செல்வக் களஞ்சியம்

செல்வம் என்றால் பொன்னும் பொருளுமா?..

இல்லை..

அமுதத் தமிழ்!..

அதுதான் - அது ஒன்றேதான் செல்வம்!..

அதைத்தான் மகாகவி பாரதியார் கூறுகின்றார்!..

மார்பில் அணிவதற்கே - உன்னைப்போல்

வைரமணிகள் உண்டோ!..

சீர்பெற்று வாழ்வதற்கே - உன்னைப்போல்

செல்வம் பிறிதும் உண்டோ!..

இன்று மகாகவி பாரதியார் அமரத்வம் எய்தியநாள்!.. 

* * *

சின்னஞ்சிறு கிளியே - கண்ணம்மா
செல்வக் களஞ்சியமே!..
என்னைக் கலிதீர்த்தே - உலகில் 
ஏற்றம் புரிய வந்தாய்!..

பிள்ளைக் கனியமுதே - கண்ணம்மா
பேசும்பொற் சித்திரமே!..
அள்ளி அணைத்திடவே - என்முன் 
ஆடிவரும் தேனே!..

ஓடி வருகையிலே - கண்ணம்மா
உள்ளங் குளிருதடி!..
ஆடித் திரிதல் கண்டால் - உன்னைப் போய்
ஆவி தழுவுதடி!..

உச்சிதனை முகர்ந்தால் - கருவம்
ஓங்கி வளருதடி!..
மெச்சியுனை ஊரார் - புகழ்ந்தால்
மேனி சிலிர்க்குதடி!..

கன்னத்தில் முத்தமிட்டால் - உள்ளந்தான்
கள்வெறி கொள்ளுதடி!..
உன்னைத் தழுவிடிலோ - கண்ணம்மா
உன்மத்தம் ஆகுதடி!..

சற்று உன்முகஞ் சிவந்தால் - மனது
சஞ்சலம் ஆகுதடி!..
நெற்றி சுருங்கக் கண்டால் - எனக்கு
நெஞ்சம் பதைக்குதடி!..

உன்கண்ணில் நீர் வழிந்தால் - என்நெஞ்சில்
உதிரங் கொட்டுதடி!..
என்கண்ணில் பாவையன்றோ - கண்ணம்மா
என்னுயிர் நின்னதன்றோ!..

சொல்லி மழலையிலே - கண்ணம்மா
துன்பங்கள் தீர்த்திடுவாய்!..
முல்லைச் சிரிப்பாலே - எனது
மூர்க்கந் தவிர்த்திடுவாய்!..

இன்பக் கதைகள் எல்லாம் - உன்னைப்போல்
ஏடுகள் சொல்வதுண்டோ!..
அன்பு தருவதிலே - உம்மைநேர்
ஆகுமோர் தெய்வமுண்டோ!..

மார்பில் அணிவதற்கே - உன்னைப்போல்
வைரமணிகள் உண்டோ!..
சீர்பெற்று வாழ்வதற்கே - உன்னைப்போல்
செல்வம் பிறிதும் உண்டோ!..

மார்பில் அணிவதற்கே - பாரதி உன்னைப்போல் 

வைரமணிகள் உண்டோ!..

சீர்பெற்று வாழ்வதற்கே - உன் சொல்லைப் போல் 

செல்வம் பிறிதும் உண்டோ!..

எங்கள் ஞானத் திருவிளக்கே!..

உன்திருவடி தொழுகின்றேன்!..

ஓம் சக்தி.. ஓம் சக்தி.. ஓம் சக்தி..

ஓம்!.. 

* * *