மஞ்சள்

    

நாடும் வீடும்

நலம் பெற வேண்டும்

பகையும் பிணியும்

தொலைந்திட வேண்டும்..

***

இன்று

சித்திரை 4

 திங்கட்கிழமை

மஞ்சள்

செந்தமிழ்க் குடும்பங்களில்

இல்லறமோ இறையறமோ மஞ்சள் தான் பிரதானம்..

மஞ்சள் மங்கலத்தின் சின்னம்.. 

மகிழ்ச்சியின் அடையாளம்.. 

மங்கல சுப சகுனம்..

மேல் திசையில் இருந்து கொள்ளை யடிக்க வருவதற்குப் பல நூற்றாண்டுகளுக்கு முன்னரே இந்நாட்டில் மஞ்சள் எல்லாவற்றிலும் முதலிடத்தில் இருந்தது.. இப்போதும் இருக்கின்றது..

மஞ்சளாக இருப்பதாலேயே இது மஞ்சள்..

அகத்திலும் புறத்திலும்

மிகச் சிறந்த கிருமி நாசினி..

மனதில் ஆன்மீக உணர்வுகளைத் தூண்டி விடுவது மஞ்சள்..

தோல் நோய்களுக்கு மிகச் சிறந்த தீர்வு மஞ்சள்..

மஞ்சளின் மருத்துவ குணங்களை அறிந்து கொண்ட அமெரிக்கா மஞ்சளைக் கைப்பற்ற முனைந்தது நம்மில் பலருக்கும் தெரியும்..

மஞ்சளில் உள்ள குர்க்குமின் என்ற  நிறமி தான் மஞ்சள் நிறத்துக்குக் காரணம்..  

பெண்கள் முகத்துக்கு மஞ்சள் பூசுவதால் முகத்தில் முடி வளராமல் தடுப்பதுடன் முகத்துக்கு ஒருவித பளபளப்பும் வசீகரமும் ஏற்படுகின்றது. முகத்துக்கு மஞ்சள் பூசுதல் பாரத கலாச்சாரம்..

பூப்பெய்திய பெண்ணை வாழிய.. வாழிய.. என்ற வாழ்த்துரைகளுடன் மஞ்சள் நீராட்டும் தருணங்கள் உன்னதமானவை...

இங்கிருந்து தான் சீர்மிகு மரபுகள் உருவாகின்றன..

மஞ்சள் தூளை பாலில் சேர்த்துக் காய்ச்சி அருந்தினால் தொண்டை எரிச்சல் தீரும்..

சளி, வறட்டு இருமல் தொடர்பான காய்ச்சல்  மற்றும் மூட்டு வலிக்கு  மஞ்சள் பால் சிறந்த நிவாரணி.. 

வறட்டு இருமலினால் உண்டாகும் தொண்டை எரிச்சலுக்கு  கலப்படமற்ற தேனில் (1tbsp) சுத்தமான மஞ்சள் தூளைக் (1 tsp) குழைத்து சுவைப்பது மிகவும் நல்லது..

உடலில் சொறி, சிரங்கு  முதலானவை  ஏற்பட்டால் மஞ்சளை அரைத்துப் பூசுவது ஒன்றே தீர்வு..  

தோல் பராமரிப்பிற்கு மஞ்சளுக்கு நிகராக வேறு ஒன்று இல்லை..

மூட்டு வீக்கத்தைக் குறைக்கின்றது...

காயத்தால் ஏற்படும் வீக்கத்திற்கும்  தசை வலியைப் போக்குவதற்கும் மஞ்சளுடன் சிறிது நீர் விட்டு சுண்ணாம்பு குழைத்துப் பூசுதல் வழக்கம்..

காயம் பட்ட இடத்தில் பூசப்படும் மஞ்சள் சாந்து கிருமி நாசினியாக வேலை  செய்கின்றது.. புதிய திசு உருவாகவும், காயம் ஆறுவதற்கும்  காரணம் ஆகின்றது..

பூப்படைந்த பெண்ணுக்கும் பிரசவித்த பெண்ணுக்கும் மஞ்சளே உற்ற துணை.. பிறந்த குழந்தையை மஞ்சள் நீரில் குளிப்பாட்டுதல் மரபு..

அந்தக் காலத்தில அம்மை நோயில் இருந்து மீண்டவர்களுக்கும் வேப்பிலை மஞ்சள்,  நீர் குளியலே பிரதானம்..

இதெல்லாம் சர்வ சாதாரணமான வீட்டு விஷயங்கள்.. கைக் குறிப்புகள்..

சமையலில் மஞ்சளின் பங்கு மிகவும் அதிகம்..

மஞ்சள் தூளைப் பசும் பாலில் (பாக்கெட் பால் அல்ல) சேர்த்துக் காய்ச்சுவதே மஞ்சள் பால்..

இன்றைக்குப் பசும் பாலுக்கும் பிரச்னை எனில் ஒன்றும் செய்வதற்கில்லை..

மஞ்சள் பால்  நீரிழிவுக்கு நன்மை பயக்கும். இது கல்லீரலில் இன்சுலின்  சுரப்பினை அதிகரித்து  இரத்த குளுக்கோஸ் அளவைக் கட்டுப்படுத்துகின்றது

மஞ்சள்  ஜீரண மண்டலத்தை ஒழுங்கு செய்து உடலில் நோய் எதிர்ப்பு சக்தியை உண்டாக்குகின்றது. இதனால் உடல் செல்களுக்கு முழு பாதுகாப்பை ஏற்படுகின்றது..

உடலின் நச்சு நீக்கி கல்லீரல் நலத்தை மேம்படுத்துகிறது மஞ்சள்..

மஞ்சளின் குர்குமின்  புற்றுநோய்க் கட்டி ஏற்படாமல் தடுக்கின்றது. ரத்தக் குழாய்களில் அடைப்பு ஏற்படாமல் தடுக்கின்றது என்று தற்போது கண்டறிந்துள்ளனர்..

மஞ்சளில் வைட்டமின் a, தியாமின் (b1), ரிபோஃப்ளேவின் (Riboflavin), வைட்டமின் c மற்றும் கால்சியம், பாஸ்பரஸ், இரும்பு, சோடியம் மற்றும் பொட்டாசியம் முதலானவை அடங்கி உள்ளதாக விக்கி சொல்கின்றது..

மஞ்சளின் மூலக்கூறினை அடிப்படையாகக் கொண்டு பற்பல கிரீம்  லோஷன்கள் அழகு சாதனப் பொருட்கள் தற்போது அதிக அளவில் தயாரிக்கப்பட்டு விற்பனைக்கு வருகின்றன..

மஞ்சளின் மகத்துவத்தைப் பற்றி இங்கே பேசுவது கொல்லன் பட்டறையில் குண்டூசி விற்பதற்குச் சமம்...

ஆனால்,

மங்கலமாகிய மஞ்சள் திகழ வேண்டிய பெண்ணின் முகத்தில் நவநாகரிக மேல் பூச்சு தவழ்கின்ற காலம் இது!..

மங்களகரமான திருமணத்தில் கூட  மினுக்கும் ஒப்பனையுடன் மணமகள் வருகின்ற காலம் இது..

எனவே மஞ்சளைப் பற்றி பேச வேண்டியதாயிற்று..

மேலும்

கடைகளில் கிடைக்கும் மஞ்சள் தூள்களில் கலப்படம் என்கின்றனர்..  

உலர்ந்த மஞ்சள் கிழங்கினை வாங்கி மேலும் வெயிலில் உலர்த்தி அரைத்துக் கொள்வதே நல்லது.. 

அது தான் எங்கள் வீட்டிலும்!..

வாழ்க மஞ்சளும் மங்கலமும்

நம்முடைய நலம்

நம்முடைய கையில்!..

***