ஆதுரசாலை

    

நாடும் வீடும்

நலம் பெற வேண்டும்

பகையும் பிணியும்

தொலைந்திட வேண்டும்..

***

இன்று

ஐப்பசி 22

புதன்கிழமை

இணையத்தில்

சேகரிக்கப்பட்ட செய்திகளுடன்..

நன்றி - விக்கி.

 

ஸ்ரீ ராஜராஜ சோழரின் தமக்கையான குந்தவை நாச்சியார் மிகச்சிறந்த ஆளுமை உடையவர்.. சோழப் பேரரசின் அடையாளமாகத் திகழ்ந்த மாதரசி..

நற்குணவதியாகிய இவர் - தனது தந்தை சுந்தர சோழர் பெயரில் தஞ்சையில் ஆதுர சாலை எனப்பட்ட மருத்துவ மனை 

ஒன்றை அமைத்திருக்கின்றார்..

மேலும், பற்பல அறங்களையும் செய்திருக்கின்றார்.. 

இதற்கான சான்றுகள் தஞ்சை கோயிலிலும் தாராசுரம் கோயிலிலும் கல்வெட்டுகளாக இருக்கின்றன..

அதன் வழியே -

தஞ்சையின் பெருமைமிகு  அடையாளமாக - இன்றளவும் சிறப்புடன் திகழ்கின்ற - ராஜா மிராசுதார் அரசு மருத்துவமனை குறித்த தகவல்களுடன் இன்றைய பதிவு..

தஞ்சை நகரின் மத்தியில்  அமைந்துள்ள  இந்த மருத்துவமனை 1876 ​​ல்  நிறுவப்பட்டது.. 

இந்த மருத்துவ மனைக்கான 

முந்தைய வரலாறு சிறப்புடையதாகும்..

இசை, கலை, கல்வி மற்றும் இலக்கியம் ஆகியவற்றில் வல்லுநராக இருந்த 

மன்னர் சரபோஜி - II மருத்துவத்திலும் மிகுந்த ஆர்வம் கொண்டிருந்தார்.

இவரது நிர்வாகத்தில்

தஞ்சை அரண்மனைக்குள் தன்வந்திரி ஆரோக்கிய சாலை  - என்ற பெயருடன் மருத்துவமனை ஒன்று நாட்டு மக்களுக்காக  இருந்திருக்கின்றது..

சித்தா, ஆயுர்வேதம் மற்றும் யுனானி ஆகியவற்றை ஆதரித்த இவர் 1810 ல் தஞ்சையில் மேற்கத்திய மருத்துவ முறையை அறிமுகம் செய்தார்..

1827 ல் நவ வைத்திய கலாநிதி சாலையைத் தொடங்கினார். 

அரசருடைய மருத்துவ மையமாகிய தன்வந்திரி ஆரோக்கிய சாலை  - மருத்துவ ஆராய்ச்சி மையமாகவும் செயல்பட்டிருக்கிறது.

சரஸ்வதி மஹால் நூலகப் பதிவுகளின்படி, 1828 ல், அந்த மருத்துவ மனையில் - கண்புரை  அறுவை சிகிச்சை  செய்யப்பட்டிருக்கின்றது.. சிகிச்சைக்குப் பின் சிறந்த உணவுடன்

நேரடி கவனிப்பும் இருந்திருக்கின்றது.. சிகிச்சை முடிந்து வீட்டுக்குத் திரும்பும் போது பொருள் உதவியும் செய்யப் பட்டிருக்கின்றது..

மன்னரின் காலத்திற்குப் பிறகு, ஆரோக்ய சாலையின் சேவைகளை இளவரசி காமாட்சி அம்பா பாய் சாஹேப் அவர்கள் (ஐம்பது ஆண்டுகள்) நடத்தியிருக்கிறார்..

தனது குடிமக்களின் நலன் மற்றும் நாட்டின் நலனுக்காக - என்று  பெரிய கோயிலுக்கு எதிரில் 40 ஏக்கர் நிலத்தை வழங்கி 30,000 பணத்தையும் இளவரசி கொடை அளித்தார்..

அத்துடன்,

திருப்பனந்தாள் ஸ்ரீ காசி மடத்தின் ஆதீனகர்த்தர் மற்றும் தஞ்சையின் மிராசுதாரர்கள் - 

திரு பூண்டி வீரையா வாண்டையார், திரு கபிஸ்தலம் துரைசாமி மூப்பனார், திரு பொறையார் தவசிமுத்து நாடார் ஆகியோரும் பொருளுதவி செய்தனர்..

இதனாலேயே இந்த மருத்துவமனைக்கு - ராஜா மிராசுதார் மருத்துவமனை -  என்ற பெயர் அமைந்தது..

காமாட்சி அம்பா பாய் சாஹேப் அவர்களுக்குப் பிறகு அரண்மனையின் ஆரோக்கிய சாலைக்கு என்ன ஆயிற்றோ தெரியவில்லை..

1875 ல் இந்தியாவிற்கு வருகை தந்த வேல்ஸ் இளவரசர் - ஏழாம் எட்வர்ட் - தஞ்சாவூர், மதுரை, ராயபுரம் (சென்னை) நாக்பூர்,  விசாகப்பட்டினம் மற்றும் கோழிக்கோடு உட்பட ஆறு நகரங்களில் மருத்துவப் படிப்பை 'Licentiate Medical Practioner' (LMP) தொடங்குவதற்கு உத்தரவு இட்டதன்படி, தஞ்சையில் பிரின்ஸ் ஆஃப் வேல்ஸ் (LMP) மருத்துவப்பள்ளி செயல்படத் தொடங்கியது..

1879 ல் சர் சல்லிவன் தாமஸ், மருத்துவ மனை வளாகத்தில் புதிய கட்டிடங்கள் மற்றும் அவசர,  அறுவை சிகிச்சை கூடங்களைக் கட்டினார்..

தாமஸ் ஹால்

இன்றும் அவசர சிகிச்சை பிரிவுக்கு 'தாமஸ் ஹால்' என்றே  பெயர்..

1919 ல் மருத்துவ மனை வளாகத்தின் கிழக்குப் பகுதியில் - கண் சிகிச்சைப் பிரிவுக்கான அடிக்கல்லை  நீதிபதி EH வாலஸ், ICS நாட்டினார்.. அதன்பின் 1926 ல் திறக்கப்பட்டது.. 

மருத்துவமனை வளாகத்தில் (RMH) உள்ள கண் மருத்துவ பிரிவு நூறு ஆண்டுகளைக் கடந்த பெருமை உடையது..

மேலே உள்ள கட்டிடங்கள் பழைமையானவை..

தற்போது மண்டல கண் சிகிச்சைப் பிரிவு நவீன வசதிகளுடன் புதிய கட்டிடத்தில் சிறப்புடன் இயங்கி வருகின்றது..

மூன்று புறங்களிலும் இருந்த பெரிய பெரிய இரும்புக் கதவுகள் கால சூழ்நிலையில் மாறிவிட்டன.. சிரத்தையுடன் கட்டப்பட்டிருந்த பழைமையான கட்டிடங்களும் நவீனம் என்ற பெயரில் மாற்றப்பட்டு விட்டன..

நாற்பது வருடங்களுக்கு முன் கட்டப்பட்ட குந்தவை நாச்சியார் மகப்பேறு பிரிவு - மேலும் சில வசதிகளுடன் இயங்கிக் கொண்டு இருக்கின்றது..

தற்போது 

ராஜா மிராசுதார் மருத்துவ மனை தஞ்சை மருத்துவக் கல்லூரியின் ஒரு பகுதியாக விளங்குகின்றது..

தஞ்சை மருத்துவமனை வளாகத்தில் - சில காட்சிகள்..

படங்கள்: தஞ்சையம்பதி..

புதிதாக ஸ்ரீ சாயி

மேல் திசையில் பிரம்மாண்டமான ஆலமரம்..

நூற்றைம்பது ஆண்டுகளுக்கு மேற்பட்ட இந்த ஆலமரத்தடியில் ஸ்ரீ முனீஸ்வரர் விளங்குகின்றார்..

வேண்டுதலின் பேரில் நடப்பட்ட திரிசூலங்கள் நூற்றுக்கணக்கில்!.. 

சுகப் பிரசவத்துக்காக 

வளையல் மாலைகள்!..

வெள்ளையர் காலத்திற்கு முன்பிருந்தே இங்கு முனி ஐயா இருப்பதாக

நம்பிக்கை..

அறுபது ஆண்டுகளுக்குப் 

பின் அன்றைக்குத் தான் சென்று வணங்கினேன்..

கிழக்கிந்தியக் கம்பெனி வருவதற்கு முன்பே இங்கிருந்த  அரண்மனை தன்வந்திரி ஆரோக்கிய சாலையின் விரிவாக்கமே இன்றைய மருத்துவ மனை..

இத்தனைக்கும் அடிப்படை ஆதாரமான ராணி காமாட்சி அம்பா சாஹேப் அவர்களது பெயர் எங்கேயாவது விளங்குகின்றதா?.. 

என்றால் -

தெரியவில்லை!..

நாம் தான் செந்தமிழர்கள் ஆயிற்றே!..

வாழ்க நலம்

***