நாவல் பழம்

    

நாடும் வீடும்

நலம் பெற வேண்டும்

பகையும் பிணியும்

தொலைந்திட வேண்டும்..

***

நாவலந்தீவு..

வைதீகச் சடங்குகளின்  சங்கல்ப மந்திரங்களில் ஜம்பு த்வீபே, பரத கண்டே"

என்றெல்லாம் சொல்வார்கள்..

பாரத மண்ணிற்கு வேத காலத்தில் வழங்கப்பட்ட  பெயர் - ஜம்புத்வீபம்.. 

தமிழில் நாவலந்தீவு..

ஜம்பு என்றால் நாவல் பழம்.. நாவல் மரங்கள் எங்கெங்கும் நிறைந்து இருந்ததால் நாவலந்தீவு.. 

சங்க இலக்கியங்கள் பலவும் நாவலந்தீவு என்று பேசுகின்றன..

நாவலந்தீவகத்தினுக்கு நாதர் ஆன காவலரே ஏவி விடுத்தாரேனும்.. (6/98)

- என்றும்,

நாவலம் பெருந்தீவினில்

வாழ்பவர் வந்து வணங்கி.. (5/52)

- என்றும், 

அப்பர் ஸ்வாமிகள் குறிப்பிட்டுச் சொல்கின்றார்..

நாவலந்தேயம் என்பதும் சொல்வழக்கு.. 

ஸ்ரீவிநாயகப் பெருமானுக்கு நிவேதனம் செய்யப்படும் பழங்களுள் இதுவும் ஒன்று..

ஔவையாருக்கு முருகப் பெருமான் நாவற்பழம் கொடுத்த சம்பவம் அனைவருக்கும் தெரியும்..

மணிமேகலை அமுதசுரபியை பெற்றதும் முதல் கவளத்தைக் கொடுத்தது தீராப் பசிப்பிணியுடன் தவித்திருந்த காயசண்டிகை எனும் கந்தர்வப் பெண்ணுக்கு.. 

இவள் - முனிவர் ஒருவர் தான் உண்பதற்கு என்று வைத்திருந்த நாவல் பழத்தைக் கணவனின் சொல்லையும் மீறி - காலால் சிதைத்ததற்காக சாபம் பெற்றவள்..

பஞ்ச பூத ஸ்தலங்களில் ஒன்றாகிய திருவானைக்காவின் தல மரம் நாவல்.. 

கையிலாய தரிசனத்திற்குச் சென்ற முனிவர் ஒருவருக்குப்  பிரசாதமாக இறைவன்

நாவல் பழத்தைக் கொடுத்தார்..  கயிலாயத்தில்

நாவல் பழத்தின் விதையை

உமிழ்வதற்கு அஞ்சிய முனிவர் அப்படியே பழத்தை விழுங்கி விட்டார்.. அது முனிவரின் உச்சந்தலை வழியே  முளைத்துவிட்டது.. "இனி நான் செய்வது என்ன?.." - என்று  முனிவர் கேட்டபோது இறைவன் கூறினான் - 

" காவிரிக் கரையில் தவம் இருக்கவும்!.. " - என்று..

அவ்வாறே முனிவர் தவமிருந்தபோது முனிவரின் தலையில் முளைத்த விதை பெரிய விருட்சமாகி விட்டது..

பின்னாளில் அந்த நாவல் மரத்தின் நிழலில் தான் அம்பிகை சிவபூஜை செய்து தவமிருக்க வந்தாள்..

அந்த மரத்தின் சருகுகள் சிவலிங்கத்தின் மீது விழாமல் இருப்பதற்காக சிலந்தி ஒன்று லிங்கத்திற்கு மேலாக வலை ஒன்றினைப் பின்னி வைத்தது.. சிவலிங்கத்திற்கு மேலாக சிலந்தி வலைக்குள் சருகுகள் சிக்கி கொண்டு இருப்பதைக் காணச் சகிக்காத யானை ஒன்று அதை பிய்த்துப் போட்டது..

சிலந்திக்கும் யானைக்கும் மோதல் உண்டாயிற்று.. துதிக்கையினுள் புகுந்து கடித்து வைத்தது சிலந்தி.. விஷத்தின் வேகத்தினால் யானை தரையில் மோதிக் கொண்டு வீழ்ந்து இறந்தது.. யானை மோட்சம் எய்தியது.. சிலந்தியோ சோழர் குலத்தில்  மன்னனாகப் பிறந்தது..

அறுபத்து மூவருள் ஒருவராகிய

கோச்செங்கணான் என்ற அந்த மன்னர் பிறந்ததே ஒரு திவ்ய சரித்திரம்.. அதை மற்றொரு சமயத்தில் பார்க்கலாம்...

எழுபத்தெட்டு மாடக்கோயில்களை

கோச்செங்கட் சோழர் கட்டியதாக அப்பர் ஸ்வாமிகள் குறிப்பிடுகின்றார்.. இந்த மன்னர் பிரான் பிறப்பதற்கான காரணம் - நாவல் மரம்..

நாவல் மரம் தல விருட்சமாக விளங்கும் இன்னொரு தலம் திரு நாவலூர்.. இவ்வூரில் தான் ஸ்ரீ சுந்தரமூர்த்தி ஸ்வாமிகள் தோன்றினார்..

இப்படியான பல சிறப்புகளை உடைய நாவல் பழம் பழுத்து உதிரும் காலம் இது..

அன்றைக்கு நாற்பது ஆண்டுகளுக்கு முன்பு - நவீன சாக்லேட்டுகள் விற்பனைக்கு வராத காலத்தில் பள்ளிப் பிள்ளைகள் விரும்பித் தின்பவற்றுள் நாவல் பழமும் ஒன்று..

அந்நாளில் பள்ளிக் கூடங்களுக்கு அருகில் ஐந்து பைசாவிற்கும் பத்துப் பைசாவிற்கும் சிரிப்பாய் சிரித்துக் கிடந்த நாவல் பழத்திற்குள் ஒரு மருத்துவம் ஒளிந்து கொண்டிருப்பது அவ்வளவாக யாருக்கும் தெரியாது..

நாவல் பழத்தின் ஜம்போலின் எனும் மூலக்கூறு - நாம் கார்போஹைட்ரேட் மிகுந்த உணவுகளை உட்கொண்ட பிறகு இரத்தத்தில் சர்க்கரையை நிர்வகிக்கின்றது என்பதைக்  கண்டறிந்துள்ளனர்..

நாவல் ரத்தத்தில் சர்க்கரையின் அளவைக் கட்டுக்குள் வைத்திருக்கின்றது.. நாவல் பழத்தின் கொட்டையும் புற்றுநோய் தடுப்பாக விளங்குகின்றது என்பது சிறப்பு அம்சம் ..

வீட்டுக்கு வீடு சர்க்கரை நோயாளிகள் என்றாகி விட்ட இந்த கால கட்டத்தில் அந்த ரகசியம் வெளிப்பட்டு விட்டதால் - 

இங்கே தஞ்சையில் ஒரு கிலோ நாவல் பழம் இருநூறு ரூபாய்.. சிங்காரச் சென்னை போன்ற பெரு நகரங்களில் என்ன விலைக்கு விற்கின்றார்களோ!..

அப்போதெல்லாம் பள்ளியில் சக தோழியருக்காக நாவல் மரத்தில் ஏறி பழங்களைப் பறித்துத் தருபவன் மகா வீரன்.. அந்த சாகசத்தில்  மரத்திலிருந்து விழுந்து கை கால்களில் அடிபட்டுக் கொள்வதோடு வீட்டில் உதை வாங்குவதும் உண்டு.. இருந்தாலும் கடைக்கண் பார்வை - அது ஒன்று போதுமே!..

நேற்று மருத்துவ ஆலோசனைக்குச் சென்று விட்டு வரும்  வழியில் கால் கிலோ வாங்கியதற்காக இந்த 

நாவல் பழ புராணம்..

*

நாவல் பழம் வாழ்க..

இயற்கை மருத்துவம் வாழ்க..

***