கற்பக மூர்த்தி

பாலும் தெளிதேனும் பாகும் பருப்பும் இவை
நாலுங் கலந்துனக்கு நான் தருவேன் - கோலஞ்செய்
துங்கக் கரிமுகத்துத் தூமணியே நீயெனக்குச்
சங்கத் தமிழ் மூன்றுந் தா..

-: ஔவையார் :-

நாடெங்கும் விநாயக சதுர்த்தி விழாக்கள் களை கட்டியிருக்கின்றன...

பொருளாதாரத்தை அனுசரித்து
பத்து நாள் திருவிழாவாகக் கொண்டாடும் திருக்கோயில்களும் உள்ளன..

அந்த வகையில்
காரைக்குடிக்கு அருகிலுள்ள
பிள்ளையார்பட்டி ஸ்ரீ கற்பக விநாயகர் திருக்கோயில் முக்கியமானது...

பிள்ளையார்பட்டி ஸ்ரீ கற்பக விநாயகர் திருக்கோயில் - என்றாலும்,
அங்கே பிரம்மாண்டமாக விளங்குவது சிவாலயம்...

அருள்தரும் வாடாமலர் மங்கை உடனாகிய மருதீசர் உறையும்
அழகான திருக்கோயில்...

ஆனால் -
மூல மூர்த்தி -
மலைப் பாறையின் சிறு குகைக்குள்
புடைப்புச் சிற்பமாக விநாயகர் திருமேனி...

வலஞ்சுழித்த துதிக்கை..
இரண்டு திருக்கரங்களுடன் பால கணபதி எனும் திருக்கோலம்..

ஸ்ரீ கற்பக விநாயகர் வடக்கு திசை நோக்கித் திகழ்கின்றார்...

ஆறடி உயரம்... அருள் நோக்கு மிக நன்றாகப் புலப்படும்...

ஆயிரத்து முன்னூறு ஆண்டுகளுக்கு முற்பட்டவர்...

இந்த குடைவரையுடன் இணைந்ததாக விளங்கும்
சிவாலயம் சமீப காலத்தைச் சேர்ந்தது...

கிழக்கு முகமாக விளங்கும் சிவாலயத்தையும்
குடைவரையையும் ஒருசேர கிரி வலம் செய்யலாம்...

மருத மரங்கள் நிறைந்திருந்ததால்

இவ்வூருக்கு மருதங்குடி, மருதவனம் என்பதே பழைய பெயர்...

காரைக்குடி - திருப்பத்தூர் பிரதான சாலையில் இறங்கினால்
திருக்கோயிலை நோக்கித் தெற்காகச் செல்கின்றது சாலை...

திருக்கோயிலை நெருங்கும் முன்பாக பெரிய திருக்குளம்...

அங்கிருந்தே -
ஆனைமுகத்து அம்மானை ஒளிமயமான திருக்கோலத்தில் தரிசிக்கலாம்...

நகரத்தார்களின் சீர்மிகு நிர்வாகத்தில் சிறப்புடன் விளங்குகின்றது..

திருக்கோயிலுக்குள் -
நிர்வாகத்தினரைத் தவிர படமெடுக்க அனுமதியில்லை...

சில ஆண்டுகளுக்கு முன் திருக்கோயிலுக்குச் சென்றபோது
வெளியில் இருந்து படங்கள் எடுத்திருக்கின்றேன்...

அப்படி எடுக்கப்பட்ட படங்கள் எங்கேயிருக்கின்றன!..
- என்று தெரியவில்லை...

கிடைத்தால் பதிவில் தருகின்றேன்..

இவ்வேளையில்
பிள்ளையார்பட்டியில் நிகழும் வைபவங்களின் படங்களும்

தஞ்சையை அடுத்துள்ள
கணபதி அக்ரஹாரம் மற்றும் மெலட்டூர்
விநாயகர் திருக்கோயில்களில் நிகழும் வைபவங்களின்
படங்களும் இன்றைய பதிவில்!..

வழக்கம் போல சிவனடியார் திருக்கூட்டத்தினருக்கு
மனமார்ந்த நன்றி...

பிள்ளையார்பட்டி வைபவங்கள்..

ஸ்ரீ கற்பக விநாயகர்
பிள்ளையார்பட்டி

ஸ்ரீ சண்டேஸ்வரர்
பிள்ளையார்பட்டி

கணபதி அக்ரஹாரம் - தஞ்சை..

மெலட்டூர் - தஞ்சை

அற்புதக் கீர்த்தி வேண்டின் ஆனந்த வாழ்க்கை வேண்டின்

நற்பொருள் குவிதல் வேண்டின் நலமெலாம் பெருக வேண்டின்

கற்பக மூர்த்தி தெய்வக் களஞ்சியத்து இருக்கை சென்று

பொற்பதம் பணிந்து பாரீர் பொய்யில்லை கண்ட உண்மை..

-: கவியரசர் கண்ணதாசன் :-

ஓம் கம் கணபதயே நம: 

ஃஃஃ