நமசிவாய வாழ்க.. நாதன் தாள் வாழ்க..

நம சிவாய வாழ்க.. நாதன் தாள் வாழ்க..

நம சிவாய

பூ நாளும் தலை சுமப்ப - புகழ் நாமம் செவி கேட்ப - நா நாளும் நவின்றேத்தப் பெறலாமே நல்வினையே!..

உழவர் ஓதை மதகோதை உடை நீரோதை தண்பதங்கொள்

விழவர் ஓதை சிறந்தார்ப்ப நடந்தாய் வாழி காவேரி..

வெள்ளி, ஜூன் 24, 2022

நடந்தாய் வாழி

     

நாடும் வீடும்
நலம் பெற வேண்டும்
பகையும் பிணியும்
தொலைந்திட வேண்டும்..
***






வான் பொய்ப்பினும் தான் பொய்யா 
மலைத் தலைய கடற்காவிரி..
-: பட்டினப்பாலை :-

உழவர் ஓதை மதகு ஓதை
உடை நீர் ஓதை தண்பதம் கொள்
விழவர் ஓதை சிறந்து ஆர்ப்ப
நடந்தாய் வாழி காவேரி!..
விழவர் ஓதை சிறந்து ஆர்ப்ப
நடந்த எல்லாம் வாய் காவா
மழவர் ஓதை வளவன் 
தன் வளனே வாழி காவேரி!..
-: இளங்கோவடிகள் :-

தண்ணீரும் காவிரியே
-: கம்பர்:-

கலவ மயிலுங் குயிலும் 
பயிலுங் கடல்போற் காவேரி
(1/67) 
முழுமணித் தரளங்கள்
மன்னு காவிரி சூழ் (2/106)
-: திருஞானசம்பந்தர் :-

கைய னைத்துங் கலந்தெழு காவிரி
செய்ய னைத்திலுஞ் சென்றிடுஞ் செம்புனல் (5/75)
மலைப்பண்டங் கொண்டு வருநீர்ப் பொன்னி (6/73)
-: அப்பர் ஸ்வாமிகள் :-

மாமணிக் கல்லை உந்தி 
வளம்பொ ழிந்திழி காவிரி  (7/48)
அழகார் திரைக் காவிரி (7/ 77)
-: சுந்தரர் :-

கங்கையிற் புனிதமாய காவிரி
-: தொண்டரடிப் பொடியாழ்வார் :-

ஏழ்தலம் புகழ் காவேரியால் 
விளை சோழ மண்டலம்
-: அருணகிரிநாதர் :-

சென்ற 27/5 ல் கல்லணையில்  தண்ணீர் திறந்து விடப்பட்டது.. 

அப்போது
கும்பகோணத்திற்கு அருகில் இருந்தேன் .. காவிரியாற்றில் நீர் வந்தபோது இரவு நேரம்.. சென்று தரிசிப்பதற்கு இயலவில்லை.. இந்நிலையில் 3/6 அன்று திரு ஐயாற்றில் காவிரி தரிசனம்.. சந்தனம் சாற்றி மலர்கள் தூவி வணங்கி என் அன்பினைத் தெரிவித்துக் கொண்டேன்..





காவிரி காவிரி எனும் போது 
என் கண்கள் ஆனந்தக் கடலாட
என் தமிழும் அதனுடன் சேர்ந்தாட
அந்த செங்கரைப் பூக்கள் அசைந்தாட
அங்கு சேலொடு உளுவை புரண்டாட
சிறு குருவிகள் தாமும் மகிழ்ந்தாட
தென்னங்குலைகளும் 
வளைந்து கூத்தாட
தென்திசைக் காற்றும்
சேறுடை நாற்றும் 
சிலு சிலு என்றே பண்பாட
செக்கர் வானக் கதிரும் சேர்ந்தே 
செந்நெல் கதிருடன் நின்றாட
செழுமைகள் எங்கும் குழைந்தாட
கொண்டாடு மனமே
கொண்டாடு..

வாழிய காவிரி வாழியவே!..
***

வியாழன், ஜூன் 23, 2022

வாத்தலையம்மன்

    

நாடும் வீடும்
நலம் பெற வேண்டும்
பகையும் பிணியும்
தொலைந்திட வேண்டும்..
***
திருவையாறு கும்பகோணம் சாலையில் 11 கி.மீ. தொலைவிலுள்ள ஆடுதுறை ஸ்ரீ குலை வணங்கு நாதர் கோயிலுக்கும் கூடலூர் ஸ்ரீ ஜகத்ரக்ஷகப் பெருமாள் கோயிலுக்கும் நடுவில் அமைந்துள்ள கோயில்..

ஸ்ரீ ஜகத்ரக்ஷகப் பெருமாள் கோயிலின் கும்பாபிஷேகத்தன்று இக்கோயிலுக்கும் சென்றிருந்தேன்..


தஞ்சை மாவட்டத்தில் காவிரி முதலான ஆறுகளில் இருந்து உள்ளூர் பாசனத்திற்கு என்று பிரியும் கால்வாய்களின் தலைப்பில் காவல் நாயகமாக அம்மன், முனீஸ்வரன், வீரன் ஆகியோர் கோயில் கொள்வதுண்டு..

கால்வாய் தலைப்பு என்பதே வாய்த்தலை - வாத்தலை என, மருவி நிற்கின்றது..


ங்கே 
வாத்தலை அம்மன் எனும் பெயர்.. வாத்தலை நாச்சியார் என்றும் வழங்குவதுண்டு..

தொன்மையான திருமேனி.. லிங்க வடிவ கல்லில் புடைப்புச் சிற்பமாக விளங்குகின்றாள் அம்மன்.. 





சந்நிதியின் இருபுறமும் ஸ்ரீ கணபதியும் கந்தனும்..
கீழ்புறத்தில் ஸ்ரீ மதுரை வீரன்.. மேல்புறத்தில் ஸ்ரீ காமாக்ஷி அம்மன்..



வாத்தலை அம்மனின் கோயிலுக்குப் பின்புறம் காவிரி.. எதிரே பரந்து விரிந்த வயல்வெளி..


காவிரியில் தண்ணீர் வந்து விட்டது.. கழனிகள் காத்திருக்கின்றன..

ஒவ்வொரு நாற்றும் அதன் கதிரும் வாத்தலை அம்மனுக்கே அர்ப்பணம்.. 


இக்கழனியைக் கண்களைப் போல காப்பவளும் அவளே..

களத்தில் கதிர்களைக்கட்டு கட்டாகச்
சேர்ப்பவளும் அவளே..

வாத்தலையாள் வரவேணும்
வாரி எல்லாம் தரவேணும்
பூத்தலையாள் புதுநிலவாய்
பொன்னியுடன் வரவேணும்..

காவிரியாள் கருணையிலே
கழனியதில் நிறை வேணும்
முகத்தலையும் குறைநீக்கி
குளுமைதனைத் தரவேணும்..

காற்றலையும் திசையெல்லாம்
கை கூப்பித் தொழவேணும்
சேற்றினிலே நாற்றுகளில்
செழுங்கதிராய் வரவேணும்..

நோய்களையும் வினைகளையும்
நெருங்காமல் விரட்டி விட்டு
நோய் களையும் தாயே நீ
வளர்கலையாய் வரவேணும்..

களைகளையும் கழித்து விட்டு 
கதிர்முகமாய் வரவேணும்
கதிரவனும் கை கொடுத்து
கதிர் உழக்காய் தரவேணும்

சோறதனில் சுகம் அதுவாய்
நின் அருளே வரவேணும்..
பாரதனில் பசி தீர்க்கும்
பணி அதையே தரவேணும்!..
*
ஓம் சக்தி ஓம் சக்தி
ஓம் சக்தி
ஓம்
***

புதன், ஜூன் 22, 2022

நவநீத சேவை

    

நாடும் வீடும்
நலம் பெற வேண்டும்
பகையும் பிணியும்
தொலைந்திட வேண்டும்..
***
கடந்த ஞாயிறு அன்று தஞ்சை மாநகரில் நிகழ்ந்த கருட சேவைக்குப் பின் திங்கட்கிழமை காலை நவநீத சேவை எனும் வெண்ணெய்த் தாழி உற்சவம்.. இவ்வைபவத்தில் பிரதான கோயில்களான மாமணிக் கோயில்களுடன்
ஏனைய சில கோயில்களும் சேர்ந்து பதினைந்து பல்லக்குகள் நகரில் எழுந்தருளின. 

அந்தக் காட்சிகள் இன்றைய பதிவில்..


























நேற்று மாமணிக் கோயில்கள் மூன்றிலும் தீர்த்த வாரியுடன் கருட சேவைப் பெருவிழா இனிதே நிறைவுற்றது..

இந்நிலையில் 
கருட சேவையை நேரில் தரிசிக்க இயல வில்லையே - என்று நான் வருந்தியிருக்க, தாழியில் இருந்த வெண்ணெயில் கையளவுக்கு பிரசாதமாக அனுப்பி அருள் பொழிந்து இருக்கின்றார் பெருமாள்..

நெஞ்சம் நெகிழ்ந்திருக்கின்றேன்..
*

கல்யாண வரதன் கவலையைத் தீர்க்க
வீரசிங்கம் வினைகளை விலக்க
மாமணிக் குன்றம் மங்கலம் அருள
நீலமேகம் நின்றருள் பொழிகவே!..

ஓம் ஹரி ஓம்
நமோ நாராயணாய..
***

செவ்வாய், ஜூன் 21, 2022

கருடசேவை 2

    

நாடும் வீடும்
நலம் பெற வேண்டும்
பகையும் பிணியும்
தொலைந்திட வேண்டும்..
***
நேற்றைய பதிவின் தொடர்ச்சியாக இன்றும் கருடசேவைக் காட்சிகள்..


ஆதியில் பராசர மகரிஷியும் மார்க்கண்டேயரும் பின்னர் திருமங்கை ஆழ்வாரும் தரிசனம் செய்த கருட வாகனத் திருக்காட்சியை 
ஏறத்தாழ தொண்ணூறு ஆண்டுகளுக்கு முன்பு இங்கே வாழ்ந்த மகான் ஒருவர் கண்ணாரக் கண்டு மகிழ்ந்திருக்கின்றார்.. அவர் பன்னிரண்டு கோயில்களை இணைத்து இவ்விழாவைத் தொடங்கி வைத்ததால் ஸ்ரீ துவாதச கருடாழ்வார் தாசர் எனப்பட்டார்.. அந்த மகான் வகுத்த வழியில் இந்நாளில் இவ்விழா சிறப்பாக நடைபெறுகின்றது..




ஒரே நாளில் இருபத்து நான்கு கருட தரிசனமும் சடாரி சூட்டப்படுவதும் எத்தனை எத்தனை புண்ணியம்!..





நம் நாட்டில் இது போன்ற நிகழ்வு வேறு எங்கும் இல்லை..



தமிழகத்தில் தஞ்சை மாநகரில் தான் இருபத்து நான்கு கருடசேவை எனும் வைபவம் நடைபெற்றுக் கொண்டிருக்கின்றது..

இதன் கீழ் வரும் காட்சிகளை வழங்கியவர் திரு. தஞ்சை விஜய்.. அவர் தமக்கு நெஞ்சார்ந்த நன்றி..








கருட தரிசனம்
ஜன்ம பாவ விமோசனம்..

ஓம் ஹரி ஓம்
நமோ நாராயணாய
***