சஷ்டி 3

 

நாடும் வீடும்

நலம் பெற வேண்டும்

பகையும் பிணியும்

தொலைந்திட வேண்டும்..

***

இன்று

ஐப்பசி 29 

 புதன்கிழமை

சஷ்டி மூன்றாம் நாள்

இலஞ்சி திருப்புகழ்

தனந்தன தந்த தனந்தன தந்த 

தனந்தன தந்த ... தனதானா

 

சுரும்பணி கொண்டல் நெடுங்குழல் கண்டு 

துரந்தெறி கின்ற ... விழிவேலால்

சுழன்றுசு ழன்று துவண்டுது வண்டு 

சுருண்டும யங்கி .. மடவார்தோள்

விரும்பிவ ரம்பு கடந்துந டந்து 

மெலிந்துத ளர்ந்து ... மடியாதே

விளங்குக டம்பு விழைந்தணி தண்டை 

விதங்கொள்ச தங்கை ... யடிதாராய்

பொருந்தல மைந்து சிதம்பெற நின்ற 

பொலங்கிரி யொன்றை ... யெறிவோனே

புகழ்ந்தும கிழ்ந்து வணங்குக ணங்கொள் 

புரந்தரன் வஞ்சி ... மணவாளா

இரும்புன மங்கை பெரும்புள கஞ்செய் 

குரும்பைம ணந்த ... மணிமார்பா

இலஞ்சியில் வந்த இலஞ்சியம் என்று 

இலஞ்சி அமரந்த ... பெருமாளே..

-: அருணகிரிநாதர் :-

 நன்றி கௌமாரம்

கருமேகம் போல நீண்டு அடர்ந்த கூந்தலையும்  

அதில் சூடியுள்ள மலர்களில் 

மொய்க்கின்ற வண்டுகளைப் பார்த்தும்

வேகமுடைய வேல் 

போன்ற கண்களைப் பார்த்தும்

சுழன்று சுழன்று துவண்டு  துவண்டு 

மனம் மயக்கமுற்று

மாதர்களின் தோள்களை 

விரும்பி நடந்து

மெலிந்து தளர்ந்து (நான்)

மடிந்து போகாமல்

கடம்ப மலர் மாலையை விரும்பி 

அணிந்திருக்கும் முருகா..

அழகிய தண்டைகளுடன் 

இன்னிசை கூடி ஒலிக்கின்ற

கிண்கிணிகளும் விளங்கும் உனது 

திருவடிகளை எனக்குத் தந்தருள்வாயாக..

பொன் மலையாக மேன்மை கொண்டு 

நின்ற கிரெளஞ்சத்தை அழித்தவனே..

உன்னைப் புகழ்ந்து மகிழ்ந்து வணங்கி 

வழிபட்ட தேவேந்திரன் வளர்த்த

வஞ்சிக் கொடியாகிய தேவயானையின் 

கணவனே..

தினைப் புன வள்ளியின்

 குரும்பை மார்பினில் கலந்து 

மகிழ்ந்த மணி மார்பனே..

சரவணத் திருக்குளத்தில் தோன்றிய 

காரணத்தால் இலஞ்சியம் என்ற 

திருப்பெயர் கொண்டு, 

இலஞ்சி எனும் திருத்தலத்தில் 

வீற்றிருக்கும் பெருமாளே...

**

திருச்செந்தூரில் சஷ்டி விரதமிருக்கும் பக்தர்களுக்கு சீர் வளர் சீர் தருமபுர ஆதீன மடாதிபதி அவர்களால்  

நானூறு லிட்டர் பால் காய்ச்சி வழங்கப்பெற்றது..

 நன்றி:

தம்பிரான் ஸ்வாமிகள்

முருகா முருகா

முருகா முருகா

ஓம் சிவாய 

சிவாய திருச்சிற்றம்பலம்

***