எண்ணெய்

    

நாடும் வீடும்

நலம் பெற வேண்டும்

பகையும் பிணியும்

தொலைந்திட வேண்டும்..

***

இன்று

பங்குனி 28

செவ்வாய்க்கிழமை

எண்ணெய்..

எண்ணெய் என்பது இயற்கையின் கொடை.. 

கொழுப்புச் சத்து மிக்கது.. இதற்குள் ஏராளமான நன்மைகள் நிறைந்திருக்கின்றன..

கொழுப்பு உடலுக்கு  ஏன் தேவை?..

உடலுக்கான சக்தி கிடைப்பதற்கு..

செல்களின் வளர்ச்சிக்கான  அமினோ அமிலங்களைக் கொடுப்பதற்கு..

 

உள்ளுறுப்புகளைப் பாதுகாப்பதற்கு..

புரதத்திலும் மாவுச் சத்திலும் உள்ளதைப் போல  இரு மடங்கு ஆற்றல் கொழுப்பில் இருந்து கிடைக்கின்றது...

நெய் பருப்புடன் கூடிய முதற்கவளம் தான் நம்முடைய பாரம்பரிய உணவு..

நெய்யில்லா உண்டி பாழ்!.. - என்பது ஔவையாரின் அமுத வாக்கு..

இங்கே நெய் என்பதை இயற்கையான எண்ணெய் என்றும் கொள்ளலாம்..

ஒரு கிராம் புரதத்தில் கிடைக்கும் கலோரிகளை விட  அதே அளவு கொழுப்பில் அதிக கலோரிகள் என்கின்றனர்.. 

கண்ணுக்குத் தெரிந்தது,  தெரியாதது என கொழுப்பில் இருவகை..

நெய், வெண்ணெய், எண்ணெய் - என்பன கண்ணறிந்து  நாம் எடுத்துக் கொள்கின்றவை..

இதர உணவு வகைகளின் மூலமாக நமது உடலுக்குள் சேர்வது கண்ணுக்குத் தெரியாத கொழுப்பு..

இதற்கு மேலாக -

அதற்குள் இது இதற்குள் அது.. என்று  ஆளைக் குழப்புகின்ற விஞ்ஞான மேற்கோள்கள்.. 

அவையெல்லாம் தற்போது தேவையில்லை..

அறையின் வெப்ப நிலையில் இறுகக் கூடிய எந்த எண்ணெயும்  ஆரோக்கியத்துக்கு நல்லதல்ல..

உடலில் மூட்டுகளின் அசைவுக்காக  வழவழப்பைச் சுரக்கும் சுரப்பிகள் சரிவர இயங்குவதற்கு கொழுப்பு மிகவும் முக்கியம்..

தாவர எண்ணெய்களில் நேரடி கொலஸ்ட்ரால் கிடையாது..

இன்றைக்கு - இப்படியான

இயற்கை எண்ணெய் தான் உடலுக்கு நல்லது இல்லை - என்று கற்பிக்கப்பட்டுள்ளது..

மருத்துவ உலகம் சொல்வதைப் போலவே ரத்தக் கொதிப்பு, மாரடைப்பு  - என்று எல்லாவற்றிற்கும் எண்ணெயே காரணமாகின்றது..

ஏன் இப்படி?..

இன்று நமது சமையலறைக்கு வரும் எண்ணெய்கள் அனைத்தும் இயற்கையாகக் கிடைக்கும் எண்ணெயின் உருமாற்றங்களே.. உடல் நலத்திற்கு எவ்விதத்திலும் உதவாதவையே..

எண்ணெயின் இயற்கையான நிறத்தையும், அதன் வழவழப்புத் தன்மையையும், கொழுப்புச் சத்தையும் வேறுபல நச்சு இரசாயனங்களைக் கொண்டு அடியோடு நீக்குவதையே இன்றைக்கு சுத்திகரிப்பு என்று சொல்கிறார்கள்..

சுத்திகரிப்பு  செய்யப்பட்டு மீண்டும் சில ரசாயனங்களுடன் சேர்ந்து  - கவர்ச்சியான ஆடல் பாடல் விளம்பரங்களுடன் 

சந்தைக்கும் சமையல் அறைக்கும் வருகின்ற எண்ணெய் என்பது  ஒரு திரவம்.. 

அவ்வளவு தான்..

சுத்திகரிக்கப்பட்ட இந்த எண்ணெய்யை - அதிக பட்ச உஷ்ணத்துடன் - முதல் முறை பயன்படுத்தப்படும் போதே உருமாறிப் போகின்றது.. 

இதுவே மறுமுறையும் சூடு படுத்தப்படும் போது ஆபத்தானதாகி விடுகின்றது..

ஒருமுறை பயன்படுத்திய எண்ணெயை மீண்டும் பயன்படுத்த வேண்டாம் என்று தற்போது சொல்லப்படுவது இதனால் தான்..

உடல் நலத்திற்கு ஊறுதுணையாக இருந்த எண்ணெயை உடலுக்கு ஊறு விளைவிக்கும் ஒன்றாக மாற்றியதே நவீன தொழில் நுட்பத்தின் அரும் சாதனை..

உடலுக்கு ஒவ்வாத ஒன்றாக இன்றைய எண்ணெய்  விளங்குகின்றது என்பதில் ஐயம் இல்லை..

சாலையோரத்தில் விற்கப்படும் விலை மலிவான சிறு தீனிகளும் சுட்டெடுக்கப்பட்ட எண்ணெயில் இருந்து தான் என்றறியும் போது நாம் எங்கே சென்று முட்டிக் கொள்வது?..

சரி.. இதற்கு என்ன தான் தீர்வு?..

தீர்வா?.. 

அப்படி ஒன்றும் இல்லை!.. 

இருந்தாலும் யாரும் சொல்ல மாட்டார்கள்!.. 

நமக்கு நல்லதான எண்ணெயை  - 

நாமே தேடிக் கொள்வது தான் ஒரே தீர்வு!..

நம்முடைய நலம்

நம்முடைய கையில்!..

***