ஸ்ரீ ஐயப்ப சரிதம் 01

அமுதத்தில் விளைந்த அமுதம்..

ஐப்பசியும்  கார்த்திகையும்  - அடை மழைக்காலம்...
அடுத்து வரும் மாதமாகிய மார்கழியைப் பற்றிச் சொல்லவே வேண்டாம்!..

இத்தகைய சூழலில் -

கேரள தேசத்தில் அடர்ந்த வனப் பகுதிக்குள்

ப்ரம்மச்சர்யம் பூண்டு ஸ்ரீ சபரி பீடத்தில்

யோக நிஷ்டையில் வீற்றிருக்கும்

ஸ்ரீ ஐயப்ப ஸ்வாமியைத் தரிசிக்க வேண்டுமென்று -

கார்த்திகை மாதத்தின் முதல் நாளில் மாலையணிந்து

கடும் விரதம் மேற்கொண்டு - ஒரு மண்டல காலம் அல்லது

தை முதல் நாளன்று மகர ஜோதி தரிசனத்துடன் விரதத்தை 

நிறைவு செய்யும்  பக்தர்கள் லட்சோப லட்சம் என -

நாளுக்கு நாள் பெருகிக் கொண்டிருக்கின்றனர்...

எங்க வீட்டுலேயே குருசாமி...

அவரோட நானும் மூணு வருஷமா ஜோதி பார்த்திருக்கிறேன்!..

- என்று சொல்லும் பாக்கியத்தம்மாள்...

எங்கஅப்பாவுக்கு இந்த வருஷம் பதினெட்டாவது மலை!..

- என்று பெருமை கொள்ளும் சந்திரசேகரன்...

இந்த வருஷம் என் தம்பி கன்னிச்சாமி!..

- என்று சந்தோஷப்படும் கெளரி...

எங்க சுந்தரும் சுதாவும் அவங்க அப்பாவோட

இந்த வருஷம்  மாலை போட்டுக்கிட்டு இருக்காங்க!..

- என்று குதுகலிக்கும் சரண்யா...

இவர்களை - அநேகமாக எல்லா ஊர்களிலும் காணலாம்...

இப்படி கணவரோ, தந்தையோ, சகோதரனோ, 

மகனோ, மகளோ - மலைக்குச் செல்லும் போது - 

அவர்களுடன் தாமும் ஆசார அனுஷ்டானங்களில்

ஒன்றியிருந்து எல்லா நியமங்களையும் குறைவின்றிச்

செய்வதிலும் செய்விப்பதிலும் முன் நிற்பது -

அன்பும் அருளும் ஒருவடிவாகித்
திருவடிவம் எனத் திகழும் பெண்மையே!..

அப்படிப்பட்ட பெருமைக்குரிய
பெண்மையைக் காப்பதற்கு -  வந்தவர் தான் - 

ஸ்ரீ தர்ம சாஸ்தா!.. 

பழந்தமிழில்-
மகா சாத்தன்!.. - என்று போற்றப்படுபவர் இவரே!..

கந்தனின் கருணையைப் பாடும் கந்த புராணத்தில் -
ஸ்ரீ தர்ம சாஸ்தாவின் திரு அவதாரம் சொல்லப்படுகின்றது - 

அப்படிச் சொல்லும் படலம்
மா சாத்தப் படலம் என்று வழங்கப்படுகின்றது...

ஸ்ரீ தர்ம சாஸ்தா எனப்படும் ஸ்ரீ ஹரிஹரன்
பாற்கடல் கடைந்த நிகழ்வுகளுக்குப் பின் தோன்றியவர்...

பாற்கடல் ஏன் கடையப்பட வேண்டும்!..

எக்கணமும் கோபாக்னி கொழுந்து விட்டு
எரிந்து கொண்டிருக்கும் அவருடைய சிரசில்!...

அவர் - துர்வாச மகரிஷி...

அம்பிகை அணிந்திருந்த பூமாலையை ஏந்தியவராக
தேவலோகத்தை நோக்கி வந்து கொண்டிருந்தார்...

ஆனால் - எல்லாவற்றையும் முன்னரே வகுத்து வைத்திருக்கும் காலம்
அன்றைய தினம் தேவேந்திரனை அவருக்கு முன்பாக அழைத்து வந்தது...

நரை, பிணி, மூப்பு - எய்தாமலிருக்க என்ன செய்வது என்று சிந்தித்துக் கொண்டிருந்தான் - தேவேந்திரன்...

அந்த நேரத்தில் துர்வாச முனிவரின் சாபமும் சேர்ந்து கொண்டது..

பாற்கடலைக் கடைந்து அமுதம் எடுத்து அருந்த வேண்டும்.. - என,
முடிவு செய்த இந்திரன் அசுரரைத் துணைக்கு அழைத்துக் கொண்டு பாற்கடலைக் கலக்கினான்...

அது முதற்கொண்டு
ஆலகால விஷம் தோன்றியது வரைக்கும் பற்பல இன்னல்கள்..

எல்லாவற்றையும் கடந்த நிலையில்
பற்பல சீதனங்களுடன்

பாற்கடலில் தோன்றியது அமுதம்...

அதன் பின் என்னவாயிற்று!?..

அமுதத்திலிருந்து அமுதம் எப்படித் தோன்றியது!?...

இதற்கெல்லாம் விடை காணும்முன்
பாற்கடல் கடையப்பட்ட வைபவம்
கீழ்க்காணும் பதிவுகளில் உள்ளன...

1) துயர் தீர மருந்து!..

2) கடலைக் கடையலாமா!..

3) திரண்டு வந்தது - எது?..

4) கண் கண்ட கயிலாயம்!..

5) மஹா பிரசாதம்!..

இவற்றை ஒருதரம் படித்துக் கொள்ளுங்கள்..

பாற்கடலிலிருந்து கிடைத்த அமுதத்தினை

ஜகன்மோகினியாக நின்ற மஹாவிஷ்ணு -

தேவர்களுக்கு அளித்த - அவ்வேளையில்

அருட்பெருஞ்சோதியாகிய சிவபெருமான் -

அழகே உருவான ஜகன்மோகினியின்

திருக்கரத்தினை வாஞ்சையுடன் பற்றிட -

ஹரிஹர சங்கல்பத்தின்படி நிகழ்ந்ததே

ஸ்ரீ தர்ம சாஸ்தா திருஅவதாரம்!..

ஸ்ரீ தர்ம சாஸ்தாவாகிய ஸ்ரீ ஹரிஹர சுதனே
ஸ்ரீ ஐயனார் எனப்படுபவர்...

ஸ்ரீ பூர்ணகலா, ஸ்ரீ புஷ்கலா எனும் இருவரும்
ஸ்ரீ ஐயனாருடைய தேவியர்...

ஸ்ரீ பூண புஷ்கலா தேவியருடன் ஸ்ரீ ஐயனார்  

கந்த புராணத்தில், கச்சியப்ப சிவாச்சார்யார் -

ஸ்ரீ ஐயனாரின் திருத் தோற்றத்தினைக் காட்டுகின்றார்...

ஸ்ரீ ஐயனார் வழிபாடு தொன்மையானது...

ஸ்ரீ பூர்ணா புஷ்கலா சமேத ஸ்ரீஐயனார் - என, தமிழகத்தின் பற்பல கிராமங்களிலும் திகழும் காவல் தெய்வம் இவரே!..

ஸ்ரீ ஐயனார் வழிபாடு

முறையாக நடைபெறும் கிராமங்களில் 

கள்வர் பயம் என்பதே இருக்காது...

ஸ்ரீ ஐயனாரைப் பக்தியுடன் வழிபடும் பெண்களுக்கு
எவ்விதத்திலும் துன்பம் என்பதே இல்லை!...

பெண்களைக் காத்தருளும் பெருமான் - ஸ்ரீ ஐயனார்... 

இப்படி -

பெண்மையைக் காத்தருளும் பெருமான்
எவ்வண்ணம் தோன்றினார்!?...

ஸ்ரீ பூர்ணகலா ஸ்ரீ புஷ்கலா எனும்
தேவியர் இருவருக்குக் காந்தனாகிய ஸ்ரீ ஹரிஹரசுதன்
பிரம்மச்சர்யம் கொண்ட ஐயப்பன் என்று எப்படி ஆனார்!?..

அடுத்தடுத்த பதிவுகளில் காண்போம்!..

ஸ்ரீ ஹரிஹர புத்ர 

ஸ்வாமியே சரணம்!.. சரணம்!..
ஃஃஃ