தஞ்சையம்பதி: விருந்தினர் பக்கம் 03

ஞாயிறு, ஜனவரி 27, 2019

விருந்தினர் பக்கம் 03

அன்பின் நெல்லைத்தமிழன் அவர்களின்

பயணக் குறிப்புகள்..

புள்ளமங்கை ஆலந்துறை நாதர் கோயில்

(தொடர்ச்சி)

ஃஃஃ

கிபி 900ல் பராந்தக சோழன் இக்கோயிலின் கருவறையையும் அர்த்த மண்டபத்தையும் திருப்பணி செய்துள்ளான்.

பராந்தக சோழன், ராஜராஜ சோழனின் கொள்ளுப்பாட்டன். பராந்தகன் காலத்தில்தான் பலவித சிற்பங்களோடு கோயில் உருப்பெற்றிருந்திருக்கிறது.

இந்தக் கோயிலின் வெளிப்புறத்தில் உள்ள துர்க்கை (மஹிஷாசுர மர்த்தனி என்பார்கள்)..

சிலை மிகவும் தனிச்சிறப்பு வாய்ந்தது. கருங்கல்லில் எருமைத் தலைமீது நின்று சக்கரம் சங்கோடு, வில், சூலம் போன்ற ஆயுதங்கள் ஏந்தி இரு புறமும் கலைமானும் சிங்கமும் இருக்க, ஒரு வீரன் தன் தலையை கத்தியால் அரிந்து தருவது போலவும்,

இன்னொரு புறம், இன்னொரு வீரன் தன் துடையைக் கிழித்து இரத்த பலி தருவது போலவும் சிற்பங்கள் உள்ளன.

இந்தத் துர்க்கை கோலம், திருநாகேச்வரம், பட்டீச்வரம் மற்றும் இந்தக் கோயிலில் ஒரே சிற்பியால் வடிக்கப்பட்டவை என்றும் மிகவும் சக்தி வாய்ந்தவை என்றும் சொல்கிறார்கள்..

கோயிலின் சுற்றுச்சுவரில், நம் முழங்காலுக்கும் கீழான பகுதியில்

சிறு சிறு சிற்பங்கள் நிறைய செதுக்கியுள்ளனர்..

இவை இராமாயண மகாபரதக் காட்சிகள் என்று சொல்கின்றனர்..

ஒவ்வொன்றையும் புரிந்து கொள்ள முடியாதபோதும் சிற்பங்களின் சிறப்பை நம்மால் புரிந்து கொள்ள முடியும்..

கோயில் கருவறை கோபுரத்தில் விஷ்ணு நரசிம்ஹ சிற்பங்களும் இருக்கின்றன.. சுமார் அரை மணி நேரம் கோயிலில் இருந்திருப்போம்.. சிற்பங்கள் தந்த உணர்வை எழுத்தில் வடிக்க இயலாது,, எனக்கு முகத் திருப்தியாக அமைந்த கோயில் மற்றும் கலை தரிசனம்..

காரணமில்லாமல் இதற்கு நான் பயணப்பட்டிருக்க முடியாது..

அதனால் தான் இதனை இணையத்தில் பகிர்ந்து கொள்ள வேண்டும் என்று தோன்றியது..

கல்வி கற்ற அந்தணர்கள் வாழ்ந்த ஊர்.. என்று, சம்பந்தர் சொல்கிறார்..

அதற்கான தடயம் இருப்பதாகவே தெரியவில்லை..

எல்லா கிராமங்களைப் போல - சாதாரணத் தெருக்களைக் கொண்டிருக்கும் கிராமத்தின் ஒரு பகுதியாகவே தோன்றுகிறது...

கோயிலில் மண்டபத்தில் ஒரு பாடலை ஒட்டி வைத்திருந்தனர்.. இரவு படுக்கப் போவதற்கு முன்பு சொல்வது நல்லது - என..

அந்தப் பாடல் உங்களுக்காக..

கல்லாப் பிழையும் கருதாப் பிழையும் கசிந்துருகி

நில்லாப் பிழையும் நினையாப் பிழையும்நின் ஐந்செழுத்தை

சொல்லாப் பிழையும் துதியாப் பிழையும் தொழாப் பிழையும்

எல்லாப் பிழையும் பொறுத்தருள்வாய் கச்சி ஏகம்பனே...

பிறகுதான் இந்தப் பாடல் பட்டினத்தார் பாடியது என்று தெரிய வந்தது..

ஏகம்பன் அவனது கோயிலை விட்டுவிட்டு வந்தவர்களையும் பொறுத்தருளட்டும்...

1980 களில் இந்தக் கோயிலுக்குச் சென்றுவிட்டு அதைப் பற்றி எழுதியவர்கள் குறிப்பிட்டிருப்பது..

தினமணி நாளிதழில் வெளியாகி கோயிலிலேயே பத்திரிக்கைப் பக்கத்தை வைத்திருக்கிறார்கள்..

மாஞ்சோலையாகத் திகழும் நெடுஞ்சாலை வழியாகப்

பயணப்பட்டு இவ்வூருக்குள் நுழைகிறோம்..

இருமருங்கும் நெல்லும் கரும்புமாக

வயல்வெளிகள் வரவேற்கின்றன..

ஊரைச் சுற்றி எங்கும் குன்றுகள் போல

சிறிதும் பெரிதுமாக மணல்மேடுகள்..

கோயில் ஆற்றின் நடுவே அமைந்துள்ளதோ

என்ற பிரம்மையை உண்டாக்குகின்றன..

ஆனால் நான் சென்றபோது அப்படி வயல்சூழ் இடங்களைப் பார்க்கவில்லை..

கோயிலை விட்டு வெளியில் வரும்போது என்மனதில் தோன்றியவை இரண்டு..

ஒன்று -

எதைத் தேடி நாம் எல்லாரும் நம் ஊரை விட்டு விட்டு வெளி இடங்களுக்குப் புலம் பெயர்ந்தோம்?..

பாடல் பெற்ற திருத்தலங்கள், கோயில்களை விட்டு நாம் விலகி வந்ததன் காரணம் என்ன?..

அதை நாம் அடைந்து வாழ்க்கையில் வெற்றி பெற்றோமா.. இல்லை -

அந்த ஊரை விட்டு விடாமல் அங்கேயே இருக்கின்ற மனிதர்கள் வாழ்க்கையில் வெற்றி பெற்றவர்களா?..

இரண்டாவது -

வெளிநாடுகளில் புகழ்பெற்ற மியூசியங்களுக்குச் சென்றிருக்கிறேன்..

அங்கு இருப்பவை பளிங்கில் வடிக்கப்பட்ட கிரேக்க சிலைகள்.. ஆனால்

நம்மிடம் ஒவ்வொரு ஊரிலும் இருப்பவை ஆயிரம் ஆண்டுகளுக்கு முன்பு,

நம் முன்னோர்கள் தத்தம் கலைத்திறமையால் வடித்த சிற்பங்கள்..

இவைகளின் மதிப்பை நாம் ஏன் புரிந்து கொள்ளவில்லை?..

இந்த இடங்களை அரசாங்கம் செலவு செய்து சுத்தப்படுத்தி வைத்தால்

அவை எத்தனை அன்னியச் செலவாணிகளையும் சுற்றுலா வருபவர்களையும் ஈர்க்கும்?...

இன்னும் பல கோயில்களைப் பற்றி வாய்ப்பிருக்கும்போது பகிர்ந்து கொள்கிறேன்..

***

வெகு சிறப்பாக எழுதியுள்ளார்
அன்பின் திரு. நெ. த., அவர்கள்...

சென்ற வருடம் இத்திருக்கோயிலுக்குச்
சென்றிருந்த போது பூட்டிக் கிடந்தது..

மீண்டும் தரிசனம் செய்ய வாய்ப்பினை
அருள்வான் - இறைவன்....

இனி, பதிவினைப் பற்றி
எனது கருத்து...

இந்த இடங்களை அரசாங்கம் செலவு செய்து

சுத்தப்படுத்தி வைத்தால்..

அதான் சுத்தப்படுத்தி வெச்சுட்டாங்களே!...

கலையழகு மிக்க சிற்பங்கள்
அன்னியச் செலவாணிகளையும் ... ஈர்க்கும்?...

அன்னியச் செலவாணிகளை மட்டுமா!..

அயோக்கியக் களவாணிகளையும் அல்லவா ஈர்க்கின்றது!?...

வாழ்க நலம்

ஃஃஃ

45 கருத்துகள்:

KILLERGEE Devakottai27 ஜனவரி, 2019 06:38
முடிவில் தங்களது ஆதங்கமான கேள்வி சிந்திக்க வைத்தது தமிழரே...

நாம் அனைவருமே நமது முன்னோர்களின் பேராற்றலை உணர்ந்து பார்க்க மறுக்கின்றோம்.

அதன் பலனை நாம், அனுபவித்தே தீரவேண்டும்.
பதிலளிநீக்கு
பதில்கள்
கோமதி அரசு27 ஜனவரி, 2019 06:55
கோவில் சென்று அங்கு கலை அம்சம் நிறைந்த சிற்பங்களை ஒவ்வொன்றையும் ரசித்து படம் எடுத்து பகிர்ந்து கொண்டதற்கு நன்றி நெல்லைத் தமிழன்.

கோவில்கள் பழைமை மாறாமல் சீர் அமைத்தால் நல்லது, ஆனால் அதை கெடுத்து விடுகிறார்கள்.

பழைய மூலிகை ஓவியங்களை அழித்து விட்டு இவர்கள் ஏதோ வரைந்து வைக்கிறார்கள், பின்னம் அடைந்து இருந்தாலும் கலை அம்சம் நிறைந்த சிற்பங்கள் எல்லாவற்றையும் குப்பை போல் மூலையில் போட்டு வைத்து இருக்கிறார்கள்.

அந்த அந்த கோவில்களில் உள்ள உற்சவர்களை (மிக அழகாய் வடிவமைத்த) காட்ட பயப்படுகிறார்கள் குருக்கள், பட்டர்கள்.

மேலகடம்பூர் அருள்மிகு அமிர்தகடேசுவரர் திருக்கோவிலில் உள்ள அருள்மிகு ரிஷபத் தாண்டவ மூர்த்தி மிகவும் அழகாய் இருப்பார், அதை தயங்கி தயங்கி காட்டினார் குருக்கள்.

பிரதோஷ்காலத்தில் வழிபட்டால் சகல தோஷ நிவர்த்தி ஆகும் என்று சொன்னார்.
படம் விற்றார்கள்.

சுற்றலாத் துறை கவனிக்கலாம் நீங்கள் சொல்வது போல்.
வெளி நாட்டில் அப்படியே பழமையை காப்பாற்றி வருகிறார்கள்.
அடுத்த பதிவுக்கு காத்து இருக்கிறேன்.

திருவெண்காடு துர்க்கையை பார்த்து வாருங்கள் அவ்வளவு அழகாய் வில், சூலம் ஏந்தி மிக அழகாய் இருப்பார்.

பதிலளிநீக்கு
பதில்கள்
திண்டுக்கல் தனபாலன்27 ஜனவரி, 2019 08:40
சிந்திக்க வேண்டிய கேள்விகள்...
பதிலளிநீக்கு
பதில்கள்
ஸ்ரீராம்.27 ஜனவரி, 2019 14:58
படங்கள் அழகாய் இருக்கின்றன. விவரங்கள் சுவாரஸ்யம். ஆதங்கம் எல்லோருக்கும் பொது.
பதிலளிநீக்கு
பதில்கள்
வெங்கட் நாகராஜ்27 ஜனவரி, 2019 18:58
அழகான படங்கள்.
பதிலளிநீக்கு
பதில்கள்
வல்லிசிம்ஹன்27 ஜனவரி, 2019 19:56
அன்பு முரளி மா,
இத்தனை அழகான சிற்பங்களை நீங்கள் படம் எடுத்ததால் தெரிய வருகிறது. அதுவும் அந்த துர்க்கை மஹா சக்தி வாய்ந்தவள்
மூன்றடி உயரம் பேபர் மாஷே தங்கப் பதுமையாக எங்கள் வீட்டுக்கு வந்து
ஒரு மழை நாளில் கரைந்து போனாள்.
பிறகு பட்டீஸ்வரம் சென்று பார்த்த பிறகே மனம் ஆறியது.

அருள் வடிவம் அவள்.
கச்சி ஏகம்பன் பாடல் எங்கள் தமிழ் மாஸ்டர் சொல்லிக் கொண்டே இருப்பார். அவரும் பிழைக்க வேண்டி திண்டுக்கல்லுக்கு வந்தவர் தான். எப்போது நம் முன்னோர்
அவரவர் ஊரைவிட்டுப் புலம் பெயர்ந்தார்களொ
அப்போதே ஆரம்பித்தது இந்த Exodus.

YAARAICH SOLLI ENNA PAYAN. என் மாமா பையன் சென்னையைச் சுற்றி இருக்கும் கோவில்களில் உழவாரப் பணிகள் செய்கிறான். என் சம்பந்தியும் திருவல்லிக் கேணியில் இருந்தவரை
கோவில் பணிகளைச் செய்து கொண்டுதான் இருந்தார்கள்.

இங்கே கோவில்களில் சுத்தம் பரிசுத்தமாகக் கவனிக்கப் படுகிறது.
நம் ஊரில் அழுக்குக்கே பழகிவிட்டோமோ என்னவோ.
இப்போது நிறைய விழிப்புணர்ச்சி வந்திருக்கிறது. தமிழ்னாடு ஹெரிடேஜ் குழுவில்
நீங்கள் சேர்ந்தால் இன்னும் பல இடங்கள் போகலாம்.
பதிலளிநீக்கு
பதில்கள்
வல்லிசிம்ஹன்27 ஜனவரி, 2019 19:57
அன்பு துரை செல்வராஜு வணக்கம்மா.
பதிலளிநீக்கு
பதில்கள்
மனோ சாமிநாதன்27 ஜனவரி, 2019 21:55
மிக அருமையான பதிவு!
சொந்த ஊரிலேயே இருப்பவர்களை விடவும் வாழ்க்கையின் தேவைகளுக்காக புலம் பெயர்ந்தவர்களுக்கு இன்னும் அதிகமாக ஊர்ப்பாசம் இருக்குமென்பது என் நினைப்பு. அனுபவமும் அப்படித்தான் சொல்கிறது.
தஞ்சை பெருவுடையார் கோவிலையே எடுத்துக்கொள்ளுங்களேன். அங்கே சும்மா பிராகாரத்தில் அமர்ந்திருந்தாலே போதும், மனதில் அமைதி கிடைக்கும். மதுரையிலிருந்து முதன்முதலாக தஞ்சை பெரிய கோவிலைப்பார்க்க வந்த நண்பர், அதை முழுமையாக பார்த்ததும் ' இந்த அமைதி மதுரை மீனாட்சி அம்மன் கோவிலில் இல்லை' என்றார்.
நிறைய கோவில்களில் சுத்தம் இல்லை என்பதைக் கண்கூடாக பார்க்கலாம்.

இத்தனை கோவில்களின் சிறப்புகளுக்குப்பின்னால் மாபெரும் வரலாறு, நம் முன்னோர்களுடைய வரலாறு இருக்கிறது. அவர்களுடைய தொலை நோக்குப்பார்வை, பொது நலன், சிறப்பான நிர்வாகம் இருக்கின்றன. உதாரணத்துக்கு, தஞ்சை பெருவுடையார் கோவிலில் விழும் மழை நீர் வீணாவதே இல்லையாம். கோவிலின் இரு புறமும் அதற்கான குளங்கள் வெட்டி கோவிலினுள்ளேயிருந்து மழை நீர் பூமி வழியே இந்த குளங்களில் நிரம்புகிறதாம். முதல் நீர் அழுக்கான, சுத்தமில்லாத நீராக இருப்பதால் அதை அப்படியே சிவகங்கை தோட்டத்தினுள்ள் திருப்பி விடப்பட்டு நல்ல தண்ணீர் மட்டும் சேமிக்கப்படுகிறதாம். இது ராஜராஜ சோழன் செய்தது. இப்போதும் இது நடைபெறுவதாக வரலாற்று அறிஞர்கள் சொல்கிறார்கள். இவற்றையெல்லாம் அரசு தான் நல்ல முறையில் கட்டிக்காத்து ஆவன் செய்ய வேண்டும்!!
பதிலளிநீக்கு
பதில்கள்
மனோ சாமிநாதன்27 ஜனவரி, 2019 22:06
ஒன்றை சொல்ல மறந்து விட்டேன். சிவ கங்கை தோட்டம் என்ற பெயர் வரக்காரணமே, சிவனிடமிருந்து கங்கை அங்கே வருவதால் தான் அந்த பெயர் உருவானதாம்!
பதிலளிநீக்கு
பதில்கள்
Bhanumathy Venkateswaran27 ஜனவரி, 2019 23:10
நெ.த.வின் பயண குறிப்புகளும், செல்வராஜ் சார் அவர்களின் கருத்தும் மிகவும் நன்றாக இருக்கின்றன.
பதிலளிநீக்கு
பதில்கள்
Anuprem28 ஜனவரி, 2019 11:19
சிறப்பான பதிவு ...

ஒவ்வொரு இடத்திற்கும் கோவிலுக்கும் செல்லும் போது எனக்குள் எழும் கேள்வி ...எத்தகைய பொக்கிசங்கள் இவை ..இதை காப்பாற்றாமல் நாம் என்ன செய்கிறோம் என்பதே ...

பதிலளிநீக்கு
பதில்கள்
Thulasidharan V Thillaiakathu28 ஜனவரி, 2019 16:56
படங்கள் எல்லாம் ரொம்ப அழகாக இருக்கின்றன நெல்லை. உங்கள் குறிப்புகளும் அருமை.

நான் சிற்பங்களின் கதை அறிய முடிந்தால் ஓகே இல்லைனா அதன் அழகை ரசிப்பது என்றே நினைப்பேன்..

உங்கள் ஆதங்கம் எல்லோருக்கும் உண்டு. ஆனால் நடைமுறை வேறு.

துரை அண்ணாவின் கருத்துகளும் அருமை.

கீதா
பதிலளிநீக்கு
பதில்கள்
பொன்னியின்செல்வனைப் படிக்கும்:) ) அதிரா28 ஜனவரி, 2019 18:52
ஆஆஆஆ புள்ளமங்கை அம்மனைப் பார்த்திட்டேன்ன்ன்ன்...
சிற்பங்களை நன்கு ரசிச்சிருக்கிறீங்க என்பது புரியுது.
பதிலளிநீக்கு
பதில்கள்
பொன்னியின்செல்வனைப் படிக்கும்:) ) அதிரா28 ஜனவரி, 2019 18:53
கல்லாப் பிழையும்.....
பார்த்ததும் அப்பாதான் நினைவுக்கு வந்தார், ஏனெனில் அப்பா டெய்லி சொல்லுவார்... நான் அது தேவாரம் என நினைச்சிருந்தேன்.
பதிலளிநீக்கு
பதில்கள்
பொன்னியின்செல்வனைப் படிக்கும்:) ) அதிரா28 ஜனவரி, 2019 18:56
அல்லோஓஒ நெல்லைத்தமிழன், கோயிலுக்குப் போனால் பார்த்தமா ரசிச்சமா கும்பிட்டோமா என வந்திடோணும்:)
அதை விட்டுப் போட்டுத் தேவையில்லாத கிளவியை எல்லாம் சேசே கேள்வி எல்லாம் கேய்க்கக்கூடா கர்ர்ர்ர்ர்ர்ர்:)...
பதிலளிநீக்கு
பதில்கள்
Geetha Sambasivam29 ஜனவரி, 2019 13:10
சிறப்பான பதிவு. அருமையான படப்பிடிப்பு! தேர்ந்த ஃபோட்டோகிராஃபர் என்பது தெரிகிறது. ஆனால் இத்தனை படங்கள் எடுக்க அனுமதிக்கிறார்கள் என்பதுதான் எனக்குள் ஓர் புதிராக இருக்கிறது. பொதுவாகப் பட்டீஸ்வரம் போன்ற பெரிய கோயில்களில் படம் எடுக்க அனுமதி கிடைப்பது குதிரைக்கொம்பு! நாங்க பத்து, பதின்மூன்று வருடம் முன்னரே போய் வந்தோம். அப்போக் காமிராவெல்லாம் இல்லை. அடுத்த முறை போனால் காமிரா எடுத்துச் சென்று படம் பிடிக்க முயற்சி செய்யணும்.
பதிலளிநீக்கு
பதில்கள்