தில்லையில் குடமுழுக்கு

தில்லைத் திருச்சிற்றம்பலம் என்று புகழப்படுவது - சிதம்பரத்திலுள்ள
ஸ்ரீ சிவகாமசுந்தரி உடனாகிய ஸ்ரீ நடராஜப்பெருமான் திருக்கோயில்.

இத்திருக்கோயிலுக்கு இன்று காலை 7.00 மணிக்கு மேல் 8. 30 மணிக்குள் ரிஷப லக்னத்தில் மகா கும்பாபிஷேகம் நிகழ இருக்கின்றது.

நான்கு ராஜ கோபுரங்களுடன் ஒன்பது திருவாயில்களையும் 15 பிரதான சந்நிதிகளையும் உடையது - இத்திருக்கோயில்.

1987-ல் நான்கு ராஜகோபுரங்களுக்கும் அனைத்து சந்நிதிகளுக்கும் மகா கும்பாபிஷேகம் நடந்தது.

அதன்பின் - தற்போது நிகழ இருக்கும் திருக் குடமுழுக்கிற்கான நிகழ்ச்சிகள்
கடந்த 22/4 திங்கள் அன்று காலை கூஷ்மாண்ட ஹோமத்துடன் தொடங்கியது.

தொடர்ந்து மஹாகணபதி ஹோமம் நவக்ரக ஹோமங்கள் நடந்தன.

23/4 அன்று அனுக்ஞை பூஜையுடன் தனபூஜை மற்றும் வாஸ்து சாந்தி ஹோமங்கள் நடந்தன.

24/4 அன்று ம்ருத்சங்க்ரஹணம், அங்குர பூஜை தொடர்ந்து ரக்ஷாபந்தனம் எனும் காப்பு கட்டுதல் நடந்தது.

25/4 அன்று காலையில் மந்த்ர ஜபத்துடன் கலாகர்ஷணம்.  கும்பஸ்தானம் செய்யப்பட்டு தீபாராதனை நடந்தது.

25/4 அன்று மாலையில் முதல் கால யாக பூஜை நடை பெற்றது.

26/4 அன்று இரண்டாம் மூன்றாம் கால யாக பூஜைகளும்
27/4 அன்று நான்காம் ஐந்தாம் கால யாக பூஜைகளும்

28/4 அன்று ஆறாம் ஏழாம் கால யாக பூஜைகளும்
29/4 அன்று எட்டாம் ஒன்பதாம் கால யாக பூஜைகளும்

30/4 அன்று பத்து, பதினொன்று மற்றும் பனிரண்டாம் கால யாக பூஜைகளும் நடை பெற்றன.

இணையத்தில் படங்களை வழங்கியோர்க்கு நன்றி

இன்று (1/5) வெள்ளிக் கிழமை காலையில் -
தம்பதி பூஜை, வடுக பூஜை, கன்யா பூஜை ஸூவாஸினி பூஜை, கோ பூஜை, கஜ பூஜை, அஸ்வ பூஜை இவற்றுடன் கும்பங்களின் யாத்ரா தானம் நடைபெறும்.

தொடர்ந்து - காலை 7.00 மணிக்கு மேல் 8. 30 மணிக்குள் ரிஷப லக்னத்தில்

ஸ்ரீ சிவகாம சுந்தரி சமேத ஸ்ரீமந் நடராஜப் பெருமான் சித்சபை மஹா கும்பாபிஷேகமும்

அதே வேளையில் - ராஜசபை எனப்படும் ஆயிரங்கால் மண்டபத்திற்கும் நான்கு ராஜகோபுரங்களுக்கும் மஹாகும்பாபிஷேகம் சிறப்பாக நிகழ இருக்கின்றது.

இன்றைய தினம் மாலையில் ஸகோபுரத் திருக்காட்சி.

தெருவடைச்சான் எனும் மஹா ரிஷப வாகனத்தில் ஸ்வாமி எழுந்தருள பஞ்ச மூர்த்தி வீதியுலா.

2/5 அன்று காலை சித்சபையிலிருந்து தேருக்கு எழுந்தருளும் யாத்ரா தானம்.

கும்பாபிஷேகத்தை அனுசரித்த சிறப்பு தேர்த்திருவிழா நடைபெறும்.

இரவு - ஆயிரங்கால் மண்டபத்தில் - ஏக தின லட்சார்ச்சனை.

3/5 அன்று அதிகாலை திருமஞ்சனம். ஸ்வர்ண மஹா அபிஷேகம்.
மதியத்தில் - ஞானாகாச சித்சபா பிரவேசம் எனும் மஹா தரிசனத் திருக்காட்சி.

4/5 அன்று இரவு பஞ்ச மூர்த்திகள் எழுந்தருளல். முத்துப் பல்லக்கில் வீதியுலா.

மஹாகும்பாபிஷேக நிகழ்வினை அனுசரித்து யாகசாலை காலங்களின் போது வேதபாராயணங்கள், நாகஸ்வர இன்னிசை, ஓதுவாமூர்த்திகளின் பண்ணிசை, திருமுறை பாராயணங்கள், இன்னிசை நிகழ்ச்சிகள், உபந்நியாஸங்கள், நாம சங்கீர்த்தனங்கள் மற்றும் பரத நாட்டிய நிகழ்ச்சிகள் நடைபெறுகின்றன.

உபயதாரர்களின் அன்னதான வைபவமும் உண்டு.

மஹாகும்பாபிஷேகத்தினைத் தொடர்ந்து 48 நாட்களுக்கு மண்டலாபிஷேகம்.

சிறப்பு யாக பூஜைகளுடனும் அபிஷேக ஆராதனைகளுடனும் அன்னதான நிகழ்வுகளுடனும் நடைபெறும்..

அளவிடற்கரிய பெருமைகளை உடையது - தில்லையம்பதி.

சைவ சமயாச்சார்யர்களாகிய திருநாவுக்கரசர், திருஞான சம்பந்தர், சுந்தரர், மாணிக்க வாசகர் - எனும் பெருமக்களால் போற்றித் துதிக்கப்பட்ட பெருங் கோயில்.

இன்னும் -  வள்ளலார் போன்ற அருளாளர்களால் துதிக்கப்பட்ட திருத்தலம்..

நாளும் கோளும் கூடியிருக்கும் நல்லவேளையில் 

நல்லதொரு திருக்குடமுழுக்கு நிகழ்வுகளை சிந்தித்திருப்போமாக!..

அருட்ஜோதி தெய்வம் எனை ஆண்டு கொண்ட தெய்வம்

அம்பலத்தே ஆடுகின்ற ஆனந்த தெய்வம்

பொருட்சாரும் மறைகளெல்லாம் போற்றுகின்ற தெய்வம்

போதாந்த தெய்வம் உயர் நாதாந்த தெய்வம்

இருட்பாடு நீக்கி ஒளி ஈந்தருளும் தெய்வம்

எண்ணியநான் எண்ணியவா றெனக்கருளும் தெய்வம்

தெருட்பாடல் உவந்தெனையும் சிவமாக்கும் தெய்வம்

சித்சபையில் விளங்குகின்ற தெய்வமதே தெய்வம்!..

-: அருட்பிரகாச வள்ளலார் :-

அரியானை அந்தணர்தம் சிந்தையானை 

அருமறையின் அகத்தானை அணுவை யார்க்கும் 

தெரியாத தத்துவனைத் தேனைப் பாலைத் 

திகழ்ஒளியைத் தேவர்கள் தங்கோனை மற்றைக் 

கரியானை நான்முகனைக் கனலைக் காற்றைக் 

கனைகடலைக் குலவரையைக் கலந்து நின்ற 

பெரியானைப் பெரும்பற்றப் புலியூரானைப் 

பேசாத நாளெல்லாம் பிறவா நாளே!.. 

-: திருநாவுக்கரசர் :-

ஓம் நம சிவாய சிவாய நம ஓம்

திருச்சிற்றம்பலம் 

* * *

தில்லையில் திருவிழா

அம்பலத்தரசன். ஆடவல்லான். ஆனந்தக்கூத்தன்.

மூவரும் தேவரும் காணா முக்கண் முதல்வன்.

நால்வரும் பாடிய நற்றமிழின் நாயகன்.

பஞ்சவரில் பார்த்தனுக்கு அருள் செய்து, படைக்கலமாக பாசுபதம் வழங்கிய பரமன்.

தான் வீற்றிருக்கும் மாமலையினை மமதையுடன் பெயர்த்தெடுக்க முயன்ற ராவணனை - மன்னித்துப் பெருங்கருணையுடன் - பேரும், நாளும், வாளும் வழங்கிய வள்ளல்.

வியாக்ரபாத முனிவரின் மகன் உபமன்யு, பசித்து அழுதபோது  - தேவ லோகத்திலிருந்து காமதேனுவையோ நந்தினியையோ - பாலுக்காக அனுப்பாமல் பாற்கடலையே அனுப்பி வைத்த பரமதயாளன்.

ஞானசம்பந்தப் பெருமான்  - திருப்பதிகம் பாடும்போது  - தன்  கரங்களால் தாளமிட - ''..சம்பந்தனின் பிஞ்சுக்கரங்கள்  வலிக்குமே!..'' - என்று மனம் துடித்து வெண்கலத் தாளம் கூட இல்லை - பொற்றாளம் வழங்கி மகிழ்ந்த பெருமான்.

நாவுக்கரசர் - முதிர்ந்த வயதில்  - தலங்கள் தோறும் யாத்திரை செய்தபோது -  பசி மயக்கத்துடன் தளர்ந்த வேளையில்  - தயிர் சோறும் நீரும் சுமந்து வந்து,   பரிமாறி - களைப்பு  நீக்கிய கருணைக் கடல்.

சுந்தரர் - திருஒற்றியூரில் சங்கிலி நாச்சியாருக்குக் கொடுத்த வாக்கினை மீறியதால் - அவருடைய கண்களைப் பறித்தாலும் திருஆரூரில் அவர் பொருட்டு - பரவை நாச்சியாரின் இல்லம் தேடி நடந்து - இல்லறத்தை நல்லறமாக ஆக்கி வைத்த அருளாளன். 

மாணிக்கவாசகரின் பொருட்டு - காட்டு நரிகளைக் கவின்மிகு குதிரைகளாக ஆக்கியதோடு அல்லாமல் - அவற்றை ஓட்டிக் கொண்டு மாட மாமதுரையின் திருவீதிகளில் வலம் வந்து - மன்னன் அளித்த மாலை மரியாதைகளை ஏற்றுக் கொண்டு மறுநாளே - அவனிடம் பிரம்படி என்று ஏற்றருளிய சோமசுந்தரன்.

உலகுக்கெல்லாம் படியளக்கும் பரமசிவம். ஆனாலும் உதிர்ந்த பிட்டு உண்ண ஆசை கொண்டு - வந்தியம்மையின் அன்பின் முன் கையேந்தி நின்ற நிமலன்.

ஒன்றா!.. இரண்டா!.. சொல்லிக் கொண்டேயிருக்கலாம்!... 

இப்படியெல்லாம்  - அன்பர்களுடன் ஆடியவன்!.. அன்பர்களை ஆட்டி வைத்தவன்!.. அவர்தம் அல்லல் எல்லாம் ஓட்டி வைத்தவன்!..  ஆனந்தக் கோலாகலத் திருநடம் காட்டி வைத்தவன்!..

நம் பொருட்டு  - 13/7 அன்று தில்லைத் திருச்சிற்றம்பலம் எனும் சிதம்பரத்தில் ஆனித் தேரோட்டம் - நிகழ்ந்துள்ளது.

''.. நீ வரா விட்டால் என்ன!... நானே உன்னைத் தேடி வருகின்றேன்!..'' - என வாஞ்சையுடன் வள்ளல் பெருமான் தேரில் - திருவீதி எழுந்தருள - ஆயிரம் ஆயிரமாய் அன்பர்கள் ஐயனைக் கண்டு   இன்புற்றிருக்கின்றனர்.

5/7/2013 அன்று காலை கொடியேற்றத்துடன் தொடங்கிய பெருவிழாவில் - ஒவ்வொரு நாள் காலையிலும் இரவிலும் ஐயனும் அம்பிகையும் ஆனிப் பொன்மஞ்சம் , சந்திர பிரபை, சூர்ய பிரபை, பூதம் , யானை , கயிலாயம் - என மகத்தான  வாகனங்களில் எழுந்தருளி -

விநாயகர், முருகன், சண்டிகேசர் - சூழ  -  திருவீதி வலம் கோலாகலமாக நிகழ்ந்துள்ளது.

ஒன்பதாம் நாள் -  ஆனித் தேரோட்டம். 

நடராஜப்பெருமான் - சிவகாமசுந்தரியுடன் திருத்தேரில் எழுந்தருளி நான்கு வீதிகளில் உலா வந்த பின்னர் இரவில் ராஜசபை எனும் ஆயிரங்கால் மண்டபத்தில் தங்குவார். 

பத்தாம் நாளாகிய உத்திரத்தன்று வைகறையில் ஆனித் திருமஞ்சன அபிஷேகம் விமரிசையாக நடைபெறும்.

இன்று (14/7) ஆனி உத்திரம் - நடராஜப்பெருமானுக்கு -  திருமஞ்சனம்.

கோயில் - எனப்படும் திருச்சிற்றம்பலத்தின் ஆயிரங்கால் மண்டபத்தில் - யாகசாலை ஹோமபூஜைகளுடன்  - அற்புதமான மஹாபிஷேகம் நிகழ்வுறும். 

அனைத்து திரவியங்களாலும் அபிஷேகம் நிறைவுற்ற பின்னர் பலவிதமான மலர்களால் புஷ்பாஞ்சலியும்  -

அலங்கார மூர்த்தியாகத் திகழும் எம்பெருமானுக்கு அர்ச்சனைகளும் மஹா தீப ஆராதனையும் நிகழ்வுறும்.  

அன்பர்கள் இன்புறும் வண்ணம்  - திங்களன்று முத்துப்பல்லக்கில் வீதியுலா. அதன் பின் -

எம்பெருமானும் சிவகாமசுந்தரியும் - ஆனந்த நடனம் புரிந்தபடியே மீண்டும் சித்சபைக்கு எழுந்தருள்வர்.

சகல சிவாலயங்களிலும் - நடராஜர் சந்நிதியில் ஆனித் திருமஞ்சன வைபவம் விசேஷமாகக் கொண்டாடப்படும்.

சைவநெறிகளின்படி கோயில் என்றால் -  தில்லை திருச்சிற்றம்பலம் தான்!..

எல்லா சிவாலயங்களின் கலைகளும் இங்கே ஒருங்கிணைவதாக ஐதீகம்.

திருச்சிற்றம்பலம் தான்  - சித்சபை.  நடராஜப் பெருமானும் சிவகாமசுந்தரியும் வீற்றிருக்கும் கருவறை. பெருமானின் வலப்புறம் சிதம்பர ரகசியம். பொன் வேய்ந்திருப்பதால் பொன்னம்பலம் எனத் திருப்பெயர். 

எம்பெருமான் - நடராஜ மூர்த்தி என உருவம், சிதம்பர ரகசியம் என அருவம், ஸ்படிகலிங்கம் என அருவுருவம் - ஆகிய மூன்று நிலைகளில் இங்கே திகழ்கின்றனர். 


இந்த நல்ல நாளில் - அருளாளர்களாகிய நம் முன்னோர் - தம் திருவாக்கில் அருளியபடி ஆனந்தக்கூத்தனை- இதயக் கமலத்தில் தரிசித்து இன்புறுவோம்!. 

திருஞானசம்பந்தர் அருளிய திருக்கடைக்காப்பு

செல்வ நெடுமாடஞ் சென்று சேணோங்கிச்
செல்வ மதிதோயச் செல்வம் உயர்கின்ற
செல்வர் வாழ்தில்லைச் சிற்றம்பலமேய
செல்வன் கழலேத்துஞ் செல்வம் செல்வமே!..1/80/5.

திருநாவுக்கரசர் அருளிய தேவாரம்

குனித்தபுருவமும் கொவ்வைச் செவ்வாயிற் குமிண் சிரிப்பும் 
பனித்த சடையும் பவளம்போல் மேனியிற் பால்வெண்ணீறும்
இனித்த முடைய எடுத்த பொற்பாதமுங் காணப்பெற்றால்
மனித்தப் பிறவியும் வேண்டுவதே இந்தமாநிலத்தே!..4/81/4.

சுந்தரர் அருளிய திருப்பாட்டு

மடித்தாடும் அடிமைக்கண் அன்றியே மனனே நீ வாழுநாளும்
தடுத்தாட்டித் தருமனார் தமர்செக்கிலிடும்போது தடுத்தாட்கொள்வான்
கடுத்தாடும் கரதலத்தில் தமருகமும் எரிஅகலும் கரிய பாம்பும்
பிடித்தாடிப் புலியூர்ச் சிற்றம்பலத்தெம் பெருமானைப் பெற்றாமன்றே!..7/90/1.

மாணிக்கவாசகர் அருளிய  திருவாசகம்

நல்கா தொழியான் நமக்கென்று உன் நாமம் பிதற்றி நயனநீர்
மல்கா வாழ்த்தா வாய் குழறா வணங்கா மனத்தால் நினைந்துருகிப்
பல்கால் உன்னைப் பாவித்துப் பரவி பொன்னம்பலம் என்றே
ஒல்கா நிற்கும் உயிர்க்கிரங்கி அருளாய் என்னை உடையானே!.. 8/21/10.

திருமூலர் அருளிய திருமந்திரம் 

தேவரோடாடித் திருஅம் பலத்தாடி 
மூவரோடாடி முனிகணத்தோடாடிப்
பாவினுள் ஆடிப் பராசத் தியில்ஆடிக்
கோவிலுள் ஆடிடும் கூத்தப் பிரானே!.. 9/14/9.

சேந்தனார் அருளிய திருப்பல்லாண்டு 

பாலுக்குப் பாலகன் வேண்டி அழுதிடப் பாற்கடல் ஈந்தபிரான்
மாலுக்குச் சக்கரம் அன்றருள் செய்தவன் மன்னிய தில்லைதன்னுள்
ஆலிக்கும் அந்தணர் வாழ்கின்ற சிற்றம்பலமே இடமாகப்
பாலித்து நட்டம் பயிலவல்லானுக்கே பல்லாண்டு கூறுதுமே!.. 9/29/9.

வள்ளலார் அருளிய திருஅருட்பா

அருட்ஜோதி தெய்வம் எனை ஆண்டு கொண்ட தெய்வம்
அம்பலத்தே ஆடுகின்ற ஆனந்த தெய்வம்
பொருட்சாரும் மறைகள் எல்லாம் போற்றுகின்ற தெய்வம்
போதாந்த தெய்வம் உயர் நாதாந்த தெய்வம்
இருட்பாடு நீக்கி ஒளி ஈந்தருளும் தெய்வம்
எண்ணிய நான் எண்ணியவாறெனக் கருளும் தெய்வம்
தெருட்பாடல் உவந்தெனையும் சிவமாக்கும் தெய்வம்
சித்சபையில் விளங்குகின்ற தெய்வம் அதே தெய்வம்!

தென்னாடுடைய சிவனே போற்றி!..

எந்நாட்டவர்க்கும் இறைவா போற்றி!..

சிவாய திருச்சிற்றம்பலம்!..

ஆனந்தம் தரும் ஆனி

சூரியன்  - தை முதல் நாளில் தெற்கிலிருந்து வடக்கு நோக்கி தொடங்கிய  உத்ராயண பயணம் நிறைவுறும் இனிய மாதம் ஆனி.

கோடைக் காலத்தின் கடைசி மாதமாகிய ஆனியில் -  சைவ, வைணவ திருக்கோயில்களில் பற்பல புண்ணிய விசேஷங்கள் நிகழ்கின்றன.

ஆனி மாதத்தில் தான்   தில்லைச் சிற்றம்பலத்தில் ஆடவல்லானாகிய எம்பெருமானுக்குத் திருமஞ்சனம் நிகழ்வுறுகின்றது. 

அதே நாளில் திருஆரூரில் தியாகராஜப்பெருமானுக்கும் சிறப்பு அபிஷேக ஆராதனைகள் நிகழ்வுறும். 

அன்றைய தினம்  - தில்லையில்  நடராஜப்பெருமானும் திருஆரூரில் தியாகராஜப் பெருமானும் தேரில் எழுந்தருளி திருவீதி பவனி வருவர். தில்லையில் ஆனந்த நடனம் எனில் திருஆரூரில் அஜபா நடனம் என்பது திருக்குறிப்பு.

தில்லையை - பொற்கோயில் என்றும் திருஆரூரை - பூங்கோயில் என்றும் சான்றோர் குறிப்பிடுவர். 

தில்லைத் திருச்சிற்றம்பலமாகிய சிதம்பரத்தில், திருமஞ்சனப் பெருவிழா பத்து நாட்கள் கொண்டாடப்படுகின்றது. திருமஞ்சனத் திருவிழாவினைத் தரிசிக்கும் கன்னியர்  விரைவில் கல்யாணக் கோலம் கொள்வர் என்பதும் சுமங்கலிகள் மாங்கல்ய பாக்கியம் பெறுவர் என்பதும் ஐதீகம்.

தில்லையிலும் திருஆரூரிலும் போலவே -

எல்லா சிவாலயங்களிலும் ஸ்ரீநடராஜப்பெருமானுக்கும்  சிவகாமசுந்தரிக்கும்  திருமஞ்சன வைபவத்தினை சிறப்புடன் நடத்தி அன்பர்கள் மகிழ்கின்றனர்.

மேலும் -  ஆனி மாதத்தில் கோலக்குமரன் குடிகொண்டுள்ள பழனியில்,   அன்னாபிஷேகம் நடைபெறுகின்றது.  

கேட்டைநட்சத்திரத்தன்று - மலைக்கோயிலில் உச்சி காலத்தில் உற்சவ மூர்த்திக்கும் , மூல நட்சத்திரத்தன்று  - திருஆவினன்குடியாகிய அடிவாரத் திருக்கோயிலில்  மாலை வேளையில் குழந்தை வேலாயுதப் பெருமானுக்கும்  அன்னாபிஷேகம் நிகழ்கின்றது. 

பழனியில் - ஜேஷ்டாபிஷேகம் எனும் ஆனித் திருமஞ்சனம் - விசாக நட்சத்திரத்தில் நடைபெறும். 

ஆனி மாத பெளர்ணமியை அனுசரித்து - காரைக்காலில் மாங்கனித் திருவிழா வெகு சிறப்புடன் நடைபெறுகின்றது.

கையிலாய நாதர் பிட்க்ஷாடனராக வீதியுலா வரும் போது நேர்த்திக் கடனாக மாம்பழங்களை வீசி மக்கள் இன்புறுகின்றனர்.

ஆனி - மக நட்சத்திரத்தன்றுதான் தில்லை நடராஜப் பெருமானுடன் மாணிக்க வாசகர் ஜோதியாக இரண்டறக் கலந்தார். ஆனிமாதத்தின் தேய்பிறை ஏகாதசி அன்று - பெருமாளைத் திரிவிக்ரமப் பெருமானாக வழிபட, குருநிந்தனை செய்ததும், பொய் சாட்சி கூறியதுமான பாவ வினைகள் விலகும் என்பர். 

ஆனி மாத அமாவாசையை அடுத்து வரும் ஒன்பது நாட்களும் ஆஷாட நவராத்திரி எனப்படும்.  பொதுவாக ஆஷாட நவராத்திரி வடமாநிலங்களில்  கொண்டாடப்படுகின்றது.

தஞ்சை பெரிய கோயிலில் எழுந்தருளியுள்ள ஸ்ரீவராஹி அம்மனுக்கு ஆஷாட நவராத்திரி வெகு சிறப்பாக அனுசரிக்கப்பெறுகின்றது. 

ஒன்பது நாட்களும் காலையில் ஸ்ரீவராஹி அம்மனுக்கு  மூல மந்திரத்துடன் யாகசாலை பூஜையும்,  மாலையில் மகாஅபிஷேகத்துடன் அலங்காரமும் மகாதீப ஆராதனையும் நிகழும்.  

ஒன்பது நாளும் ஒன்பது வகையான அலங்காரத்துடன் திகழும் அன்னை வராஹி - பத்தாம் நாள் அன்று,

கோயில்யானை முன் செல்ல, செண்டை வாத்யங்களும் சிவகண கயிலாய வாத்தியங்களும் சேர்ந்திசைக்க - கோலாகலமாக நான்கு ராஜவீதிகளிலும் எழுந்தருள்கின்றாள். 

திருச்சி - உறையூரில்,   வெயில், மழை, பனி, காற்று  - என எதுவானாலும் தாங்கிக்கொண்டு வெட்டவெளியில் வீற்றிருக்கும் ஸ்ரீவெக்காளி அம்மனுக்கு ஆனி பெளர்ணமியில் மாம்பழ அபிஷேகம் நடத்தப்படுகின்றது. 

மலைக்கோட்டை ஸ்ரீதாயுமானஸ்வாமிக்கும் மட்டுவார்குழலி அம்பிகைக்கும் - நேர்த்திக் கடனாக வாழைத்தார்களை அன்பர்கள் செலுத்துவதும் ஆனி பெளர்ணமியில் தான். 

அம்பலமாகிய தில்லையில் ஸ்ரீநடராஜனுக்கு திருமஞ்சனம் என்றால் - 

அரங்கமாகிய ஸ்ரீரங்கத்தில் ரங்கராஜனுக்கு ஆனியில் ஜேஷ்டாபிஷேகம் நடத்தப்படுகின்றது.  கேட்டை நட்சத்திரமே ஜேஷ்டா எனப்படுவது.

கங்கையினும் புனிதமாய காவிரியிலிருந்து தங்கக்குடத்தில் தீர்த்தம் எடுத்து யானை மேல் வலம் வந்து பெருமாளுக்கு அபிஷேகம் செய்யப்படும். அதன் தைலக்காப்பு நடைபெறும். இவ்வேளைகளில் அரங்கனின் திருமுக தரிசனம் மட்டுமே!. 

அதன்பின் - திருஅரங்கனுக்கு பலவகையான பழவகைகளுடன் தேங்காய்த் துருவலும் நெய்யும் நிவேத்யம் செய்யப்படும். அடுத்த வெள்ளியன்று ஸ்ரீரங்க நாயகிக்கு இதேபோல ஜேஷ்டாபிஷேக வைபவம் சிறப்புடன் நடைபெறும்.

இவ்வண்ணமாக - 

ஆனி மாதத்தில் மங்கள வைபவங்களைக் கண்டருளும் -

நடராஜனும் ரங்கராஜனும் 

நம் அல்லல்களைத் தீர்த்து வைத்து 

ஆனந்தமான வாழ்வினை அருள்வார்களாக!...