மாமதுரைத் திருவிழா 5

மாமதுரையில் நிகழ்வுறும்

சித்திரைத் திருவிழாவின் முத்திரைத் திருநாள் - இன்று..

***

நேற்று ஒன்பதாம் திருநாள்.

அன்னை மீனாக்ஷி திக்விஜயம் செய்தாள்..

சுந்தரேசப்பெருமானைக் கண்டு நாணித் தலை கவிழ்ந்தாள்..

போர்க்கோலங் கொண்ட பூங்குழலாள்

புதுமலர் சூடி திருமணக்கோலங் கொண்டாள்!..

இன்று மதுரையம்பதியில் மங்கலகரமாக 

ஸ்ரீ மீனாட்சி - ஸ்ரீ சுந்தரேஸ்வரர் திருக்கல்யாணம் நிகழ்ந்தது.

மங்கல வைபவத்தின் நிகழ்வுகளை -
இன்றைய பதிவில் வழங்குவதில் மகிழ்ச்சியடைகின்றேன்..

இன்றைய பதிவின் படங்களை வழங்கியோர் :- 

திரு. குணா அமுதன், திரு. ஸ்டாலின், திரு.அருண்., 

அவர் தமக்கு நெஞ்சார்ந்த நன்றி..

* * *

மணியே மணியின் ஒளியே ஒளிரும் மணிபுனைந்த

அணியே அணியும் அணிக்கு அழகே அணுகாதவர்க்குப் 

பிணியே பிணிக்கு மருந்தே அமரர்பெரு விருந்தே

பணியேன் ஒருவரை நின் பத்ம பாதம் பணிந்த பின்னே!.. (24)

* * *

ஒன்பதாம் திருநாள் (18/4) வைபவம் 

மாசி வீதிகளில் நிகழ்ந்த திருவீதி உலா!..

-: காலை :-

மரவர்ண சப்பரத்தில் எழுந்தருளல்.

-: இரவு :-

அருள் தரும் சுந்தரேசப்பெருமானும் 

அங்கயற்கண் அம்பிகையும்

இந்திர விமானத்தில் 

எழுந்தருளி மாசி வீதிகளில் வலம் வந்தனர்.

பத்தாம் திருநாள் (19/4) வைபவம்

ஸ்ரீ மீனாக்ஷி திருக்கல்யாணம். 

-: காலை :-

சித்திரை வீதிகளில் 

வெள்ளி சிம்மாசனத்தில் திருவீதி உலா!..

முத்துராமையர் மண்டபத்தில் 
கன்னி ஊஞ்சலாடிய கயற்கண்ணி
திருமண மண்டபத்திற்கு எழுந்தருளினாள்.

பல்லாயிரக்கணக்கானவர் மாமதுரையில் கூடியிருக்க - 

அம்மையும் அப்பனும் சர்வ அலங்காரத்துடன் -
ஆடி வீதி மற்றும் சித்திரை வீதிகளில் எழுந்தருளினர்.

தொடர்ந்து மலர்களால் அலங்கரிக்கப்பட்டிருந்த மணமேடையில்
சுந்தரேசப் பெருமான் எழுந்தருளினார்.

பெருமானைத் தொடர்ந்து - பிரியாவிடையும் மீனாக்ஷி அம்மனும்
திருமணக் கோலத்தில் மணமேடைக்கு எழுந்தருளினர்.

அன்புத் தங்கையை கன்யாதானம் செய்து கொடுப்பதற்கென - திருப்பரங்குன்றத்திலிருந்து ஸ்ரீ பவளக்கனிவாய்ப் பெருமான்
 எழுந்தருளினார். 

அம்மையப்பனின் திருமணக் கோலத்தைக் கண்டு மகிழ்வதற்கு - 

வள்ளி தெய்வானையுடன் திருமுருகன் - தானும் எழுந்தளினன்.

காலை 8.45 மணியளவில் ரிஷப லக்னம் கூடிய சுபவேளையில் திருமாங்கல்யதாரணம் நிகழ்ந்தது.

ஸ்ரீ மீனாக்ஷிக்கு திருமாங்கல்யம் அணிவிக்கப்பட்ட சுபவேளையில் கூடியிருந்த மக்கள் மலர்களுடன் அட்சதை தூவி வழிபட்டதுடன் - சுமங்கலிகள் தாலிச்சரடு மாற்றிக் கொண்டனர்.

திருமண விழாவில் மகிழ்ச்சியுடன் சுற்றி வருகின்ற மச்சக்கன்னியும் 

கனகசுந்தரம் அருகிருக்க புது மஞ்சள் கயிறு மாற்றிக் கொண்டாள்..

-: இரவு :-

அருள்தரும் சுந்தரேசப்பெருமான் யானை வாகனத்திலும் 

அங்கயற்கண் அம்பிகை பூம்பல்லக்கிலும்

மாசி வீதிகளில் எழுந்தருள்வர்.

புண்ணியம் செய்தனமே மனமே புதுப்பூங்குவளைக்

கண்ணியும் செய்ய கணவரும் கூடி நம்காரணத்தால்

நண்ணி இங்கே வந்து தம்அடியார்கள் நடுஇருக்கப்

பண்ணிநம் சென்னியின்மேல் பத்மபாதம் பதித்திடவே!.. (41)

-: அபிராமி அந்தாதி :-   

மீனாட்சி சுந்தரேசர்
திருவடிகள் போற்றி.. போற்றி!..

ஓம் நம் சிவாய சிவாய நம ஓம் 

* * *