நமசிவாய வாழ்க.. நாதன் தாள் வாழ்க..

நம சிவாய வாழ்க.. நாதன் தாள் வாழ்க..

நம சிவாய

பூ நாளும் தலை சுமப்ப - புகழ் நாமம் செவி கேட்ப - நா நாளும் நவின்றேத்தப் பெறலாமே நல்வினையே!..

வாழி அவன்தன் வளநாடு மகவாய் வளர்க்கும் தாயாகி

ஊழி உய்க்கும் பேருதவி ஒழியாய் வாழி காவேரி!..


திங்கள், டிசம்பர் 11, 2017

பாட்டுத் திறத்தாலே..

11 டிசம்பர் 1882
மகாகவி பிறந்த நாள்
பாட்டுத் திறத்தாலே இவ்வையகத்தைப் 
பாலிக்கின்ற எங்கள் மகாகவிக்கு 
இன்று பிறந்தநாள்..
***


காணி நிலம் வேண்டும் - பராசக்தி
காணி நிலம் வேண்டும் அங்கு 
தூணில் அழகியதாய் நன்மாடங்கள்
துய்ய நிறத்தினதாய் அந்தக்
காணி நிலத்திடையே ஓர்மாளிகை
கட்டித் தரல்வேண்டும் அங்கு
கேணிய ருகினிலே தென்னைமரம்
கீற்றும் இளநீரும்


பத்துப் பன்னிரண்டு தென்னைமரம்
பக்கத்திலே வேணும் நல்ல
முத்துச் சுடர்போலே நிலவொளி
முன்புவர வேணும் அங்கு
கத்துங் குயிலோசை சற்றேவந்து
காதிற்பட வேண்டும் என்றன்
சித்தம் மகிழ்ந்திடவே நன்றாயிளந்
தென்றல் வர வேணும்..


பாட்டுக் கலந்திடவே அங்கேயொரு
பத்தினிப் பெண்வேணும் எங்கள்
கூட்டுக் களியினிலே கவிதைகள்
கொண்டு தரவேணும் அந்தக்
காட்டு வெளியினிலே அம்மா நின்றன்
காவலுற வேனும் மென்றன்
பாட்டுத் திறத்தாலே இவ்வையகத்தைப் 
பாலித்திட வேண்டும்..
***


துன்பம் இனியில்லை சோர்வில்லை தோற்பில்லை
அன்பு நெறியில் அறங்கள் வளர்ந்திட
நல்லது தீயது நாமறியோம் அன்னை
நல்லது நாட்டுக.. தீயது ஓட்டுக!..
-: மகாகவி :-

வாழ்க பாரதி.. வாழ்க பாரதி!.. 
* * *

சனி, டிசம்பர் 09, 2017

சிவகங்கைப் பூங்கா 2

தஞ்சை மாநகரின்
சிவகங்கைப் பூங்காவைப் பற்றிய முதல் பதிவு இங்கே!..

நுழைவு வாயிலில் புறப்பட்டு அப்படியே வலமாக சுற்றி
நீர் சறுக்கு பகுதியைக் கடந்து நீச்சல் குளத்தின் அருகில் இருக்கின்றோம்..

வாருங்கள்.. பூங்காவைச் சுற்றி வரலாம்!..


பூங்கா என்றால் பூஞ்சோலை..
ஆனால், சும்மா இது ஒரு பெயருக்குத் தான்!..

இங்கே பூச்செடி ஒன்று கூட இல்லை என்பது குறிப்பிடத்தக்கது..

அடர்ந்து விரிந்திருக்கும் மரங்கள் மற்றும்
குறுஞ்செடிகளான குரோட்டன்ஸ் இவைகள் மட்டுமே!..

பூஞ்செடிகள் என்றால் பொதுமக்களிடமிருந்து மீட்டெடுத்து
பராமரிப்பது மிகவும் கடினம் தான்..

அதற்காக புல்வெளிகளைக் கூட - வெயிலைக் காரணம் காட்டி
பராமரிக்காமல் விட்டிருக்கின்றார்கள்...


மான்கள் வெட்டவெளி கட்டாந்தரையில் தான் சுற்றித் திரிகின்றன...
அவ்வப்போது கொட்டப்படும் புற்களை மேய்ந்து கொண்டிருக்கின்றன...

அவற்றின் வாழிடத்தில் பத்தடி அகலத்துக்குக் கூட பசும்புல் வெளி கிடையாது... அவற்றுக்கு முறையான நிழல் பரப்பு கூட இல்லை...

பெரிய தண்ணீர் தொட்டி நீரின்றி வறண்டு கிடக்க
சிறிய தொட்டியில் மட்டுமே தண்ணீர் இருக்கின்றது..

வறண்டு கிடக்கும் நீர்த்தொட்டி
அதுமட்டுமல்லாமல் இந்த மான்களுக்கு
முறையான பாதுகாப்பும் கிடையாது என்பது வேதனையான செய்தி..

இங்குள்ள மான்கள் அவ்வப்போது வெறிநாய்களால் கடித்துக் குதறப்படுகின்றன... பலத்த காயங்களுடன் உயிர் துறக்கின்றன..

பாவப்பட்ட ஜீவன்களாகிய இந்த மான்களுக்காக வேண்டிக் கொள்வோம்...



நீர் சறுக்கு அரங்கம்.. செயற்கை நீரூற்றுகள்.. இதற்கெல்லாம் கட்டணம்..

நீர் சறுக்கு அரங்கத்தின் வெளிப்புறம் மேற்காக சற்று நடந்தால் சிவகங்கைக் குளத்தின் முழு அழகையும் காணலாம்..


இங்கிருந்து பார்க்கலாமே தவிர குளத்துக்குள் இறங்க முடியாது..

திரும்பி நடந்தால் வெளிப்பக்கமாக நீச்சல் குளமும் உள்ளது..
இதற்கும் கட்டணம் தான்...

இதற்கு அருகில் பழைமையான தொங்கும் தொட்டில் (Rope Car)...



இந்த தொங்கும் தொட்டில் - கரையிலிருந்து குளத்தில் இருக்கும் சிறிய தீவுக்கு இயக்கப்படுகின்றது..

தண்ணீரில் இருக்கும் தீவில் என்ன விசேஷம்!?..

தீவு போன்ற திட்டில் சிறிய கோயில்..
அதனுள்ளே சிவலிங்கம்.. சிவலிங்கத்தின் எதிரே நந்தி..


இந்தக் கோயில் தான் -
திருவீழிமிழலை திருப்பதிகத்தில் அப்பர் பெருமான் குறிப்பிட்டருளிய
தஞ்சைத் தளிக்குளம் என்று சொல்கின்றார்கள்...

சிலர் அப்படியில்லை - என்கின்றார்கள்..

சரி.. உண்மை என்ன?..

தஞ்சைத் தளிக்குளம் பெரிய கோயிலோடு ஒன்றி விட்டது..
தளிக்குள நாதர் எனப்பட்ட லோகநாத ஸ்வாமியும் லோகேஸ்வரி அம்பிகையும் பெரிய கோயிலின் மேற்குத் திருச்சுற்றில் விளங்குகின்றனர்!.. -

- என்று, உள்முக தியானத்தில் விடை கிடைக்கின்றது...

எப்படியோ இந்தத் திருக்குளம் -
பெரியகோயிலுக்கு பல நூற்றாண்டுகள் முந்தையது என்பது மட்டும் நிச்சயம்...

தஞ்சைத் தளிக்குளம் எனப்படும் திருத்தலம்
தொங்கு தொட்டில் கரையிலிருந்து இந்தக் கோயிலுக்குச் சென்றதும்
அங்கே ஒருவர் இருந்து தொங்கு தொட்டிலின் கதவினைத் திறந்து விடுவார்...

ஆனால் - இப்போது தொங்கு தொட்டில் அங்கு செல்லுமே தவிர
திட்டில் இறங்குவதற்கு பயணிகளுக்கு அனுமதியில்லை...

அதனால் கோயிலுக்குச் செல்வதென்பது இயலாது...

அதற்குக் காரணம் - சமூக விரோதிகள் மற்றும் கல்லூரிகளைக் கடந்து வரும் மாணவ மாணவிகள்...

படகுத் துறை
சிவகங்கைக் குளத்தின் கீழ்க்கரையில் படகுத் துறை உள்ளது..

மாலை நேரத்தில் இங்கேயுள்ள மிதி படகுகளை இயக்கலாம்..
சிவகங்கைக் குளத்தைச் சுற்றி வந்து மகிழலாம்..

அந்த மகிழ்ச்சிக்கும் கட்டணம் உண்டு..

இந்தக் குளத்தினைக் கடந்து நடந்தால்
கிட்டத்தட்ட பூங்காவின் வாசலருகில் வந்து விடுகின்றோம்...


இந்தப் பூங்காவினுள் ஆண்டுகள் பல நூறினைக் கடந்தவைகளாக
நிழல் பரப்பியிருந்த மரங்கள் பற்பல..

ஆல், அசோகம், இலுப்பை, நாகலிங்கம், செண்பகம் மற்றும் மலைவேம்பு -
என்பவை முக்கியமானவை..

இவற்றுள் ஆலமரங்களைத் தவிர வேறெவையும் இப்போது இல்லை...

இப்போதிருக்கும் ஆலமரங்கள் பல நூறு ஆண்டுகளைக் கடந்தவை என்றாலும்

அவற்றைவிடவும் வயது முதிர்ந்த மரங்களாக இருப்பவை -
யானைக்கால் மரம் மற்றும் மோதகவல்லி மரம் என்பன...


இவற்றுள் யானைக்கால் மரத்தின் பூர்வீகம் ஆப்பிரிக்கா..

ஆப்பிரிக்க கண்டத்தில் 33 நாடுகளில் பரவலாகக் காணப்படும்
இம்மரத்தின் தாவரவியல் பெயர் - Adansonia Digitata..

இம்மரத்தின் பழங்கள் சற்றே புளிப்புச் சுவை உடையவை..
முற்றிய விதைகளில் இருந்து எண்ணெய் எடுக்கப்படுகின்றது..

இத்தகைய மரத்தின் விதை இங்கே விதைக்கப்பட்டபோது 
அதற்கு என்ன பெயர் சொல்லப்பட்டதோ - தெரியவில்லை..

பிரம்மாண்டமாக வளர்ந்த பின் -
மக்கள் இதற்கு யானைக்கால் மரம் என்று பெயரிட்டிருக்கலாம்..

ஆயிரம் ஆண்டுகளுக்கு முன்பு 
ஆப்பிரிக்க அரபு நாட்டின் வர்த்தகர்களால் 
நம் நாட்டிற்குக் கொண்டு வரப்பட்டிருக்கலாம் - என அறியப்படுகின்றது...

இம்மரத்தின் பட்டையிலிருந்து எடுக்கப்படும் சாறு
மயக்கத்தைக் கொடுக்கும் எனவும் மலேரியாவுக்கு மருந்து இதன் மூலம் பெறப்பட்டதாகவும் -

தலை சிறந்த வைத்தியராக விளங்கிய -
தஞ்சை ஆபிரகாம் பண்டிதர் தனது கருணாமிர்த சாகரம் எனும் நூலில்
குறிப்பிட்டுள்ளதாக செய்திகள் கூறுகின்றன..

இந்தப் பூங்காவில் இரண்டும் வெண்ணாற்றங்கரையில் ஒன்றுமாக -
மூன்று யானைக்கால் மரங்கள் தஞ்சையில் குறிப்பிடப்படுகின்றன...

பூங்காவிலுள்ள
மற்றொரு யானைக்கால் மரம்
தற்போது இம்மரங்களின் பூக்கள் மற்றும் விதைகள் ஆகியன
எப்படி கையாளப்படுகின்றன என்பது தெரியவில்லை...

இத்தகைய சிறப்புடைய யானைக்கால் (Adansonia Digitata..) மரத்தினோடு
மோதகவல்லி எனப்படும் மரமும் சிவகங்கைப் பூங்காவில் உள்ளது..

அதன் விவரத்துடன் மேலதிக செய்திகள் - அடுத்த பதிவில்!..

வாழ்க நலம்..
*** 

வியாழன், டிசம்பர் 07, 2017

சிவகங்கைப் பூங்கா 1

தனிப்பெரும் சிறப்புகள் பலவற்றைத்
தன்னகத்தே கொண்டிருக்கும் மாநகர் - தஞ்சை..

தஞ்சை மாநகர் தன்னகத்தே கொண்டிருக்கும்
சிறப்புகளுள் ஒன்று தான் - சிவகங்கைப் பூங்கா!..


தஞ்சை பெரிய கோயிலின் வடக்குப் புறமாக 
மிக அருகாமையில் அமைந்துள்ளது...

ஆயிரம் வருடங்களுக்கு முந்தையது..
தஞ்சை பெரியகோயிலின் நந்தவனம் இதுதான் என்பது நம்பிக்கை..

பெரியகோயிலின் தீர்த்தக் குளமான சிவகங்கைக் குளம் இந்தப் பூங்காவின் உள்ளே தான் இருக்கின்றது..

அதனால் தான் இதன் பெயர் சிவகங்கைப் பூங்கா...

சிவகங்கைக் குளமும் சிவகங்கைப் பூங்காவும் பெரியகோயிலின் கோட்டைக்குள் இருக்கின்றன..

சிவகங்கைப் பூங்காவிற்கு வெளியே உள்ள பூங்காவிலுள்ள ராஜராஜ சோழனின் சிலை


பற்பல வருடங்களுக்கு முன்பு -
- என்றால் 30/40 ஆண்டுகளுக்கு சிவகங்கைப் பூங்காவின் அழகே தனி..

மரம் செடி கொடிகள் மட்டுமல்லாமல் -
உயிரியல் பூங்காவாகவும் திகழ்ந்தது...

அன்னங்கள் (Swan), கூழைக்கடா (Pelicon), முக்குளிப்பான்கள், நாரை,
மடையான், கொக்கு - முதலான நீர்ப்பறவைகளால் நிறைந்திருந்தது..

அதற்குக் காரணம் சிவகங்கைப் பூங்காவினுள் இருக்கும் சிவகங்கைக் குளம்..

மேலும் -
அடர்ந்திருக்கும் மரக் கூட்டங்களில் பல்வேறு வகையான பறவையினங்கள்..

கூண்டுகளுக்குள் சிங்கவால் குரங்குகள், முள்ளம் பன்றிகள், மரநாய்கள்,
புனுகுப் பூனைகள், புள்ளி மான்கள் - என, காண்பதற்கு அரிய விலங்குகள் வளர்க்கப்பட்டன..

அத்துடன் மயில்களும் பல்கிப் பெருகியிருந்தன...

கூடவே - இரண்டு ஒட்டகங்கள்..
மகிழ்ச்சியின் மொத்த உருவமாக ராஜேந்திரா எனும் குட்டி யானை...

இந்த குட்டி யானையை பெரிய கோயிலுக்கென்று கொடுத்தார் -
அன்றைய முதல்வர் ஜெ.ஜெ.

கோயிலுக்குக் கொடுக்கப்பட்டாலும்
பூங்காவினுள் சுற்றிக் கொண்டிருந்த யானைக் குட்டி
எதிர்பாராத விதமாக ஏதோ உடல் நலக்குறைவினால் இறந்து போனது..

அதன்பின் யானைக் குட்டி ஏதும் இந்தப் பூங்காவுக்கு வரவில்லை..

ஒட்டகங்களும் பராமரிப்பு இன்மையால் உடல் நலங்குன்றி இறந்து போயின...

இத்தனைக்கும்
கால்நடைகளுக்கான மிகப் பெரிய மருத்துவமனை மிக அருகிலேயே!..

சிங்கவால் குரங்குகளும் முள்ளம் பன்றிகளும் மயில்களும்
போய்ச் சேர்ந்த இடம் தெரியவில்லை..

ஆனால், இன்றைக்கு -
நீர்ப்பறவைகள் எவையும் இல்லை... ஆடிக் கொண்டிருந்த மயில்களும் இல்லை..

பூங்காவினுள் இயற்கையாய் சுற்றித் திரியும் சில பறவைகள் மட்டுமே...

புதுக்கோட்டை மற்றும் விராலிமலை பகுதிகளில்
மயில்களின் வாழிடங்கள் அழிக்கப்பட்டதால்

அங்கிருந்து தப்பிப் பிழைத்த மயில்கள்
ஒரு நூறாகப் பெருகி தஞ்சையைச் சுற்றித் திரிகின்றன..

அவற்றுள் ஒன்றிரண்டு அவ்வப்போது பூங்காவினை வலம் வருகின்றன..

புள்ளி மான்கள் மட்டும் சற்றே பரந்த வெளியில் சுற்றித் திரிகின்றன...

சற்றும் பொருத்தமில்லாத கூண்டுக்குள் - பாவப்பட்ட சீமை எலிகளும்
ஒரு சில முயல்களும் வாழ்நாளைக் கழித்துக் கொண்டிருக்கின்றன...

அந்த ஜீவன்களைக் காணச் சகிக்காததால்
அவற்றைப் படமெடுக்கவில்லை..

அவைகள் அடைபட்டிருக்கும் கூண்டு மட்டும் பதிவில் இடம்பெற்றுள்ளது..

மற்றபடி அடர்ந்து படர்ந்திருக்கும் அரசு,  ஆல், வாத நாராயண மரம் என பல்வகையான மரங்களால் பூங்கா குளிர்ந்திருக்கின்றது..

பிற நகர்களுக்குக் கிடைக்காத வரப்பிரசாதம் - இந்தப் பூங்கா!..

ஆனால், பராமரிப்பு!?..

பூங்காவினுள் மகாத்மா
இன்றைய பதிவில் சிவகங்கைப் பூங்காவின் சில தோற்றங்கள்..

இந்தப் பூங்காவினுள் இருக்கும்
சில அதிசயங்களை அடுத்த பதிவினில் காணலாம்..  



பராமரிப்பின்றிக் கிடக்கும் யானைமுக நீரூற்று




எஞ்சியுள்ள மான்கள்
பூங்காவினுள்ளிருந்து பெரியகோயில்

சிவகங்கைக் குளம்
சிறுவர் ரயில்
சிறுவர்களுக்கான மிதி படகு

தமிழகத்தில் வேறெங்கும் இல்லாத மரம் தான் மேலே உள்ள படத்தில் இருப்பது..

அந்த மரத்தில் யானைக்கால் மரம் என்ற குறிப்பு பதிக்கப்பட்டுள்ளது..

யானைக்கால் மரத்தைப் பற்றிய மேலதிக செய்திகளுடன் அடுத்த பதிவு...

பதிவிலுள்ள படங்கள் எனது கைவண்ணம்..
நன்றாக இருக்கின்றனவா.. என்று சொல்லுங்கள்..



வாழ்க நலம்.. 
***

திங்கள், டிசம்பர் 04, 2017

கார்த்திகைத் திங்கள் 3

கார்த்திகையின் முதல் திங்களன்று
திருஆலம் பொழில் சிவாலயத்தையும்

இரண்டாம் திங்களன்று
திருக்காட்டுப்பள்ளி சிவாலயத்தையும்
தரிசனம் செய்தோம்..

இன்று கார்த்திகை மூன்றாம் திங்கள்..
வழக்கம் போலவே சிவாலய தரிசனம்..

இன்றைய தரிசனம் - திருக்கரந்தை..

இந்நாளில் கரந்தட்டாங்குடி என்று வழங்கப்படுகின்றது..

இத்திருக்கோயில் தஞ்சை மாநகரின் வடபுறமாக
வடவாற்றங்கரையில் அமைந்துள்ளது

திருத்தலம்
திருக்கருந்திட்டைக்குடி


இறைவன் - ஸ்ரீவசிஷ்டேஸ்வரர்
அம்பிகை - ஸ்ரீபிரஹந்நாயகி

தலவிருட்சம் - வன்னி
தீர்த்தம்
சந்திர தீர்த்தம், வசிஷ்ட தீர்த்தம், வடவாறு...

வசிஷ்டர் சிவலிங்க பிரதிஷ்டை செய்ததால் -
இறைவனின் திருப்பெயர் ஸ்ரீவசிஷ்டேஸ்வரர்.

இகபர செளபாக்யங்களை அருள்வதற்கு திருஅவதாரம் செய்த 
ஸ்ரீராமசந்திர மூர்த்திக்கு குருவாக விளங்கியவர் ஸ்ரீவசிஷ்ட மகரிஷி...

அவர் தென்குடித் திட்டை எனும் உலவாப் பதியாகியில்
சிவபூஜை செய்து சிவ தரிசனம் பெற்றார்..

அந்தப் புண்ணியத்தின் நற்பயனாக -
தான் செய்து வரும் நித்ய அக்னிஹோத்ரம் முதலான
ஆசார அனுஷ்டானங்களுக்கு உதவும் வகையில்
தெய்வப் பசுவாகிய காமதேனுவைப் பெற்றார். 

வசிஷ்ட மகரிஷி - அருந்ததி தம்பதியருடன்  இருந்து,
அவர்களுடைய தவ நெறிகளில் காமதேனுவும்
தன் மக்களாகிய நந்தினி, கமலினியுடன் பங்கெடுத்துக் கொண்டது. 

அதன் பயனாக - 
தெய்வப் பசுக்களாகிய -  நந்தினியும் , கமலினியும்
தங்கள் தாயாகிய காமதேனுவைப் போலவே
எல்லா உலகத்துக்கும் செல்லும் ஆற்றலையும்,
தீய அரக்கர்களை எதிர்க்கும் சக்தியையும் பெற்றன.

இத்தகைய சூழலில், வசிஷ்ட மகரிஷிக்கு -
கால மாற்றங்களினால் தோல் நோய் ஏற்பட்டது. 

இன்ப துன்பங்களைச் சமமாகப் பாவிப்பவராகிய வசிஷ்டர் -
இதன் காரணத்தினை அறிய விரும்பி  - இறைவனிடம் வேண்டி நின்றார்.

உலகோர் உய்வடையும் பொருட்டு -
இத்திருத்தலத்தின் தென்கிழக்கே உள்ள
கரந்தை வனத்தில் எம்மை வழிபடுவீராக!.
அங்கே உமக்கு நலமும் பலமும் கிடைக்கும்!..  

- என ஈசன் மறுமொழி அளித்தனன்.   

அந்த அளவில் பின் வரும் ஒரு நன்மையின் பொருட்டு
வசிஷ்டர் அருந்ததி அம்மையுடன் ஈசன் குறிப்பிட்டருளிய
கரந்தை வனத்தை அடைந்தார்..

கரந்தைச் செடி - துளசி இனத்தை (OCIMUM BASILICUM.) சேர்ந்தது..
இதனை - திருநீற்றுப் பச்சை என்றும் சொல்வர்.

கரந்தை வனத்தினை அடைந்த வசிஷ்டர் -
தனது - நித்ய வழிபாட்டுக்கு என ஒரு குளத்தை உருவாக்கினார். 

அக்குளத்தை சந்திரன் தனது அமுத கலைகளால் நிரப்பினான். 
அக்குளத்தில் நீராடி - ஈசன் அருளியபடி வழிபாடு செய்தார் வசிஷ்டர். 

அவருடன் அந்த வனத்திலிருந்த ஏனைய முனிவர்களும் 
யாக வேள்வி பூஜைகளில் கலந்து கொண்டனர்.

சாயா தேவியின் சாபத்தினால் கலக்கமுற்றிருந்த 
யமதர்மராஜன் - இதனை அறிந்து கொண்டான்..  

கரந்தை வனத்திற்கு வந்து வசிஷ்டரையும் 
ஸ்ரீ வசிஷ்டேஸ்வர ஸ்வாமியையும் பணிந்து வணங்கி நின்றான். 

சாயாதேவியின் சாபம் யமதர்மனை விட்டு விலகியது.  
சாப விமோசனம் பெற்று தென் திசைக்குத் தலைவன் ஆனான். 

வசிஷ்ட மகரிஷியை வந்து வணங்கிய ஆதிசேஷன் 
ஸ்ரீ வசிஷ்டேஸ்வரரின் அனுக்ரகத்தால் - 
தளர்ச்சியின்றி  பூவுலகைத் தாங்கும் திறன் பெற்றான். 

அத்துடன் தன் இனத்தவரால்  - எட்டுத் திக்கிலும் ஒரு குரோச தொலைவுக்கு விஷ பயம் கிடையாது!.. - என வாக்கு கொடுத்தான்..

ஒரு குரோசம் என்பது இரண்டரை மைல்.. நான்கு கி,மீ..

வசிஷ்ட மகரிஷி கரந்தை வனத்தில் சிவபிரதிஷ்டை செய்து தவமிருக்கின்றார் என்பதை அறிந்த  - அருட்குரு கோரக்க சித்தர் -
ஸ்ரீவசிஷ்ட மகரிஷியை வந்து வணங்கி இன்புற்றார்.  

இன்றளவும் வசிஷ்ட மகரிஷி நித்ய வாசமாக இங்கேயே உறைவதால்
அருட்குரு கோரக்க சித்தர் ஒவ்வொரு  வியாழன் அன்றும் இரவு குரு ஹோரையில் - கரந்தை வசிஷ்டேஸ்வரர் திருக்கோயிலுக்கு வந்து ஸ்வாமியையும் ஸ்ரீவசிஷ்ட மகரிஷியையும் வணங்கி மகிழ்கின்றார் ..

கோரக்க சித்தரின் வருகையை முன்னிட்டு - 
இங்குள்ள  அருட்குரு கோரக்க சித்தர் பீடத்தில் -
வியாழக்கிழமை தோறும் சிறப்பு வழிபாடுகள் நிகழ்கின்றன..

ஸ்ரீ கோரக்க சித்தர் அதிஷ்டானம்
மற்றும் பெளர்ணமி சிறப்பு பூஜைகளும் 
அவர்தம் அடியார்களால் சிறப்புடன் மேற்கொள்ளப்படுகின்றன. 

அருட்குரு கோரக்க சித்தர் - தம் அடியார்களுள் எளியேனும் ஒருவன். 

தனது சந்திரரேகை எனும் ஞான நூலில் திருநீற்றுப் பச்சிலை (144 -145) - சாபமற்ற மூலிகை - குரு மூலிகை - வில்வம், துளசி ஆகியனவற்றுக்கு இணையானது என்று அருளுகின்றார். 

கோயிலின் தெற்கு கோபுரம்
கிழக்கு ராஜகோபுரம் கிடையாது.
தெற்கு கோபுர வாசல் தான் பிரதானம்.  மூன்று நிலை கோபுரம்..

கிழக்கே உள்ள கொடிமரம்
தெற்கு உள் பிரகாரம்
ஸ்வாமி சந்நிதி விமானம்



ஸ்ரீ வசிஷ்டர் - அருந்ததி அம்மை

இத்தகைய தலவரலாறு கொண்ட -
திருக்கோயிலுக்கு எதிரில் உள்ள வசிஷ்ட தீர்த்தத்தில் நீராடி
கரிகால் சோழன் தோல் நோய் நீங்கப் பெற்றதாக ஐதீகம்.

வசிஷ்ட தீர்த்தத்தில் தொடர்ந்து 45 நாள்கள் மூழ்கி,
ஈசனை வழிபட்டால் சரும நோய்கள் தீரும் என்பது நம்பிக்கை. 

சந்நிதி வாசலிலுள்ள திருக்குளம்
ஆனால் , இன்று திருக்குளத்தின் நிலை பரிதாபமாக உள்ளது.

ஆலயத்தின் கிழக்கு வாசலில் திருக்குளமானதால் -
கிழக்கு முகமாக கோயிலினுள் நுழைய முடியாது...

விமானத்தின் மேற்கு தரிசனம்
ஸ்தல விருட்சம் - வன்னி
அம்பிகை தனி சந்நிதியில் திகழ்கின்றனள்.

அம்பிகை சந்நிதி கொடிமரம்
தெற்கு நோக்கிய அம்பிகைக்கு தனியே ஒரு கொடிமரம். தெற்கு வாசலில் அம்பிகையை நோக்கியவாறு பிரத்யேக நந்தி மண்டபம் விளங்குகின்றது.

இறைவன் கருவறை கோஷ்டத்தில்
மிகுந்த கலை நுணுக்கத்துடன் சிற்பங்கள் வடிவமைக்கப்பட்டுள்ளன. 

தெற்கு கோஷ்டத்தில் விரித்த சடையுடன் முயலகன் மீது காலை ஊன்றி நடமாடும்  நடராஜப் பெருமானின் இருபுறமும் அப்பரும் திருஞானசம்பந்தரும் திகழ்கின்றனர். 

கோஷ்டத்தில் தட்க்ஷிணாமூர்த்தியை அடுத்து வசிஷ்டருக்கும் அருந்ததி அம்மையாருக்கும் விக்ரகங்கள் உள்ளன..

நிருதி மூலையில் விநாயகர்..
அருகில் வள்ளி தேவசேனா உடனுறையும் திருமுருகன் சந்நிதி..

திருச்சுற்று மண்டபத்தில் சப்த லிங்கங்கள்..
ஜூரஹர லிங்கம் தொட்டிக்குள் விளங்குகின்றது.. 

தீராத காய்ச்சல் உடையவர்கள் தொட்டிக்குள் நீர் நிரப்பி வழிபட
ஜூரம் தணியும் என்பது நம்பிக்கை..

ஸ்ரீ துர்காம்பிகை
கோஷ்டத்தில்  விநாயகர், பிட்க்ஷாடனர், கங்காதரர், கங்காளர்,லிங்கோத்பவர், வலம் இடம் மாறி விளங்கும் அர்த்தநாரீஸ்வரர், காலாந்தகர், துர்கை - என வெகு சிறப்புடைய திருமேனிகள் விளங்குகின்றன. 

அர்த்தநாரீஸ்வர திருக்கோலத்தில் - 
உமை வலப்புறமும், ஈசன் இடப்புறமும் மாறித் திகழ்கின்றனர்...

இரண்டாம் திருச்சுற்றில் - 
கோயிலின்  நான்கு மூலைகளிலும் நான்கு விநாயகர் சந்நிதிகள் உள்ளன..

ஸ்ரீ தண்டாயுதபாணி சந்நிதி
ஸ்ரீ செல்லியம்மன் மூலஸ்தானம்
மேற்குப் பிரகாரத்தில்
மேற்கு நோக்கிய வண்ணம் ஸ்ரீ பாலதண்டாயுதபாணி சந்நிதி

பிரகாரத்தின் வடபுறத்தில் - வெளிப்பக்கமாக 
மாகாளியாகிய ஸ்ரீ செல்லியம்மன் திருக்கோயில்...

இந்த அம்மனை - கோயிலுக்கு வெளியே வந்து தான் தரிசிக்க முடியும்..

மன்னன் கரிகால் சோழனால் திருப்பணி செய்யப்பட்ட திருக்கோயில். 
பின்னர் முதலாம் பராந்தக சோழரால்  கருங்கல் கோயிலாக சிற்பச் செறிவுடன் திகழ்கின்றது. கருவறைச் சுவரில் நிறைய கல்வெட்டுக்கள்  உள்ளன.



பெருந்திருவிழாக்கள்  - தேரோட்டத்துடன் நிகழ்ந்த தலம்.  
ஆனால், இப்போது தேர் போய்ச் சேர்ந்த இடம் தெரியவில்லை. 

பிரதோஷம், சோமவாரம், பெளர்ணமி, திருக்கார்த்திகை முதலான விசேஷங்கள் சிறப்புடன் நிகழ்கின்றன. 

தைப்பூச நாளில் இறைவனுக்கும் அம்பிகைக்கும் திருக்கல்யாண வைபவம்... 

அதே நேரத்தில் - வசிஷ்டர் - அருந்ததி தம்பதியருக்கும் திருக்கல்யாணம் நிகழ்கின்றது...

தீண்டுவீராகில் எமைத் திருநீலகண்டம்!..  
- என்று மனையாள் சூளுரைத்ததால் - இளமையைத் துறந்த திருநீலகண்ட நாயனாருக்கு வாழ்வும் வளமும் நல்கிய வைபவம் ஆண்டுதோறும் நிகழ்கின்றது. 

ஆண்டு தோறும் பங்குனி மாதம் 3,4,5, ஆகிய நாட்களில்
உதயத்தின் போது சூரிய கதிர்கள் கருவறையில் படர்கின்றன..

அந்த நாட்களில் வெகு சிறப்பாக சூரிய பூஜை நிகழ்கின்றது. 


திருநாவுக்கரசர் தனது திருவாக்கினால் - 
இத்தலத்தை க்ஷேத்ர கோவையில் குறிப்பிட்டுள்ளார். 

இன்று திருக்கோயில் கருணாஸ்வாமி கோயில் எனவும் 
திருத்தலம் கரந்தை எனவும் கரந்தட்டாங்குடி எனவும் வழங்கப்படுகின்றது.

தஞ்சை பழைய பேருந்து நிலையத்திலிருந்து திருவையாறு பாபநாசம் செல்லும் அனைத்து நகரப் பேருந்துகளும் கரந்தையில் நின்று செல்கின்றன..

பிரதான சாலையில் இருந்து அரை கி.மீ., தொலைவில் கோயில் உள்ளது..
பூஜைப் பொருட்களைக் கரந்தை கடைத்தெருவில் வாங்கிக் கொள்ளலாம்..


கரந்தை திருக்கோயிலுக்கு 2 பிப்ரவரி 2017 அன்று திருக்குடமுழுக்கு நடந்துள்ளது...

பதிவில் உள்ள படங்கள் எனது கைவண்ணம்..
இன்னும் ஒரு பதிவிற்கான படங்கள் உள்ளன..
அவற்றை வேறொரு இனிய நாளில் சிந்திப்போம்..

நற்கொடிமேல் விடையுயர்த்த நம்பன் செம்பங்
குடிநல்லக் குடிநளிநாட் டியத்தான் குடி
கற்குடிதென் களக்குடிசெங் காட்டங் குடி
கருந்திட்டைக்குடி கடையக் குடிகா ணுங்கால்
விற்குடிவேள் விக்குடிநல் வேட்டக் குடி
வேதிகுடி மாணிகுடி விடைவாய்க் குடி
புற்குடி மாகுடி தேவன்குடி நீலக்குடி
புதுக்குடியும் போற்ற இடர் போகுமன்றே!..(6/71)
-: திருநாவுக்கரசர் :- 

ஓம் நம சிவாய சிவாய நம ஓம்
* * *