ஒரு பார்வை

    

நாடும் வீடும்

நலம் பெற வேண்டும்

பகையும் பிணியும்

தொலைந்திட வேண்டும்..

***

இன்று

வைகாசி 32

 வியாழக்கிழமை

இன்று பிரதோஷம்

கார்த்திகை..

தஞ்சையில்

கருடசேவையின் போதும் நவநீத சேவையின் போதும்

தெற்கு ராஜவீதி ஸ்ரீ கலியுக வேங்கடேசர் கோயிலுக்கு முன்பாக இரண்டு நாளும் 

தஞ்சை சௌராஷ்ட்ர சபையினரால் நாம சங்கீர்த்தனமும் அன்ன தானமும் நடத்தப்பட்டது குறிப்பிடத்தக்கது..

அடுத்துள்ள ஸ்ரீ அன்னபூரணி கோயிலின் முன்பு பெரிய பந்தலிடப்பட்டு எழுந்தருள்கின்ற பெருமாளுக்கு நிவேத்தியத்துடன் கற்பூர ஆரத்தி..

அந்த வகையில்

இருபத்து நான்கு நிவேத்யங்கள் சமர்ப்பிக்கப்பட்டன..

நாம சங்கீர்த்தனம் செய்து கொண்டு வந்த பெரியவர்களை வணங்கி ஆசி பெற்றது பெரும் பாக்கியம்..

அங்கே சடாரி பெற்று வருவதற்குள் கழற்றி வைத்த செருப்பு தொலைந்து விட்டது..

கொதிக்கும் வெயிலில்

ஆடிக் கொண்டும் பாடிக் கொண்டும்

வந்தோர் பலர்..

நாம சங்கீர்த்தனம் செய்து கொண்டு வந்த பெரியோர்களுக்கு முன் நான் சாதாரணம் எனினும் செருப்பு இன்றி நடக்க இயலவில்லை..

இருந்தும்

தெற்கு ராஜவீதியில்

இருந்து மேல ராஜ வீதி காமாட்சியம்மன் கோயில் வரை (மூன்று கி.மீ) சென்று திரும்பி வந்தேன்.. 

பல இடங்களிலும் சித்ரான்னம் வழங்கிக் கொண்டிருந்தனர்.. 

தவிரவும் தெற்கு ராஜவீதி ஸ்ரீ அன்னபூரணி சந்நிதியில் போல - மேல ராஜவீதியின் பல வீடுகளிலும் இருபத்து நான்கு நிவேத்யங்கள் சமர்ப்பித்து மகிழ்ந்தனர்..

இல்லம் ஒன்றில் வாசலில் வைத்து மாம்பழம் வழங்கி மகிழ்ந்தனர்..

தண்ணீர், மோர், பேரீச்சம் பழம், உலர் திராட்சை, கற்கண்டு என - மக்களின் அன்பிற்கு அளவில்லை..

சுட்டெரிக்கும் வெயிலில் செருப்பில்லாமல்  நடப்பது அவ்வளவு எளிதாக இல்லை.. 

ஆனாலும்,

அடியார்கள் பலர் செருப்பின்றி நடந்து கொண்டு இருந்தனர்..

தெற்கு ராஜவீதியில் ஒரே ஒரு இடத்தில் மட்டும் தண்ணீர் குழாயைத் தெருவில் போட்டு குளிரச் செய்திருந்தார்கள்..

சாலைகளின் அழகு சொல்லி மாளாது.. 

பற்பல காரணங்களால்

மாணிக்கப் பரல்களாக

ஆங்காங்கே ஜல்லிக் கல் சரளைகள் சிதறிக் கிடந்தன.. 

இவற்றை கவனத்தில் கொண்டு ஒழுங்கு செய்வது யார்?.. 

தெரியவில்லை..

ஏதும் கேட்டால் - 

" இஷ்டம் என்றால் நட.. இல்லாவிட்டால் வீட்டிலேயே  கிட!.. " - என்பார்கள்..

நமக்கு எதற்கு ஊர் வம்பு?..

இருந்தாலும், சில பிரச்னைகள் தவிர்க்கவே இயலாமல்..

சடாரிக்கும் குங்குமத்துக்குமாக மனம் துணிந்து நெருக்கியடித்து முட்டி மோதிக் கொண்ட மங்கையர் திலகங்கள்..

மாற்றுச் சாலை வசதி இருந்தும் - ஒழுங்கு முறையின்றி திருவிழா கூட்டத்துக்குள் தாறுமாறாக வந்து - காள்.. காள்.. - என்று ஒலியெழுப்பி இடையூறு செய்த வாகன ஓட்டிகள்..

முறையான அனுமதியுடன் தான் விழா நடக்கின்றது என்றாலும் - எதற்குப் பிரச்னை - என்று  கருட வாகன வண்டிகளை விறுவிறுப்பாக நடத்தி விட்டார்கள் நம்மவர்கள்..

கூட்டத்துக்குள்  நடக்கும் போது  முதுகில் கை வைத்துத் தள்ளுவது எங்கும் சர்வ சாதாரணமாக இருப்பது..

அந்த வகையில் மெதுவாக நடந்த நானும் தள்ளப்பட்டு

தடுமாறினேன்..

கீழே விழாதிருந்தது அதிர்ஷ்டம்..

அப்படி என்னைத் தள்ளிய ஒருவன்   

என்னிடம் கேட்ட கேள்வி..  

" நடக்க முடியலை.. ன்னால் இங்கே எதுக்கு வந்தாய்?.. "

நான் வந்திருப்பது எதற்கு - என்று அவனுக்கு எப்படித் தெரியும்!..

நாராயண.. 

நாராயண!..

***