அறங்கள்

 

நாடும் வீடும்

நலம் பெற வேண்டும்

பகையும் பிணியும்

தொலைந்திட வேண்டும்..

***

இன்று

கார்த்திகை 3

ஞாயிற்றுக்கிழமை

ஐயன் அளந்த இருநாழி நெல் கொண்டு அம்பிகை முப்பத்திரண்டு வகை அறங்களையும் செய்ததாக நமது புராணங்கள் பேசுகின்றன..

காஞ்சியின் ஸ்தல வரலாறு இதுதான்..

அபிராமவல்லியைப் பாடும்போது, 

ஐயன் அளந்தபடி இரு நாழி கொண்டு அண்டம் எல்லாம்

உய்ய அறம் செயும் உன்னையும் போற்றி ஒருவர் தம்பால்

செய்ய பசுந்தமிழ்ப் பாமாலையும் கொண்டு சென்று பொய்யும்

மெய்யும் இயம்பவைத்தாய் இதுவோ உந்தன் மெய்யருளே.. 57

என்றும் 

நீடு உலகங்களுக்கு ஆதாரமாய் நின்று நித்தமாய்

முத்தி வடிவாய் நியமமுடன் முப்பத்து இரண்டு

அறம் வளர்க்கின்ற நீ..

என்றும் அபிராமி பட்டர் போற்றுகின்றார்..

திருஐயாறு மற்றும்

பட்டுக்கோட்டைக்கு அருகில் உள்ள தாமரங்கோட்டை  தலங்களில் அம்பிகையின் திருப்பெயர் அறம் வளர்த்த நாயகி..

என்னுடைய தொகுப்பில் இருந்து முப்பத்திரண்டு வகை அறங்கள்:

(இவற்றுள் பாட பேதங்களும் உள்ளன..)

1) ஆதுலர் சாலை

மருத்துவமனை அமைத்தல்.

2) ஓதுவார்க்கு உணவு 

கல்வி கற்போர்க்கு உணவு.

3) அறுசமயத்தோர்க்கு உணவு

துறவியர்க்கு உணவு.

4) பசுவுக்கு வாயுறை 

வாயில்லா ஜீவன்களைக் காத்தல்.

5) சிறைச் சோறு

சிறையில் இருப்போர்க்கு உணவு அளித்தல்.

6) ஐயம்

பிச்சையெடுத்து உண்போர்க்கு உணவிடுதல்.

7) நடைத் தின்பண்டம் 

வழிநடை செல்வோர்க்கு உண்ணக் கொடுத்தல்.

8) மகச் சோறு

கர்ப்பிணியரைக் காத்தல்.

9) மகப்பெறுவித்தல்

பேறுகாலம் பார்த்தல்.

10) மக வளர்த்தல்

பிள்ளை வளர்த்துக் கொடுத்தல்.

11) மகப் பால் 

தாய்ப்பால் ஊட்டுதல்.

12) அறவைப்பிணஞ்சுடுதல்

ஆதரவற்ற சடலங்களுக்கு கிரியை செய்வித்தல்.

 13) அழிந்தோரை நிறுத்தல் 

நன்றாக இருந்து வீழ்ந்தோர்க்கு உதவுதல்.

14) வண்ணார் சகாயம்

ஏழையர் துணி வெளுக்க உதவுதல்.

15) நாவிதர் கூலி

ஆதரவற்றோர்க்கு முடி திருத்தி உதவுதல்.

16) கன்யாதானம்

ஏழைக் கன்னியர்க்கு திருமணம் செய்வித்தல்.

17) சுண்ணம் 

தாம்பூலம் அளித்தல்.

18) மருந்து

நோய்க்கு மருந்து கொடுத்தல்.

19) காதோலை

ஏழையர்க்கு பூணூல் காதோலை/ வளையல் வழங்குதல்.

20) கண் மருந்து 

கண்ணுக்கு மருந்திடுதல்.

21) கண்ணாடி

கண் சிகிச்சைக்கு உதவுதல்.

22).தலைக்கெண்ணெய்

தலைக்கு எண்ணெய் தேய்த்து சீவி விடுதல்.

23) போகம் அளித்தல்

தம்பதியர்க்கிடையே சச்சரவு நீக்கி வைத்தல்.

24) அன்னதானம்

நாளும் வழிச்செல்வோர்க்கு அன்னம் வழங்குதல்.

25) பிறரறங் காத்தல் 

பிறரது அறத்தினை காத்து நிற்றல்.

26) தண்ணீர்ப் பந்தல்

கோடையில் தண்ணீர்ப் பந்தல் அமைத்தல்.

27) மடம் 

வழிச் செல்வோர் தங்கும் இடம் அமைத்தல்.

28) குளம்

குளம் அமைத்து பராமரித்தல்.

29) சோலை

கோயில்களில் நந்தவனம்

அமைத்தல்.

30) ஆ உரிஞ்சு கல்

விலங்குகள் உரசிக் கொள்வதற்கு மந்தையில்

கல் நிறுவுதல்.

31) ஏறு விடுத்தல் 

மந்தைக்கு காளை வாங்கிக் கொடுத்தல்.

32) உயிர்மீட்டல்

கொலைக் களத்தில் விலை கொடுத்து  உயிர்களை மீட்டளித்தல்..

யாவர்க்கும் ஆகிய அறங்கள்

யாவர்க்குமாம் இறைவற்கொரு பச்சிலை 

யாவர்க்குமாம் பசுவுக்கொரு வாயுறை 

யாவர்க்குமாம் உண்ணும்போது ஒரு கைப்பிடி

யாவர்க்குமாம் பிறர்க்கு இன்னுரை தானே..

-: திருமூலர் :-

 

ஒல்லும் வகையான் அறவினை ஓவாதே 

செல்லும்வாய் எல்லாஞ் செயல்..

**

 

ஓம் சிவாய 

சிவாய திருச்சிற்றம்பலம்

***