திருநடனம்

நாடும் வீடும்

நலம் பெற வேண்டும்

பகையும் பிணியும்

தொலைந்திட வேண்டும்..

***

இன்று

வைகாசி 2

புதன் கிழமை

தஞ்சை பாபநாசம் கும்பகோணம் வட்டாரங்களில் வசந்த உற்சவ வைபவமாக ஸ்ரீ காளி திருவீதி எழுந்தருளி திருநடனம் நிகழ்த்துவது சிறப்பு..

சமயம் சார்ந்த மக்கள் தங்கள் இல்லத்தின் வாசலில் அம்மனை வரவேற்று குறை இரந்து நிற்பர்.. அம்மனும் அருள் வாக்கு கூறி வாழ்த்திச் செல்வாள்.. 

அந்த வகையில்

குழந்தையைத் தாங்கிய வண்ணம் அம்மன் நடமிடும் காட்சி..

நோய் நொடிகள் நெருங்காமல் இருக்கவும் துஷ்டங்கள் தொல்லைகள் விலகிச் செல்லவும் இப்படியான நிகழ்வுகள்..

இந்தக் காணொளி சென்ற வருடத்தில் கிடைத்ததாகும்..

அம்மா உன் கரங்கொண்டு

அரவணைத்து ஆதரிப்பாய்..

அம்மா உன் பேர் பாட 

விழியோடு மொழி கொடுப்பாய்..

அம்மா என் குரல் கேட்டு

குறை நீக்கி நலம் சேர்ப்பாய்..

அம்மா என் தமிழ் கேட்டு 

வேப்பிலையால் வினை தீர்ப்பாய்..

ஆடி வரும் பாதங்களை

அன்புடனே தொழுகின்றேன்..

அம்மா உன் அருள் கொண்டு

அனுதினம் வாழுகின்றேன்..

குற்றங்களை மறந்து விட்டு

குறுநகை நீ காட்டு..

குறுநகை தனைக் காட்டி

என்மனதை நீ தேற்று..

வேப்பிலையின் நாயகியே

வேதனையை விரட்டிடுவாய்

தீராத நோய் நொடியை 

திருவிழியால் தீர்த்திடுவாய்..

வாசல் வழி தொழுவோர்க்கும்

வாழ்வருளும் காளியம்மா 

கை கொடுத்துக் காப்பவளே

கலி தீர்க்கும் காளியம்மா..

கார் முகிலின் வடிவாகி

கருணை முகம் காட்ட வேணும்

கண் மலர்ந்து அடியாரும்

கைதொழுது போற்ற வேணும்..

வேண்டியது எல்லாமும் 

வித்தகியே நீ கொடுப்பாய்

வினைதரு வினைகளையே

வேப்பிலையால் நீ தடுப்பாய்..

நன்றான கரிமுகனும் 

நலங்கோடி தருகின்றான்

குன்றாத குளிர்நிலவாய்

குகனருள் பொழிகின்றான்..

சிவமணி திருமணியாய்

திருவருள் தான் வழங்க

கோவிந்தன் சோதரியே

குன்றாத கொடை அருள்வாய்!..

ஓம் சக்தி ஓம்

ஓம் நம சிவாய 

சிவாய நம ஓம்

***