கார்த்திகை நாள்

     

நாடும் வீடும்

நலம் பெற வேண்டும்

பகையும் பிணியும்

தொலைந்திட வேண்டும்..

***

இன்று

ஆடி ஏழாம் நாள் (22/7)

கார்த்திகை நட்சத்திரம்

ஆடிக் கார்த்திகை எனப்படும்

நன்னாள்..

சரவணப் பொய்கையில் 

முருகப் பெருமான்

தோன்றியதும்

 அவனுக்குப்

 பாலூட்டுவதற்காக அம்பிகையே 

ஆறு கன்னியராகி வந்தாள் என்பது 

அருணகிரிநாதர்

நமக்குக் காட்டுகின்ற

திருக்குறிப்பு..

கன்னியர் அறுவரொடு

அறுமுகனை வணங்கி விரதம் 

மேற்கொண்டு

எல்லாப் பாவங்களில்

இருந்தும் நீங்கியிருப்பது

நமது பண்பாடு..

அருணகிரிநாதர்

அருளிச்செய்த

திருப்புகழுடன்

இன்றைய பதிவு..

தனதன தாத்தன தனதன தாத்தன 

தனதன தாத்தன ... தந்ததான

விரகற நோக்கியு முருகியும் வாழ்த்தியும்

விழிபுனல் தேக்கிட ... அன்புமேன்மேல்

மிகவுமி ராப்பகல் பிறிதுப ராக்கற

விழைவுகு ராப்புனை ... யுங்குமார

முருகஷ டாக்ஷர சரவண கார்த்திகை 

முலை நுகர் பார்த்திப ... என்றுபாடி

மொழிகுழ றாத்தொழு தழுதழு தாட்பட

முழுதும லாப்பொருள் தந்திடாயோ..

பரகதி காட்டிய விரகசி லோச்சய 

பரமப ராக்ரம ... சம்பராரி

படவிழி யாற்பொரு பசுபதி போற்றிய

பகவதி பார்ப்பதி ... தந்த வாழ்வே

இரைகடல் தீப்பட நிசிசரர் கூப்பிட

எழுகிரி யார்ப்பெழ ... வென்றவேலா

இமையவர் நாட்டினில் நிறைகுடி யேற்றிய 

எழுகரை நாட்டவர் ... தம்பிரானே..

(நன்றி: கௌமாரம்)

இந்த எழுகரை நாடு என்னும் தலம் குடகு மலைச் சாரலில் என்றும் ஈழத்தில் என்றும் இருவேறு கருத்துகள் நிலவுகின்றன..

**

உனது திருக்கோலம் ஒன்றே இலக்கு எனும் ஒருமித்த சிந்தையொடு உன்னையே நினைந்து மனம் உருகித் துதித்துப் பலவாறு வாழ்த்தி,

கண்களில் நீர் நிறைந்து வழிந்திட  மேன்மேலும் அன்பு பெருக்கி, இரவும் பகலும் வேறெந்த சிந்தனையும் இலாது,

விருப்பமுடன் குரா மலரை மாலையாக

அணிந்து கொள்ளும் குமரனே முருகனே.. ஆறெழுத்துடைய ஐயனே.. சரவணபவனே.. 

கார்த்திகைக் கன்னியரின் திருமுலைப் பால் அருந்திக் களித்த அழகனே..

என்றெல்லாம்,

வாய்மொழி குழறும் படிக்கு உன்னைப் பாடித் தொழுது ஓயாமல் அழுது -

யான் உன்னால் ஆட்கொள்ளப்பட வேண்டும்..

அந்நிலையில்,

உலக மாயையைக் கடந்த மெய்ஞானத்தை அடியேனுக்குத் தந்தருளல் வேண்டும்!..

உபதேச மொழியின் வழியாக எனக்கு மோட்ச வீட்டைக்

காட்டிய பராக்ரமனே!.. மலைகளுக்கு அரசன் ஆனவனே!.. மிக்க வீரத்தினை உடையவனே!..

மன்மதன் சாம்பலாகும்படிக்கு அவனை நெற்றிக் கண் கொண்டு நோக்கிய பசுபதியாகிய சிவ பெருமான் புகழ்ந்து அணைந்த பகவதி எனும் பார்வதியாள் பெற்றளித்த பெரு வாழ்வே,

நீ அமரர்களுக்காக போர் நடாத்தியபோது

ஓயாத இரைச்சல் உடைய அலைகடல்  தீப்பற்றிக் கொண்டு எரிந்தது.. அதைக் கண்ட அசுரர்கள் அஞ்சி நடுங்கினர்.. அலறிக் கதறினர்.. 

கிரெளஞ்ச மலைத் தொடர் ஆர்ப்பரித்து அதிர்ந்து அழிந்தது..

இப்படியாக, 

அசுரர்களை அழித்து வெற்றி கொண்ட வேலவனே!..

தேவர்களை அவர்களது உலகில் நிறைவாகக் குடியேற்றியவனே!..

எழுகரை நாடு எனப்படும் தலத்தில் எழுந்தருளிய எம்பெருமானே!..

எங்களையும் நோய் நொடிகளில் இருந்து காத்தருள்வாயாக!..

வெற்றி வேல் முருகனுக்கு அரோகரா..

வீரவேல் முருகனுக்கு அரோகரா..

***