நீராடல்

நாடும் வீடும்

நலம் பெற வேண்டும்

பகையும் பிணியும்

தொலைந்திட வேண்டும்..

***

இன்று

ஆடி 6

திங்கட்கிழமை

எண்ணெய்க் குளியல்

நாளுக்கு இருமுறை

வாரத்திற்கு இருமுறை

பட்சத்திற்கு இருமுறை

வருடத்திற்கு இருமுறை 

- என்ற பழங்கணக்கில்

வாரத்திற்கு இருமுறை என்று எண்ணெய்க் குளியலை வகுத்துள்ளது  - 

பழந்தமிழ் சித்த மருத்துவம். 

கோடையில் வாரம் இருமுறை என்றால் மழைக் காலத்தில் வாரம் ஒருமுறை மட்டுமே எண்ணெய்க் குளியல் எடுத்துக் கொள்ள வேண்டும் - என்றும்  சொல்லி வைத்தனர் ஆன்றோர்..

ஆண்கள் புதன் மற்றும் சனிக் கிழமைகளிலும் பெண்கள் செவ்வாய் மற்றும் வெள்ளிக் கிழமைகளிலும் கண்டிப்பாக

எண்ணெய்க் குளியல் எடுக்க வேண்டும் அந்நாட்களில்...

இன்று எண்ணெய் தேய்த்துக் குளிக்கும் பழக்கமே  இல்லாமல் போய்விட்டது.. 

தீபாவளி எண்ணெய்க் குளியல் மட்டும் தான்..

எங்கள் வீட்டிலும் தீவளிக்குத் தீவளி தான்..

எண்ணெய்க் குளியலுக்கு  உகந்தது - நல்லெண்ணெய்..

கேரளத்தில் தேங்காய் எண்ணெய்க் குளியல் பிரதானம் என்று அறிந்திருக்கின்றேன்.. 

இன்று போல தொ.கா. நிகழ்ச்சிகள் இல்லாத அந்தக் கால கட்டத்தில்  அறிவுரைகளுக்கும் ஆலோசனைகளுக்கும்

எதிர்ப்புற வீடுகளும்,  பக்கத்து வீடுகளுமே உற்ற துணை..

விளம்பரங்களில் கும்மியடிப்பவர்கள் எவரும் நடு வீட்டுக்குள் வந்து 

பெரிய பெரிய அறிவுரை ஏதும் சொல்ல வேண்டிய அவசியம் - அப்போது இல்லாதிருந்தது..

பாரம்பரிய வைத்தியர்களின் அறிவுரையின் படி சிலர் -  மூலிகைகளைக் கலந்து சுட வைத்துத் தைலங்கள் தயாரித்து குளியலில்  பயன்படுத்திக் கொள்வர்.. 

எண்ணெய் வழி மருத்துவம் கேரளத்தில் பிரசித்தமானது..

இன்றைக்கு மீண்டும் எண்ணெய்க் குளியல் முன்னெடுக்கப்பட்டால்  

எண்ணெயில் இட்டுக் காய்ச்சுவதற்கு

பிரியாணி மசாலாப் பொடி தான் சிறந்தது!.. 

அதுவும் நாங்க தான் உங்களுக்காக தயாரிக்கிறோம்!.. ன்னு

விளம்பரத்திலும்   யூட்டீப்பிலும் கதறிக் 

கொண்டிருப்பார்கள்!.

நல்லவேளை.. தப்பித்தோம்!..

எண்ணெய்க் குளியலின் போது

முதல் துளியை பூமாதேவிக்கு அர்ப்பணம் செய்து விட்டு வலது உள்ளங்கையில் எண்ணெய் எடுத்து உச்சந்தலையில் அழுத்தமாக தேய்த்துக் கொள்வதும் தொடர்ந்து உந்திக் குழியில் தடவிக் கொள்வதும் மரபு..

அதன் பிறகே உடல் முழுக்க எண்ணெய் தடவிக் கொள்வர்.. 

உள்ளங்காலில்  எண்ணெய் தடவிக் கொள்வது அவசியம்..

ஆண்கள் வீட்டின் உள்ளிருந்து எண்ணெய் தேய்த்துக் கொள்வது கூடாது..

இடக்கையால் எண்ணெய் எடுப்பதோ தடவிக் கொள்வதோ கூடாது.. அது அமங்கலத்தைக் குறிப்பது..

எண்ணெய் தேய்த்துக் கொண்டு குளத்திற்குச் செல்லக் கூடாது.. 

எண்ணெய் தேய்த்துக் கொண்டு வீதியில் செல்வது அபசகுனம்..

உடல் முழுக்க நல்லெண்ணெய் வாசம் கமழ்ந்திருக்க - ஒரு நாழிகை வெயில் சார்ந்த நிழலில் இருந்து விட்டு கிணற்றடியில் வெதுவெதுப்பான நீரில் குளிப்பதே முறையான எண்ணெய்க் குளியல்...

திருமணம் நடந்த மறுநாள் காலையில் மாப்பிள்ளையை எண்ணெய் தேய்த்துக் குளிக்கச் செய்து மோதிரம் அணிவிப்பது சில சமூகங்களில் வழக்கம்.. 

எண்ணெய்க் குளியலால் சிலருக்கு பிரச்னைகளும்  வந்து விடுகின்றன.. அவர்களுக்கு மட்டுமே விதி விலக்கு..

குளியலின் போது 

சீயக்காயே சிறந்தது!

ரசாயன நுரைகளைத் தவிர்த்து விட்டு சீயக்காய்  குளியலே சிறந்தது..

சாதாரணமாக

உடலுக்கு ஆரோக்கியம் தருபவை சீயக்காய்த் தூள் நலங்கு மாவு போன்றவையே.. ரசாயன நுரைப்புகள் அல்ல...

உடல் அழுக்கும் கிருமிகளும் நீங்குவதோடு சருமத்துக்கு பொலிவும் கிடைக்கும்..

எண்ணெய் தேய்த்துக் குளித்த பிறகு, பெண்கள் கூந்தலுக்கு சாம்பிராணி தூபம் (புகை) இட்டுக் கொள்வது வழக்கம்.. 

கூடலில் - 

செண்பகப் பாண்டியன் - பூங்குழலியின் கூடலில் - 

கொங்கு தேர் வாழ்க்கை வடிவத்தில்

நக்கீரரின் விதி வந்து விளையாடியது இப்படியான நேரத்தில் தான்!..

தலையில் சேர்ந்திருக்கும் நீரை சாம்பிராணிப் புகை அகற்றி நறுமணம் ஊட்டும்.

ஆனால், இப்போது எல்லாம் கலப்படம் என்ற நிலையில் நாட்டு மருந்து கடைகளில் சுத்தமான சாம்பிராணியாக பார்த்து வாங்கி தூபம் இட்டுக் கொள்வது நல்லது.. 

நல்ல சாம்பிராணியாக கிடைக்காத பட்சத்தில் நாமே தூபப் பொடி தயாரித்துக் கொள்ள வேண்டியது தான்..

சூரியன் உதித்ததில் இருந்து மூன்று மணி நேரத்திற்குள் எண்ணெய் தேய்த்துக் குளித்திடல் வேண்டும்.. ஒன்பது மணிக்குப் பிறகு எண்ணெய்க் குளியல் கூடாது.. நடுப்பகலில்

அந்தியில் இரவில் கூடவே கூடாது..

ஐப்பசி மாத தேய்பிறைச் சதுர்த்தசி அன்று மட்டுமே உதயாதி நாழிகைக்கு முன் எண்ணெய்க் குளியலுக்கு அனுமதி (தீபாவளி)..

எண்ணெய்க் குளியலால்

உடலில் சூடு குறைந்து, மனம் புத்துணர்வைப் பெறும்...

முழங்கால் வலி, மூட்டு வலி போன்ற பிரச்னை இருப்பவர்கள், எண்ணெய்த் தேய்ப்பு  செய்து குளிப்பது நல்லது.

குளிர்ச்சியான எந்த உணவையும் எண்ணெய் தேய்த்துக் குளித்த நாளில் உண்ணக் கூடாது.

எண்ணெய் தேய்த்துக் குளித்த அன்று மதியம் சோறும் மிளகு ரசமும்  தான் சிறந்தவை என்பது குறிப்பிடத்தக்கது..

ஆயினும்,

எண்ணெய் தேய்த்துக் குளித்த நாளின் மதிய உணவுக்குள்  

கோழியும் ஆடும் மற்றதும் எப்படி

உள்ளே புகுந்தன என்பது தெரிய வில்லை..

புலால் உணவுகளைக் கூடுமானவரை எண்ணெய் தேய்த்துக் குளித்த அன்று

உண்ண வேண்டாம்...

இங்கே நம்முடைய கபாலச் சூடு உடல் சூடு - குறையாதபடிக்கு  நுரைப்பி விளம்பரங்கள் கரடி ஆட்டம் ஆடிக் கொண்டு இருக்கின்றன..

உடலுக்கும் மனதிற்கும் புத்துணர்ச்சி தரக்கூடிய எண்ணெய்க் குளியல் நமக்கே நமக்கான பாரம்பரியம் என்பதை மறவாது இருப்போம்..

ஃ

புறந்தூய்மை நீரால் அமையும்..

சிவாய நம ஓம்

***