அண்ணாமலை

மங்கலகரமான மகா தீபத்திருநாளை அனுசரித்து

ஜோதி ஸ்வரூபமாகிய

திரு அண்ணாமலை திருக்கோயிலில்

கார்த்திகைப் பெருந்திருவிழா

கடந்த முதல் தேதி முதல் நடைபெற்றுக் கொண்டிருக்கின்றது..

இந்நிகழ்வின் திருக்காட்சிகளை

அன்பர்களால் வலையேற்றப்பட்டுள்ளது...

அத்திருக்காட்சிகளுள் சில

இன்றைய பதிவில்..

வலையேற்றிய அன்பர்களுக்கு 

நெஞ்சார்ந்த நன்றியும் வணக்கமும்...

திருக்கோயில்

திரு அண்ணாமலை

இறைவன் - அண்ணாமலையார்

அம்பிகை - உண்ணாமுலையாள்

தலவிருட்சம் - மகிழ மரம்

தீர்த்தம் - சிவகங்கை

பதிவில் இடம்பெற்றுள்ள திருப்பாடல்கள் 

ஞானசம்பந்தப் பெருமான் அருளியவை..

முதலாம் திருமுறை..

திருப்பதிக எண் 69..

பூவார் மலர் கொண்டு அடியார் தொழுவார் புகழ்வார் வானோர்கள்

மூவார் புரங்கள் எரித்த அன்று மூவர்க்கருள் செய்தார்

தூமாமழை நின்று அதிர வெருவித் தொருவின் நிரை ஓடும்

ஆமாம் பிணை வந்து அணையும் சாரல் அண்ணாமலையாரே..

இழைத்த இடையாள் உமையாள் பங்கர் இமையோர் பெருமானார்

தழைத்த சடையர் விடையொன்றேறித் தரியார் புரம் எய்தார்

பிழைத்த பிடியைக் காணாதோடிப் பெருங்கை மதவேழம்

அழைத்துத் திரிந்து அங்கு உறங்கும் சாரல் அண்ணாமலையாரே...

எனைத்தோரூழி அடியார் ஏத்த இமையோர் பெருமானார்

நினைத்துத் தொழுவார் பாவந்தீர்க்கும் நிமலர் உறைகோயில்

கனைத்த மேதி காணாது ஆயன் கைம்மேற் குழலூத

அனைத்துஞ்சென்று திரளும் சாரல் அண்ணாமலையாரே...

வந்தித்து இருக்கும் அடியார் தங்கள் வருமேல் வினையோடு

பந்தித்து இருந்த பாவந்தீர்க்கும் பரமன் உறைகோயில்

முந்தி எழுந்த முழவின் ஓசை முதுகல் வரைகண்மேல்

அந்திப்பிறை வந்தணையுஞ் சாரல் அண்ணாமலையாரே..

அல்லாடரவம் இயங்கும் சாரல் அண்ணாமலையாரை

நல்லார்பரவப் படுவான் காழி ஞான சம்பந்தன்

சொல்லால் மலிந்த பாடலான பத்தும் இவைகற்று

வல்லாரெல்லாம் வானோர் வணங்க மன்னி வாழ்வாரே...

***

தீபத் திருவிழா நிகழ்ந்து கொண்டிருக்கும் இவ்வேளையில்

தருமபுரம் ஸ்ரீ குரு மகாசந்நிதானம்

ஸ்ரீலஸ்ரீ சண்முக தேசிக ஞானசம்பந்த பரமாச்சார்ய ஸ்வாமிகள்

கடந்த 4.12.2019 அன்று தமது தொண்ணூற்று மூன்றாவது வயதில்

சிவ மகாஜோதியுள் பரிபூணம் எய்தினார்கள்...

ஸ்ரீ சந்நிதானம் அவர்கள்

சைவமும் தமிழும் தழைப்பதற்குப்

பாடுபட்டவர்கள்...

அன்னாரது திருவடிகளுக்கு

எளியேனின் அஞ்சலி..

ஓம் நம சிவாய சிவாய நம ஓம்

ஃஃஃ