தங்கக் காமாட்சி

     

நாடும் வீடும்

நலம் பெற வேண்டும்

பகையும் பிணியும்

தொலைந்திட வேண்டும்..

***

காமாட்சி விருத்தம்  என்றதொரு பாமாலை U tube ல் இருக்கின்றது.. நூறாண்டுகள் பழமையானது..

கேட்கின்ற போதில் நெஞ்சம் உருகும்.. 

பேய் கூட - தான் பெற்ற பிள்ளையை பிரியமுடன் காக்குமே!.. நீ என்னைக் 

காத்து ரட்சிக்காமல் கை விடத் தகுமோ?.. என்று உரிமையுடன் போராடுகின்றார் அதனை இயற்றியவர்.. அவர் யாரென்று தெரியவில்லை..

ஆனாலும், விருத்தத்தைக் கண்டுபிடித்து இன்னிசைப் பாமாலையாக வலையேற்றி இருக்கின்றார்கள்.. 

சரியாக ஓராண்டுக்கு முன் குவைத்தில் இருந்தபோது நண்பர் கணேச மூர்த்தியின் அறைக்குச் சென்று விட்டு திரும்பிக் கொண்டிருந்த வேளையில் -  அப்படியொன்றை எழுத வேண்டும் - என்று மனதில் தோன்றியது.. 

இசைக் குறிப்பை மட்டும் கொண்டு பேருந்தில் இருந்தபடியே மூன்று கண்ணிகளை கைத் தொலைபேசியில் எழுதினேன்.. அதன் பிறகு அங்கு சூழ்நிலை சரியில்லை..

சென்ற மாதத்தில் உடல் நலக் குறைவு ஏற்பட்ட பிறகு - விரல்களின் இயக்கம் சரியில்லாது இருந்த போதும்  மனம் தளராமல் ஒற்றை ஒற்றை எழுத்துக்களாக உருவேற்றி அவள் அருளால் நிறைவு செய்திருக்கின்றேன்..

பதினாறாம் நூற்றாண்டில் அன்னியக் களவாணிகள் தமிழகத்தின் மீது படையெடுத்த போது

கொலை, கொள்ளை, தீ வைப்பு போன்றவற்றில் இருந்து தற்காத்துக் கொள்வதற்காக காஞ்சி ஸ்ரீ சங்கர மடம் தஞ்சையிலும் குடந்தையிலும் சிலகாலம் இயங்கியது என்பது வரலாற்றுச் செய்தி.. 

ஸ்ரீ பங்காரு காமாட்சி

அந்தக் கால கட்டத்தில் 

காஞ்சியில் விளங்கி இருந்த ஸ்ரீ ஸ்வர்ண (பங்காரு) காமாக்ஷியும் அங்கிருந்து புறப்பட்டு விட்டாள்..

இவள் ஆதியில் காஞ்சியில் தவம் புரிந்த ஸ்ரீ நான்முகனின் மனதில் இருந்து தங்க மயமாக வெளிப்பட்டவள்.. 

ஹேம காமாக்ஷி என்பதும் திருப்பெயர்..

உடையார் பாளையம் ஜமீனிலும் திரு ஆரூரிலும் சிலகாலம் இருந்து விட்டு தஞ்சைக்கு வந்த ஸ்ரீ ஸ்வர்ண காமாக்ஷி இங்கேயே நிரந்தரமாகத் தங்கி விட்டாள்..

இச்சம்பவம் நிகழ்ந்தது மன்னர் பிரதாப சிம்மனின் (1739) ஆட்சிக் காலத்தில்!..

சிறிய அளவில் அமைந்த சந்நிதியானது நாளாவட்டத்தில் பெரிய அளவிலான கோயிலாக உருவெடுத்து விளங்குகின்றது..

ஸ்ரீ அத்திவரதரின் தங்கையான சத்தி சிவரூபிணி இங்கே மேல ராஜவீதியில் ஸ்ரீ விஜயராமர் திருக் கோயிலுக்கும் ஸ்ரீ நவநீத கிருஷ்ணன் திருக்கோயிலுக்கும் நடுவில்  தானும் கோயில் கொண்டாள்.. ஸ்ரீ காமாக்ஷியம்மனுக்கு மூலை ஆஞ்சநேயர் தான் மெய்க்காவல் என்கின்றனர்..

கார்த்திகையின் முப்பது நாட்களும் இக்கோயிலில் பென்களும் ஆண்களும் அடிப்ரதட்சிணம் செய்வார்கள்.. அவர்களோடு  சின்னஞ்சிறு பெண் போல

ஸ்ரீ காமாக்ஷியும் சேர்ந்து கொண்டு அடிப்ரதட்சிணம் செய்கின்றாள் என்பது உணரப்படுகிறது..

சங்கீத மும்மூர்த்திகளுள் ஒருவரான ஸ்ரீ சியாமா சாஸ்திரிகள் இக்கோயிலில் தான் அம்பாளுக்குக் கைங்கர்யம் செய்து கொண்டிருந்தார்..

இத்துணை சிறப்புகளையும் ஒருங்கே உடையவளை  மனதில் கொண்டு பாமாலையைப் புனைந்து  சமர்ப்பித்துள்ளேன்..

திருப்பதிகத்தின் இலக்கணம் எதுவும் தெரியாது.. அன்னை அவள் கொடுத்தாள்.. அடியேன் தொடுத்திருக்கின்றேன்..

நாளை முதற்கொண்டு சில நாட்களுக்கு எளியேன் செய்திருக்கும் பதிகத்தின் பாடல்கள்..

ஓம் 

சக்தி ஓம் சக்தி 

ஓம் சக்தி ஓம்

***