சித்திரை விஷூ

ஸ்ரீ சாஸ்தா பஞ்சரத்னம்

சபரிமலையில் ஸ்வாமியின் சந்நிதி நடை திறந்து விழாக்கோலம் கொண்டிருக்கும் நன்னாள்.  ஸ்ரீதர்மசாஸ்தா மணிகண்டனாக அவதரித்த பங்குனி உத்திர திருநாளுக்குப் பின் சந்நிதானத்தில் விசேஷ வழிபாடுகள் நிகழும் காலம் சித்திரை விஷு எனப்படும் புண்ய தினம்.  

இந்த வேளையில், ஸ்ரீ ஐயப்பனை வழிபட்டு சகல வளத்தையும் அடைவோம்.

ஸ்ரீ ஹரிஹரபுத்திரன்

சாஸ்தா - சாத்தன் என்றும் ஐயனார் என்றும் வழங்கப்படும் திருப்பெயர்கள் ஸ்ரீஐயப்ப ஸ்வாமியைக் குறிப்பவை. சாத்தன் என்றால் தலைவன் என்பது பொருள். சாத்தன் எனும் சொல்லே வடமொழியில் சாஸ்தா எனப்படுகின்றது.

ஸ்ரீ ஐயப்பன் - சிவபெருமானின் புத்திரன் என்பதைக் குறித்து திருநாவுக்கரசு சுவாமிகள் அருளிய திருப்பாசுரம் இதோ... 

பார்த்தனுக்கு அருளும்வைத்தார் பாம்பரை யாடவைத்தார்
சாத்தனை மகனா வைத்தார் சாமுண்டி சாமவேதங்
கூத்தொடும் பாடவைத்தார் கோளராமதிய நல்ல
தீர்த்தமுஞ் சடைமேல் வைத்தார் திருப்பயற்றூரனாரே!... (4/32/4)

                                                                                                     - திருநாவுக்கரசர் தேவாரம்.

தர்ம சாஸ்தா, கல்யாண சாஸ்தா, பிரம்ம சாஸ்தா, ஞான சாஸ்தா, மகா சாஸ்தா, மோஹன சாஸ்தா, வீர சாஸ்தா, வேத சாஸ்தா - என விளங்கும் பூதநாத சுவாமியே!  

உன்னருளால் எங்கள் வாழ்வில் எல்லா வளமும் நலமும் பெருக வேண்டும்!...

ஸ்ரீ சாஸ்தா பஞ்ச ரத்னம்

லோகவீரம் மஹா பூஜ்யம் ஸர்வ ரக்ஷாகரம் விபும்
பார்வதீ ஹ்ருதயா னந்தம் சாஸ்தாரம் ப்ரணமாம் யஹம் -1
 
விப்ர பூஜ்யம் விச்வ வந்த்யம் விஷ்ணு சம்போ ப்ரியம் ஸுதம்
க்ஷிப்ர ப்ரஸாத நிரதம் சாஸ்தாரம் ப்ரணமாம் யஹம் - 2
 
மத்த மாதங்க கமணம் காருண்யாம்ருத பூரிதம்
ஸர்வ விக்ன ஹரம் தேவம் சாஸ்தாரம் ப்ரணமாம் யஹம் - 3
 
அஸ்மத் குலேச்வரம் தேவம் அஸ்மத் சத்ரு விநாசனம்
அஸ்மதிஷ்ட ப்ரதா தாரம் சாஸ்தாரம் ப்ரணமாம் யஹம் - 4
 
பாண்ட்யேச வம்ச திலகம் கேரளே கேளி விக்ரஹம்
ஆர்த்தத்ராண பரம் தேவம் சாஸ்தாரம் ப்ரணமாம் யஹம் - 5
 
பஞ்ச ரத்னாக்ய மேதத்யோ  நித்ய ஸுத்தப் படேந் நர:
தஸ்ய ப்ரசன்னோ பகவான் சாஸ்தா வசதி மானஸே:

 ஸ்ரீ சாஸ்தா நமஸ்கார ஸ்லோகம்

பூதநாத ஸதாநந்த ஸர்வபூத தயாபர
ரக்ஷ ரக்ஷ மஹாபாஹோ சாஸ்த்ரே துப்யம் நமோ நம:


ஸ்ரீ சாஸ்தா தியான ஸ்லோகம்

ஆச்யாம கோமள விசால தனும் விசித்ரம்
வாஸோ வஸானம்  அருணோத் பல வாம ஹஸ்தம்
உத்துங்க ரத்ன மகுடம் குடிலாக்ர கேசம்
சாஸ்தாரம்  இஷ்டவரதம் சரணம் ப்ரபத்யே:

ஓம் ஸ்வாமியே சரணம் ஐயப்பா!...

பம்பையில் ஆராட்டு

சபரிமலை பங்குனி உத்திரத் திருவிழா!

சபரிமலையில் மண்டல பூஜை, மகரவிளக்கு பூஜைகளைப் போலவே - பத்து நாட்கள் நடைபெறும் பங்குனி உத்திரத் திருவிழாவும் பிரசித்தி பெற்றது.

அந்த வகையில் இந்த ஆண்டு கடந்த 18-ம் தேதி அன்று காலை பத்து மணி அளவில் ஸ்ரீகோயில் முன் மண்டபத்தில் தந்திரிகளின் கொடிப்பட்ட பூஜை முடிந்ததும் மேளம் தாளம் முழங்க கொடிப்பட்டம் பவனியாக வந்தது.

நெற்றிப் பட்டத்துடன் அலங்காரமாக விளங்கிய யானை கொடிமரம் முன் வந்து நிற்க பக்தர்களின் சரண கோஷ முழக்கத்துடன் தந்திரி கண்டரரு ராஜீவரரு தங்கக் கொடிமரத்தில் கொடியேற்றினார். 

கொடியேற்றத்துடன் பங்குனி உத்திரத் திருவிழா தொடங்கியது.

அன்று முதல் ஒன்பதாம் நாள் திருவிழா வரை தினமும் உச்சபூஜைக்கு முன்னோடியாக உற்சவபலி,  இரவு அத்தாழபூஜைக்கு பின்னர் ஸ்ரீபூதபலி ஆகியன நடைபெற்றன. ஐந்தாம் திருவிழா முதல் தினமும் இரவு ஒன்பது மணிக்கு அலங்கரிக்கப்பட்ட யானையின் மீது ஸ்வாமி  எழுந்தருளினார்.

ஸ்வாமியின் பிறந்த நாளான உத்திரத்தையொட்டி ஸ்ரீகோயில் முழுவதும் மலர்களால் அலங்கரிக்கப்பட்டிருந்தது.

ஒன்பதாம் நாளான 26-ஆம் தேதி பள்ளிவேட்டைக்காக ஸ்வாமி சரங்குத்திக்கு எழுந்தருள - நள்ளிரவில் சரங்குத்தியில் பள்ளிவேட்டை நடைபெற்றது. அதன் பின்னர் ஸ்ரீகோயிலுக்கு எழுந்தருளிய ஸ்வாமி ஸ்ரீகோயில் முன்புறம் உள்ள மண்டபத்தில் பள்ளி கொண்டார். 

நேற்று 27-ஆம் தேதி அதிகாலை ஐந்து மணிக்கு நடை திறந்து கோயிலுக்குள் ஸ்வாமி எழுந்தருளும் நிகழ்ச்சி நடைபெற்றது. அதை தொடர்ந்து நிர்மால்ய தரிசனம் கணபதி ஹோமம் வழக்கமான நெய்யபிஷேகம் மற்றும் ஆராட்டு பலி பூஜைகள் நடைபெற்றன. 

காலை ஏழு மணியளவில் நடை அடைக்கப்பட்டது. பம்பையில் ஆராட்டுக்காக யானை மீது ஸ்வாமி மேள தாள வாத்திய முழக்கத்துடன் பக்தர்கள் புடை சூழ, பம்பை  ஆற்றுக்கு எழுந்தருளினார்.

மதியம் 12.30 மணி அளவில் பம்பை நதிக்கரையை வந்தடைந்ததும் பம்பை திருவேணி சங்கமத்தில் ஆராட்டு நடைபெற்றது. ஸ்வாமிக்கு மஞ்சள் காப்பு நடைபெற்றது. தந்திரியும், பூஜாரிகளும் ஸ்வாமி விக்ரகத்துடன் பம்பையில் மூழ்கி எழுந்தனர்.  

மாலை மூன்று மணி வரை பம்பை கணபதி கோயிலில் எழுந்தருளிய ஸ்வாமியை பரவசத்துடன் பக்தர்கள் தரிசனம் செய்தனர். பம்பையில் தரிசனம் நிறைவுற்ற பின்,  பறை வழிபாடு சமர்ப்பணம் நடைபெற்றது.

அதன்பின் - சன்னிதானத்துக்கு ஸ்வாமி எழுந்தருளினார். பத்து மணி அளவில் சன்னிதானம் வந்தடைந்ததும் சிறப்பு பூஜை தீபாராதனைகளுடன் திருக்கொடி இறக்கப்பட்டதும் பங்குனி உத்திரத் திருவிழா நிறைவு பெற்றது.

திருவிழாவையொட்டி - நெய்அபிஷேகம், களபாபிஷேகம், சகஸ்ரகலச  அபிஷேகம்,  உதயாஸ்தமன பூஜை, படிபூஜை -  என  பூஜைகள் நடந்துள்ளன.

சித்திரை விஷூ திருவிழாவினை முன்னிட்டு ஏப்ரல் ஒன்பதாம் தேதி மீண்டும் திருநடை திறக்கப்படும்.

பூதநாத சதானந்த சர்வ பூத தயாபர

ரக்ஷ ரக்ஷ மஹாபாஹோ சாஸ்த்ரே துப்யம் நமோ நம: 

ஓம் ஸ்வாமியே சரணம் ஐயப்பா!...