முருங்கை

   

நாடும் வீடும்

நலம் பெற வேண்டும்

பகையும் பிணியும்

தொலைந்திட வேண்டும்..

***

இன்று

பங்குனி 26

 ஞாயிற்றுக்கிழமை

ஊட்டச் சத்து விவரங்களுக்கு 

நன்றி - விக்கி..

அகநானூறு வரிகளுக்கு நன்றி - 

தமிழ் இணையப் பல்கலைக் கழகம்..

முருங்கை..

நமது நாட்டிற்கே உரிய சிறப்பு மிகு தாவரங்களுள் இதுவும் ஒன்று..

எல்லா வகை நிலங்களிலும் செழித்து வளரும் தன்மையுடைய முருங்கை - எளிதில் ஒடிந்து விழக் கூடிய கிளைகளை உடைய பெருஞ்செடி..

ஆறு மாதத்திற்கு ஒருமுறை பூத்து மூன்று மாதங்கள் வரைக்கும் பலன் தருவது..

முருங்கை வழங்குகின்ற நன்மைகள் ஏராளமானவை..

இலை, பூ, காய், முற்றல் - என அனைத்தும் நற்குணம் உடையவை..

வெண்ணெயை உருக்கும் போது இரண்டு இணுக்கு முருங்கைக் கொழுந்தினைப் போட்டு முறிப்பது இந்தப் பக்கத்து வழக்கம்..

முறுகிய முருங்கைக் கொழுந்து சுவையோ சுவை!..

அப்படியான புத்துருக்கு நெய் எல்லாம் வீட்டில் செய்தால் தான் உண்டு!..

நாற்பதாண்டுகளுக்கு முன்பு வரை இலை மறைவாக இருந்த முருங்கைக் காய் விஷயத்தைப் பொது வெளியில் அம்பலப்படுத்திய பெருமை அந்த திரைப்படத்தையே சேரும்.. 

அதற்குன் பின் முருங்கைக் காயைப் பற்றி பேசினாலே மர்மப் புன்னகை மலர்கின்றது.. 

ஒருவித ஏளனச் சிரிப்பு என்றாலும்  ஆனந்தத்தின் அடிப்படை ஆரோக்கியம் என்ற மறைபொருள் அதனுள் இருக்கின்றது..

முருங்கையின் இலைகளுக்கு -  கீரை என்றே பெயர்.. 

இதில் அத்தியாவசிய ஊட்டச் சத்துக்கள் மற்றும் தாது உப்புகள் நிறைந்து உள்ளன..

வைட்டமின்கள் B , C, K , புரோவிட்டமின் A என்னும் பீட்டா கரோட்டின், கால்சியம், மாங்கனீஸ்,  புரதம்,  மற்றும் அமினோ அமிலங்கள்  நிறைந்துள்ளன.. 

மனிதர்களுக்குத் தேவையான

இருபது அமினோ அமிலங்களில் பதினெட்டு 

அமிலங்கள் முருங்கைக் கீரையில் உள்ளன என்பது குறிப்பிடத்தக்கது. 

மனித உடலால் தயாரிக்க இயலாத எட்டு அத்தியாவசிய அமினோ அமிலங்கள் இறைச்சியில் மட்டுமே கிடைக்கின்றன. 

அந்த எட்டு அமிலங்களையும் கொண்ட ஒரே தாவர உணவு முருங்கைக் கீரை.

சமையலறையின் இனிமை முருங்கைக் காய்.. சாம்பார் என்றதும்  முதலில் நினைவுக்கு வருவது முருங்கைக் காய் தான்..

முருங்கைக் கீரையை ஆய்ந்து எடுப்பது சற்றே அலுப்பானது..  இந்த ஒரு கீரை மட்டுமே எண்ணற்ற பலன்களைத் தருகின்றது என்பதை நினைத்துக் கொண்டால் எல்லாம் எளிதாகி விடும்..

ரத்த விருத்திக்கு மிகச் சிறந்தது முருங்கை கீரை..

முருங்கை கீரையை தொடர்ந்து சாப்பிட்டு வந்தால் கண் நோய்கள் வராமல் தடுக்கலாம்.

பாசிப் பருப்புடன் முருங்கைப் பூ , சின்ன வெங்காயம் சேர்த்துச்  சமைப்பதே மன்மத விருந்து.. 

இதனால் தாது விருத்தியாகும் என்பது குறிப்பிடத்தக்கது.. 

பிரசவித்த பெண்களுக்கு பால் சுரப்பினை அதிகரிப்பதில்  முருங்கைக் கீரைக்கே முதலிடம்..

பழங்காலத்தில் இருந்தே முருங்கையானது சித்த மருத்துவத்தில் சிறப்பிடம் பெற்று விளங்குகின்றது..

முருங்கைக்காயை வைத்துக் கொண்டு கண்டமேனிக்கு குழாயடியில் மருத்துவ குறிப்புகள் காணக் கிடக்கின்றன.. அவற்றுள் எது உண்மை.. எத்தனை உண்மை என்பது எவருக்கும் தெரியாது..

பண்டைய வைத்திய முறை ஒவ்வொன்றுக்கும் எதிராக பலப்பல ஆய்வுகள்.. அவற்றில் இருந்து 

முருங்கையும் தப்பிக்க வில்லை.. 

முருங்கையினால் பிரச்னைகள் என்றெல்லாம் எதிர் கருத்துகள்.. முருங்கையினால் பிரச்னை இருக்கலாம்.. அவை அனைத்தும் அற்பமானவையே!..

யாரும் நலமாக இருந்து விடக்கூடாது என்பதற்காகத் தானே மேலை நாட்டு  விஞ்ஜான (விஞ்ஞான) உணவு முறைகள் இங்கே வந்து கொண்டிருக்கின்றன..

சம்சாரி வாழ்வுக்கு ஒரு பசு மாடு என்பதுடன் முருங்கையையும் சேர்த்துக் கொள்ளலாம்..

இன்றைய நாட்களில்

ஒரு கைப்பிடி முருங்கைக் கீரை பதினைந்து ரூபாய்

 வரைக்கும் விற்கப்படுகின்றது..

தனியாக முருங்கைக் காய் ஒன்றை பத்து ரூபாய்க்கும் மூன்றை இருபத்தைந்து ரூபாய்க்கும் இங்கே விற்றுக் கொண்டிருக்கின்றனர்..

வீட்டு வாசலில் ஒரு முருங்கை மரம் இருந்தாலே போதும்..  சாதாரணமாக காய்களை விற்று சம்பாதித்து விடலாம்..

ஆரோக்கியமான முருங்கை  ஆண்டொன்றுக்கு 450 காய்கள் காய்க்கக் கூடியது ..

வீட்டுத் தேவைக்குப் போக நமக்கு முருங்கை தருகின்ற ஆதாயத்தினை  உள்ளூர் விலையை அனுசரித்து நீங்களே கணக்கிட்டுக் கொள்ளுங்கள்..

தற்போது வர்த்தக ரீதியில் முருங்கை வளர்ப்பு பரவலாகி உள்ளது.. 

முருங்கைக் காய்,  இலைப் பொடி  ஆகியன ஏற்றுமதி செய்யப்படும் சூழ்நிலையும் உருவாகியிருக்கின்றது.

பாரம்பரிய நெட்டை மரம் குட்டையான காய் வகைகள் சற்றே குறைந்து செடி முருங்கை எனும் இனம் பரவலாகக் காணப்படுகின்றது.. காய்களும் நீளமானவையாக இருக்கின்றன..

ஆனால்,  வீட்டு வாசலில் முருங்கை இருக்கக் கூடாது என்பார்கள்.. ஏனெனில் மாலையில் சற்றே சோர்வுடன் தூங்கு மூஞ்சி போல காணப்படும்...

வேதாளத்துடன் இணைத்துப் பேசப் படுவது முருங்கை.. ஆனாலும் அந்தக் கதை  முருங்கையின் வலுவற்ற  தன்மைக்காக சொல்லப்பட்டதே

அன்றி வேறொரு காரணமும் இல்லை..

முருங்கை -  

தான் வலுவற்று இருந்தாலும் உண்பவர் தம் உடலை  உறுதியாக்குவதை சிந்திக்க வேண்டும்..

நெடுங்கான் முருங்கை வெண்பூத் தாஅய்

(அகநானூறு 53)

நெடிய காட்டு முருங்கையில்  வெள்ளைப் பூக்கள் ..

முருங்கை மேய்ந்த பெருங்கை யானை

(அகநானூறு 167)

முருங்கையை - 

பெரிய தும்பிக்கை உடைய யானை தின்று தீர்த்து விட்டது.

( பாவம்... யானைக்கு என்ன பிரச்னையோ!..)

வாழ்க முருங்கை

நம்முடைய நலம்

நம்முடைய கையில்!..

***