வருக.. வாழ்க..

     

நாடும் வீடும்

நலம் பெற வேண்டும்

பகையும் பிணியும்

தொலைந்திட வேண்டும்..

***

இன்று

ஆடி 18

 வியாழக்கிழமை

இன்று 

ஆடிப் பெருக்கு 

காவிரி அன்னையை 

வாழ்த்தி வணங்குவோம்..

கலையாய் வருகின்ற காவிரி வாழ்க..

நிலையாய் வளந்தரு வாழ்வே வருக..

அலையாய் அழகாய் அமுதாய் வருக..

இலையாய் மலராய் கனியாய் வாழ்க..

கலைமிகு நின்றன் கழனிகள் வாழ்க..

விலைமிகு வேளாண் புகழுடன் வாழ்க..

சிலையொடு கோயிற் கோலம் வாழ்க..

நிலைதரு  தெய்வக் களஞ்சியம் வாழ்க..

காண்கிற தெல்லாம் கவினுடன் வாழ்க..

பூண்கிற தெல்லாம் பொலிவுடன் வாழ்க..

தாங்கி நலந்தரும் தமிழ் நலம் வாழ்க

ஓங்கி வளந்தரும் உயிர்க் குலம் வாழ்க..

அன்பினில் ஆருயிர்ச் சுடர்களும் வாழ்க

நன்றியில் நின்றோர் நற்குலம் வாழ்க..

தென்றலில் தெய்வத் திருவருள் வாழ்க..

சென்றிடும் திசை தனில் செல்வங்கள் வாழ்க..

கவினுறு காவிரி கண்களில் வாழ்க

கலைதரு காவிரி நெஞ்சினில் வாழ்க

நவில்தொறும் நலங்கள் நாளும் தருக

நிலைபெறு மங்கல மாண்புகள் தருக..

அலைபுனல் காவிரி அன்புடன் வருக..

ஆருயிர்க் குலங்கள் தழைத்திட வருக..

அலைதவழ் செல்வக் காவிரி வருக..

சிலைமுக தேவி திருவருள் தருக

மனந்தொட்டு வாழ்வோர் மாண்புகள் வாழ்க

தனந்தொட்டுத்  தருவோர் தகவுற வாழ்க

இதந்தொட்ட தமிழினில் வந்தனை வாழ்க

பதந்தொட்டுப் பணிந்த கவியினில் வாழ்க..

ஃஃஃ

காவிரி வாழ்க கலைகளும் வாழ்க..

கைதொழுவார் மனை மங்கலம் வாழ்க..

**

ஓம் நம சிவாய சிவாய நம ஓம்

***