ஆபத் சகாயம்

      

நாடும் வீடும்

நலம் பெற வேண்டும்

பகையும் பிணியும்

தொலைந்திட வேண்டும்..

***

ஆடிப்பூரம்..

ஸ்ரீ பாடகச்சேரி ஸ்வாமிகளின் குருபூஜை நாள்..

சூழ்நிலையின் சிரமங்களால் ஒன்றும் செய்ய இயலவில்லை..  புதன்கிழமையன்று மதிப்புக்குரிய கோமதிஅரசு அவர்கள் ஸ்ரீ பாடகச்சேரி மகானைப் பற்றி எழுதியிருந்தார்கள்.. 

வியாழக்கிழமையன்று தான் அந்தப் பதிவினைப் பார்த்தேன்.. அன்றிரவு அந்தப் பதிவில் கருத்தை எழுதிய பின் உறக்கம்.. 

நேற்று காலையில் எழுந்ததும்

அந்தக் கருத்து பதிவாகி இருக்கின்றதா என  கவனித்தேன்.. பதிவில் கோமதிஅரசு அவர்கள் சொல்லியிருந்த மறு மொழியால் என் மனம் நெகிழ்ச்சியுற்றது..

அந்த நெகிழ்ச்சியின் விளைவு இன்றைய பதிவில்..

அருட்பெருஞ் ஜோதி அருட்சிவ ஒளியாய்

அடியவர்க்கு ஆகும் அடைக்கல நிழலாய்

ஆபத் சகாய அமுதே போற்றி..

அன்பின் ஒளியே போற்றி போற்றி..1

துயர்படும் வாழ்வில் துன்பங்கள் தீர்க்கும்

தூயவர் திருவடி போற்றி போற்றி..

தொழுவார் விழியில் ஒளியே போற்றி..

திருவே துணையே போற்றி போற்றி.. 2

நன்மைகள் நல்க நானிலம் நடந்த

பசுபதி பாத மலர்கள் போற்றி..

புன்மைகள் தீர்க்க புழுதியில் நடந்த

புண்ணிய பாதம் போற்றி போற்றி.. 3

அல்லலை அறுக்கும் அருட்பெருஞ் ஜோதி

அன்பின் முகமே போற்றி போற்றி..

தனிப்பெருங் கருணை தண்ணிழல் அருளும்

தவமே சிவமே போற்றி போற்றி.. 4

பிழையாய் பிழைகள் பிழைபல நூறு

அனைத்தும் மறந்து காத்திடும் ஜோதி

அன்பினில் கலந்து அருமருந்த ளிக்கும்

அருட்சிவ சுடரே போற்றி போற்றி.. 5

அருள் விழியாலே அல்லலை நீக்கி

அருள் மொழியாலே ஆறுதல் கூட்டி

திருநீ றதனால் திருவுளங் காட்டும்

திருவருள் போற்றி போற்றி போற்றி.. 6

திருந்தாப் பிணியை தீமையை ஓட்டி

வருந்தா வகையை வாழ்வினில் காட்டி

உயிரில் உடம்பில் உறுதியை ஊட்டும்

உத்தமர் திருவடி போற்றி போற்றி.. 7

நலிந்தவர் நடுக்கம் தீர்க்கும் மருந்தே

மக்களின் துயரம் மாற்றிடும் விருந்தே

அடைக்கலம் அருளும் ஆபத் சகாயம்

அருட்சிவ நிழலே போற்றி போற்றி.. 8

ஆடகப் பொன்போல் அருளொளி காட்டும்

பாடகச் சேரி திசையது போற்றி

வீடகத்தே நல் வினையது நிறைய

பாடகச் சேரி பசுபதி போற்றி.. 9

அடியவர் அன்பில் எனையும் வைத்த

அருளா னந்தக் கடலே போற்றி

கைதொழு வாரவர் கவலையை மாற்றும்

கருணா மூர்த்தி போற்றி போற்றி.. 10

ஓம் நம சிவாய சிவாய நம ஓம்

***