நல்வாழ்த்துகள்..

அக்கா.. அக்காவ்!..

வாம்மா.. தாமரை.. வா.. எப்படியிருக்கே?..

நல்லாயிருக்கேன்.. அக்கா!.. மாமாவுக்குத் தான் ரெண்டு நாளா ஜூரம்.. நல்லவேளை சாதாரண காய்ச்சல் தான்!..

என்னமோ..ம்மா.. எல்லாரும் நல்லபடியா இருக்கணும்... வீட்டுக்கு வீடு கஷ்டம்.. வருத்தம்...சோதனை .. ன்னா மனசு ரொம்பவும் கஷ்டப்படுது...

அக்கா.. நேத்து கூட டெங்கு காய்ச்சல்..ல இருந்து தப்பிக்கிறதுக்கு பொது சுகாதார வழிமுறைகள்..ன்னு ஒரு கையேடு கொடுத்துருக்காங்க.. பக்கத்து வீட்டுப் பையன் வாங்கி வந்திருந்தான்.. கூடவே நிலவேம்பு பொடியும் கொடுத்தாங்களாம்..

யாரு கொடுத்தாங்களாம்!..

ஏதோ சிவனடியார் திருக்கூட்டம்..ன்னு போட்டிருந்தது.. அத்தோட அப்பர் பாடுனது.. அவரு பாடுனது.. இவரு பாடுனது..ன்னு தேவாரப் பாட்டு எல்லாம் அச்சடிச்சு கொடுத்திருக்காங்க... இதப் பாடினா ஜூரம் ஓடிப் போய்டும்..ன்னு வேற சொல்லியிருக்காங்க...

நல்லது தானே!..

என்னா நல்லது?.. ஊர் தீப்புடிச்சி எரிஞ்சப்போ யாரோ ஒரு ராஜா தில்லானா வாசிச்சானாம்.. அந்த மாதிரி.. எங்கே பார்த்தாலும் கொடுமையா விஷக் காய்ச்சல் ஜூரம் ..ன்னு இருக்கிறப்போ தேவாரம் பாடுங்க... திருநீறு பூசுங்க..ன்னா என்னக்கா அர்த்தம்.. முட்டாள் தனமா இருக்கா.. இல்லையா!...

இதுல.. என்னம்மா முட்டாள் தனம் இருக்கு?..

ஜூரம் வந்துட்டா கோயிலுக்குப் போறதா?.. டாக்டர்..கிட்ட போறதா?..

கோயிலுக்குப் போறது மனசு நல்லாயிருக்கணும் ..ங்கறதுக்கு..
ஆஸ்பத்திரிக்குப் போறது உடம்பு நல்லாயிருக்கணும் ..ங்கறதுக்கு...

அந்த டாக்டர்களே தெய்வத்தை நம்புறப்போ -
நாம தெய்வத்துக்கிட்ட நம்பிக்கை வைக்கிறதுல என்ன தப்பு?..

அதுக்காக வியாதி எல்லாம் கோயிலுக்குப் போறதுனாலயும் தேவாரம் பாடுறதுனாலயும் விலகிப் போகும்...ன்னு சொன்னால்..

அலைச்சல் மிச்சம்.. உளைச்சல் மிச்சம்...

என்னக்கா... எதுகை மோனையா?..

இல்லடா.. தாமரை.. இன்றைக்கு மருத்துவம் என்ன நிலைல இருக்கு..ன்னு நான் சொல்லி நீ தெரிஞ்சிக்க வேண்டியதில்லை.. சமீபத்தில தவறான சிகிச்சையால கர்ப்பிணி ஒருத்திக்கு கரு கலைஞ்சதோட அதிக வீரியமான மருந்தினால குடல் பகுதியும் அழுகிப் போனதாக செய்தியெல்லாம் வந்ததே!..

அதனால???..

கோயிலுக்குப் போகணும்..ன்னு சிரத்தையா இருக்கிறவங்க தன்னை சுத்தமா வெச்சுக்குவாங்க... தன்னுடைய இருப்பிடத்தை சுத்தமா வெச்சுக்குவாங்க...

அதுக்கும் இதுக்கும் என்னக்கா சம்பந்தம்!?..

இருக்குதே!..

என்ன அது?...

ஆறு குளம் குட்டை - இதெல்லாத்தையும் அழிக்க மாட்டாங்க.. இயற்கையை காப்பாத்துறதுல ஆர்வமா இருப்பாங்க!.. 
நீ தட்டான் பூச்சி பார்த்திருக்கியா!..

ஓ!..

அந்தத் தட்டான் ஒரு நாளைக்கு பல நூறு கொசுக்களை குளங்குட்டைகள்..ல ஒழிச்சுக் கட்டிடுதாம்.. 

கொசு முட்டையிட்டா அதுகளையெல்லாம் அந்தத் தண்ணியில கிடக்கிற தவளைகள் தின்னு தீர்த்துடுதாம்...

அட!..

என்ன ஆச்சர்யமா இருக்கா!.. ஈக்குருவி...ன்னு ஒன்னு.. கோடியக்கரை பட்டுக்கோட்டை பக்கமெல்லாம் நான் பார்த்திருக்கிறேன்.. 

Fly Catcher

ஆனா அதுங்க.. இப்போ இல்லை.. சிட்டுக் குருவிய மாதிரி.. காணாமப் போயிடுச்சுங்க!..

அதென்ன அக்கா ஈக்குருவி?..

Fly Catcher.. ன்னு ஆங்கிலப் பெயர்.. ஈ கொசு மாதிரியான சின்ன சின்ன பூச்சிகளைக் காலி பண்றது தான் இதுங்களுக்கு வேலை...

Fly Catcher - India

கரிச்சாங்குருவி மாதிரி .. ஆனா செந்தூர நிறமா இருக்கும்.. வால் நீளமா இருக்கும்... அப்போ இதுங்களைப் பற்றி அதிகமா தெரியலை.. இப்போ கூகிள் வழியா தெரிஞ்சுகிட்டேன்.. வட இந்தியாவுல பலவகையா நெறைய இருக்குதாம்.. மத்தியப் பிரதேசத்தின் மாநிலப் பறவையாம் இது.. இலங்கையிலும் காணப்படுதாம் இந்தப் பறவை..

இந்த சேதியெல்லாம் எனக்கு புதுசு அக்கா!..

இந்தப் பறவைகளுக்கு மரங்கள் அடர்த்தியான பகுதி தான் வாழ்விடங்கள்.. ஆனா நமக்குத் தான் மரங்களைக் கண்டாலே பிடிக்காதே...

..... ..... ..... .....!..

இயற்கையில ஒன்னுக்கொன்னு தொடர்பிருக்கு.. அதை மனித சமூகம் தான் உடைச்சது... அதனோட பலனைத் தான் இப்போ அனுபவிக்கிறது..

பக்தியினால மனம் சுத்தமானது.. சுற்றுச் சூழல் பத்திரமானது.. எங்காவது ஒரு சில தவறு நடந்திருக்கலாம்... அதுக்காக கோயிலாவது குளமாவது.. ன்னு குற்றம் சொல்லக் கூடாது...

பகுத்தறிவு ..ன்னு வந்ததுக்கு அப்புறம் தான் ஆறு குளம் காடு மலை எல்லாமே காணாமப் போனது!..

நம்ம மக்களையும் சும்மா சொல்லக் கூடாது.. 
கோயிலுக்குப் போனா அங்கே அசுத்தம் பண்றது தான் முதல் வேலை..

கோயில் குளத்து...ல ஈரத்துணிகளை போட்டு வர்றது... 
கொய்யாப் பழத்துல விளக்கேத்துறேன்.. கொடுக்காப் புளியில விளக்கேத்துறேன்... ன்னு சுற்றுப் புறத்தைக் கெடுக்கிறது...

கோயில்..ல உட்கார்ந்து கண்டதையும் தின்னுட்டு அங்கேயே போட்டுட்டு வர்றது..

இப்படியெல்லாம் பண்றதுனாலே மத்தவங்களுக்கும் இடைஞ்சல்...ங்கறதை கொஞ்சமும் உணர்ந்துகிறதே இல்லை...

வீட்டு வாசல்..ல முருங்கை மரம்.. அது பக்கத்து வீட்டுப் பக்கம் வளைஞ்சா சண்டை வராது.. ஏன்னா - முருங்கைக் காய்!.. ஆனா, அதுவே வேப்ப மரமா இருந்தா சண்டை..  உடனே மரத்தை வெட்டுங்க.. இலை எல்லாம் விழுந்து ஒரே குப்பை.. ன்னு!...

..... ..... ..... .....!..

ஆனா வேப்பஞ்சருகுகளை கொளுத்தி விட்டா அந்தப் புகையில கொசு ஈ எல்லாம் ஒழிஞ்சு போகுது... வேப்ப மரங்களே காணாமப் போன பிறகு வேப்பஞ்சருகுக்கு எங்கே போறது!..

வீடுகள்..ல முன்னெல்லாம் சாம்பிராணி குங்கிலிய தூபம் போடுவாங்க!.. நெருப்புக் கங்குல தக.. தக..ன்னு புகை.. கொசு மட்டுமல்ல பல்லி கூட ஓடிப் போகும்.. இப்போ கம்பியூட்டர் சாம்பிராணி..ன்னு.. ஏதோ ஒன்னு... அதனால என்ன பிரயோஜனம்?.. யாருக்கும் தெரியாது!..

இப்படியெல்லாம் இருக்குதா அக்கா!..

இல்லையா பின்னே!.. ஜனங்க பக்கந்தான் இப்படி..ன்னா முனிசிபாலிட்டி என்ன செய்யுது?.. எந்த ஒரு ஊராவது சுத்தமா இருக்கிறதா விரல் விட்டு சொல்லு.. பார்ப்போம்!..

அது முடியாது அக்கா!..

எந்த ஊருக்கும் போய் இறங்கு.. அந்த ஊர் பஸ் ஸ்டாண்டு எப்படி இருக்கு?.. வேற ஊர்களை ஏன் சொல்வானேன்!.. நம்ம தஞ்சாவூரை எடுத்துக்க!.. சொல்ற மாதிரி இருக்குதா!.. பல லட்சம் செலவு..ன்னு கணக்கு காட்டுறாங்க.. நாலு மாசத்தில இலவச கழிப்பிடம் பாழாய்ப் போய்க் கிடக்குது.. வழி நெடுக குப்பை கூளம்.. துர்நாற்றம்.. திருந்தாத ஜனங்கள்.. அரசு வேலையாட்கள்...

இதையெல்லாம் ஒட்டு மொத்தமா திருத்துறதுக்கு எத்தனை காலம் ஆகுமோ.. யாருக்கும் தெரியாது.. யாராலயும் முடியாது..ன்னும் வெச்சுக்கயேன்...

அதனால தான் நம்மள.. நாமே திருத்திக்கலாம்..ன்னு சொல்றீங்களா!..

ஆமாம்..  
அதுக்காக ஆஸ்பத்திரிகெல்லாம் போக வேண்டாம்..ன்னு யாரையும் சொல்லலை... 
நமக்கு நாமே சுத்தம் சுகாதாரத்தைப் பேணிக்குவோம்..
முடிஞ்சவரைக்கும் நோய் நொடிக்கு இடங்கொடுக்காம இருப்போம்..

நம்ம முயற்சி எல்லாம் பலிக்கணும்..ன்னு
தெய்வத்தையும் கூட துணைக்கு அழைச்சுக்குவோம்!.

ஓஹோ.. அதுக்குத் தானா தேவாரம் திவ்ய பிரபந்தம் எல்லாம்!...

ஆமாம்..மா.. 
எங்கள் Blog.. ன்னு ஒரு வலைத்தளம்.. ஸ்ரீராம் நடத்துறார்..

வாராவாரம் சனிக்கிழமை ஊருக்கு நல்லது செய்ற 

நல்லவங்களைப் பற்றி எழுதறார்...

தன்னலமில்லாத அவங்க எல்லாம்
கடவுளை வேண்டிக்கிட்டா கூட நல்லது நடக்குமே.. 
மனுசங்களை நம்புறதை விட தெய்வத்தை நம்புவோமே...

மருந்தெல்லாம் நலம் கொடுக்குமா.. கெடுக்குமா.. தெரியலை...
இன்னைக்கு உணவே விஷம்.. ந்னு சொல்லிட்டாங்க..
அப்படியிருக்க.. மருந்து மட்டும் அமுதம் ஆகிடுமா!..

அதனால தான் சொன்னேன் -
அவனது அடியலால் ஈங்கில்லை பிறிதொரு தஞ்சம்!.. - அப்படி..ன்னு!..

நம்பிக்கை .. அதுதான் மருந்து...
அதைத்தான் இறையருளா எடுத்துக்கறோம்...

எப்படியோ அக்கா.. நல்லது நடக்கணும்..
அதுக்காக வேண்டிக்குவோம்!..
எங்கே...க்கா அத்தானும் பசங்களும்?..

அங்கே அரண்மனை வளாகத்துல
சித்த மருத்துவம் பற்றி பயிற்சிப் பட்டறையாம்.. போயிருக்காங்க...

அப்புறம் அக்கா!..
தீபாவளி விசேஷமெல்லாம் எப்படி போயிக்கிட்டு இருக்கு!.

எல்லாருக்கும் துணிமணியெல்லாம் எடுத்தாச்சு...
பலகாரம் செய்யிறது மட்டும் தான் பாக்கி!..

ஆமாம்.. அக்கா.. எங்க வீட்லயும் துணி எடுத்தாச்சு...
இந்தத் தீபாவளிக்கு புதுசா ஒரு இனிப்பு செய்யப் போறேன்!..

அப்படியா!.. என்னம்மா அது?..

அதை தீபாவளி முடிஞ்சதும் சொல்றேனே!..

தீபாவளிக்கு பட்டாசெல்லாம் பாதுகாப்பா வெடிக்கணும்.. சரியா!..

ஆகட்டும் அக்கா!.. எல்லாருக்கும் தீபாவளி நல்வாழ்த்துகள்!..

ஆகட்டும்..டா.. செல்லம்.. 
அனைவருக்கும் தீபாவளி நல்வாழ்த்துகள்!..

வாழ்க நலம்..

வாழ்க வளம்!..

***

திருவாதிரைக் களி 1

அக்கா.. அக்காவ்!..

வாம்மா.. தாமரை!.. வா.. வா!..

என்னக்கா.. இது? .. தக்காளி கிலோ எழுபது ரூபாய் சொல்றாங்க.. எதுவும் வாங்க முடியாதபடிக்கு விலை எல்லாம் ஏறிப் போய்க் கிடக்கு!...

ஆமா.. ரெண்டு மூணு மாசமா இப்படித் தான் இருக்கு..  மழை இல்லை.. சரியா விளைச்சலும் இல்லை.. என்னதான் செய்யமுடியும்.. பாவப்பட்ட ஜனங்களுக்கு பரிதவிப்பு தான் மிச்சம்!...

ஆனாலும் நாக்கு கேக்க மாட்டேங்குதே!.. மாமாவுக்கு தக்காளி சட்னி இல்லை..ன்னா இட்லி இறங்காது.. தக்காளி  ரசம் இல்லை..ன்னா அத்தை தவிச்சுப் போயிடுவாங்க!..

இங்கேயும் அப்படித்தான்..  அத்தானுக்கு யோகா முடிச்சதும் தக்காளி ஜூஸ் குடிச்சாத் தான் நிம்மதி..

இதெல்லாம் பிரச்னையே இல்லை.. விலைதான்.. அதிலயும் பாருங்க.. நல்ல பழமா பொறுக்கி எடுக்க விட மாட்டேங்கிறான்... இப்போ வாங்கின ஒரு கிலோவில நாலு பழம் நல்லதா இல்லை.. கேட்டா இஷ்டம்...னா வாங்குங்க.. - அப்படி..ன்னு எகத்தாளம்...

அதுக்குத் தான் சொன்னாங்க.. நாக்கை அடக்குங்க... ந்னு.. இல்லை..ன்னா வீட்டுத் தோட்டம் போட்டுட வேண்டியது தான்.. ஓரளவுக்கு சமாளிக்கலாம்...

அதுக்கெல்லாம் உடம்பும் வளையணுமே!..

நல்லது வேணும்..ன்னா வளைஞ்சு தான் ஆகணும்.. அத்தான் போன மாசம் பட்டுக்கோட்டை போயிருந்தப்ப அங்கேயிருந்து கீரை, கத்தரி, தக்காளி விதையெல்லாம் வாங்கிக்கிட்டு வந்தாங்க... கொல்லைப் பக்கம் போட்டுருக்கேன்..

சொல்லவேயில்லை.. அக்கா!..

நல்லா தழைச்சிருக்கு... இன்னும் நாலு நாளை..ல தக்காளி பழுத்திடும்... பழுத்ததும் கொடுத்து விடலாம்..ன்னு இருந்தேன்...

நாம பார்த்து பார்த்து வளர்க்கிறது தனி சந்தோஷம்.. இல்லையா அக்கா!..

ஆமாம் தாமரை.. ஏற்கனவே கொத்தமல்லி, புதினா கறிவேப்பிலை எல்லாம் தோட்டத்தில இருந்து தான்..

அது தான் தெரியுமே!... ஆனாலும் இந்தத் தக்காளி தான்...

தக்காளியைக் குறைச்சுக்கலாமே.... கொத்தமல்லி புதினா  இதெல்லாம் சட்னிக்கும் ரசத்துக்கும் ஆகி வராதா?..

அப்போ..  தக்காளிப் பழம் வேண்டாமா!?..

குறைச்சுக்கலாம்.. புளி, எலுமிச்சம்பழம் இதெல்லாம் தக்காளியை விட மலிவு தானே..

உள்ளது.. உள்ளது.. நீங்க சொல்றது சரிதான் அக்கா!..

இப்படித்தான் சமையல் குறிப்பு..ன்னு அதையும் இதையும் கலந்து கட்டி அடிச்சி விடுறாங்க... அதுக்கு இதைப் போடணுமா.. இதுக்கு அதைப் போடணுமா..ன்னு - படிக்கிறவங்களும் கேக்கிறவங்களும் தலையப் பிச்சுக்கிறாங்க...

அக்கா.. உங்களை ஒன்னு கேட்கலாமா!..

கேளேன்.. தாமரை!..

களி செய்யத் தெரியுமா?..

ஓ!.. உளுத்தங்களி, கம்பங்களி, கேப்பைக்களி, சோளக் களி...

திருவாதிரைக் களி!?..

என்னம்மா.. திடீர்... ந்னு சந்தேகம்!..

சொல்லுங்களேன்!...

தெரியுமே!..

சொல்லுங்க.. அக்கா.. திருவாதிரைக்களி எப்படி செய்றது..ன்னு சொல்லுங்க அக்கா!..

கால் கிலோ பச்சரிசிக்கு  கால் கிலோ வெல்லம்.. உள்ளங்கையளவு பயத்தம் பருப்பு.. கொஞ்சம் போல  தேங்காய்ப்பூ. கொஞ்சம் நெய்.. அஞ்சாறு முந்திரிப்பருப்பு ரெண்டு ஏலக்காய்.. அவ்வளவு தான்..

அரிசியையும் பருப்பையும் நல்லா  கழுவி விட்டு நிழல்ல உலர்த்தி தனித்தனியா வறுக்கணும்.. ஓரளவுக்கு சிவந்தால் போதும்..

அரிசியும் பருப்பும் ஆறினதும் திருகல்..ல்ல போட்டு பூ நொய் பதத்துக்கு உடைச்சுக்கணும்..

அதென்ன பூ நொய்!..

குறு நொய்க்கு அடுத்த பக்குவம்.. கிட்டத்தட்ட ரவை மாதிரி...

நெல்லோட உமி இல்லாம முழுசா இருந்தா அரிசி..
அரிசி ரெண்டா உடைஞ்சா நொய்..
நாலா உடைஞ்சா குறு நொய்..
எட்டா உடைஞ்சா பூ நொய்!..

யப்பா!.. இத்தனை அர்த்தம் இருக்கா!..

ஏலக்காயை  தட்டிக்கணும்.. முந்திரியை பக்குவமா வறுத்துக்கிடணும்..

வெல்லத்தை ரெண்டே கால் குவளை  தண்ணீரில் கொஞ்ச  நேரம் கொதிக்க வைக்கணும்.. கொதிக்கறப்போ - வெல்லத்தோட கசடு வந்தா எடுத்துப் போட்டுட்டு  உடைச்ச அரிசி பருப்பு இதெல்லாம் போட்டு கட்டிப் பிடிக்காம கிளறணும்..

முக்கால் பங்கு வேக்காடு ஆகி - தள தள..ன்னு வரும்..
அப்போ  தேங்காய்ப்பூ நெய் முந்திரி ஏலக்காய்
இதெல்லாம் போட்டு நல்லா கிளறி இறக்கி வைக்க வேண்டியது தான்..

என்னக்கா.. இப்படிச் சொல்லிட்டீங்க!.. பச்சரிசியும் பாசிப் பருப்பும் வெல்லமும் சேர்த்துப் பண்ணினா சர்க்கரைப் பொங்கல் ஆகிவிடாதோ!?..

ஆகிடும் தான்!..
குழைஞ்சு இறுகினா சர்க்கரைப் பொங்கல்..
தள.. தள..ன்னு நெகிழ்ந்தா பச்சரிசி பாயசம்!..
கொஞ்சம் கவனமாத் தான் செய்யணும்...

அக்கா.. இதுல கடலைப் பருப்பு இது மாதிரியெல்லாம் போடலாம்..ன்னு செல்றாங்களே!..

அம்மாடி.. தாமரை!.. ஒவ்வொரு ஊருக்கும் ஒவ்வொரு தெருவுக்கும் ஒவ்வொரு வீட்டுக்கும் ஒரு பக்குவம் இருக்கு... சமையல் விஷயத்துல மட்டும் இது தான் அது!.. -ன்னு நிலை நிறுத்திட முடியாது...

ஓ!.. இப்போ புரியுது.. அக்கா!..

ஆமாம்.. உனக்கென்ன இப்போது திடீர் சந்தேகம்!...

திங்கக்கிழமை திருவாதிரைக் களி.. அப்படி..ன்னு ஒரு பதிவு.. எங்கள் பிளாக்..ல.. நெல்லைத் தமிழன் எழுதியிருந்தாங்க.. அதைப் படிச்சிட்டு தான் உங்களைக் கேட்டேன்...

ஓஹோ!.. சரி.. முதன்முதலா இந்தக் களியை செஞ்சது யாரு..ன்னு தெரியுமா?..

தெரியாது..

சாப்பிட்டது யாரு..ன்னு தெரியுமா?..

அதுவுந் தெரியாதே!..

காவிரிப் பூம்பட்டினத்தில வைரத் தூண் நட்டு வைத்து வணிகம் செய்தவர் திருவெண்காடர்.. அவருக்கும் ஞானம் வந்தது.. போடா.. சரிதான்!.. -ன்னு எல்லாத்தையும் தூக்கி வீசிட்டு துறவியாயிட்டார்..

வைரத் தூணையும் தூக்கி எறிஞ்சிட்டா!?..

ஆமாம்!.. அவர் தான் பட்டினத்தார்.. அவரோட கணக்கப்பிள்ளை சேந்தனார்.. தன்னோட முதலாளி சிவனடியாராகப் போனதும் இவரும் சிவனடியார்களுக்கு அடியாராக ஆகிட்டார்.. சேந்தனாரோட மனைவியார் தான் முதன்முதலா திருவாதிரைக் களி செய்தவர்...

அப்போ.. முதன்முதலா சாப்பிட்டவர்!?..

வேற யாரு!.. ஈசன் எம்பெருமான் தான்!..

ஓ.. திருவாதிரைக் களி.. இதுக்குள்ளே இத்தனை கதை இருக்குதா!.. சொல்லுங்களேன் அக்கா!...

அதை சொல்றதுக்கு முன்னால - 
இறைவன் இந்த களியை உண்ணும் போது
அதில் கடலைப்பருப்போ துவரம்பருப்போ முந்திரியோ 
ஏன் - நெய் கூட சேர்ந்திருக்கவில்லை!..

பின்னே!?..

அன்புதான்.. அன்பு மட்டுமே அதில் சேர்ந்திருந்தது..
அன்பு தான் திருவாதிரைக் களிக்குக் கூட்டு!..

சரியாகச் சொன்னீர்கள்.. அக்கா!.. சரி நான் புறப்படுகின்றேன்..
நாளைக்கு மீண்டும் வருகின்றேன்.. கதை கேட்க வேண்டும்...

தாமரை.. காபியை மறந்து விட்டுப் போகலாமா!..

அக்கா.. அக்கா!...

வாழ்க நலம்..

* * *

கோலக் குருவி..

வாசலில் ஸ்கூட்டியின் சப்தம்..

விரைந்து வருவதற்குள்ளாக -

அக்கா.. அக்கா..வ்!..

கை நிறைந்த காய்கறிகளுடன் தாமரை.. சந்தையிலிருந்து வருகின்றாள்..

ஆனாலும், வீட்டிற்குள் வராமல் -  
வாசலிலிருந்த வண்ணக் கோலத்தில் லயித்திருந்தாள்...

வாம்மா.. தாமரை!..

அக்கா.. இன்றைக்கு என்ன விசேஷம்?... வாசலில் குருவிக் கோலம் எல்லாம்!..

என்ன விசேஷம் என்று நீதான் சொல்லேன்!..

அக்கா!.. அந்த அளவுக்கு நான் எங்கே?... இருந்தாலும் தலை இருக்க வால் ஆடக் கூடாது இல்லையா!.. அதனால்.. நீங்களே சொல்லி விடுங்களேன்!..

நல்ல பொண்ணு நீ!.. இன்னைக்கு சிட்டுக்குருவிகள் தினம்!.. உலகம் முழுதும் கொண்டாடுகின்றார்கள்!..

ஆகா!.. பல்பு வாங்கிட்டேன்!.. இருந்தாலும் அக்கா கிட்ட தானே!..

வா.. தாமரை.. உள்ளே வா!..  காய்கறி விலையெல்லாம் எப்படியிருக்கு?..

ஓரளவுக்கு மலிவு தான்!.. அக்கா.. நான் ஒன்று கேட்பேன்... தப்பாக நினைக்கக் கூடாது!..

என்னம்மா?..

சிட்டுக் குருவிக்கென்ன அவ்வளவு மகத்துவம்!.. அதுக்காக ஒரு நாளா?..

சிட்டுக்குருவி.. இயற்கையில அதுவும் ஒரு அங்கம்.. மனிதர்களோடு வாழ விரும்பும் உயிரினங்களுள் அதுவும் ஒன்று.. பழைய காலத்து வீடுகள்..ல சர்வ சாதாரணமா மக்களோட பழகித் திரியும்.. 

ஓ!..

வீட்டுத் தாழ்வாரங்கள் கூரை முடுக்குகள்... இங்கெல்லாம் ரொம்ப உரிமையா கூடு கட்டிக் கொள்ளும்.. யாருக்கும் எந்த தொந்தரவும் செய்யாது...

ஓஹோ!.. 

வீட்டுக்குள்ள வந்து சிட்டுக் குருவி கூடு கட்டினாலே நல்ல அதிர்ஷ்டம் .. அப்படின்னு சொல்லுவாங்க..,

அது மட்டுமா!.. இளந்தம்பதிகள் இருக்கிற வீட்டுல குருவி கூடு கட்டினா.. குலம் விருத்தி.. ந்னு சந்தோஷப்படுவாங்க..

அக்கா!.. அதுக்கும் இதுக்கும் என்ன சம்பந்தம் அக்கா?...

தாமரை!.. இதெல்லாம் உனக்கு தெரியாது.. குருவி மட்டுமல்ல.. குளவி வந்து கூடு கட்டினாலே பலப்பல அர்த்தம் இருக்கு.. குளவிக் கூட்டை கலைக்க மாட்டாங்க!.. குளவி கட்டுற கூட்டை வச்சி என்ன குழந்தை பிறக்கும்..ன்னு சொல்லிடுவாங்க!.. 

ஆச்சர்யமா இருக்கே!..

அந்த அளவுக்கு சிற்றுயிர்களோட இணைந்து வாழ்ந்த சமுதாயம் நம்முடையது.. தாமரை!..

கொஞ்சம் கொஞ்சமா நாகரிகம்..ங்கற பேர்..ல தன்னை இழந்துகிட்டு இருக்கிறதும் நம்முடைய சமுதாயம் தான்!...

ஊர் உலகம் எல்லாம் மாறி வருது தானே!..

ஊர் உலகம் போலவா நம்முடைய கலாச்சாரம்!..  தாத்தா காலத்தில எல்லாம் கறையானுக்கு மருந்து எறும்புக்கு மருந்து.. நெல்லுக்கு மருந்து தென்னைக்கு மருந்து.. இதெல்லாம் கிடையாது!... 

வீட்டு வாசல்ல சாணம் தெளித்து கோலம் போட்டால் கறையான் எறும்பு இதெல்லாம் வீட்டுக்குள்ளே வராது... நிலைப்படியில மஞ்சள் பூசி கூரையில நாலு வேப்பிலையும் மாவிலையும் தொங்க விட்டா கெட்ட கிருமிகளுக்கு வேலை இல்லை.. வீட்டைச் சுற்றி கோழி குருவி இதெல்லாம் இருந்தா விஷப் பூச்சிகள் ஒழிந்து போகும்...

கொல்லையில புழக்கடை தண்ணி ஓடுற இடத்தில நாலு வாழை வைச்சி வாழை இலையில சாப்பாடு..ன்னா உடம்புக்கு நல்லது... கிணற்றடியில துளசி மாடம்.. அப்படியே அந்தப் பக்கம் தும்பை தூதுவளை, செம்பருத்தி சோற்றுக் கற்றாழை..ன்னு இருந்துட்டா அந்த வீட்டுல நோய் நொடியே இருக்காது..

ஏ.. அம்மாடி!.. இவ்வளவு சேதிகளா!..

ஏழை.. ன்னாலும் பணக்காரன்.. ன்னாலும் காற்றோட்டமான வீடு... நல்ல தண்ணி.. நல்ல சாப்பாடு.. அவங்க அவங்க குணம் கொள்கை இதனால அப்படி இப்படி இருந்தாங்களே தவிர கிராமங்கள் யாரையும் கை விட்டதே இல்லை...

அக்கா!..

வாழையிலைக்குள் வாழும் குருவி

காத்து நின்ற கிராமங்களை நாம் தான் கை விட்டோம்!.. ஆற்றை குளத்தை அழித்தோம்.. மரம் மட்டைகளை ஒழித்தோம்.. நாம் வாழ இயற்கையைக் கெடுத்தோம்... வருங்கால சந்ததிக்கு வறட்சியைக் கொடுத்தோம்!..

... ... ...!..

எந்த நாட்டிலும் இல்லாதபடிக்கு எத்தனை எத்தனையோ ஞானிகள்!.. எத்தனை எத்தனையோ நீதி நூல்கள்!.. அத்தனையும் இருந்தும் அறிவழிந்து போனோம்!..

... ... ...!..

அடுத்த நாட்டுக்காரனைப் பற்றி பேச வேண்டாம்.. நம்மை நாமே கெடுத்துக் கொண்டோம்!.. உருப்படாத கல்வி முறையால் ஊர் அழிந்தது தான் மிச்சம்...

... ... ...!..

நம்முடைய பெருமையை திறமையை நமக்குச் சுட்டிக் காட்டணும்.. நல்லறிவை அடுத்த தலைமுறைக்குக் கொண்டு போகணும்.. அதுதான் கல்வி.. ஆனால் இன்றைக்கு நடக்கிறது என்ன?.. கொடுக்க வேண்டிய இடத்தில் காசைக் கொடுத்துட்டால் என்ன வேணும்...னாலும் செய்து கொள்ளலாம்... கழனியை அழித்து விட்டு கல்லூரியே கட்டலாம்!..

... ... ...!..

ஆறு குளம் எல்லாம் அழியுதே... குன்று மலை எல்லாம் மடுவாகிப் போகுதே... மரம் மட்டை எல்லாம் விறகாகிப் போனதே.. கூக்குரல் இட்டாலும் கேட்பாரில்லை.. கைமேல் பலன் பூஜ்யம் தான்!..

... ... ...!..

மக்களுக்கான குளத்தை ஏரியை தூர்த்து விட்டு மக்கள் நலப்பணி..ங்கறான்... நல்ல தண்ணிக்கு ஜனங்க குடத்தோட அலையுறப்போ ஆழ்துளைக் குழாய்.. ங்கறான்.. இதுனால பூமி பொத்தலாகிப் போனது தான் மிச்சம்...

... ... ...!..

பூமிக்குள்ள நீர் போய்ச் சேர்ந்தாத் தானேடா மேலே பொங்கி வரும்.. நமக்குத் தான் மழைத் தண்ணியைத் தேக்கி வைக்கிற பழக்கம் எல்லாம் கிடையாதே!.. ஆயிரம் வருஷத்துக்கு முன்னால செஞ்சு காட்டுனாங்க... அப்படியெல்லாம் நல்லது செஞ்சாங்க..ங்கறதே - இன்றைக்கு படிக்கிற பிள்ளைகளுக்குத் தெரியாது!.. அப்புறம் எப்படி உருப்படும் ஊரும் நாடும்?..

... ... ...!..

ஆறு இல்லா ஊருக்கு அழகு பாழ்.. அப்படி..ன்னு ஔவையார் சொன்னாங்க.. நாம கேட்டோமா?.. ஒரு ஆறு அழிஞ்சா எத்தனை எத்தனை மரங்கள் அழியுது.. ஒரு மரம் அழிஞ்சா எத்தனை எத்தனை ஜீவராசிகள் அழியுது.. இதெல்லாம் நல்லதுக்கா!..

... ... ...!..

இத்தனை மரமும் நீ வெச்சதா?.. நான் வெச்சதா?.. காற்றும் தண்ணியும் பறவைகளும் விலங்குகளும் வெச்சது!..

நீ படிச்சதில்லையா?.. காற்றினாலும் தண்ணீராலும் பறவைகளாலும் விலங்குகளாலும் விதைகள் இடம் விட்டு இடம் பரவுகின்றன.. அப்படின்னு!..

மேட்டுல இருந்து பள்ளத்துக்கு தண்ணீர் வர்றதில்லை... அடைத்தாயிற்று.. ஆறு அழிந்தது.. ஆற்றங்கரை அழிந்தது.. மரம் ஒழிந்தது.. மேலே பறவைகள் இல்லை.. கீழே விலங்குகள் இல்லை..

ஒன்றுக்கும் உதவாத மனிதன்.. இவனுக்கு மட்டும் பாதை வேண்டுமாம். ஆனை வழியை அழிக்கிறான்... பூனை வழியை ஒழிக்கிறான்... கேட்டால் நடுராத்திரியில உடுக்கை எடுத்துக்கிட்டு அடிக்கிறான்... அங்கே அரளிய வெச்சேன்.. இங்கே குறளிய வெச்சேன்..ங்கிறான்...

ஏன்டா.. தஞ்சாவூர் மண்ணும் தகரக்குடி மண்ணும் ஒன்றா?... மண்ணுக்கு மண் மரத்தைப் பார்த்து வைத்தானே இறைவன்!.. அவன் பெரியவனா?.. அவன் பேரைச் சொல்லி வயிறு வளர்க்கிற நீ பெரியவனா?..

மரம் மட்டையெல்லாம் அழித்து விட்டு - மழை வர்றதுக்காக ஆயிரத்து எட்டு குண்டத்துல ஹோமம்... ங்கிறான்!..

புழு பூச்சிய எல்லாம் கொன்னு போட்டுட்டு பூமிய வாழ வைப்பேன்... என்கிறான்!.. பறவை மிருகம்.. எல்லாம் அழியுது.. இவன் சொல்றான்.. இந்தியா வளருது.. ன்னு!..

ஊர் குடியைக் கெடுத்தவன் எல்லாம் பெரியபேர் வெச்சிக்கிட்டு அலைகிறான்!.. ஏதிலிகளாகிப் போனோம் தாமரை.. ஏதிலிகளாகிப் போனோம்!..

அக்கா.. அக்கா!.. என்னாச்சு!..

இயற்கையைப் பற்றி பேசினால் இளக்காரமா இருக்கு!..

நாலு சுவற்றுக்குள்ளே ஒற்றைப் பனை மரம் போல வாழ்க்கை... இவனுங்களுக்கெல்லாம் என்ன தெரியும் இயற்கையைப் பற்றி?..

சம்பளத்துக்காக வாழ்வதா வாழ்க்கை?.. சந்ததிகளுக்காக வாழவேணும்!.. எறும்பும் தான் வேணும்.. யானையும் தான் வேணும்!.. மண்ணுந்தான் வேணும்.. மரமும் தான் வேணும்..

அங்கே புதுச்சேரிக்குப் பக்கத்தில பார்.. தானியத்தில விஷம் வைச்சதில இருபத்திநாலு மயில்கள் செத்துப் போயிருக்கு.. ஆனா, இவனுங்க மட்டும் நல்லா இருக்கணும்!?..

ஆமா..ங்க்கா.. நானும் படிச்சேன்.. ரொம்ப வருத்தமா இருக்கு...

மயில்களோட வாழ்விடத்தை அழிச்சிட்டா அதுங்க வாழறதுக்கு வேறெங்கே போகும்?.. மயில்கள் சாபம் இடுதோ இல்லையோ.. அதைப் பார்க்கிறவங்களோட வயிறு பற்றி எரியுதே.. அந்தப் பாவம் சும்மா விடுமா?..

சே.. என்ன ஒரு ஈனத்தனமான வேலை!..

இப்படித் தான் சிட்டுக்குருவி லேகியம்.. ந்னு வேட்டு வைத்தார்கள்... முடிவு என்னவாயிற்று... குலம் விளங்கவில்லை.. குணம் விளங்கவில்லை...

அதென்னக்கா.. சிட்டுக்குருவி லேகியம்?..

அது ஒரு ஏமாற்று வேலை!.. உருப்படாதவனுங்க செஞ்சது!..

மறுபடியும் சிட்டுக்குருவிங்க.. எல்லாம் பெருகுமா.. அக்கா?...

இப்போ ஓரளவுக்கு சிட்டுக்குருவிகள் விருத்தியாகி இருக்கிறதா இயற்கை ஆர்வலர்கள் சொல்றாங்க!..

இருந்தாலும் அதுங்க நிம்மதியா வாழ்றதுக்கான வாய்ப்புகளை நாமதான் பெருக்கணும்!..

அந்த நேரத்தில் சட.. சட.. என்று சிறகடித்தபடி பத்துப் பதினைந்து சிட்டுக் குருவிகள் முன் கூடத்திற்குள் புகுந்து பறந்தன..

அக்கா.. அக்கா!.. இங்கே பாருங்களேன்!..

என்ன.. தாமரை.. இது!.. ஆச்சரியமா இருக்கு!..

அவ்வேளையில் ஒரு குருவி பேசிற்று!..

வாழ்க வளமுடன்!.. உங்களைப் பற்றி கேள்விப்பட்டு வந்தோம்!..

தாமரை.. அங்கே வரகரிசி இருக்கு எடுத்து வாம்மா!.. ஒரு காலத்தில் எங்கள் பழைய வீட்டில் நெல்மாலை கட்டியிருப்போம்.. இன்றைய சூழ்நிலையில் அதெல்லாம் இங்கே இல்லை... என்றாலும் எங்கள் வீட்டில் அமுது செய்தல் வேண்டும்!..

நல்லது.. ஆயினும், அங்கே தஞ்சையம்பதியார் இல்லத்தில் அவர்களுக்கு இன்று திருமண நாள் என்று விருந்துண்டோம்.. அவர்கள் தான் தங்களைச் சந்திக்கும்படி சொன்னார்கள்...

அப்படியா!.. - தமிழ்ச்செல்விக்கு மகிழ்ச்சி..

அக்கா... இந்தாங்க.. வரகரிசி!..

கூடத்தில் வரகரிசியை வாரி இறைத்து - வாஞ்சையுடன் தண்ணீரும் வைத்தார்கள்..

குருவிகள் கூடிக் குளிர்ந்து - தானியங்களை உண்டன.. நீரை அருந்தின..

அங்குமிங்கும் ஆனந்தமாகப் பறந்தன...

மகிழ்ச்சி.. விரைவில் தாமரையின் வீட்டில் கூடு கட்டுவோம்!.. 

வலமாகச் சுற்றி வாழ்த்திய வண்ணம் - வானில் பறந்து காற்றில் கலந்தன!..

தாமரை!.. நல்ல சேதிதான்!.. தம்பி ஊருக்கு வர்றாங்க..ன்னு நினைக்கிறேன்!..

போங்க..க்கா!.. எனக்கு வெக்கமா இருக்கு!.. - முகம் சிவந்தாள் தாமரை..

இறைவனே இயற்கை.. இயற்கையே இறைவன்..

இயற்கை இருக்கட்டும்.. இயற்கையாகவே இருக்கட்டும்!.

இயற்கை இருக்கும் வரைக்கும் தான் நமக்கு இங்கே இருக்கை!..

இன்று உலக சிட்டுக் குருவிகள் நாள்..

நாமும் வாழ்வோம்..

வையகத்தையும் வாழ வைப்போம்..

இயற்கை வாழ்க..

இயற்கையோடு இணைந்த இன்பமும் வாழ்க!..

***

அழகே.. தமிழே!..

வானளந்த நிலவு முகம்

தானளந்த நறுந் திலகம்

நல்லழகே தமிழ்கூறும் மங்கலமோ!..

கண்ணளந்த புன்னகையும்

காதளந்த பொன்னகையும்

காலமகள் செய்தளித்த நன்கலமோ!..

பூவளந்த நறுங்குழலும்

நாவளந்த இன்தமிழும்  

வானளந்த பேரழகைக் கூட்டாதோ!..

நானளந்த நற்கவியும்

தேனளந்த தென்தமிழும்

தேவியவள் திருவடிவைக் காட்டாதோ!..

பேரளந்த பெருந்தகவாய்

ஊரளந்த ஒலிமுழவாய்

பொன்மாலை பூந்தோளில் ஆடாதோ!..

தினையளந்த வயற்காட்டில்

எனையளந்த என்னுயிரே

என்கவியை நின்செவிதான் ஏற்காதோ!..

மலையளந்த பெருந்தனத்தாள்

நிறையளந்த நிலைகுணத்தாள்

குளிர்நிலவாய் கூடவந்தால் ஆகாதோ!..

பாலளந்த பசுங்குணத்தாள்

பாவளந்த தமிழ் வணத்தாள்

பூவிழியால் புன்னகைத்தால் ஆகாதோ!..

நீரளந்த நெடுங்கரையில்

நிழலளந்த குழல்உலர்த்தி

நீநடக்க என்கலியும் தீராதோ!..

தேனளந்த பூஞ்சரத்தாள்

வானளந்த புகழ்நலத்தாள்

தேவகன்னி என்றுரைத்தால் ஆகாதோ!..

பொன்னளந்த பூங்கரத்தாள்

மின்னளந்த விழிநலத்தாள்

நின்றெனக்கு ஒன்றுரைத்தால் ஆகாதோ!..

நெல்லளந்த நெடுவயலில்

நின்றளக்கும் தென்காற்றில்

உன்றனுக்கு என்றுரைத்தால் வாராதோ!..

சேலளந்த செவ்விழியும்

நூலளந்த மெல்லிடையும்

நூறுகவி நான்பாடச் சொல்லாதோ!..

சீரளந்த பெருங்குலத்தாள்

நீரளந்த முகில்குணத்தாள்

நானளந்த மொழிகேட்டால் ஆகாதோ?..

நானளந்த நற்கவியும்

தேனளந்த தென்தமிழும்

தேவியவள் திருவடிவை வாழ்த்தாதோ!..

நாலளந்த நறுங்குணத்தாள்

காலளந்த தூரமெல்லாம்

நான்நடக்க வாழ்நாளும் வாராதோ!..

***

மதிப்புக்குரிய ஓவியர் மாருதி அவர்களுக்கு நன்றி

அக்கா.. அக்கா!.. 

சொல்லம்மா!..

இதென்னக்கா!..

கவிதை.. கவிதை..ம்மா!..

கவிதையா.. அதான்.. எனக்குத் தெரியுதே!..

வேறென்ன உனக்குத் தெரியலை?..

அத்தான் உங்களைச் சுத்திச் சுத்தி வந்தப்போ எழுதுனது..ன்னு புரியுது!..

அப்புறம் என்னவாம்!..

எல்லா வரியிலயும் - அளந்த.. அளந்த.. - ன்னு அளந்திருக்காங்களே!.. உண்மையில அளந்த கவிதையா.. இல்லே.. அளந்த கவிதையா!..

என்னம்மா!.. சிலேடையெல்லாம் பொங்குது?..

அத்தானும்... தான் கவிதையில ஒருவரி சிலேடை வெச்சிருக்காரே!..
எந்த வரி..ன்னு தெரியுதா!?..

குறுஞ்சிரிப்பு தாமரையின் இதழ்களில்..

அக்காவின் முகத்திலும் - மெல்லிய பூஞ்சிரிப்பு!...

சொல்லுங்க அக்கா!.. எப்படி.. இதெல்லாம்!?..

உங்க அத்தான் வந்ததும் அவரையே கேளேன்!..

அத்தானைக் கேக்கறது இருக்கட்டும்...
நம்மைப் பார்த்து இப்படியெல்லாம் அளக்குறாங்களே!.. அது எப்படி..க்கா?..

அத்தானைக் கேட்டா - உள்ளதைச் சொல்றேன்!.. அப்படி..ன்னு சொல்லுவாங்க...

உள்ளதைச் சொன்னாங்களோ!.. உள்ளத்தைச் சொன்னாங்களோ!... பொதுவா இவங்களால நம்மை அளந்துட முடியுமா?..

ஓ.. முடியுமே!..

எப்படிக்கா?..

அன்பு!.. அன்பு தான் அளவு கோல்!.. 
அன்பை அளப்பதும் அன்பு தான்!.. 
அன்பை அளிப்பதும் அன்பு தான்!..

ஓ!.. அத்தானுக்கு ஏத்த அக்கா தான்!..

தாமரை சிரித்தாள்.. 
தாமரையுடன் சேர்ந்து தமிழ்ச்செல்வியும் சிரித்தாள்..

அழகு வாழ்க..

அழகுடன் சேர்ந்து அன்பும் வாழ்க!.. 

***

கோலம் திருக்கோலம்..

அக்கா... அக்காவ்!..

வாம்மா.. தாமரை!.. வா.. வா!..

என்னக்கா.. செய்றீங்க.. பழைய கோல நோட்டெல்லாம் இன்னும் பத்திரமா வெச்சிருக்கீங்களா!..

இதெல்லாம் முப்பது வருஷ பழசு.. தெரியுமா!..

பார்த்தாலே தெரியுதே.. பாருங்களேன்.. நோட்டு விலை பதினைஞ்சு நயா பைசா..ன்னு போட்டிருக்கு!..

தமிழ்ச்செல்வி

நான் படிக்கிறப்பவே - கோலப் போட்டியில எல்லாம் கலந்துக்குவேன்.. எத்தனை பரிசு வாங்கியிருக்கிறேன்... 

ஓ!..

என்னயப் பார்த்ததுமே - மத்த பொண்ணுங்க..ல்லாம் தமிழு வந்துட்டாடி... இனிமே நாம என்னத்தைப் போடறது..ன்னு அசந்துடுவாங்க!..

உங்க கை வண்ணமே தனி தானே அக்கா!..

இனிமே அந்த நாளெல்லாம் திரும்பி வருமா..ன்னு தெரியலே!... அதிருக்கட்டும்.. அன்னைக்கு பாரதி விழாவில என்ன அருமையான பாட்டு!.. அடேயப்பா... அத்தனை பேரும் யாரு.. இந்தப் பொண்ணு..ன்னு கேள்வி மேல கேள்வி கேட்டு..

போங்க அக்கா!.. எனக்கு வெக்கமா ஆயிடுச்சி.. நான் ஏதோ தெரிஞ்சதைப் பாடினேன்.. அது இப்படியாகும்..ன்னு நினைக்கலை!...

அதில்லை தாமரை!... ழகர.. ளகர.. உச்சரிப்பு எல்லாம் சுத்தமா தெளிவா...  உண்மையிலேயே உணர்ச்சி பூர்வமா இருந்துச்சு உன் பாட்டு... 

என்னக்கா!.. நீங்க வேற ரொம்பப் புகழ்...றீங்க!..

அந்தப் பெரியவர் - அத்தான்..கிட்ட வந்து -  செந்தில்.. இந்தப் பொண்ணு உங்க உறவுக்காரங்களாமே.. ந்னு கேட்டதும் அத்தானோட முகத்தைப் பார்க்கணுமே.. ஒரே பூரிப்பு!...

பயந்துகிட்டே தான் வந்தேன்...நல்லவேளை... ஒன்னும் கோளாறு ஆகலை!.. 

மகாகவியோட பாட்டுகள்..ல நாலு தெரிஞ்சுகிட்டா போதும்.. தன்னம்பிக்கையும் தைரியமும் தன்னால வந்துடும்...

அட.. எங்க தமிழ் ஐயாவும் இப்படித்தான் சொல்வார்!..

தாமரை.. நானும் தமிழாசிரியர் பொண்ணு தான்... அன்னைக்கு மனப்பூர்வமா தமிழ் படிச்சதினால தான் உடம்பும் மனசும் உறுதியா இருக்கு!..

தாமரை

ஆமாங்..க்கா!.. தமிழையும் தமிழ் கலாச்சாரத்தையும் நாம காப்பாத்துனா... தமிழும் தமிழ் கலாச்சாரமும் நம்மைக் காப்பாத்தும்..ன்னு சொல்வாங்க எங்க தாத்தா!.. அவங்க அந்தக் காலத்திலயே குருகுலத்தில படிச்சவங்க.. ஏதேதோ பழைய சுவடிக்கெல்லாம் விளக்கம் எழுதினாங்களாம்!.. 

இதெல்லாம் நீ சொல்லவில்லையே.. தாமரை!..

தொண்ணூற்று ஆறு வயசு வரைக்கும் நடை உடையா இருந்தாங்க.... பெரிய கார்த்திகை அன்னைக்கு ஜோதி ஆகிட்டாங்க... அவ்வளவு சிவனடியார்கள் வந்து தேவாரம் திருவாசகம் பாடி மரியாதை செஞ்சாங்க.. அப்போ எனக்கு பத்து வயசு!..

அவங்கள்..லாம் கொடுத்து வைச்சவங்க!..

எனக்கு பேர் வெச்சதே எங்க தாத்தா தானாம்!.. எங்க அப்பத்தா.. எண்பத்தைஞ்சு வயசு வரைக்கும் இருந்தாங்க..  வாராவாரம் வீட்டை சாணி போட்டு மெழுகி.. பச்சரிசி மாவுல நீர்க்கோலம் போடுவாங்க..  நிலைப்படிக்கெல்லாம் மஞ்சள் பூசுவாங்க.. குங்குமம் வைப்பாங்க!.. நல்ல நாள் பெரிய நாள்..ல எல்லாம் செங்காவி பூசுவாங்க.. மாவிலை ஒடிச்சிக்கிட்டு வரச் சொல்லி தோரணம் கட்டுவாங்க...

தாமரை!.. அந்த மாதிரியெல்லாம் இப்ப யார் செய்றாங்க... யாருக்கு இடுப்பு வளையுது?...

அவங்களுக்கு அப்புறம் வீட்டு..ல சிமெண்ட் தரையானது.. அதுக்கப்புறம் மொசைக் வந்திச்சு.. இப்ப டைல்ஸ்.. கிரானைட்.. ன்னு பளபளப்பு.. ஆனா வீடு கழுவ முடியலை.. ஈரத்துணியைப் போட்டு துடைங்க.. அப்படி...ன்னு சொல்றானுங்க...

ஆமாம்.. தரையில கோலம் போட முடியலை.. ஸ்டிக்கர் கோலத்தை வாங்கிக் கிட்டு வந்து ஒட்டுறாங்க.. கோலம் போடறதும் மறந்து போச்சு.. எங்க சுகந்திக்கே கை வளையமாட்டேங்குது!..

கலாச்சாரம் தானே அடையாளம்.. அதை கைவிடாம இருந்தாதானே.. நாம எல்லாம் தமிழர்..ன்னு சொல்லிக்கலாம்!.. கலாச்சாரத்தை மறந்துட்டு நின்னா.. என்னாகும்?.. இன்னும் நூறு வருசம் கழிச்சி..

நீ வேற!.. நூறு வருசம் எல்லாம் என்னத்துக்கு?.. பத்து வருசமே அதிகம்!..

ஒரு பத்து வருசம் கழிச்சு - அடேய்.. உன் அடையாளம் என்ன..ன்னு கேட்டா.. ஒன்னும் தெரியாது.. ஆந்தை மாதிரி முழிக்க வேண்டியது தான்!..

ஏதோ இந்த மார்கழி மாசம் வந்துட்டா போதும்.. வீட்டு வாசல்ல இந்தக் கோலம் போட்டால்.. மகாலட்சுமி வந்துடுவா!.. அந்தக் கோலம் போட்டால் குபேரன் வந்துடுவான்... அப்படின்னு பத்திரிக்கையிலயும் டீவியிலயும் கலக்குறானுங்க.. அதுக்காகத்தான் ரொம்ப பேரு இப்போ கோலம் போட ஆரம்பிச்சு இருக்காங்க!...

இதுக்கு இடையில - அவங்க வாசல்..ல கோலமா போடறாங்க.. அவங்கள்..லாம்  நல்லா இல்லையா?.. - அப்படி..ன்னு கேள்வி கேட்டுக்கிட்டு ஒரு கும்பல் கிளம்பி விடும்!..

நல்லா இருக்கிறதும் இல்லாததும் அவங்க அவங்க மனசாட்சிக்குத் தான் தெரியும்!.. இப்ப கூட இந்த பழைய நோட்டெல்லாம் எதுக்கு.. ன்னு தெரியுமா?..

ஏங்..க்கா!.. எதும் போட்டியில கலந்துக்க போறீங்களா?..

இல்லே..ம்மா!.. பக்கத்து வீட்டுப் பொண்ணுங்க.. எல்லாம் கோலம் போட்டு பழகிக்கணுமாம்... எங்க அம்மா பெரிய களஞ்சியம் அப்படின்னு.. சுகந்தி சொல்லிட்டா!.. 

உண்மையில நீங்களும் அத்தானும் பெரிய களஞ்சியம் மாதிரி தான்.. நான் தான் அன்னைக்கு விவரம் தெரியாம சிவபூஜையில கரடி மாதிரி இடைஞ்சல் பண்ணிட்டேன்...

அதெல்லாம் ஒன்னுமில்லை.. தாமரை!...

எனக்கு மனசு ஆறவில்லை.. அக்கா!...

அதை விடு.. தாமரை.. இந்தப் பொண்ணுங்களுக்கு எல்லாம் கோலம் சொல்லித் தரணும்...

அக்கா.. எனக்கும் கோலம் சொல்லிக்கொடுங்க அக்கா!.. எவ்வளவு சார்ஜ் பண்றீங்க!..

அடிப் பைத்தியம்!.. இது ஒரு சேவையம்மா.. சேவை!..

எனக்குத் தெரியாதா.. சும்மா.. லுலு...லுவா!...

நானும் பக்கத்து வீட்டு ராஜியும் விடியக்காலைல கோலம் போடறப்ப.. உங்க அத்தான் கன்னுக்குட்டிய கையில பிடிச்சுக்கிட்டு அங்கிட்டும் இங்கிட்டும் நடப்பாங்க.. அவங்களைப் பார்த்ததும் எனக்குக் கையும் ஓடாது.. காலும் ஓடாது.. நேர்க்கோலம் எல்லாம் நெளி கோலம் ஆகிப் போகும்.. ராஜி கிடந்து சிரிப்பா!..

அதெல்லாம் வசந்த காலம்... இல்லையா!..

அதுமட்டுமா!.. விடியற்காலைல.. கோலம் போடுறப்ப பனிக்காத்து ஒத்துக்காது... ந்னு - எங்க அம்மா எல்லாருக்கும் பனங்கல்கண்டு போட்டு சுக்குக் காபி கொடுப்பாங்க.. அதுல ஒரு குவளை உங்க அத்தானுக்கும் போகும்!..

இது வேறயா.. சரிதான்!..

ஆனா - அவங்களைப் பார்த்ததுமே எனக்கு வேர்த்து விடும்.. தாமரை!..

அக்கா.. உங்களுக்குத் தான் அதெல்லாம் ஒத்து வராதே!..

எதெல்லாம்!?..

அதை அப்புறமா சொல்றேன்.. இப்போ.. நீங்க சொல்லுங்க.. என்னைக்கு பயிற்சி வகுப்பு?.. நான் கலர் மாவு எல்லாம் வாங்கி வந்துடறேன்..

கலர் மாவா?.. அதெல்லாம் வேண்டாம்.. சாதாரணமா வந்தா போதும்.. பேனா.. கலர் பென்சில் நோட்டு கொண்டு வந்தா போதும்.. கோலம் பழகினதும் அரிசி மாவுல தான் போடணும்.. என்னைக்கும் இதை மறக்கக் கூடாது..

ஏங்..க்கா.. கலர் பொடியில போட்டா என்ன?...

கோலம்..ங்கறது ஒரு தர்மம்.. கைப்பிடி அரிசி மாவுல ஆயிரமாயிரம் எறும்புகளுக்கு அன்ன தானம் பண்றோம்... கலர் பொடி எல்லாம் ரசாயனம்.. கலர் கோலத்தைத் தேடி எறும்புங்க வராது... அதெல்லாம் ஒரு அலங்காரத்துக்குத் தான்.. அத்தானுக்கு அரிசி மாவுல கோலம் போட்டா தான் பிடிக்கும்...

இவ்வளவு நாள் தெரியாம போச்சே!... அக்கா.. இந்த இரசாயனம் எல்லாம் தண்ணில கரைஞ்சி மண்ணுக்குள்ளே போனா - அங்கேயிருக்கிற புழு பூச்சிக்கெல்லாம் ஆபத்து தானே!..

ஆமாண்டா.. செல்லம்!..

சே.. முட்டாள் தனமா.. கலர்ப் பொடியெல்லாம் வாங்கி வெச்சிருக்கேன்.. வெள்ளைக் கருங்கல்லை அரைச்சி கோலமாவு..ன்னு விக்கிறான்.. அதையும் வாங்கி வெச்சிருக்கேன்... பெரிய தப்பு பண்ணிட்டேன்.. அக்கா!..

நீ மட்டுமில்லே தாமரை.. முக்கால்வாசிப் பேர் இப்படித்தான் இருக்கிறாங்க... இது எதுக்கு.. இதுக்குள்ள அர்த்தம் என்ன.. அப்படிங்கறதை எல்லாம் யோசிக்கிறதே இல்லை...

அக்கா.. புயலோட புயலா -  நல்லா இருந்த மரங்களையும் சேர்த்து வெட்டித் தள்ளிட்டாங்களாம் - சென்னையில.. செய்தி படிச்சீங்களா!..

ஆமாம்.. படிச்சேன்.. அறிவு வளர்ந்திருக்கிறதால புயலைத் தடுக்க முடியலை...ன்னாலும் சேதங்களை ஓரளவுக்குக் குறைக்க முடிஞ்சது.. ஆனா - இந்த மாதிரி சமூக விரோதங்களை தடுக்கவே முடியாது போல இருக்கு... மரங்கள்..லாம் வேரோட சாய்றதைப் பார்க்கவே வருத்தமா இருந்தது.. அதுல இந்தக் கொடுமையும் வேற!..   

அக்கா.. கோலம் போட்டு சாணத்தில பூசணிப் பூ வைக்கணுமே.. அதுக்கெல்லாம் எங்கே போவது?...

அதெல்லாம் பிரச்னையே இல்லை.. மார்கழி முழுக்க பசுஞ்சாணமும் பூசணிப் பூவும் கொண்டு வந்து தர்றதுக்கு பக்கத்து ஊர்ல சொல்லியாச்சு..  

அது தானே!.. அக்கா இருக்க கவலை எதுக்கு?.. சரி.. நான் புறப்படட்டுமா!.. 

இரும்மா.. சுக்கு காபி ஒரு வாய் குடி!.. குளிருக்கு நல்லது.. குங்குமம் எடுத்துக்க தாமரை!..

அது சரிக்கா!.. மார்கழி..ல திருப்பாவை திருவெம்பாவை எல்லாம் படிக்கணும் தானே!..உங்க கிட்ட புத்தகம் இருக்கா?...

படிக்கிறது இருக்கட்டும்.. அதுமாதிரி நடக்கணும்.. திருப்பாவை திருவெம்பாவையின் நோக்கம் இறைவனை அடைறது மட்டும் இல்லை!..

அப்புறம்?..

இயற்கையை ரசிக்கிறது.. இயற்கையை நேசிக்கிறது..

இயற்கையை சுவாசிக்கிறது!..

அப்போ.. மார்கழி முதல் நாள்..ல இருந்து கோலமும் குதூகலமும் தான்!..

இயற்கையை நேசிப்போம்..

இயற்கையை சுவாசிப்போம்!.. 

* * *