சதயத் திருவிழா 1

நாடும் வீடும்

நலம் பெற வேண்டும்

பகையும் பிணியும்

தொலைந்திட வேண்டும்..

***

இன்று ஐப்பசி 18

வெள்ளிக்கிழமை

நேற்று (3/11) தஞ்சை ஸ்ரீ ப்ரஹதீஸ்வரர் திருக்கோயிலில் நடைபெற்ற சதயத் திருவிழாவின் காட்சிகள் சில..

தாங்கள் அனைவரும் சதய விழா நிகழ்வுகள் அனைத்தையும் உடனுக்குடன் பார்த்திருக்கக் கூடும்.. இருப்பினும் எனது மகிழ்ச்சிக்காக...

படங்களைப் பதிவிட்டவர்க்கு நெஞ்சார்ந்த நன்றி..

நேற்று காலை மங்கல இசையுடன் விழா துவங்கியது..

தருமபுர ஆதீனம் இருபத்தேழாவது குருமகா சந்நிதானம் ஸ்ரீ மாசிலாமணி தேசிக ஞானசம்பந்த பரமாச்சாரிய சுவாமிகள் திருக்கோயில் பணியாளர்களுக்கு புத்தாடைகள் வழங்கினார்..

சகோட யாழ்

ராஜராஜன் காலத்தில் 

ஓதுவார்களால் இசைக்கப்பட்ட சகோட யாழ் எனும் இசைக் கருவிக்கும் பன்னிரு திருமுறைகளுக்கும் மலர் அலங்காரம் செய்யப்பட்டு சிறப்பு தீப ஆராதனை  நடத்தப்பட்டது..

தொடர்ந்து அலங்கரிக்கப்பட்ட யானையின் மீது திருமுறைகளை ஏற்றிக் கொண்டு தமிழகத்தின் பல பகுதிகளிலும் இருந்து வந்திருந்த நாற்பத்தெட்டு ஓதுவார்கள் தேவாரத் திருப்பாடல்களைப்  பாடியபடி, ராஜராஜன் சிலையை சென்றடைந்து மாலை அணிவித்து மரியாதை செய்தனர்..

திருக்கோயிலில்

ராஜராஜ சோழன், உலகமா தேவியரது திருமேனிகளின் முன்பாக புனித நீர் கலசங்கள் வைத்து சிவச்சாரியர்கள் சிறப்பு யாகம் நடத்தினர்..

தொடர்ந்து, ஸ்வாமிக்கும் அம்பாளுக்கும்

நாற்பத்தெட்டு மங்கலப் பொருட்களால் பேரபிஷேகம் நிகழ்த்தப்பட்டு மகா தீபாராதனையும் நடைபெற்றது..

தருமபுரம் வேத பாடசாலை மாணவர்களும்  தேவாரப் பாடசாலை மாணவர்களும் வேத, திருமுறை பாராயணம் செய்தனர்.

(மேலேயுள்ள படங்கள் காணொளியில் இருந்து எடுக்கப்பட்டவை)

மாலையில் சர்வ அலங்காரத்துடன் ஸ்வாமி அம்பாள் ரிஷப வாகனத்தில் திருவீதி எழுந்தருளினர்..

ராஜராஜ சோழனும் உலகமாதேவியும் உடன் எழுந்தருள - நாகஸ்வர இன்னிசை, சிவ கண கயிலாய வாத்திய பேரொலியுடன் சதயத் திருவிழா சிறப்பாக நடைபெற்றது..

**

சிவபாத சேகரன் வாழ்க.. வாழ்க..

ஓம் நம சிவாய சிவாய நம ஓம்..

***