மலர் முகம்

     

நாடும் வீடும்

நலம் பெற வேண்டும்

பகையும் பிணியும்

தொலைந்திட வேண்டும்..

***

இன்று

ஆடி 17

 புதன்கிழமை

" மலர்ந்த முகமே வாழ்வின் இன்பம் " - என்று அப்போதெல்லாம் கடைகளில் எழுதி வைத்திருப்பார்கள்..

அப்போது என்றால் 1960 - 70 களில்..

இப்போது அப்படியான வாசகங்களை மட்டுமல்ல மலர்ந்த  முகங்களைக் கூட காண முடிவதில்லை..

ஆங்காங்கே தெரிகின்ற புன்னகை, பொலிவு - எல்லாமே ஏதோ ஒரு நிர்பந்தத்தின் பேரில் தான் என்பது புரிகின்றது..

ஏன்.. என்ன பிரச்னை?..

வேறொன்றும் இல்லை.. 

பிரச்னை தான் எல்லாருக்கும்  பிரச்னை!..

அங்கே இங்கே என்று கேட்டுக் கொண்டிருந்தது எல்லாம் ஏதோ ஒரு வகையில்  உள்ளங்கையில் இருக்கும்  கைத்தலபேசிக்குள் ஏதேதோ பெயர்களுடன் ஒட்டடையாய் படிந்திருக்கின்றன...

தொட்டதற்கெல்லாம் ஆய்வுகள்.. ஆலோசனைகள்.. 

இலை விழுந்ததில் இருந்து இதயத்தை அறுத்து சிகிச்சை செய்வது வரைக்கும்.. 

இனி எல்லாம் இப்படித் தான்!.. - என்றதன் அச்சாரமாக வந்து விழுந்து கொண்டு இருக்கின்றன....

இதை அப்படிச் சாப்பிடுங்கள்.

அதை இப்படிச் சாப்பிடுங்கள்.. - என்று பலவகை மருத்துவங்களுக்கு இடையே,

இட்லியை எண்ணெயில் பொரித்து எடுப்பது எப்படி?..  அதிரசத்தை அவித்து எடுத்து அடுக்குவது எப்படி?.. 

உங்கள் வீட்டில் ஒன்றுமே இல்லையா.. என்று தொடங்கி  சூப்பர் பிறியானி (பிரியாணி) செய்து அசத்தலாம் என்பது வரைக்கும் - அலசி எடுக்கின்ற ஆலோசனைக்  குப்பைகள்!..

வேடிக்கை விபரீதமான

 அவற்றை எல்லாம்  புறந்தள்ளி விட்டு

நல்ல வகையான உணவுகளில் எதை வேண்டுமானாலும் 

சாப்பிடுங்கள்..

நல்ல உணவு..

எது நல்ல உணவு?..

யார் தீர்மானிப்பது அதை!..

அரிசியைப் பிளந்து அதற்குள் வேறொரு மரபின் அணுவைப் பொதிந்து வைப்பவனா?..

அரிசிச் சோற்றுடன் வகை வகையாய் புலாலைக் கலந்து வைக்கும் பிரியாணிக் கடைக்காரனா?..

ஒட்டு முறையில் விளைந்த மாங்காய்களை சந்தைப் படுத்தியவனா?.. 

அவற்றில் ரசாயனம்  வைத்து  - பழம் என்று சொல்லி ஏமாற்றிப் பிழைக்கும்  வல்லரக்கனா?..

வல்லடி வழக்காக ஆகி விட்ட ஏமாற்று வணிகத்தை ஒதுக்கி விட்டால் -

நாம் தான் நமக்கு முதலாளி..

நமக்கு ஆகி வரும் நல்ல உணவை நாம் தான் தீர்மானிக்க வேண்டும்.. 

இதுதான் நியாயம்.. நீதி!..

காலம் அறிந்து சாப்பிடுங்கள்..

அளவு அறிந்து சாப்பிடுங்கள்..

நல்ல உழைப்புக்குப் பின் சாப்பிடுங்கள்..

அல்லது 

பசியெடுத்த பின் சாப்பிடுங்கள்..

ஏனென்றால், 

உடலுக்கு ஏதாவதொரு வழியில் சற்று கடினமான வேலைகள் தேவை..

அது உடலின் சதைக்கும் எலும்புக்கும் சாதகமாக இருக்க வேண்டுமே தவிர பாதகமாக இருந்து விட கூடாது..

பயிற்சிக் கூடத்தில் உடற்பயிற்சியின் போது மாரடைப்பு ஏற்பட்டதாக உலகம் முழுதிலும் பரிதாபங்கள் பலப்பல..

பொதுவாக உடல் அமைவின்படி மாரடைப்பு என்பது வரலாம். 

ஆனால் உடற்பயிற்சியின் போது அதற்கான வாய்ப்பு அதிகமாகின்றது. உடற்பயிற்சியின் போது இதயத் துடிப்பும் ஆக்சிஜன் தேவையும் அதிகரிக்கின்றது.

ரத்தத்தில்  ஆக்சிஜன் தேவை அதிகரிக்கும் 

போது அதைச் சமன் செய்வதற்காக இதயத்தின் வேகமும் அதிகரிக்கின்றது.. இதனால் ரத்தக் குழாய்களில் அழுத்தமும் கூடுகிறது.. 

இவை அனைத்தும் சேர்ந்து கொள்ளும் போது - இதற்கு ஏற்றபடி இதயத்தின் தன்மை இல்லா விட்டால் திடீர் மாரடைப்புடன் வேறு பாதிப்பும் ஏற்படக் கூடும் - என்பது பரவலாக தற்போது அறிவுறுத்தப்படுகின்றது

இந்நிலையில், 

உடற்பயிற்சி ஆயுளை நீட்டிக்கும் என்ற முடிவுக்கு சிலர் வந்தது எப்படி என்று தெரியவில்லை..

உடலுழைப்பு வேறு.. 

உடற்பயிற்சி வேறு!..

பலரும் இன்றைக்கு உழைப்பையும் உடற்பயிற்சியையும் குழப்பிக் கொண்டிருக்கின்றனர்..

முயல் எப்போதும் ஓடிக் கொண்டும் அப்படியும்  இப்படியும் குதித்துக் கொண்டே இருக்கின்றது.. அது பெற்றிருக்கும் வரம் மூன்று முதல் ஐந்து ஆண்டுகளே.. 

சில வகை முயல்கள் மட்டுமே ஒரு சில ஆண்டுகள் கூடுதலாக வாழ்கின்றன!..

ஆனால் -

ஓடுவது, குதிப்பது என்றால்  - என்ன என்றே தெரியாத 

ஆமைகள் நிலத்தில் சராசரியாக எண்பது முதல் நூறு ஆண்டுகள் வரையிலும் கடல் ஆமைகளில் சில  நூற்றைம்பது வருடங்களும் பிழைத்திருக்கின்றன!..

எல்லாம் அந்தந்த ஜீவன்களும் வாங்கி வந்த வரங்கள்..

எனவே, 

கடினமான உடல் உழைப்பு குறைந்து விட்ட இந்த கால கட்டத்தில் இயன்ற வரை அதிகாலையில் விழித்தெழுங்கள்..

இயல்பானவற்றுக்குப் பின் ஐந்து நிமிடமாவது மனதை ஒருமுகப்படுத்தி தியானத்தில் இருங்கள்.. 

ஆதியான இறைவனிடம் 

பிரார்த்தனை செய்யுங்கள்..

நல்ல உணவை  விருப்பமுடன் சாப்பிடுங்கள்..

தேவையான அளவு தண்ணீர் குடியுங்கள்..

கிடைத்திருக்கும் வேலையை மனம் ஒன்றிச் செய்யுங்கள்..

ஒவ்வொரு நாளும் ஒரு கிமீ., தூரம் இயல்பாக  நடந்து சென்று திரும்பி வாருங்கள்..

பிடித்தமான இசையுடன் மகிழ்ந்திருங்கள்..

வீண் பிரச்னைகளில் ஈடுபடுவதைத் தவிர்த்து விடுங்கள்..

மது, புகை போன்ற தீய பழக்கங்கள் கை வசம் இருந்தால் விட்டு விடுங்கள்..

குளிர்ந்த மன நிலையில் அமைதியாக இருங்கள்.

நிம்மதியாக ஓய்வெடுங்கள்..

கிடைக்கும் நேரத்தில்

இயன்றவரை பிறருக்கு உதவுங்கள்..

ஏனெனில், 

வாழும் வாழ்க்கை 

நம்முடையது..

முழுமையான மலர்ச்சியுடன்

 மகிழ்ச்சியுடன் வாழ்வோம்!..

உடல் நலனும்

மன நலனும்

முக்கியமானவை..

மலர்ந்த முகமும்

மலர்ந்த மனமும் தான் 

வாழ்வின் சிறப்புக்குக்  

காரணங்கள்!..

பிரியாணியோ

பிஸ்ஸாவோ அல்ல!..

**

வாழ்க நலம்

நலம் வாழ்க

***