குங்குமம் நீயே..

     

நாடும் வீடும்

நலம் பெற வேண்டும்

பகையும் பிணியும்

தொலைந்திட வேண்டும்..

***

இன்று

புரட்டாசி 21

ஞாயிற்றுக்கிழமை

சொல்லரும்பு தானெடுத்து

நல்லரும்பு தான் தொடுத்து

கண்மலரும் தான் களிக்க

தாள்மலரில் சூட்டினனே..

அம்மா உன் சீரெடுத்து

அன்பான நூலெடுத்து

அத்தனையும் நான் தொடுக்க

அருள் தர வேண்டினனே..

அன்னை தந்தையும் நீயே நீயே

அருள் தருவாயே மகமாயி

உயிரும் நீயே உறவும் நீயே 

உறுபிணி தீர்ப்பவள் நீயே நீயே..

அமுதும் நீயே தமிழும் நீயே

அருள் புரிவாயே ஓங்காரி

வாழ்வும் நீயே வளமும் நீயே

வரந்தருவாயே மகமாயி..

பொங்கும் மங்கலம் நீயே நீயே

புதுநலம் தருவாய் மகமாயி

பூதங்கள் ஐந்தும் நீயே நீயே

புன்மை தவிர்ப்பாய் ஓங்காரி..

கற்பகம் நீயே அற்புதம் நீயே

நற்றுணை வருவாய் மகமாயி

கோவிந்த கொற்றவை நீயே நீயே

குற்றம் பொறுப்பாய் நீயே நீயே..

குங்கும மஞ்சள் நீயே நீயே

மங்கல நாயகி நீயே நீயே

நெஞ்சகத் தாமரை நீயே நீயே

அஞ்சுதல் நீக்கி அருள் தருவாயே..

சொல்லும் பொருளும் நீயே நீயே

சூட்சுமம் எல்லாம் நீயே நீயே

செல்லும் வழியில் சோதியும்  நீயே

சிவசிவ சங்கரி நீயே நீயே..

*

ஓம் சக்தி ஓம்

சிவாய

திருச்சிற்றம்பலம்

***