திருப்புகழ்

  

நாடும் வீடும்

நலம் பெற வேண்டும்

பகையும் பிணியும்

தொலைந்திட வேண்டும்..

***

இன்று

தை 19

வெள்ளிக்கிழமை

திருப்புகழ்

-: பொது :-

தானன தனன தானன தனன

தானன தனன ... தனதான

தோரண கனக வாசலில் முழவு

தோல்முர சதிர ... முதிராத

தோகையர் கவரி வீசவ யிரியர்

தோள்வலி புகழ ... மதகோப

வாரண ரதப தாகினி துரக

மாதிர நிறைய ... அரசாகி

வாழினும் வறுமை கூறினு நினது

வார்கழ லொழிய ... மொழியேனே

பூரண புவன காரண சவரி

பூதர புளக ... தனபார

பூஷண நிருதர் தூஷண விபுதர்

பூபதி நகரி ... குடியேற

ஆரண வனச ஈரிரு குடுமி

ஆரியன் வெருவ ... மயிலேறும்

ஆரிய பரம ஞானமு மழகு

மாண்மையு முடைய ... பெருமாளே..

-: நன்றி கௌமாரம் :-

தோரணங்கள் ஆடுகின்ற  

அரண்மனையின்  அழகிய வாசலில் 

முழவு, முரசு முதலிய வாத்தியங்கள் ஒலிக்கவும்

இளம் பெண்கள் சாமரம் வீசவும்

புலவர்கள் எனது

வீரத்தைப் புகழவும்

மதமும் கோபமும் கொண்ட யானைகள், 

தேர்கள், காலாட் படைகள், குதிரைகள்,  - என 

திசை நிரம்பி விளங்கவும்

நான் ஒரு அரசனாகி வாழ்ந்தாலும் 

வறுமை நிலை மிகுந்து வீழ்ந்தாலும் 

உனது திருவடித் தாமரைகளைத் தவிர 

வேறு எதையும் வேறு யாரையும் 

புகழ மாட்டேன்..

பூரணனே புவனத்திற்குக்  காரணனே 

குற வள்ளியின் திருத்தன 

பாரங்களில் அணைவோனே..

அசுரர்களை நிந்தித்துக் கண்டிப்பவனே

தேவர்களின் தலைவன்

அமரலோகத்தில் மீண்டும் குடியேறும்படிச் 

செய்தவனே

வேதம் ஓதியபடி தாமரையில் அமர்ந்திருக்கும் 

நான்முக  பிரம்மன் அச்சம் கொள்ளும்படி

மயிலேறி வருகின்ற பெரியவனே..

பரம ஞானத்தையும் அழகையும் 

பராக்ரமத்தையும் உடைய பெருமாளே..

முருகா முருகா

முருகா முருகா

**

ஓம் நம சிவாய 

சிவாய நம ஓம்

***