நாளும் நலமும்..

கடந்த ஆகஸ்ட் 27 அன்று விடியற்காலையில் செந்தூரில் இருந்தோம்...

திருக்கோயில் நாலரைக்கெல்லாம் நடை திறக்கப்படுகின்றது...
ஆயினும், நாழிக்கிணற்றுக்கு ஆறு மணிக்கு மேல் தான் அனுமதி...

கடலில் நீராடும் அளவுக்கு இல்லை.. மிகவும் தளர்ச்சியாக இருந்தது...

எனவே விடியும் முன்னரே வெளியில் நீராடி முடித்து சூர்ய தரிசனம் செய்தபின் சந்நிதி புகுந்தோம்...

அவ்வளவாகக் கூட்டம் இல்லை...

திருமூலஸ்தானத்தில் நல்ல மகிழ்ச்சியான தரிசனம்..

ஆவணித் திருவிழா நிகழ்ந்ததால்
ஜெயந்தி நாதர் வசந்த மண்டபத்தில் எழுந்தருளியிருந்தார்...

முன்பெல்லாம் திருச்சுற்றில் ஸ்ரீ தக்ஷிணாமூர்த்தி, சனைச்சரன், வைரவர் சந்நிதிகளில் நூற்றுக்கணக்கான விளக்குகளை பக்தர்கள் ஏற்றியிருப்பார்கள்...

விளக்கேற்றும் நடைமுறை இப்போது தடை செய்யப்பட்டு விட்டது...

மேலும் சத்ரு சங்காரமூர்த்தி மண்டபத்தில்
ஹோமங்கள் செய்யப்படுவதில்லை என்றும் எழுதப்பட்டிருந்தது...

இருந்தாலும் சந்நிதியை வலம் வருவது மட்டும்
சோமசூத்ரப் பிரதக்ஷிணம் மாதிரி தான்...

திருச்சுற்றில் பள்ளி கொண்டிருக்கும் பரந்தாமனையும் கண்ணார சேவித்தபின்
மேலைக் கோபுரத்தின் வடபுறத்தில் விளங்கும் காவல் நாயகமாகிய
ஸ்ரீ சங்கிலி பூதத்தார் ஸ்வாமியையும் வணங்கி நின்றோம்...

அங்கிருந்து வள்ளி குகை நோக்கி வந்த வேளையில் தான்
உடல் நலக்கோளாறு ஏற்பட்டது...

அதற்கு முன் எடுக்கப்பட்ட படங்களே இன்றைய பதிவில்...

எம்முறையும் இல்லாதபடிக்கு இம்முறை
இப்படியானதே.. என்று தளர்ச்சியுற்றேன்...

ஆனால் அதற்கான விளக்கத்தை
இப்போது தான் - இந்தப் பதிவின் போது தான் பெற்றேன்..

அன்றைக்கு அவனொரு திருவிளையாடலை நிகழ்த்தியிருக்கிறான்...
அது அப்போது புரியவில்லை...

அருணகிரியாருக்குத் நடனத் திருக்காட்சி நல்கிய திருத்தலம் திருச்செந்தூர்..

அருணகிரியாருக்கு அருளிய செந்தில்நாதனே -
எளியேனுக்கும் நாளும் நலமும் நல்கியிருக்கின்றான்...

அருணகிரிநாதரின் திருவாக்கு மெய்யானது.. மெய்யானது... மெய்யானது..

சேல்பட்டழிந்தது செந்தூர் வயற்பொழில் தேங்கடம்பின்

மால்பட்டழிந்தது பூங்கொடியார் மனம் மாமயிலோன்

வேல்பட்டழிந்தது வேலையும் சூரனும் வெற்பும்அவன்

கால்பட்டழிந்தது இங்குஎன் தலைமேல் அயன்கையெழுத்தே!..

-: அருணகிரிநாதர் :-

முருகா சரணம்.. முதல்வா சரணம்..
செந்தில்நாதா சரணம்.. சரணம்..
ஃஃஃ