செண்டார் கையன்

நாடும் வீடும்

நலம் பெற வேண்டும்

பகையும் பிணியும்

தொலைந்திட வேண்டும்..

***

இன்று கார்த்திகை 3

   சனிக்கிழமை

ஸ்ரீ ஐயப்பனின் மண்டல பூஜை நாட்களின் முதல் சனிக்கிழமையை முன்னிட்டு சிறப்புப் பதிவு இன்று..

**

சூரபத்மனுக்கு அஞ்சிய தேவேந்திரன் தனது தேவியுடன் வேணுபுரம் எனப்பட்ட மூங்கில் வனத்துக்கு வந்து ஒளிந்திருந்தான்.. 

ஒருநாள் அவனுக்கு திருக்கயிலாயம் சென்று ஈசனைத் தரிசித்து பிரச்னைகளுக்குத் தீர்வு காணும் எண்ணம் வந்தது.. கூடவே இந்த்ராணியை தனித்து விடவும் இயலாது.. கூட அழைத்துச் செல்லவும் முடியாது என்ற இயலாமையும் புரிந்தது.. 

அப்போது அங்கே தோன்றிய நாரதர் தர்மசாஸ்தா எனும் ஸ்ரீ ஹரிஹர புத்திரனைப் பற்றி விளக்கினார்.. 

அதன்படி இந்திரன் ஸ்ரீ ஹரிஹர புத்திரனைப் பணிந்து வணங்கி அவரது பொறுப்பில் இந்த்ராணியை விட்டுச் சென்றான்.. 

அதே வேளையில் தேவேந்திரனைச் சிறைப் பிடிப்பதற்காக வந்த அஜமுகி - சூரபத்மனின் தங்கை - தனித்திருந்த இந்த்ராணியைக் கண்டு அவளைக் கைப்பற்றினாள்..

அப்போது, இந்த்ராணி -

பையரா அமளியானும் பரம்பொருள் முதலும் நல்கும்

ஐயனே ஓலம் விண்ணோர் ஆதியே ஓலம் செண்டார்

கையனே ஓலம் எங்கள் கடவுளே ஓலம் மெய்யர்

மெய்யனே ஓலம் தொல் சீர்வீரனே ஓலம் ஓலம்!..

- என்று, ஓலக்குரல் எழுப்பியதைக் கேட்ட ஸ்ரீ தர்ம சாஸ்தா தனது படைத் தளபதிகளுள் ஒருவரான ஸ்ரீ மஹாகாள மூர்த்தியை அனுப்பி வைக்கின்றார்.. 

மஹாகாளர் அஜமுகியிடம் நீதியை எடுத்துக் கூறியும் அவள் அதைக் கேட்காமல் வரம்பு மீறி நடந்து இந்த்ராணியின் கூந்தலைப் பற்றி இழுக்கிறாள்..

கோபம் கொண்ட  மஹாகாளர் அஜமுகியின் கையை வெட்டித் தள்ளி விடுகின்றார்..

ஸ்ரீ கந்த புராணம் காட்டும் சம்பவம் இது..

ஸ்ரீ மஹாகாள மூர்த்தி தான் இன்றைய ஐயப்ப வழிபாட்டில் ஸ்ரீ கருப்பசாமி எனும் காவல் நாயகம்..

இன்றைய ஐயப்ப வழிபாடு  சங்க கால தமிழகத்தில் சிறப்புற்றிருந்தது.. சாத்தன் எனும் பெயரில் ஊர்கள் தோறும் கோயில்கள் இருந்தன.. மக்களில் பலருக்கும் சாத்தன் எனும் பெயர் அமைந்திருந்தது..

ஸ்ரீ ஹரிஹர புத்திரனாகிய மஹா சாஸ்தாவிற்கு யானை வாகனம். குதிரையும் கூட வரும்.

செண்டு எனப்பட்ட  சுரிகாயுதம் இவருக்கு உரியது.. இது சாட்டை என்று சொல்லப்படுவது.. 

பூர்ணகலை, பொற்கலை - என , தேவியர் இருவர் இருபுறமும் திகழ்வர்.. பூத கணங்களை அடக்கி அவற்றுக்கு தலைவனாக விளங்குபவர்..

சாஸ்தா எனும் சொல்லின் தமிழ் வடிவமே சாத்தன் என்பது..

சாத்தன் எனில் வலிமையுடையவன் என்றும் பொருள்.. 

அதனால் தான் பெருங் கழுகை அடித்துத் துரத்தும் சின்னஞ்சிறு கரிக்குருவிக்கு ஆனைச் சாத்தன் எனும் பெரிய பெயர் அமைந்தது..

இப்படியான சாத்தன் எனும் பெருமானுக்கு தந்தை ஈசன் என்றும் ஈசனின் தேவியானவள் ஹரி எனும் பெயரையும் உடையவள்  என்றும் அப்பர் ஸ்வாமிகள் தமது திருப் பாடல்களில் பதிவு செய்திருக்கின்றார்..

அரியல்லால் தேவியில்லை ஐயன் ஐயாறனார்க்கே.. - என்று திரு ஐயாற்றில் பேசுகின்ற அப்பர் ஸ்வாமிகள் -

காவியங்கண்ணள் ஆகி

கடல் வண்ணம் ஆகி நின்ற

தேவியைப் பாகம் வைத்தார் திருப்பயற்றூரனாரே.. - என்று புகழ்கின்றார்..

கடல் வண்ணன் என்பது ஸ்ரீ வைகுந்த வாசனின் திருப் பெயர்களுள் ஒன்று..

பார்த்தனுக் கருளும்வைத்தார் பாம்பரை யாடவைத்தார்

சாத்தனை மகனா வைத்தார் சாமுண்டி சாமவேதங்

கூத்தொடும் பாடவைத்தார் கோளராமதிய நல்ல

தீர்த்தமுஞ் சடைமேல் வைத்தார் திருப்பயற்றூரனாரே .. (4/32)

இறைவன் சாந்த வடிவாக எழுந்தருளும் போது உமா, கோப வடிவினில் காளி, போர்க் கோலத்தில் துர்கா, புருஷத்துவம் கொள்ளும்போது விஷ்ணு என்று சிவபெருமானின் சக்திகளை நான்காகக் கூறுவர் ஆன்றோர்..

பரமேஸ்வரியின் திருப்பெயர்களுள் கோவிந்த ரூபிணி என்பதும் ஒன்று என்பது இறை வழியில் நிற்பவர்க்குப் புரியும்..

ஓம் 

ஹரிஹர புத்ராய

புத்ர லாபாய சத்ரு நாசனாய 

மதகஜ வாகனாய

பிரத்யட்ச சூலாயுதாய

மஹா சாஸ்த்ரே நமோ நம:

ஸ்வாமியே சரணம் ஐயப்பா

***