நமசிவாய வாழ்க.. நாதன் தாள் வாழ்க..

நம சிவாய வாழ்க.. நாதன் தாள் வாழ்க..

நம சிவாய

பூ நாளும் தலை சுமப்ப - புகழ் நாமம் செவி கேட்ப - நா நாளும் நவின்றேத்தப் பெறலாமே நல்வினையே!..

வாழி அவன்தன் வளநாடு மகவாய் வளர்க்கும் தாயாகி

ஊழி உய்க்கும் பேருதவி ஒழியாய் வாழி காவேரி!..


புதன், அக்டோபர் 01, 2014

வாய்மையே வெல்லும்

காந்திஜியின் சத்திய சோதனை.

என் திறமையில் எனக்கு பிரமாதமான மதிப்பு இருந்ததில்லை. எனக்குப் பரிசுகளும் உபகாரச் சம்பளங்களும் கிடைக்கும் போதெல்லாம் நான் ஆச்சர்யப்படுவதுண்டு. 

ஆயினும், நான் எனது நன்னடத்தையை சர்வ ஜாக்கிரதையாகக் காப்பாற்றி வந்தேன். இதில் சிறு குறை ஏற்பட்டாலும் கண்ணீர் விட்டு அழுது விடுவேன். 

கண்டிக்கப்பட்டாலோ கண்டிக்கப்பட வேண்டியவன் என்று ஆசிரியர் கருதினாலோ, என்னால் சகித்துக் கொள்ள முடியாது.


முதல் வகுப்பில் அல்லது இரண்டாம் வகுப்பில் நடந்த சம்பவம் - இது.

ஒரே ஒரு தடவை அடிபட்டதாக நினைவு. அடிபட்டதற்காக வருந்தவில்லை. நான் அடிபட வேண்டியவன் என்று கருதப்பட்டதே - எனக்கு மிக வருத்தத்தை அளித்தது. அதற்காகவே அழுதிருக்கின்றேன்.

மற்றொன்று - ஏழாம் வகுப்பு படிக்கும் போது நடந்தது. 

அச்சமயம் திரு. தோராப்ஜி யதுல்ஜி ஜிமி - தலைமையாசிரியர். மாணவர்கள் அவரிடம் அதிக பிரியம் கொண்டிருந்தனர். அதே சமயம், அவர் மிகவும் கண்டிப்பானவர். நல்ல ஆசிரியர். 

எந்த காரியத்தையும் முறைப்படி ஒழுங்காகச் செய்வதில் அவருக்கு ஈடுபாடு அதிகம். 

அவர், மேல் வகுப்புப் பையன்களுக்குக் கிரிக்கெட்  உடற்பயிற்சி இரண்டையும் கட்டாயமாக்கி விட்டார். இந்த இரண்டும் எனக்குப் பிடிப்பதில்லை. 

நான் கிரிக்கெட் விளையாடியதும் இல்லை. உடற்பயிற்சி செய்ததும் இல்லை.

இவற்றில் நான் சேராமல் ஒதுங்கியிருந்ததற்கான காரணம் என்னுடைய கூச்சம்!.. தவிரவும் படிப்பிற்கும் இவற்றுக்கும் எந்த சம்பந்தமும் இல்லை என்ற தவறான கருத்தும் மற்றொரு காரணம். 

ஆனால், இன்று பாடத்திட்டத்தில் மனப்பயிற்சிக்கு எந்த அளவு சிறப்பு அளிக்கப்படுகின்றதோ அந்த அளவு சிறப்பு உடற்பயிற்சிக்கும் அளிக்கப்பட வேண்டும் என்பதை அறிவேன்.  

திறந்த வெளியில் நீண்ட தூரம் நடப்பதால் ஏற்படக்கூடிய நன்மைகளைக் குறித்துப் படித்திருந்ததால் - நீண்ட நேரம் நடக்கும் பழக்கம் எனக்கு ஏற்பட்டது. இதன் பயனாக என் உடல் நன்கு வலுப்பெற்றது. 

மேலும் - உடற்பயிற்சி வகுப்பை நான் விரும்பாததற்குக் காரணம், என்   தந்தைக்குப் பணிவிடை  செய்ய வேண்டும் என்ற ஆர்வமேயாகும். 

பள்ளிக்கூடம் விட்டதும்,நேரே வீட்டுக்குப் போய் அவருக்குப் பணி செய்வேன். அதற்குக் கட்டாயத் தேகப்பயிற்சி இடையூறாக இருந்தது.  

ஆகையால்  தேகப் பயிற்சி வகுப்புக்குப் போகாதிருக்க அனுமதிக்குமாறு தலைமை ஆசிரியரிடம்   கோரினேன். ஆனால், அவர் ஏற்றுக் கொள்ள மறுத்து விட்டார். 

அன்று சனிக்கிழமை. மாலை நான்கு மணிக்கு திரும்பவும் நான் வீட்டிலிருந்து உடற்பயிற்சி வகுப்புக்குச் செல்ல வேண்டும். ஆனால், நான் போய்ச் சேர்வதற்குள் பிள்ளைகள் எல்லாம் பயிற்சி முடிந்து போய் விட்டார்கள். 

வந்திருந்தோரின்  கணக்கை திரு ஜிமி மறுநாள் தணிக்கை செய்துபோது நான் வரவில்லை என்று குறித்திருந்ததைக் கண்டார்.

மோகன் தாஸ்!.. நீ ஏன் நேற்று வரவில்லை?.. - என்று என்னைக் கேட்டார்.

அதற்கு நடந்ததைச் சொன்னேன்.   

நான் கூறியதை நம்ப அவர் மறுத்து விட்டார். ஓரணாவோ அல்லது இரண்டணாவோ  அபராதம் செலுத்த வேண்டும் என்று உத்தரவிட்டார்.

பொய் சொன்னதாக நான்   தண்டிக்கப்பட்டேன்!.. 

இது எனக்கு மிகுந்த மன வேதனையாகி விட்டது. நான் குற்றமற்றவன் என்பதை நிரூபிப்பது எப்படி? அதற்கு வழியே  இல்லை. 

வேதனை தாங்காமல் கதறி அழுதேன். 

பள்ளிக்கூடத்தில் நான் அசட்டையாக நடந்து கொண்ட முதல் சந்தர்ப்பமும், கடைசிச் சந்தர்ப்பமும் இதுதான். 

பள்ளிக்கூடம் விட்டதும் நேரே வீட்டுக்கு - நான்  வந்துவிட வேண்டும் - என்று தாம் விரும்புவதாக, என் தந்தை - தலைமையாசிரியருக்கு கடிதம் எழுதியதன் பேரில், 

உடற்பயிற்சி வகுப்புக்கு வரவேண்டும் என்பதில் இருந்து நான் விலக்களிக்கப் பெற்றேன்.

முடிவில் அந்த அபராதம் ரத்து செய்யப்பட்டதில் நான் வெற்றி அடைந்தேன்.


உண்மையுள்ளவன் எச்சரிக்கையுடன் இருப்பவனாகவும் இருக்க வேண்டியது முக்கியம் என்பதை அன்று தான் உணர்ந்தேன்!..

நாளைய தினம் - அக்டோபர்/2. அந்த உண்மையுள்ளவனின் பிறந்த நாள். 

 * * *

அந்த மாந்தோப்பிற்குள் திடீரென ஆரவாரம். 

என்ன?.. - என்று ஆவலுடன் குடிசைக்குள் இருந்து வெளியே வந்து பார்த்த போது அதிர்ச்சி.. 

விடலைப் பசங்களாக நான்கைந்து பேர். கையில் கிடைத்த கற்களைக் கொண்டு மாங்காய்களை அடித்துக் கொண்டிருந்தனர். 

தோட்டக் காவலாளியான கிழவர் கூச்சலிட்டதும் - கல்லெறிந்த சிறுவர்கள் அனைவரும் சிட்டாகப் பறந்து விட்டனர். ஒரே ஒரு சிறுவன் மட்டும் வசமாக சிக்கினான். அதுவும் அவன் தப்பி ஓடாததால் மாட்டிக் கொண்டான். 

மதிய வேளைத் தூக்கம் கெட்டுப் போன கடுப்பில் கையில் சிக்கியவனுக்கு நாலு அறை பளார் பளார் எனக் கிடைத்தது. வலி தாங்காமல் துடித்தான் சிறுவன். 

யாரடா நீ.. இதே வேலையா உனக்கு.. மாங்காய் திருடுவது தப்பில்லையா?.. உன்னை இழுத்துக் கொண்டு போய் பஞ்சாயத்தில் விட்டால் என்ன நடக்கும் தெரியுமா!..

ஐயா.. ஐயா.. நான் திருடவில்லை.. அந்த பசங்களோடு விளையாடியது உண்மைதான்.. ஆனால் நான் மரத்தில் கல் எறியவில்லை..

கிழவர் வியந்து நோக்கினார். சிறுவனின் கன்னங்களில் வழிந்த நீர் அவன் சொல்வது உண்மை என்றது.

தாயும் நானும் தான். என் அப்பா சமீபத்தில் இறந்து விட்டார்.  பரம ஏழை. வேறு யாரும் ஆதரவு இல்லை. தாய் மாமன் சோறு போட்டு படிக்க வைக்கிறார். பசித்தாலும் பாவம் செய்யக்கூடாது -ன்னு அம்மா சொல்லியிருக்கின்றார்கள்.. எனவே நான் தப்பெல்லாம் செய்யவே மாட்டேன்!..

காதுகளில் ஈயத்தைக் காய்ச்சி ஊற்றியது போலிருந்தது கிழவருக்கு. 

அன்பு அவருள் பொங்கியது. ஆதரவுடன் அணைத்துக் கொண்டார்.


உன் பேர் என்ன!..

லால் பகதூர்!..

இதோ பார்.. இனிமேல் அழக்கூடாது.. என்னை உன்னோட தாத்தா மாதிரி நெனைச்சு அடிச்சதை மறந்துடு.. உங்கம்மா நல்ல புத்தி சொன்னாங்க இல்லையா!.. அதோட இதையும் மனசுக்குள்ள வச்சுக்க..  

இனிமே என்னைக்கும் இந்த மாதிரி பசங்களோட சேரவே கூடாது. நீ என்னதான் நல்லவனா இருந்தாலும் களவாணிப் பசங்களோட சேர்ந்தால் உனக்கும் அந்தப் பேர் தான் கிடைக்கும்.. 

நல்லா படிக்கணும்.. நல்லவன்னு பேரெடுக்கணும் . உன்னோட வாழ்க்கைய நீதான் கவனமா வாழணும். அப்பதான் ஊரு உன்னைய உத்தமன்னு  மதிச்சி கும்பிட்டு நிக்கும். நீ எப்ப வேணாலும் இந்த தோட்டத்துக்கு வா.. இஷ்டம் போல மாம்பழம் சாப்பிடு.. ஆனா தாத்தா சொன்னதை மட்டும் மறந்திடாதே!..

சிறுவனின் கைகளில் நிறைய மாம்பழங்களைக் கொடுத்தார் கிழவர்.

சரிங்க தாத்தா.. மறக்க மாட்டேன்!.. - சிறுவன் சந்தோஷத்துடன் குதித்து ஓடினான்.

அன்று குதித்து ஓடிய சிறுவனைத் தான் - இன்னும் மறவாமல் பாரதம் மதித்துப் போற்றிக் கொண்டிருக்கின்றது.

நாளைய தினம் - அக்டோபர்/2. அந்த உத்தமனின் பிறந்த நாள்.

* * *

அன்று சரஸ்வதி பூஜை. 

விருதுப்பட்டி க்ஷத்ரிய வித்யா சாலையில் சாமி கும்பிடுதல். 

பூஜை முடிந்ததும் மாணாக்கர்களுக்கு அவல் பொரி சுண்டல் பழம் வழங்குதல் - என நிகழ்ச்சி நிரல். இதற்கென படிக்கும் பிள்ளைகள் ஆளாளுக்கும் பூஜைக் காசு கொடுத்திருந்தார்கள்.

பூஜை முடிந்ததும் பிள்ளைகள் ஆரவாரமாக முண்டியடித்துக் கொள்ள - திகைத்துப் போனது நிர்வாகம். மாணாக்கர்களில் கொஞ்சம் பேருக்கு எதுவுமே கிடைக்க வில்லை.

அதில், தேங்காய் வியாபாரி குமாரசாமி நாடார் மகன் காமாட்சியும் ஒருவன்!..


திண்ணையில் அமர்ந்திருந்த பாட்டி பார்வதியம்மாள் - பேரன் காமாட்சியை உற்று நோக்கினார்.

ஏன்யா.. காமாட்சி!.. வாட்டமா வர்றீங்க.. எல்லாப் புள்ளைங்களும் கையில சுண்டல் பழமெல்லாம் கொண்டு போறாங்களே.. உமக்குக் கெடைக்கலயா!...

இல்லையே!..

ஏன்யா!.. நீயும் மத்த புள்ளைங்களைப் போல முன்னாடி போயி வாங்க வேண்டியது தானேய்யா!?..

அது எதுக்கு?.. நாமளுந்தானே சாமி கும்பிட தலைக்கட்டு கொடுத்தோம்.. அப்ப நம்ம பங்கை அந்த வாத்தியார் ஐயா சரியா கொடுக்க வேணாமா?.. எல்லாரும் சமம் தானே!.. தள்ளு முள்ளு நியாயமா?.. சொல்லுங்களே!..

பார்வதியம்மாள் - தன் அன்புக்குரிய பேரனைத் தீர்க்கமாகப் பார்த்தார்.

உமக்கு சுண்டல் கிடைக்காம போச்சேல.. அதனால கோவம் வரலையா?..

ஏங்.. எதுக்குக் கோவம்?. இல்லாத வீட்டுப் புள்ளைங்க தானே!. அவங்க சாப்பிட்டா என்ன.. நாம சாப்பிட்டா என்ன!. அடுத்தவங்க சந்தோசமா சாப்பிடுறதப் பார்த்தா நமக்கும் சந்தோஷந்தான்னேன்!..

ஆனந்தக் களிப்புடன் பேரனை வாரி உச்சி முகந்தார் பார்வதியம்மாள்.

எந் ராசா!.. உன்னைப் போல யாரு!.. ஊரெல்லாம் உன்னைப் பேசுமய்யா ஒரு நாளைக்கு!..


அந்த ராசனை - காமராசனைத் தான் - 
நாள் தோறும் பேசிக் கொண்டிருக்கின்றது தமிழ் கூறும் நல்லுலகம்!..

நாளைய தினம் - அக்டோபர்/2.
ஊரார் பிள்ளைகள் உண்டு களித்ததை - கண்டு களித்த கர்ம வீரன் - கண் மூடி மீளாத் துயிலில் ஆழ்ந்த நாள்!..

மாசறு பொன்னாக வாழ்ந்த அந்த மாபெரும் தலைவர்களைச் 
சிந்தித்துப் போற்றி வணங்குவோம்!..
* * *

14 கருத்துகள்:

  1. தேச பிதா காந்தி , எளிமையாக வாழ்ந்த தலைவர் லால்பகதூர் சாஸ்திரி , கர்மவீரர் காமராஜ் இவர்களை பற்றிய பகிர்வு மிக அருமை.
    அவர்கள் வழி எல்லா தலைவர்களும் தன்னலம் இல்லாமல் நாட்டுக்கு உழைக்க வேண்டும்.

    பதிலளிநீக்கு
    பதில்கள்
    1. அன்புடையீர்..
      தங்கள் வருகைக்கும் கருத்துரைக்கும் நன்றி.. மகிழ்ச்சி

      நீக்கு
  2. தன்னலமற்ற மாபெரும் தலைவர்களைப் போற்றி வணங்குவோம்

    பதிலளிநீக்கு
    பதில்கள்
    1. அன்புடையீர்..
      தங்கள் வருகைக்கும் கருத்துரைக்கும் மகிழ்ச்சி.. நன்றி..

      நீக்கு
  3. மூன்று பெரும் தலைவர்கள் பற்றி நினைவு கூர்ந்து எழுதி போற்றியது அருமை! ஐயா! காந்தி பற்றி மட்டுமே போற்றும் நன் நாளில் மறக்கப்பட்ட லால் பகதூர் சாஸ்திரி பற்றியும் எழுதியதற்கு பாராட்டுக்கள்!

    அவர்கலை நினைக்கும் பொது இப்போதுள்ள நிலையை நினைத்தால் ம்ம்மென்ன சொல்லுவது!

    மிக நல்ல பதிவு!

    பதிலளிநீக்கு
    பதில்கள்
    1. அன்பின் துளசிதரன்..
      தங்கள் வருகையும் கருத்துரையும் கண்டு மகிழ்ச்சி. நன்றி..

      நீக்கு
  4. வணக்கம் ஐயா!

    தேச பிதாவைத் தேடி இட்ட பதிவு மிக அருமை ஐயா!

    அஹிம்சைக்குப் பொருளானவர்! இதயத்தில் ஏற்றிப் போற்றுவோம்!
    பகிர்விற்கு நன்றியும் வாழ்த்துக்களும் ஐயா!

    பதிலளிநீக்கு
    பதில்கள்
    1. அன்பின் சகோதரி..
      தங்களின் வருகையும் வாழ்த்துரையும் கண்டு மகிழ்ச்சி.. நன்றி..

      நீக்கு
  5. எளிமைக்கும் உண்மைக்கும் நேர்மைக்கும் உதாரணமான போற்றுதலுக்குரிய மாசற்ற தலைவர்கள் !!
    மிக அருமையான பதிவு அய்யா !

    பதிலளிநீக்கு
    பதில்கள்
    1. அன்பின் சகோதரி..
      தங்கள் அன்பு வருகை கண்டு மகிழ்ச்சி..
      தங்களின் இனிய கருத்துரைக்கு நன்றி..

      நீக்கு
  6. மூன்று தலைவர்களையும் நினைவு கூர்ந்தது சிறப்பு. ஒரு பானை சோற்றுக்கு ஒரு சோறு பதம் ...! வாழ்த்துக்கள்.

    பதிலளிநீக்கு
    பதில்கள்
    1. அன்பின் ஐயா..
      தங்கள் இனிய வருகையும் அன்பின் வாழ்த்துரையும் கண்டு மகிழ்ச்சி.
      நன்றி..

      நீக்கு
  7. மூன்று முக்கனிகளை பற்றிய முத்தான விசயங்கள் அருமை நண்பரே...

    பதிலளிநீக்கு
    பதில்கள்
    1. அன்பின் ஜி..
      இனிய கருத்துரையுடன் தங்கள் வருகை கண்டு மகிழ்ச்சி..

      நீக்கு