பூம்புகார் 5

சிலப்பதிகாரக் கலைக்கூடத்தைப் பார்த்தாகி விட்டது...

மற்ற இடங்களைக் காட்டிலும்
கலைக்கூட வளாகம் சுத்தமாக இருக்கின்றது..

இருந்தாலும் இன்னும் பிரகாசமான விளக்குகளைப் பொருத்துவது நல்லது...

சிற்பப் பலகைகளுக்குக் கீழாக
அதன் விவரங்களை எழுதி வைத்திருக்கின்றார்கள்..

ஆனாலும் அவை அழிந்தும் அழிக்கப்பட்டும் இருக்கின்றது...

சென்றைய பதிவில் - ஸ்ரீமதி கோமதி அரசு அவர்கள்
பூம்புகார் நகரின் மாதிரி வடிவமைப்பு இருக்குமே!..
அதைப் பார்த்தீர்களா?..  - என்று கேட்டிருந்தார்கள்...

அப்படி ஒன்றினைப் பார்த்ததாக நினைவில்லை...

அதேபோல - முனைவர் திரு ஜம்புலிங்கம் ஐயா அவர்கள்
அங்கிருக்கும் புத்த விஹாரைப் பார்த்தீர்களா?.. - என்று கேட்டிருந்தார்கள்...

அந்த விவரம் இப்போது தான் அறிகிறேன்...
புத்த விஹாரைக் குறித்த வழிகாட்டிப் பலகையை கவனித்ததாக நினைவு இல்லை...

இன்னும் சதுக்கப் பூதத்தின் சிலை கூட இருக்கிறது என்கிறார்கள்...

இன்றைய பதிவில்
கலைக்கூடத்தில் எடுக்கப்பட்ட படங்கள் தொடர்கின்றன...

சேரன் செங்குட்டுவனின் வடதிசைப் படையெடுப்பு

கங்கைக் கரையில் பாடி வீடு 

கனக விசயரின் முடித்தலை நெறித்து..

பத்தினிக் கோட்டத்தில் கண்ணகி தேவி 

கலைக்கூடத்தின் நடு முற்றத்தில் புல்வெளிக்கு நடுவே கண்ணகிக்கும் மாதவிக்கும் ஆளுயர சிலை அமைக்கப்பட்டுள்ளது..

கலைக்கூடத்தின் வெளியே
இருபுறமும் கரிகால் சோழனுக்கும் இளங்கோவடிகளுக்கும்
சிலை வடிக்கப்பட்டுள்ளது...

ஆனால் பராமரிப்பு தான் இல்லை...

கரிகாற்சோழன் 

இளங்கோவடிகள்  

அப்படி இப்படி பிரச்னைகள் இருந்தாலும்
கலைக்கூடத்தை விட்டு வெளியே வரும்போது
பெருமிதமாகத் தான் இருந்தது...

எப்படியெல்லாமோ சிறப்புற்றிருக்க வேண்டிய
பூம்புகார் கலைக்கூட வளாகங்கள்
அரசியல் காழ்ப்புணர்ச்சியால் அழகு குன்றியிருக்கின்றன...

இனி திருவெண்காடு செல்லவேண்டும்...
பேருந்து நிலையத்தை நோக்கி நடந்தோம்..

கடற்கரை ஓரமாக அசைவப் பிரியர்களுக்கு
சுடச்சுட மீன் வகைகள் கிடைக்கின்றன...

நம்மை மாதிரி அப்பாவிகளுக்கு
ஒரு சில குளிர்பானக் கடைகள் மட்டுமே...

விடுமுறை நாட்களில்
மட்டுமே பலவகையான கடைகள் அமைக்கப்படுகின்றன...

சாலையின் அந்தப் பக்கம் - சிவனே!... - என்று காவல் நிலையம்!...

மயிலாடுதுறைக்குச் செல்லும் பேருந்து புறப்பட்டது..
அதில் ஏறி இரண்டு கிமீ., தொலைவில் மேலையூர் பிரிவு சாலையில் இறங்கிக் கொண்டோம்..

அங்கிருந்து திருவெண்காட்டுக்குப் பயணப்பட வேண்டும்...

பேருந்துக்காக காத்திருந்த இடத்திலிருந்து -
சாலையின் தென்புறமாக ஒரு கோயில்...

அது பத்தினிக் கோட்டம்.. கண்ணகியின் கோயில்...

வெள்ளி செவ்வாய்க் கிழமைகளில் திறக்கப்படுவதாக செய்தி...

ஸ்ரீ கண்ணகி தேவி - மேலையூர் - பூம்புகார்  

ஆடி மாதத்தின் அனுஷ நட்சத்திரத்தை
கண்ணகி வீடு பேறடைந்த நாளாகக் கொண்டு விசேஷங்கள் நிகழ்கின்றன...

மதுரை ஸ்ரீ செல்லத்தம்மன் - கண்ணகி 

இன்னொரு சமயம் இங்கு சில நாட்கள் தங்கியாவது எல்லா இடங்களையும் காண வேண்டும் என்று நினைத்துக் கொண்ட வேளையில் -

திருவெண்காடு செல்வதற்கான பேருந்து வந்து நின்றது...

எல்லாரையும் நல்வழிப்படுத்துக தாயே!.. - என்று வணங்கியபடியே
திருவெண்காட்டிற்குப் புறப்பட்டோம்...

கற்புக்கரசியே போற்றி.. போற்றி..

காளீம் ஸ்ரீகண்ணகீம் நமாமி

ஃஃஃ

பூம்புகார் 4

இப்போது நாம் சிலப்பதிகாரக் கலைக்கூடத்தினுள்
சுற்றிக் கொண்டிருக்கின்றோம்...

சாம்பல் நிறம் பூசப்பட்ட தாழ்வாரம்... மங்கலான வெளிச்சம்..

கரு நிற சிற்பத் தொகுப்பு... எல்லாவற்றுக்கும் மேலாக அழிந்து போன - அழிக்கப்பட்ட விவரக்குறிப்புகள்...

விளக்குகள் வரிசையாகப் பொருத்தப்பட்டிருந்தாலும் அவற்றுள்
ஒளிர்பவை - ஒரு சில தான்...

மாலைச் சூரியனின் கதிர்களால் எதிர்புறத்தில் மட்டும் கொஞ்சம் வெளிச்சம்..

வடக்கு நோக்கிய கட்டடம் அல்லவா.. தெற்கு மற்றும் மேல்புற தாழ்வாரங்களில் போதிய வெளிச்சம் இல்லை...

மாலை மயங்கி இருள் கவிந்து விட்டால் -
போதிய வெளிச்சம் இல்லாத நிலையில்
உட்புறத்தின் நிலைமையைக்
கொஞ்சம் எண்ணிப் பார்த்துக் கொள்ளுங்கள்...

கொஞ்சம் நிம்மதியான விஷயம் என்னெவெனில் -
கலைக்கூடத் தாழ்வாரங்கள் சுத்தமாக இருக்கின்றன...

கலைக்கூடப் பணியாளர்கள் சுற்றி வருவதால் -
கலைக்கூடத்தின் உள்ளே புகுந்து
சேட்டைகள் புரிவார் - யாருமில்லை!...

இதோ மீண்டும் சிற்ப வரிசைக்குள் -

கானல் வரி பாடும் கோவலன்

திங்கள் மாலை வெண்குடையான் சென்னி செங்கோல் அதுஓச்சி

கங்கை தன்னைப் புணர்ந்தாலும் புலவாய் வாழி காவேரி..

கங்கை தன்னைப் புணர்ந்தாலும் புலவா தொழிதல் கயற் கண்ணாய்

மங்கை மாதர் பெருங்கற்பு என்றறிந்தேன் வாழி காவேரி.. 

கானல் வரி பாடும் மாதவி 

மருங்கு வண்டு சிறந்தார்ப்ப மணிப்பூ ஆடை அதுபோர்த்துக்

கருங்கயல் கண் விழித்து ஒல்கி நடந்தாய் வாழி காவேரி..

கருங்கயல்கண் விழித்து ஒல்கி நடந்த எல்லாம் நின் கணவன்

திருந்து செங்கோல் வளையாமை அறிந்தேன் வாழி காவேரி..

கோவலனின் பிரிவு  

கண்ணகியைச் சேர்ந்த கோவலன்

கவுந்தியடிகளுடன் பூம்புகாரை விட்டு நீங்குதல் 

வாழ்க்கை எனும் ஓடம்.. வழங்குகின்ற பாடம்.. 

 ஆயர் குல மகள் மாதரியின் மனையில் அடைக்கலம் 

மதுரையில் மனை மங்கலம் 

சீறடிச் சிலம்பில் ஒன்று கொளல் 

கள்ள மனங்கொண்ட கைக்கோல் கொல்லனைக் கண்டனன் கோவலன்  

கலைக்கூடத்தின் எல்லா சிற்பப் படிவங்களையும் நான் படம் எடுக்க வில்லை என்று இப்போது எனக்குத் தோன்றுகின்றது...

தேறா மன்னா.. செப்புவதுடையேன்... 

மலை வளங்காண வந்த செங்குட்டுவன்  

சிற்பத் தொகுப்பை இயன்ற வரை வழங்கியிருக்கிறேன்..

ஏறத்தாழ 50 சிற்பப் பதிவுகள் என்று அங்கே கண்டதாக நினைவு... அத்தனையையும் படம் எடுக்கவில்லைதான்..

அங்கே இருந்த சூழல் அப்படி..

இன்றைய பதிவிலுள்ள படங்கள்

தங்களைக் கவர்ந்திருக்கும் என நம்புகிறேன்..

நேற்று நள்ளிரவு இரண்டு மணிக்கு விழித்து பதிவை ஒழுங்கு செய்தும் இந்தப் பதிவினை வெளியிடுவதில் தாமதம் ஆகி விட்டது..

அதுவுமில்லாமல் கோவலன் வீழ்வதை

நேற்று வெளியிட மனமில்லை...

தொடரும் பதிவில் மேலும் சில படங்களைக் காணலாம்...

வாழ்க நலம் 

ஃஃஃ

பூம்புகார் 3

ஒருவழியாக மாலை நாலு மணிக்கு மேல் சிலப்பதிகாரக்கூடம் திறக்கப்பட்டது...

அதற்கு அனுமதிச் சீட்டு கட்டணத்துடன்...
இந்தப் பாவை மன்ற வளாகத்தில் வாசலில் இருந்த
அலுவலகத்தில் கொடுக்கப்பட்டது...

அனுமதிக் கட்டணம் எவ்வளவு என்பது மறந்து போயிற்று..

கொஞ்சம் சுத்தமாக இருந்தது அந்தப் பூங்கா...
பசுமையான குரோட்டன்ஸ் வகைச் செடிகள்...
ஒரு சில வாதநாராயண மரங்கள்...
அவ்வளவே...

பூங்காவின் அந்தப் பக்கம் கரிகால் சோழன் சிலை..
இந்தப் பக்கம் இளங்கோவடிகள் சிலை...

அந்தக் காலத்திலேயே
பூம்புகாரில் எழுநிலை மாடம் இருந்ததாக வரலாறு..

அதன் நினைவாக இந்தக் கலைக்கூடம்..
ஆனால் ஐந்து மாடங்கள் தான்!...

கேமரா மற்றும் அலைபேசி வகையறாக்களுக்கு தடையில்லை...

வாருங்கள் - கலைக்கூடத்திற்கு...

உள்ளே நுழைந்ததும் பழங்காலத்து இசைக் கருவிகள்
மற்றும் சில தொன்மையான பொருட்கள் காணக் கிடைக்கின்றன...

படிந்திருக்கும் புழுதி கூட அகற்றப்படவில்லை///
காரணம் அவை பழைமையானவைகளாம்!..

நடுமுற்றத்துடன் கூடிய சதுரமான அமைப்பு...
சுவற்றில் சிலப்பதிகார நிகழ்வுகள் காட்சிப்படுத்தப் பட்டுள்ளன...

பூம்புகாரின் காட்சிகள்  

ஒவ்வொரு சிற்பத் தொகுப்பின் கீழும்
அதன் விளக்கத்தை எழுதியிருக்கின்றார்கள்...

அவற்றில் வண்ணம் உதிர்ந்தவை சில...
எழுத்துக்களின் மீது கிறுக்கி அழிக்கப்பட்டவை பல...

அங்காடித் தெரு 

கோவலன் கண்ணகி திருமணம்

மாசறு பொன்னே.. வலம்புரி முத்தே.. 

மாசறு பொன்னே.. வலம்புரி முத்தே..

காசறு விரையே.. கரும்பே.. தேனே..

அரும்பெறல் பாவாய்.. ஆருயிர் மருந்தே..

பெருங்குடி வணிகன் பெருமட மகளே

மலையிடைப் பிறவா மணியே என்கோ..

அலையிடைப் பிறவா அமிழ்தே என்கோ!..

யாழிடைப் பிறவா இசையே என்கோ..

தாழிருங் கூந்தல் தையால் நின்னை!...

-: மனையறக் காதை :-

இந்திர விழா அறிவிப்பு  

மாதவிப் பொன்மயிலாள் தோகை விரித்தாள் 

மாதவி மனையில் கோவலன் 

கோவலன் தன்னொடும் கொள்கையின் இருந்தனள்

மாமலர் நெடுங்கண் மாதவி தான்..

-: கடலாடு காதை :-

ஒரு சில சிற்பங்கள் தெள்ளத் தெளிவாக விளங்குகின்றன...
இருந்தாலும் ஏனைய சில காட்சிகள் புரியவில்லை...

அதனால் தான் எல்லாவற்றுக்கும் என்னால் விளக்கம் அளிக்க இயலவில்லை..

ஆகவே படங்களைப் பார்த்து உணர்ந்து கொள்க...

படங்கள் எல்லாம் தங்களைக் கவர்ந்திருக்கும் என நம்புகிறேன்...

மேலதிக படங்கள் அடுத்த பதிவினில்!...

வாழ்க நலம்

ஃஃஃ

பூம்புகார் 2

பூம்புகாரில் பாவை மன்றத்தைச் சுற்றி நிகழ்த்தப்படும்
அவலங்களைக் கண்டும் நிர்வாகம் - அவற்றை ஒழுங்கு படுத்த முனையவில்லையே அது ஏன்?...

தெரியவில்லை...
ஆனாலும் நிலவும் சூழ்நிலை அசாதாரணமானது..

பாவை மன்றத்திற்கு முன்னதாக சில படங்கள்...

கலைஞர் அவர்களால் அமைக்கப்பட்ட கண்ணகி தேவி

கண்ணகி சிலை பற்றி இணையத்தில் தேடியபோது கிடைத்த படம் தான் மேலே உள்ளது...

இதனை வலையேற்றியவர் திருமதி தேனம்மை லக்ஷ்மணன்..
அவர் தமக்கு மனமார்ந்த நன்றி....

கடல் அரிப்பின் காரணமாக பழைய இடத்திலிருந்து சிலையை நகர்த்தி வைத்திருக்கின்றார்களாம்...

வைத்தது தான் வைத்தார்கள் - மண்டபம் ஒன்றினை எழுப்பி
அதனுள் கண்ணகி சிலையை வைத்திருக்கக் கூடாதோ?...

கண்ணகிக்கு எதிரே நீலத் திரைக் கடல்...

எதனாலோ நிம்மதி இல்லாமல் ஆர்ப்பரித்துக் கொண்டிருக்கின்றது...
நெடுங்கரையை அலைக் கரங்களால் அரித்துக் கொண்டிருக்கின்றது...

பாவை மன்றத்தின் சூழ்நிலையைப் பற்றி
சென்ற பதிவிலே சொல்லியிருக்கிறேன்...

மிக அருமையான கலைக்கூடம்...
சுற்றிலும் குளிர் நிழல் பரப்பும் குடைகளாய் மரங்கள்..

ஆயினும் பராமரிப்பின்றி பாழ்பட்டுக் கிடக்கின்றது...

நம்மைப் போல வெளியூர்களிலிருந்து வந்தவர்கள்
ஆங்காங்கே அமர்ந்து உணவருந்திக் கொண்டிருந்தார்கள்..

ஆனாலும் அவர்களைப் பற்றிக் கவலை கொள்ளாமல்
கலி புருஷன் தனது கைவரிகையைக் காட்டிக் கொண்டிருந்தான்...

பாவை மன்றமா அல்லது பாவ மன்றமா தெரியவில்லை!...

இதோ தங்களுக்காக பாவை மன்ற சிற்பங்களின் படங்கள்...

ஒவ்வொரு சிற்பத்திற்குக் கீழும் திருக்குறள் ஒன்றினை எழுதி வைத்திருக்கின்றார்கள்..

அதனை ஒட்டி தமது சேட்டைகளைக் காட்டியிருக்கின்றார்கள் பலர்..

எனவே அவற்றைப் படம் எடுக்க வில்லை...

நான் கவனித்த வரைக்கும் -இந்த சிற்பங்கள்

இதுவரைக்கும் யாராலும் சேதப்படுத்தப் படாமல் இருக்கின்றன...

இனி வருங்காலம் எப்படியோ!...

இந்த சிற்பங்கள் எல்லாம்
கண்ணகியையோ மாதவியையோ குறிப்பவை அல்ல...

ஆதலால் கலை வளர்த்த நங்கையராகக் கொள்ளலாம்...

பாவை மன்றத்துடன் ஏனைய இடங்களையும் சீரமைத்து

மீண்டும் பழைய பொலிவுடன் விளங்கச் செய்வதற்கு

இன்னும் எத்தனை காலம் ஆகுமோ?...

தெரியவில்லை...

புகார்க் காண்டம்
நன்னீர்ப் பொய்கையின் அழகு..

அன்ன மென்னடை நன்னீர்ப் பொய்கை

ஆம்பல் நாறுந் தேம்பொதி நறுவிரைத்

தாமரைச் செவ்வாய்த் தண்ணறற் கூந்தல்

பாண்வாய் வண்டு நோதிறம் பாடக்

காண்வரு குவளைக் கண்மலர் விழிப்ப...

-: இளங்கோவடிகள் :-

தொடரும் பதிவினில்

சிலப்பதிகாரக் கலைக் கூடத்தின் 

அழகினைக் காணலாம்...
***

இன்று உழைப்பாளர் தினம்...

உழைப்பவர் கைகளாலேயே
உலகம் உயிர் பெறுகின்றது...
உயிர் பெறும் அதனாலேயே
புகழ் பெறுகின்றது..

அனைவருக்கும்
அன்பின் இனிய நல்வாழ்த்துகள்...

வாழ்க நலம்

ஃஃஃ