - உறவாமோ
     உனதிரு வடியினி - அருள்வாயே

மறைபயி லரிதிரு - மருகோனே
     மருவல ரசுரர்கள் - குலகாலா

குறமகள் தனைமணம் - அருள்வோனே
     குருமலை மருவிய - பெருமாளே...

ஆகா... தஞ்சாவூர் திருப்புகழ் மாதிரியே இருக்கு...

நடத்தை தவறியவர்கள் 
எல்லாம் எனக்கு உற்றார் ஆவாரா!...
உனது திருப்பெயரும் திருவடிகளும்
உற்ற துணையாகும்படி அருளமாட்டாயா?...

அதுக்கு அப்புறம் கொஞ்சம் புரியலை...


ஸ்ரீஹரி பரந்தாமனோட மருகனே!...
அடங்காத அரக்கருக்கு யமன் போன்றவனே!...

குறமகள் தனக்கு மணவாளனே!..
குருமலையாகிய சுவாமிமலையில் 
கோயில் கொண்டு இருப்பவனே!...
ஈசனுக்கு உபதேசித்த ஸ்வாமி நாதனே!...

அண்ணா... இன்னைக்கும் கோயிலுக்கு வருவீங்களா!..

ம்... வருவேனே!...

நான் கோயில் வாசல்ல.... நிக்கிறேன்...
என்னையும் உங்களோட கோயிலுக்குள்ளே
அழைச்சிட்டுப் போங்க!..
*** *** ***


ஆன்றோர்கள் அருளிய உரை வழி நின்று
எனது சிற்றறிவுக்கு எட்டியபடி
தஞ்சையம்பதி மற்றும் சுவாமிமலை
திருப்புகழ்ப் பாடல்களை
இப்பதிவில் சொல்லியிருக்கின்றேன்...

குற்றங்குறைகளைப் பொறுத்தருள்க..

முருகா சரணம்... முதல்வா சரணம்...
முத்துக் குமரா... சரணம் சரணம்...

வெற்றி வேல்.. வீரவேல்.. 
ஃஃஃ