மங்கல மார்கழி 27

ஓம் 

தமிழமுதம் 

காக்கை கரவா கரைந்துண்ணும் ஆக்கமும்
அன்ன நீரார்க்கே உள.. (527)
*

அருளமுதம் 

ஸ்ரீ ஆண்டாள் அருளிய

திருப்பாவை

திருப்பாடல் 27

இன்று மங்கலகரமான கூடாரவல்லி

கூடாரை வெல்லும் சீர் கோவிந்தா உந்தன்னைப் 

பாடிப் பறை கொண்டு யாம் பெறும் சம்மானம்

நாடு புகழும் பரிசினால் நன்றாகச் 

சூடகமே தோள் வளையே தோடே செவிப் பூவே

பாடகமே என்றனைய பலகலனும் யாம் அணிவோம் 

ஆடை உடுப்போம் அதன் பின்னே பாற் சோறு

மூட நெய் பெய்து முழங்கை வழி வாரக் 

கூடி இருந்து குளிர்ந்தேலோர் எம்பாவாய்..

*

மனம் உருகி உன்னைத் தேடாரையும்
மனம் ஒன்றி எதனுடனும் கூடாரையும்
நினது அன்பினால் வென்று முடிக்கும்
கோவிந்தனே!...

நினது திருவடிகளைப் புகழ்ந்து பாடி
நாங்கள் எய்திய சன்மானங்கள் எல்லாம்
நாடு புகழக்கூடியவை...

அத்தகைய பரிசுகளை அடைந்து விட்ட பிறகு
வேறெது எங்களுக்கு ஆனந்தமாக இருக்க முடியும்!..

இனி நாங்கள்
தோள் வளைகளையும் செவிப் பூக்களையும்
இன்ன பிற மங்கல அணிகலன்களுடன் 
புத்தாடைகளையும் அணிந்து கொள்வோம்...

கருவிழிகளில் மையெழுதி
இளங்கூந்தலில் புது மலர்களைச்
சூடிக் கொள்வோம்..

புதுப்பானையில் பொங்கி எழும் பாற்சோறு  
மூடும்படிக்கு நெய்யினைப் பெய்து
அந்த நெய்யும் முழங்கை வழியாக
வழியும் படிக்கு
எல்லாருடனும் கூடி இருந்து
குலவி மகிழ்ந்து நெஞ்சம் குளிர்ந்து
உண்டு மகிழ்வோம்...

அந்த மகிழ்ச்சியினை அருளிய
உன்றனைப் போற்றித் துதித்திருப்போம்!..
*

தித்திக்கும் திருப்பாசுரம் 

ஸ்ரீ பெருமாள் கருடசேவை
தஞ்சை 

தொழுதால் பழுதுண்டே தூநீ ருலகம்

முழுதுண்டு மொய்குழலாள் ஆய்ச்சி விழுதுண்ட

வாயானை மால்விடையேழ் செற்றானை வானவர்க்கும்

சேயானை நெஞ்சே சிறந்து.. (2306) 

-: ஸ்ரீ பேயாழ்வார் :- 

இயற்கையின் சீதனம்

தேங்காய்

கற்பக விருட்சத்தின் கனி..

இதுவும் நமக்கே உடைமையான ஒன்று..

தமிழோடும் தமிழரோடும்
பின்னிப் பினைந்திருப்பது தேங்காய்...

நன்றி ஒருவர்க்குச் செய்தக்கால் அந்நன்றி

என்று தருங்கொல் எனவேண்டா நின்று

தளரா வளர்தெங்கு தாளுண்ட நீரைத்

தலையாலே தான்தருத லால்..

என்று
ஔவையாரின் திருவாக்கில்
இடம்பெற்றது தென்னை...

எல்லா வைபவங்களிலும்
முன் நிற்பது தேங்காய்...

தேங்காய் உடைபடாத வழிபாடு
சிறப்பதே இல்லை...

இதன் மீது மஞ்சளைப் பூசி விட்டால்
தெய்வீகம்..

மஞ்சள் தேங்காயின் மீது வைக்கப்பட்ட
பின்னரே மாங்கல்யதாரணம்...

குடத்து நீரில் சில மாவிலைகளும்
மஞ்சள் தேங்காயும்
நிறைமங்கலம்!...

தென்னையின் இளங்கனி
இளநீர் எனப்பட்டது...

இதன் பயன்கள் அனைவரும் அறிந்ததே..

தேங்காய் அரைப் பருவத்துக்கு மேல் தான் 
சமையலுக்கு நன்றாக இருக்கும்..

அதிகமாக முற்றி விட்டாலும்
சரிப்பட்டு வராது..

பக்குவமான தேங்காய்
சமையலுக்கு வரப்ரசாதம்...

தஞ்சை மாவட்டத்துப் பெண்கள்
பெரும்பாலானவர்களுக்கு
தேங்காய் இல்லாமல் சமைக்கத் தெரியாது..

தும்பைப் பூ இட்லியும்
தேங்காய்ச் சட்னியும் ஆகா!.. ஆகா!..

தேங்காய்ப் பால் உடலுக்குக் குளிர்ச்சி...

தேங்காய்ப் பூவில் இருந்து எடுக்கப்படும்
முதல் பால் வயிற்றுப் புண்களுக்கு அருமருந்து...

இயற்கைச் சமையலில் தேங்காய்ப்பாலை
தயிராக்குகின்றார்கள்..

சுத்தமான தேங்காய் எண்ணெய்
தலைக்கும் தலைமுடிக்கும் பாதுகாப்பு..

மேனியழகிற்கு தேங்காய் எண்ணெய்க்கு
மாற்று வேறதுவும் இல்லை..  

பற்பல பதிவுகள் தேங்காயைப் பற்றி

வழங்கலாம்..

நேரம் கூடி வரட்டும்..
வழங்குகின்றேன்!..
*

சிவதரிசனம் 

திருப்பூவனூர்

இறைவன் - ஸ்ரீ சதுரங்க வல்லபநாதர்..  

அம்பிகை - ஸ்ரீ கற்பகவல்லி, ஸ்ரீ ராஜராஜேஸ்வரி.. 

தலவிருட்சம் - பலா.  

தீர்த்தம் - க்ஷீர தீர்த்தம்..  

சுக முனிவர்
வழிபட்ட திருத்தலம்...

அம்மன் இரண்டு திருச்சந்நிதிகளில்
எழுந்தருளியிருக்கின்றனள்..

திருக்கோயிலின் எதிரில் திருக்குளம்..
இதன் கரையிலுள்ளது - இச்சி மரம்..

இந்த மரத்தில்
ஸ்ரீ முனீஸ்வரன் குடியிருப்பதாக ஐதீகம்..

விஷப் பூச்சிகளால்
குறிப்பாக எலிக்கடியினால்
பாதிக்கப்பட்டவர்களுக்கு
இத்தலத்தில் மந்திரித்து
கயிறு கட்டப்படுகிறது...

ஸ்ரீ சாமுண்டீஸ்வரி 

கொடி மரத்தின் முன்பாக தெற்கு நோக்கியவளாக

ஸ்ரீ சாமுண்டேஸ்வரி அம்மன்

விளங்குகின்றாள்...

வெண்ணாற்றின் கிளைநதியாகிய

பாமணி ஆற்றின் கரையில் திருக்கோயில் உள்ளது...

  

கும்பகோணம் மன்னார்குடி நெடுஞ்சாலையில்

நீடாமங்கலத்திலிருந்து 5 கி.மீ., தொலைவில்

உள்ளது - பூவனூர்..

தஞ்சை பழைய பேருந்து நிலையத்திலிருந்து

நீடாமங்கலம் வழியாக மன்னார்குடிக்குச்

செல்கின்ற பேருந்துகளும்

கோவிலின் எதிரில் நின்று செல்கின்றன..

*

ஸ்ரீ திருநாவுக்கரசர் அருளிய

தேவாரம் 

ஆவின் மேவிய ஐந்தமர்ந் தாடுவான்

தூவெண் நீறு துதைந்த செம்மேனியான்

மேவ நூல்விரி வெண்ணியின் தென்கரைப்

பூவனூர் புகுவார் வினை போகுமே.. (5/56)

நாரணன் னொடு நான்முகன் இந்திரன்

வாரணன் குமரன் வணங்கும் கழற்

பூரணன் திருப் பூவனூர் மேவிய

காரணன் எனை ஆளுடைக் காளையே.. (5/65)

*

ஸ்ரீ சுந்தரமூர்த்தி ஸ்வாமிகள் அருளிய

திருத்தொண்டத் தொகை

திருப்பாடல் 07

கடல் நாகை அதிபத்தர்  

பொய்யடிமை இல்லாத புலவர்க்கும் அடியேன்

பொழிற்கருவூர்த் துஞ்சிய புகழ்ச்சோழர்க்கு அடியேன்

மெய்யடியான் நரசிங்க முனையற் கடியேன்

விரிதிரைசூழ் கடல்நாகை அதிபத்தர்க்கு அடியேன்

கைதடிந்த வரிசிலையான் கலிக்கம்பன் கலியன்

கழற்சத்தி வரிஞ்சையர்கோன் அடியார்க்கும் அடியேன்

ஐயடிகள் காடவர்கோன் அடியார்க்கும் அடியேன்

ஆரூரன் ஆரூரில் அம்மானுக் காளே.. (7/39)

ஓம் நம சிவாய சிவாய நம ஓம் 

***