திருப்புகழ்

நாடும் வீடும்

நலம் பெற வேண்டும்

பகையும் பிணியும்

தொலைந்திட வேண்டும்..

***

இன்று

புரட்டாசி 26

 வெள்ளிக்கிழமை

இன்று 

திருக்கழுக்குன்றத் திருப்புகழ்

 

தான தத்த தான தத்த தான தத்த ... தனதான

தான தத்த தான தத்த தான தத்த ... தனதான

வேத வெற்பி லேபு னத்தில் மேவி நிற்கு ... மபிராம

வேடு வச்சி பாத பத்ம மீது செச்சை ... முடிதோய

ஆத ரித்து வேளை புக்க ஆறி ரட்டி ... புயநேய

ஆத ரத்தோ டாத ரிக்க ஆன புத்தி ... புகல்வாயே..

காது முக்ர வீர பத்ர காளி வெட்க ... மகுடாமா

காச முட்ட வீசி விட்ட காலர் பத்தி ... யிமையோரை

ஓது வித்த நாதர் கற்க வோது வித்த ... முனிநாண

ஓரெ ழுத்தி லாறெ ழுத்தை யோது வித்த ... பெருமாளே..

-: அருணகிரிநாதர் :-

நன்றி கௌமாரம்

வேதகிரி என்று விளங்குகின்ற திருக்கழுக்குன்றத்திலும்,

வள்ளிமலையின் தினைப் புனத்திலும்  

பேரழகுடன் வீற்றிருப்பவனே,

குறமகளாகிய வள்ளி நாயகியின் பாதத்

தாமரையின் மீது செந்நிற வெட்சி மாலை திகழ்கின்ற திருமுடி படும்படி காதலித்து, தினைப் புனத்துள் புகுந்தவனே 

பன்னிரு தோள்களை உடையவனே..

உன்னிடம் உளம் கொண்டு நான் வழிபாடு செய்யும் படிக்கு

நல்ல புத்தியைச் சொல்லிக் கொடுத்து 

எனக்கு அருள் புரிவாயாக...

உக்ரத்துடன் வெகுண்டு வந்த வீர பத்ர காளியானவள்

நாணம் அடையும்படி தமது கிரீடம் வானில் முட்டும்படி ஊர்த்துவ தாண்டவம் ஆடியவரும் 

பக்தியுள்ள தேவர்களுக்கு

வேதங்களைக் கற்பித்தவரும் 

ஆகிய சிவபெருமான் -

உன்னிடம் பாடம் கேட்கவும்

(ஈசனால்) ஓதுவிக்கப்பட்ட 

பிரம்மன் நாணம் அடையவும்,

ஓரெழுத்தாகிய  ஓங்காரத்திற்குள் 

ஆறெழுத்தாகிய  சரவணபவ எனும் 

மந்திரத்தை உபதேசித்த பெருமாளே...

**

முருகா முருகா

முருகா முருகா..

 

ஓம் நம சிவாய 

சிவாய நம ஓம்

***