தோட்டம்

  

நாடும் வீடும்

நலம் பெற வேண்டும்

பகையும் பிணியும்

தொலைந்திட வேண்டும்..

***

இன்று

மாசி 6

 ஞாயிற்றுக்கிழமை

முன்பெல்லாம் வீட்டைச் சுற்றி இடம் இருக்கும்.. 

அதில் வீட்டுக்காக செடி கொடிகளை வளர்ப்பது வழக்கம்..

அல்லது

வீட்டுக்குப் பின்புறம் நல்ல தண்ணீர் கிணறு.. பக்கத்தில் தொழுவம்.. 

கிணற்றில் புழங்குகின்ற தண்ணீரில் - தென்னை மரங்களோடு செடி கொடிகள் ஆகியன மனதுக்கு இதமாகவும் வீட்டிற்கு பயனாகவும் தழைத்திருக்கும்..

இப்போது நிலைமை அவ்வாறு இல்லை என்பது எல்லாருக்கும் தெரியும்..

வீட்டிலேயே தோட்டம் அமைக்க, பரந்து விரிந்த இடம்  இப்போது அமைவதில்லை..  

தற்போதைய அமைப்பில் முகப்பு முன் தளம் (பால்கனி) அல்லது  மேல் தளம் போதுமானவை..

அந்த இடமும் இல்லை எனில் , வெயில்படும் இடத்தில் தொட்டிகளைத் தொங்கவிட்டு சிறுசிறு செடிகள் வளர்த்து திருப்தி அடையலாம்.. 

தோட்டம் பலனளிக்கத் தொடங்கியதும் வீட்டிற்கான காய்களின் தேவையில் ஓரளவுக்கு நிறைவும் திருப்தியும் ஏற்படும்..

வீட்டின் வெளிச் சுவர்களில் பூந்தொட்டிகள் வைத்து பராமரிப்பது வீட்டிற்கு மிகவும் அழகூட்டும்.. 

மிகக் குறைந்த செலவில் மேல் தளத் தோட்டம் அமைக்க முடியும் என்கிறார்கள்..

வெண்டை, அவரை, பாகல் போன்றவை குறிப்பிட்ட பருவத்திலும் 

கத்தரி, தக்காளி, மிளகாய், குடை மிளகாய், கீரை போன்றவை எல்லா பருவங்களிலும் விளைகின்றன.

வீட்டுத் தோட்டத்தில்  இயற்கை உரங்களைப் பயன்படுத்துவதன் மூலம் சத்தான காய்கறிகளைப் பெறமுடியும்.

மாட்டுச்சாணம், ஆட்டுப் புழுக்கை, சாம்பல் போன்றவையே இயற்கை உரங்கள்.. தொட்டிகள் அல்லாத நிலம் எனில்

மண்புழுக்களை வாங்கி இடலாம்..

செடிகள் செழித்து வளரும்போது பூச்சி தாக்காமல் பார்த்துக் கொள்வது மிகவும் அவசியம்..

விடியற்காலையில் சுத்தமான சாம்பலை செடிகளில் தெளிப்பது பழைமையான முறை..

இப்போது சாம்பலுக்கு வழியே இல்லை..

மாற்றாக, வேப்ப எண்ணெயை நீரில் கலந்து தெளிக்கலாம்..

செடிகள் செழித்து வளர முறையாகத் தண்ணீர் ஊற்றுவதும் அவசியம். அதற்காக   வழிய வழிய தண்ணீர் ஊற்ற வேண்டும் என்ற அவசியமில்லை..

தினமும் செடிகள் பராமரித்து தண்ணீர் விடுவதற்கு நேரம் இல்லை எனில், 

ஒரு லிட்டர் பாட்டில்கள் சிலவற்றில் சிறுசிறு துளைகள் இட்டு, வேர் பாதிக்காதபடி தொட்டியில் பதித்து விடலாம். 

இரண்டு நாளைக்கு ஒரு முறை பாட்டிலில் தண்ணீர் ஊற்றி விட்டால், அதில் உள்ள துளைகள் மூலம் வேர்களுக்கு தண்ணீர் பரவி விடும்..

வைகாசி மாதத்தில் தென்னை நார் கழிவுகளுடன்  தோட்டத்து மண்ணை சீர் செய்து  ஆனி மாதத்தில் இயற்கை எருவையும் சேர்த்து வளப்படுத்திக் கொள்ள வேண்டும்..

ஆறுகளில் நீர் பெருகி வந்து மண் மகளைக் குளிர்விக்கின்ற ஆடிப் பட்டத்தில் விதை 

விதைக்க வேண்டும்..

 

அதிக வெயில்படும் இடம் என்றால் நிழலுக்காக வலைக் குடில் அமைத்துக் கொள்ளலாம்..

கூடுதல் தகவல்கள் தோட்டக் கலை அலுவலகத்தில் கிடைக்கும்.. 

ஏற்கனவே வீட்டில் மாடித் தோட்டம் வைத்திருப்பவர்களிடம் கேட்டுத் தெரிந்து கொள்ளலாம்..

ஃஃஃ

அன்பின் கவனத்திற்கு

புதுச்சேரி, காரைக்காலில் இருந்து பெறப்பட்ட தகவலைத் தொடர்ந்து சென்னை மெரினா கடற்கரையில்,  பறிமுதல் செய்யப்பட்ட பஞ்சு மிட்டாய்களில்

மேற்கொள்ளப்பட்ட ஆய்வுகளின் முடிவில் அதில்

புற்றுநோயை ஏற்படுத்தக் கூடிய ரோட்டமின் பி எனும் ரசாயனம் கலந்திருப்பது தெரிய வந்துள்ளது..

அத்துடன், கண்டறிய முடியாத சில ரசாயன வகைகளும், பஞ்சு மிட்டாய்களில் கலந்திருப்பது உறுதி செய்யப்பட்டுள்ளது..

மேலும் விவரங்கள் அறிவதற்கு இணைப்பு:

தினமலர் செய்தி 

நஞ்சு மிட்டாய் தடை

காய்கனிகள் கீரை பூச்செடிகள் என, தோட்டம் அமைத்தால் எல்லா நற்பயன்களும் நமக்குக் கிடைக்கும்..

சின்னச்சிறு செடி கொடிகளைக் கண்டதும்  

வண்ணத்துப் பூச்சிகளுக்கும் குருவிகளுக்கும் 

மகிழ்ச்சி பெருகும்..

அந்த மகிழ்ச்சியுடன் அவை நமது 

தோட்டத்தை சூழ்ந்து  கொண்டால் 

அதற்குப் பின் தோட்டம் தானே 

பிழைத்துக் கொள்ளும்.

நம்முடைய நலம்

நம்முடைய கையில்

நாளும் வாழ்க

நன்றென வாழ்க

**

ஓம் நம சிவாய ஓம்

***