அன்பின் நன்றி..

     

நாடும் வீடும்

நலம் பெற வேண்டும்

பகையும் பிணியும்

தொலைந்திட வேண்டும்..

***

நம்முடை நாயகனே நான்மறையின் பொருளே நாவியுள் நற்கமல நான்முகனுக்கு ஒருகால்

தம்மனை ஆனவனே தரணி தலமுழுதும் தாரகையின் உலகும் தடவி அதன் புறமும்

விம்ம வளர்ந்தவனே வேழமும் ஏழ் விடையும் விரவிய வேலைதனுள் வென்று வருமவனே

அம்ம எனக்கு ஒருகால் ஆடுக செங்கீரை ஆயர்கள் போரேறே ஆடுக ஆடுகவே.. 65 (3) 

-: பெரியாழ்வார் :-

அருமறைகள் தாலாட்ட 

ஆலிலையின் கருமணியே

ஆழ்வாரின் தமிழ் கேட்டு

அருளாமல் அருளுதற்கு

அன்றொருநாள் ஆங்கு

ஆடாமல் ஆடிவந்தாய்

ஆழ்வாரின் குடில்தேடி

ஓடோடிநீயும் வந்தாய்..

அவ்வண்ணம் காணுதற்கு

அடியேனும் விழைகின்றேன்

அன்பருக்கு அன்பனே

ஆனந்தங் கொண்டு வருக..

யாதவக் கண்ணன்

கார்முகில் வண்ணன்

கருணையின் விழிகள்

செவ்வண்ணம் அருள்

கரதலம் கமலத்

திருவண்ணம் எழில்

பதமலர் இரண்டும்

அவ்வண்ணம்..

செந்தமிழ்ச் செங்கீரை 

செவிகேட்ட செங்கணா

கொடியுடன் வருக கோவிந்தனே 

தேர்கொண்டு வருக கோபாலனே..

புல்லர்கள் பொடிபட

நல்லவர் கொடி கொள

வலம்புரியும் முழங்கிடுக

வல்வில்லும் அதிர்ந்திடுக

தலைமகன் ஆகியே 

தர்மத்திற்காய்  நின்று

மங்கலம் வார்த்திடுக

சத்தியம் நாட்டிடுக சக்ரதாரி!..

***

நன்றி - ஸ்ரீ கேசவ் ஜி

அழகின் ஓவியங்களுக்கு

நெஞ்சார்ந்த நன்றி..

**

அன்பின் நெல்லை அவர்களது விருப்பத்தின்படி பெருங்குன்றிற்கு அருகில் சிறு செடி போல கவிதை ஒன்றுடன் இந்தப் பதிவு..

ஆடி மாதத்தின் முதல் நாள் ஞாயிற்று கிழமையன்று தஞ்சை ஸ்ரீ மாரியம்மன் கோயிலில் தரிசனம்.. மதியத்தில் வீடு திரும்பிய போது விருந்தினர் - என்னிடம் நலம் விசாரிக்க - என்று.. 

இந்நிலையில் கீரைப் புராணம் பதிவுக்கு வந்த கருத்துகளின் பேரில் விளக்கம் கூறுவதற்கு  இயலவில்லை.. 

முதற்கண் அந்தக் கவிதை திட்டமிட்டு எழுதப்பட்டதல்ல.. பதினைந்து நிமிட இடைவெளிக்குள் மலர்ந்தது அது..

நெல்லைத் தமிழன் அவர்கள் சொல்லியிருப்பது போல பிள்ளைத் தமிழில் செங்கீரைப் பருவம் இருப்பது தெரியும்.. ஆயினும் அந்தக் கோணத்தில் இணைத்து எழுதுதற்கு சிந்தை செல்லவில்லை..

கீரைகளை மட்டுமே சொல்லியபோது அவற்றுக்குத் துணையாக மங்கலமாகவும் மருத்துவமாகவும் 

இருக்கின்றவைகளும் கவிதைக்குள் வந்து சேர்ந்து கொண்டன.. விலக்குவதற்கு மனம் இல்லை..

அடுத்து,

கற்பூரவல்லியை கீரையாகக் கொண்டு ஏதும் செய்கின்றோமா?. .. என்று ஒரு சந்தேகக் கணை..

கற்பூரவல்லியை சஞ்சீவி என்கின்றனர் ஆன்றோர்..  இந்தப் பெயர் எனக்கு மிகவும் பிடிக்கும்..

இப்போது இருக்கும் வீட்டின் பால்கனிப் பகுதியில்  - துளசி, அறுகம்புல், கற்பூரவல்லி, சோற்றுக் கற்றாழை, பிரண்டை ஆகியன இருக்கின்றன. ஒவ்வொரு நாளும் இருவேளை இந்த மூலிகைகளுக்கு தூபஆராதனை உண்டு.. துளசிக்கும் அறுகம் புல்லுக்கும்

அவ்வப்போது நிவேதனமும் உண்டு..

மிகினும் குறையினும் நோய்செய்யும் நூலோர் வளி முதலா எண்ணிய மூன்று..

- திருக்குறள் (941)

நமது சரீரத்தைச் சுற்றிக் கொண்டு வாதம், பித்தம், கபம் எனும் மூன்று வளையங்கள் இருக்கின்றன.. இவ்வுடம்பில் பிணிகள் ஏற்படுவதற்கு இந்த மூன்றுமே காரணம்.. 

முறையான சித்த மருத்துவர்கள் இம்மூன்றையும் ஆராய்ந்தே மருந்துகள் கொடுப்பர்..

இந்த மூன்றிடத்தும் நட்பு பாராட்டுவது கற்பூரவல்லி..

சளி மற்றும் இருமலைப் போக்கி (கபம்) நல்ல சுவாசத்துக்கு உதவுகிறது..

வயிற்றில் செரிமானத்துக்குத் (பித்தம்) துணை நிற்பதால் கெட்ட வாயுக்கள் (வாதம்) உற்பத்தியாகி எலும்பு தசை இவற்றை சேதப்படுத்துவது இல்லை.. அஜீரணம், மலச்சிக்கல் இல்லையெனில் நோய் எதிர்ப்பு சக்தி கூடுகின்றது.. 

நாம் வாழும் காலத்துக்கு இதற்கு மேல் வேறென்ன வேண்டும்!..

எனவே தான் கற்பூரவல்லி சஞ்சீவி என்று பதிவிற்குள் வந்தது .. 

திரு ஜெயக்குமார் சந்திரசேகரன் அவர்கள் சொல்வது போல இரு பகுதிகளாகச்  செய்திருக்கலாம்.. ஆனால், சில நடைமுறை சிக்கல்கள்..

உடல் நலக் குறைவால் கையில் வலி அவ்வப்போது ஏற்படுவதால் அதிக நேரம் கைத் தொலைபேசிக்குள் இருக்க முடியவில்லை.. அனுமதியும் இல்லை.. இரவு 9:30 மணி கண்டிப்பாக உறங்கியாக வேண்டும் .. 

இருந்தாலும்,

வீட்டுக்குள் அப்படி இப்படி ஏய்த்துக் கொண்டிருக்கின்றேன்..

கைத் தொலைபேசி Blogger ல் பதிவின் அளவு தெரிவதில்லை .. எல்லாம் உத்தேசமாகத் தான் செய்து கொண்டிருக்கின்றேன்..

தவிரவும்,

இதனை மரபுக்கவிதை என்று குறிப்பிட்டு இருக்கின்றீர்கள்.. எனக்கு கவிதையின் இலக்கணம் எதுவும் தெரியாது என்பதையும் சொல்லிக் கொள்கிறேன்..

அன்பின் நெல்லையும் கீதாக்கா அவர்களும் பெரியாழ்வார் அருளிச்செய்த செங்கீரைப் பருவ திருப்பாசுரத்தின் அழகைப் பகிர்ந்து கொண்ட விதம் அழகு.. அருமை..

சகோதரி கீதா அவர்களுக்கு -  தக்காளி என்று பழந்தமிழ்  குறிப்புகளில் எதுவும் கிடையாது..  மணித் தக்காளி என்கின்றது விக்கிபீடியா.. 

எனவே தான், வயிற்றுப் புண்ணுக்கு மருந்தாகிய மணத் தக்காளியை கருமணிக் கீரை என்று குறிப்பிட்டேன்..

முன்பெல்லாம் கீரை விற்பவர்கள் அவற்றின் பயன்களைச் சொல்லியே விற்பார்கள்... அந்தக் காலத்துக் குடும்பங்கள் பலவற்றில் கணவன் மனைவி உறவினை பலப்படுத்தியவர்களே கீரை விற்கும் ஆத்தாக்கள் தான்.. இதற்குமேல் தாங்களே  யூகித்து உணர்ந்து கொள்ளவும்..

மற்றபடி,

மதிப்புக்குரிய கமலா ஹரிஹரன் அவர்கள் என்னிடம் சரஸ்வதி குடி கொண்டிருக்கின்றாள் என்று சொல்லியிருக்கின்றார்..

இங்கு வலைத்தளங்களில் எழுதும் ஒவ்வொருவரும் தனித் தன்மையான  திறமைகளுடன் சிறப்பாகத் திகழ்ந்து கொண்டிருக்கின்றனர்.. கீதாக்கா, ஜெயக்குமார் சந்திரசேகரன் ஆகியவர்கள் பன்மொழி வித்தகர்கள்.. இவர்களுக்கிடையே நானெல்லாம் சர்வ சாதாரணம் என்பதையும் உணர்ந்திருக்கின்றேன்..

நேரடியாக சமையலுக்கு ஆகும் கீரைகளைத் தவிர்த்து குப்பைமேனி போன்றவைகளை மருந்தாகச் செய்யும்போது தீர்க்கமாக விசாரித்துக் கொண்டு பதம் மாறாதபடிக்குச் செய்தல் வேண்டும் என்பதை மறக்க வேண்டாம்..

பதிவினில் கருத்துரைத்த அனைவருக்கும் குறிப்பாக அன்பின் ஸ்ரீராம், கில்லர் ஜி, கோமதிஅரசு, தனபாலன், துளசிதரன், மாதேவி ஆகியோருக்கும்  நன்றியுடன் மகிழ்ச்சியைத் தெரிவித்துக் கொள்கின்றேன்.. வணக்கம்..

அனைவருக்கும்

அன்னை கலைவாணியும் 

அகத்தியர்பெருமானும் நல்லருள் புரிவார்களாக!..

வாழ்க வையகம்

வாழ்க வளமுடன்..

***