நல்வாழ்த்துக்கள்

நேற்று இரவு, தகவல் அறிந்ததுமே - பரவசம்!..

அன்பு சகோதரர் கரந்தை ஜெயக்குமார் அவர்களுக்கு விருது!..

தனித்தன்மையான படைப்பாற்றலுடன் - வலைத்தளத்தில் வலம் வரும் அன்பின் ஜெயக்குமார் அவர்கள் -

கடந்த 14/11 முதல் 23/11 வரை தஞ்சையில் நடைபெற்ற ரோட்டரி கிளப் ஆஃப் தஞ்சாவூர் கிங்ஸ் சார்பில் நடைபெற்ற ஆறாவது புத்தகத் திருவிழாவின் மூன்றாம் நாளில் நடைபெற்ற படைப்பாளிகளுக்குப் பாராட்டு விழா எனும் நிகழ்வில் கௌரவிக்கப்பட்டுள்ளார். 

தமிழக முன்னாள் வணிக வரித்துறை அமைச்சர் திருமிகு S.N.M. உபயதுல்லா அவர்களின் தலைமையில் நடைபெற்ற விழாவில்,

முன்னாள் மத்திய நிதித்துறையின் இணை அமைச்சர் திருமிகு S. S. பழனி மாணிக்கம் அவர்கள், 

''மண்ணின் சிறந்த படைப்பாளி''

- எனும் விருதினை வழங்கி சிறப்பித்துள்ளார்.

தஞ்சை மண்ணின் சிறந்த படைப்பாளி!.. - என சிறப்பிக்கப்பட்டுள்ள அன்பின் சகோதரர் அவர்களுக்கு மனம் நிறைந்த நல்வாழ்த்துக்கள்!..

பெருமதிப்புக்கும் மரியாதைக்கும் உரிய தமிழவேள் உமாமகேசுவரனார் அவர்களால் உருவாக்கப்பட்டது - கரந்தைத் தமிழ்ச் சங்கம்.

சங்கத்தின் கல்வி நிலையங்களுள் ஒன்றாக விளங்குவது உமாமகேசுவரனார் மேல்நிலைப் பள்ளி!..

பெருமைக்குரிய அந்தப் பள்ளியில் கணித ஆசிரியராகப் பணியாற்றுபவர் -

அன்பின் ஜெயக்குமார் அவர்கள்!.. 

கரந்தை வரலாற்றில் சில செப்பேடுகள், விழுதுகளைத் தேடி வேர்களின் பயணம், கணித மேதை சீனிவாச இராமானுஜன் எனும் நூல்களுடன் தனது வலைப் பூக்களைப் பற்றியும் எழுதி வெளியிட்டுள்ள  - ஜெயக்குமார் அவர்கள், 

கடந்த 26/10 அன்று மதுரையில் நடைபெற்ற வலைப்பதிவர் சந்திப்பு விழாவின் போது கரந்தை மாமனிதர்கள் எனும் நூலையும் வெளியிட்டு மகிழ்ந்தார்.

மறக்கக் கூடாத மாமனிதர்களைத் தேடி - 

அவர்களைப் பற்றிய அரிய விஷயங்களை -  

இளம் தலைமுறையினருக்காகப் பதிவு செய்து அளித்திருக்கும் நூல் - 

கரந்தை மாமனிதர்கள்!..
 

அன்புச் சகோதரர் அவர்களே!.

அன்பினால் என்னைக் கட்டிப் போட்டவர்களுள்  - தாங்களும் ஒருவர்.

புன்னகை!..

அது ஒன்றைத் தவிர வேறொன்றையும் தங்கள் முகத்தில் நான் கண்டதே இல்லை!..

புத்தகத் திருவிழா - 2013

தங்களுடைய தேடல் - மிகவும் வியப்புக்கு உரியது.

தங்களுடைய வலைத் தளத்தில் தனித்துவமான கைவண்ணத்தில் -

படிப்பவர் கண்முன்னே, உலகின் சாதனையாளர்கள் பலரையும் -

நிறுத்திய பெருமைக்கு உரியவர் - தாங்கள்!.

கண்ணகியின் அடிச்சுவடுகளைத் தேடி நடந்த -

பேராசிரியர் சி.கோவிந்தராசனார்

கண் பார்வையை இழந்து சாதனையாளராக விளங்கும் திரு. வெற்றிவேல்..

புதியதோர் உலகில் ஒரு நாள்

நாளைய கணிதத்தை நேற்றே கண்ட -

கணித மேதை இராமானுஜன்

பாவேந்தரின் நினைவினைப் போற்றிய -

பாரதிதாசனைச் சந்தித்தோம்

ஆயுதமேந்திய இயக்கத்தினரின் கொடூரத்தால் கைகளை இழந்த -

மரியாட்டு

வரலாறு என்னை விடுவிக்கும் நாடுதான் பெரிது என வாழ்ந்து வரும் -

ஃபிடல் காஸ்ட்ரோ

மணிப்பூரின் வீரப்பெண்மணி -

இரோம் ஷர்மிளா

வெள்ளிப் பனி மலையின் மீது நடந்தே சர்வே செய்த நயின் சிங் ராவத் -

இமயத்தை அளந்தவர்

செய்யும் தொழிலே தெய்வம் என ஓடோடி வந்து உதவும் -

பஞ்சர் மாயா

பார்வையற்றவர்களுக்கென உதித்த பகலவன் -

லூயிஸ் பிரெய்லி

 படிக்காத மேதை -

 பெருந்தலைவர் காமராஜர்

தேவதாசி எனும் கொடுமையிலிருந்து பெண்களை மீட்க வந்த -

புரட்சிப் பெண்மணி - முத்து லட்சுமி ரெட்டி

தமிழுக்காக வாழ்ந்து தமிழ் மண்ணிலேயே தலை சாய்த்த -

அறிஞர் ராபர்ட் கால்டுவெல்

பகுத்தறிவுப் பகலவனுக்கு - பெரியார் எனும் பட்டத்தை வழங்கிய -

கரந்தை தர்மாம்பாள்

மடமையைக் கொளுத்துவோம் எனப் பொங்கியெழுந்த - 

மகாகவி பாரதி

காந்திஜி மேலாடையைத்  துறந்த போது -

மேலாடையை மட்டுமல்லாமல் பொறியாளர் பணியையும் துறந்த  -

கரந்தை காந்தி

முதல் ஜனாதிபதி  மற்றும் செக்கிழுத்த செம்மல் ஆகியோரைப் போற்றிய -

கல்வி - தியாகத் திருநாள்

பதினாறாவது வயதில் விடுதலைக்காக இன்னுயிர் துறந்த வீரத்தமிழச்சி -

தில்லையாடி வள்ளியம்மை

எங்களைப் புத்தகத்தையும் பேனாவையும் எடுக்க விடுங்கள் என முழங்கிய

மலாலா

விண்ணில் கரைந்த - 

கல்பனா சாவ்லா

தனக்குக் கல்வி பயிற்றுவித்த ஆசிரியப் பெருமக்களைப் புகழ்ந்துரைத்த -

என் ஆசான்

- எனும் தங்களுடைய பதிவுகள் - என்றும் நினைவில் நிற்பவை.

இவையெல்லாம் - ஒரு முதற்குறிப்புக்காகத் தான்!.. 

தங்களுடைய வலைத் தளத்தில் - 

மாதுளை முத்துக்களாய் இன்னும் அருமையான பல பதிவுகள்!..

மாவீரன் சே குவாராவின் தியாக வரலாறு கருங்கல்லையும் கரைய வைக்கக் கூடியது.

அப்படியிருக்க - நான் எம்மாத்திரம்?.. 

சே குவேரா - நீ வாழ்கிறாய்

- என, தாங்கள் வழங்கிய பதிவினைப் படிக்கும்போதே - மனம் கலங்கிக் கண்ணீர் வடித்தேன். அந்த நாளை என்னால் மறக்கவும் கூடுமோ!?..

குடும்பத்துடன் இராமானுஜன் திரைப்படத்தினைப் பாருங்கள். திரைப்படம் முடிவதற்குள், ஒரு சொட்டு - ஒரே ஒரு சொட்டுக் கண்ணீர் உங்களுடைய விழிகளில் இருந்து, எட்டிப் பார்க்குமேயானால், 

அதுவே அந்த மாமேதைக்கு நீங்கள் செலுத்தும் உண்மை அஞ்சலியாகும்.

இது -

கணிதமேதை இராமானுஜன் அவர்களைப் பற்றி வெளிவந்த திரைப்படத்திற்கு தாங்கள் வழங்கிய நற்சான்றிதழ்.

கணிதமேதை சீனிவாச ராமானுஜனைப் பற்றி தாங்கள் தேடித் தேடி எடுத்த பொக்கிஷங்களையும் அதற்கான பெருமுயற்சியையும் - 

இப்போது நினைத்தாலும் வியப்பாக இருக்கின்றது. 

தாங்கள்  கணிதமேதையைப் பற்றிய அரிய தகவல்களைத் தொகுத்த போது எளியேனும் ஒரு சிறு அணில் போன்று தங்களருகில் இருந்த நாட்கள் எல்லாம் நினைவுக்கு வருகின்றன.

நான் சில தினங்கள் தஞ்சையில் இருந்தும் - தங்களுக்கு விருது வழங்கிய விழாவில் கலந்து கொள்ள இயலாமல் போனது.

கடந்த (20/11) வியாழன்று தஞ்சையிலிருந்து புறப்படும் முன் - தங்களைச் சந்திக்க வந்தேன்.

பணிச்சுமைகளுக்கு இடையேயும் இன்முகம் காட்டி வரவேற்று அளவளாவி - தங்களது கரந்தை மாமனிதர்கள் எனும் நூலைப் பரிசளித்த அன்பு நெஞ்சத்தை, என்னால் எந்நாளும் மறக்க இயலாது.

இந்த அன்பு ஆயிரம் ஆயிரம் ஆண்டுகளைக் கடந்து நிலைக்க 
அபிராமவல்லி அருள்வாளாக!..

தாங்கள் விருது பெற்ற செய்தி அறிந்து மனம் மிகவும் சந்தோஷமாக இருக்கின்றது.

இதோ  - அன்புக்குரிய Dr. B.ஜம்புலிங்கம் அவர்கள் கூறுகின்றார்.

தங்களின் பணிக்காக இத்தகைய விருது கிடைத்துள்ளது. பெருமகிழ்ச்சியைத் தருகின்றது. வலைப்பூவில் தாங்கள் தடம் பதிக்க நானும் துணையாக இருந்தேன் என்று நினைக்கும் போது மிகவும் பெருமையாக இருக்கின்றது. தங்களின் முயற்சியும் அயராத உழைப்பும் நண்பர்களை அரவணைக்கும் பாங்கும் வாசிப்பின் மீதான ஆர்வமும் தங்களை இவ்வாறான பெருமைக்கு எடுத்துச் சென்றுள்ளது. இது ஓர் ஆரம்பமே. இன்னும் பல விருதுகளைப் பெற்று நாட்டிற்கும் வீட்டிற்கும் பெருமை சேர்க்க எனது நெஞ்சார்ந்த வாழ்த்துக்களைத் தெரிவித்துக் கொள்கின்றேன்.

அவ்வண்ணம் போல - இது ஓர் ஆரம்பமே!..

தாங்கள் - 

மேலும் பல விருதுகள் பெறுவதற்கு அன்புடன் வாழ்த்துகிறேன்.

தங்களுக்கு விருது வழங்கிச் சிறப்பித்தவர்களுக்கும் 

தங்களுக்கு வாழ்த்துரைக்கும் அன்பின் பதிவர்கள் 

அனைவருக்கும் நல்வாழ்த்துக்கள்!..

வாழ்க நலம்!..

* * *