முத்து

 

நாடும் வீடும்

நலம் பெற வேண்டும்

பகையும் பிணியும்

தொலைந்திட வேண்டும்..

***

புரட்டாசி 

 வியாழக்கிழமை

2014 ல் பதிவு செய்யப்பட்ட பிள்ளைத் தமிழ் பாடலுக்கு விளக்கம் கேட்டிருந்த  அன்பருக்காக இந்தப் பதிவு

திருச்செந்தூர் முருகன் பிள்ளைத்தமிழ்

கத்தும் தரங்கம் எடுத்தெறியக்

கடுஞ்சூல் உளைந்து வலம்புரிகள்

கரையில் தவழ்ந்து வாலுகத்தில்

கான்ற மணிக்கு விலையுண்டு

தத்துங் கரட விகடதட தந்திப் 

பிறைக் கூன் மருப்பில் விளை

தரளந் தனக்கு விலையுண்டு

தழைத்து கழுத்து வளைந்த மணிக்

கொத்தும் சுமந்த பசுஞ்சாலிக்

குளிர்முத் தினுக்கு விலையுண்டு

கொண்டல் தரும் நித்திலம் தனக்குக்

கூறுந்தரமுண்டு உன் கனிவாய்

முத்தம் தனக்கு விலை உண்டோ

முருகா முத்தம் தருகவே

முத்தம் சொரியும் கடல் அலைவாய்

முதல்வா முத்தம் தருகவே..

-: பகழிக்கூத்தர் :- 

கடலில் அலையடித்து வலம்புரிச் சங்குகள் கரையில் தவழ்ந்து உமிழும் முத்துக்கு விலை உண்டு.

யானையின் தந்தத்தில் உண்டாகும் முத்துக்கும் விலை உண்டு.

வயலில் தழைத்து விளைந்த  குளிர்ச்சியான நெல் முத்தினுக்கும் மேகங்கள் பொழிந்த நீர் முத்துக்களுக்கும் விலை உண்டு.

 இவையனைத்தும் மதிப்பு மிக்கவை; ஆனால், 

முருகா நீ உந்தன் கனி இதழ்களால் தரும் முத்தமோ விலைமதிப்பற்றது, அதற்கு விலையே இல்லை..

முருகா... முத்தம் தருக..

முத்துக்களைத் சொரிகின்ற திருச்செந்தூரின் முதல்வா.. முத்தம் தருகவே!..

முருகா

முருகா...

***