அஞ்சறை

நாடும் வீடும்

நலம் பெற வேண்டும்

பகையும் பிணியும்

தொலைந்திட வேண்டும்..

***

இன்று

சித்திரை 30 

திங்கட்கிழமை

அந்தக் காலத்து சமையலறைகளில் சிறியதான  பெட்டி  ஒன்று இருக்கும்..

அஞ்சறைப் பெட்டி என்பர்..

அதனுள்ளிருக்கும் பொருட்கள் - மஞ்சள், சீரகம், சோம்பு, மிளகு,

வெந்தயம், கடுகு, பெருங்காயம், பட்டை, கிராம்பு, ஏலக்காய்  என்பவை.. 

ஐந்து அறை - அஞ்சறை என்றாலும் ஏழு, ஒன்பது என்ற அளவிலும் அவரவர் தேவைக்கு அமைத்திருப்பர்.. 

அடுப்பு மேடையில், கைக்கு அருகில் உப்பு இருக்க -

இதர பொருட்களான மல்லி, மிளகாய், பருப்பு வகைகளை தனித்தனியே அடுக்கு கலன்களில் வைத்திருப்பர்..

அஞ்சறைப் பெட்டி,  அடுக்கு கலன்களை மஹா லக்ஷ்மியாகப் பாவித்து திலகம் வைத்து தூப தீப ஆராதனைகள் செய்வதுண்டு..

இன்ன குழம்பு என்று தீர்மானம் ஆனதும் அஞ்சறைப் பெட்டியில் இருந்து மஞ்சள் முதலானவற்றை எடுத்து அம்மியில் வைத்து நீர் தெளித்து அரைத்து சாந்தாக 

வழித்தெடுப்பர்.. 

அம்மா முதற்கொண்டு தங்கை வரை இந்தக் கைங்கர்யத்தில் ஈடுபடுவர்.. 

கூட்டுக் குடும்பங்களில் நாளுக்கு ஒருவர் என்றாலும் அனைவருடைய பங்களிப்பும் தவறாமல் இருக்கும்..

நாளடைவில் நாகரிகம் மாற்றப்பட்டு விட - 

கொள்ளையர்கள் நாட்டுக்குள் புகுந்து பரவிய மாதிரி கொள்ளை நோய்களும் பரவின..

நமது பாரம்பரிய வாழ்க்கை முறையும் இதற்குக் காரணம் என குற்றம் சாட்டப்பட்டது..

குடும்பத்திற்காக ஆண்கள் பொருள் ஈட்டிய காலம் கடந்து பெண்களும் பொருள் ஈட்டுவதே நாகரிகம் என்று ஆக்கப்பட்ட நிலையில் -

நல்ல சாப்பாட்டிற்கு ஆறு நாள் தவமாய்த் தவம் கிடந்து -

ஏழாம் நாள் உணவகத்தை நாடினால் அங்கே கலப்படம்.. கலப்படம்..

உணவகத் தொழிலில்

இன்றைக்கு தொட்டது தொண்ணூறும் மோசடியாகவே இருக்கின்றன..

மீண்டும் தற்சார்பு வாழ்க்கை எந்த அளவுக்கு சாத்தியப்படும் என்பது அவரவர் சூழ்நிலையைப் பொறுத்தது....

மஞ்சள் மற்றும் மிளகாய்ப் பொடிகளில் ஒவ்வாத நிறங்கள் கலப்பு..

துணிகளுக்கான நிறங்கள் கலக்கப்பட்டிருந்த மஞ்சள் மற்றும் மிளகாய் பொடிகள்  பறிமுதல் செய்யப்பட்டதாக  செய்திகள் வருகின்றன..

தயாரிப்பு நிறுவனத்தின் பெயர், அரசு அனுமதி எண் -  இதர குறிப்புகள் இல்லாமல் விற்கப்படுகின்ற மசாலாப் பொருட்கள் என்றைக்குமே ஆபத்தானவை.. 

உணவுப் பொருட்களில் கலப்படம் செய்தால் ரூ.5 லட்சம் வரை அபராதம் என்றும் சட்டம் இருக்கின்றதாம்.. 

இதை விட வேறு நல்ல தண்டனைகளை உணவுப் பொருள் கலப்படத்திற்கு வழங்கி அவற்றை உடனடியாக  நிறைவேற்றுதலே நல்லது..

கலப்பட மசாலாப் பொடிகள் - சிறுநீரகம்  கல்லீரல் - ஏனைய உள்ளுறுப்புகளில்  பாதிப்பு மற்றும் வேறு பல கடுமையான  பிரச்னைகளுக்கு வழி வகுக்கின்றன என்று மருத்துவர்கள் எச்சரிக்கின்றனர்..

எங்கள் வீட்டில் எந்த ஒரு மசாலாத் தூளையும் வாங்குவதில்லை..

விற்பனைக்கு வருகின்ற

மசாலாப் பொருட்களைத் தான் பயன்படுத்தியாக வேண்டும் என்ற சூழ்நிலையில் இருக்கின்றவர்கள் - இயன்ற வரை கவனமாக இருக்க வேண்டும்..

வெளி உணவுகளைத் தவிர்க்க வேண்டும்..

அது ஒன்று தான் பாதுகாப்பு..

கண்ணில் தென்படுகின்ற மசாலாப் பொடிகளை எல்லாம் நம்புகின்ற வெள்ளந்திகளாக இருக்காமல் விழிப்புணர்வு பெற வேண்டும்.. 

தரங்கெட்ட  மசாலாப் பொருட்களைத் தயாரிப்பவர் யார்?.. அவற்றைப் பயன்படுத்தும் உணவகங்கள் எவை?.. - என்றெல்லாம் தெருவில் இறங்கி ஆராய்ச்சி செய்து கொண்டு இருக்காமல் -

வீட்டுக்கு வெளியே உணவருந்திக் கொண்டாட்டம் போடுவதை முற்றாகக் கை விட வேண்டும்!.. 

அதுவே நல்லது..

நம்முடைய நலம்

நம்முடைய கையில்..

ஓம் நம சிவாய 

சிவாய நம ஓம்

***