தஞ்சையம்பதி: சக்தி லீலை 7

சனி, அக்டோபர் 21, 2023

சக்தி லீலை 7

நாடும் வீடும்

நலம் பெற வேண்டும்

பகையும் பிணியும்

தொலைந்திட வேண்டும்..

***

இன்று

ஐப்பசி 4

சனிக்கிழமை

மங்களகரமான நவராத்திரியின்

ஏழாம் நாள்

இசையாய் தமிழாய் இருப்பவனே!..

என்று புகழ்வது தமிழ்.

அவன் மட்டுமல்ல அவளும் அப்படித்தான்!...

நவராத்திரி நாட்களில் இன்றும் நாளையும் நாளை மறுநாளும்

ஜகன் மாதாவாகிய அம்பிகை -

ஸ்ரீ சரஸ்வதியாக வழிபடப்படுகின்றாள்..

ராஜ மாதங்கி எனும் திருக்கோலத்தில் அம்பிகை வீணையுடன் திகழ்கின்றனள்..

ஈசனின் திருக்கோலம் வீணாதர தக்ஷிணாமூர்த்தி..

மனம் மாறி புறச் சமயம் சார்ந்த போதும் -

தமிழோடு இசை பாடல் மறந்தறியேன்.. - என்கின்றார் அப்பர் பெருமான்..

ஓசை ஒலியெலாம் ஆனாய் நீயே..

என்றும்

எண்ணும் எழுத்தும் சொல் ஆனாய் போற்றி..

என்றும் -

அப்பர் பெருமான் இறைவனைப் போற்றுகின்றார்..

இப்புகழுரைகள் ஐயனின் திருமேனியில் சரிபாதியாக விளங்குகின்ற அம்பிகைக்கும் உரியன..

கும்பகோணத்திற்கு அருகில் இன்னம்பூர் எனும் தலத்தில் இறைவன் எழுத்தறிவித்த நாதன் என்று திகழ்கின்றார்..

அம்பிகை பால் கொடுத்ததன் விளைவாக, சம்பந்தர் - ஞானசம்பந்தர் என்றாகி தலங்கள் தோறும் கைத் தாளம் இட்டு திருப்பதிகங்கள் பாடி வரும் வேளையில் - பொன்னால் ஆன தாளம் ஒன்றினை ஞானசம்பந்தருக்கு வழங்கினார் இறைவன்..

இருந்தும் அந்தப் பொற்றாளத்தில் ஒலி உண்டாகவில்லை..

அப்போது அந்த பொற்றாளத்தினுள் ஓசை - ஒலியாகப் புகுந்து பொலிந்தவள் அம்பிகை..

திருக்கோலக்கா எனும் இத்தலத்தில் அம்பிகையின் திருப்பெயர் ஓசை கொடுத்த நாயகி..

பண் களிக்கும் குரல் வீணையும் கையும் ..

நரம்பை அடுத்த இசை வடிவாய் நின்ற நாயகி..

- என்றெல்லாம் பட்டர் புகழ்கின்றார்..

சரஸ்வதியைப் போற்றி வணங்கி ஏழை எளியோர்க்கு இன்முகம் காட்டி சிற்றுயிர்களை ஆதரித்து இயற்கை வளங்களை இயன்ற வரை காத்தலே எங்கும் நிறைந்திருக்கும் பரம்பொருளுக்கு நாம் செய்யும் தொண்டு..

இந்நாட்களில் சரஸ்வதி ஸ்தோத்திரம் சரஸ்வதி அந்தாதி, சகலகலாவல்லி மாலை முதலான ஞான நூல்களின் வழியாக ஞான சரஸ்வதியை சிந்தித்திருப்பது நலம் தரும்..