திருப்புகழ்

  

நாடும் வீடும்

நலம் பெற வேண்டும்

பகையும் பிணியும்

தொலைந்திட வேண்டும்..

***

இன்று

பங்குனி 9 

வெள்ளிக்கிழமை

திருத்தலம்

திருத்தணிகை

தனத்தன தானம் தனத்தன தானம்

தனத்தன தானம் ... தனதான

வினைக்கின மாகுந் தனத்தினர் வேளம்

பினுக்கெதி ராகும் ... விழிமாதர்

மிகப்பல மானந் தனிற்புகு தாவெஞ்

சமத்திடை போய்வெந் ... துயர்மூழ்கிக்

கனத்தவி சாரம் பிறப்படி தோயுங்

கருக்குழி தோறுங் ... கவிழாதே

கலைப்புல வோர்பண் படைத்திட வோதுங்

கழற்புக ழோதுங் ... கலைதாராய்

புனத்திடை போய்வெஞ் சிலைக்குற வோர்வஞ்

சியைப்புணர் வாகம் ... புயவேளே

பொருப்பிரு கூறும் படக்கடல் தானும்

பொருக்கெழ வானும் ... புகைமூளச்

சினத்தொடு சூரன் கனத்திணி மார்பந்

திறக்கம ராடுந் ... திறல்வேலா

திருப்புக ழோதுங் கருத்தினர் சேருந்

திருத்தணி மேவும் ... பெருமாளே..

-: அருணகிரிநாதர் :-

நன்றி கௌமாரம்

 

வினைத்திரள் பெருக்கிடும் 

தனங்களையும் 

மன்மதனின் கணைக்கு ஒப்பான

கண்களையும் உடைய 

கணிகையர் மீது வைத்த ஆசையால்

பலவான அவமானங்களில் புகுந்து 

விரும்பிய போகங்களில் மூழ்கி 

பெருங் கவலை அடைந்து மீண்டும் 

கருக்குழிக்குள் நான் விழுந்திடாதபடி

இசைப் புலவர்கள் பாடுகின்ற உனது 

திருவடிப் புகழை நானும் பாடும்படியான 

ஞானத்தைத் தந்தருள்வாயாக..

 

கொடிய வில்லேந்திய குறவர் தம் 

குலக் கொடியாகிய வள்ளி நாயகியை

தினைப் புனத்தில் தேடிச் சேர்ந்தவனே..

அழகிய புயங்களை உடையவனே..

கிரெளஞ்ச மலை இரு கூறுகளாகும் படியும்,

பெருங்கடல் வற்றிக் காய்ந்திடவும், 

வானத்தில் பெரும்புகை மண்டிடவும்

கனத்த சூரனின் - திரண்ட மார்பு பிளக்கும்படியாக

கோபங்கொண்டு போர் புரிந்த மாவீரனே 

வேலாயுதப் பெருமானே..

திருப்புகழ் பாட வேண்டும் என்ற 

விருப்பத்துடன் அடியார்கள் 

கூடுகின்ற திருத்தணிகையில் 

வீற்றிருக்கும் பெருமாளே..

**

முருகா முருகா

முருகா முருகா

ஓம் நம சிவாய 

சிவாய நம ஓம்

***