ஐந்து வீட்டு சுவாமி 8

நாடும் வீடும்

நலம் பெற வேண்டும்

பகையும் பிணியும்

தொலைந்திட வேண்டும்..

***

உடன்குடி - செட்டியாபத்து ஐந்து வீட்டு சுவாமி தரிசனம் தொடர்கின்றது..

ஐந்து வீட்டு சுவாமிகள் என்றாலும் இங்கேயுள்ள சந்நிதிகள் எட்டு..

இங்கே பிரதானமாக சொல்லப்படும் மந்திரமும் எட்டெழுத்து..

மூன்று பதிவு என நினைத்த என்னை கூடுதலாக ஐந்து  எழுத வைத்ததும் எட்டெழுத்து.. 

ஐந்து வீட்டு சுவாமிகள் வலைத்தளம்,  Fb இவை இரண்டும் தகவல் தொகுப்பிற்கு உறுதுணையாக இருந்தன..

அவர் தமக்கு நெஞ்சார்ந்த நன்றி..

முதல் இரண்டு படங்களும் தஞ்சையம்பதி..

மற்ற படங்கள்: ஐந்து வீட்டு சுவாமி Fb

ஐந்து வீட்டு சுவாமி 1

ஐந்து வீட்டு சுவாமி 2

ஐந்து வீட்டு சுவாமி 3

ஐந்து வீட்டு சுவாமி 4

ஐந்து வீட்டு சுவாமி 5

ஐந்து வீட்டு சுவாமி 6

ஐந்து வீட்டு சுவாமி 7

புளிய மரம்

ஜாதி வேறுபாடுகள் மலிந்திருந்த அந்த காலகட்டத்தில ஐந்து வீட்டுக் கோயிலில் சுவாமிகளுக்கு பொங்கல் படைத்து வழிபட்டார் ஏழை ஒருவர்.. 

அந்தப் பிரசாதத்தை மற்றவர்களுக்கு கொடுத்த போது, அதனைப் பெற்றுக் கொள்வதற்கு எவரும் முன் வரவில்லை. 

காரணம், அவர்  துப்புரவுத் தொழிலாளி என்பதே..

வருத்தத்துடன் அழுது புலம்பித் தவித்த அந்த ஏழை சோர்வடைந்து கோயில் வாசலிலேயே தூங்கி விட்டார்.  

அவரது கனவில் தோன்றிய பெரிய சுவாமிகள் - 

"இந்தப் பிரசாதத்தை இங்கே எங்காவது புதைத்து வைத்து விட்டு அடுத்த வருடம் வந்து திறந்து பார்!.. "- 

எனக் கூறி மறைந்தார்.

புளிய மரத்தின் அருகில் நாக வடிவங்கள்

திடுக்கிட்டு விழித்த  தொழிலாளி கோயிலுக்குத் தெற்குப் பக்கத்தில்  இருந்த புளிய மரத்தின் கீழ்  வாழை இலையை வைத்து பிரசாதத்தை மூடி, அதைப் பானையோடு புதைத்து வைத்தார்..

மறுவருடம் கோயிலுக்கு வந்த அவர் பெரிய சுவாமியை வணங்கி விட்டு, புதைத்து வைத்திருந்த அந்த பானையைத் தோண்டி எடுக்க, 

அந்தப் பிரசாதமானது அப்பொழுதுதான்  சமைத்ததைப் போல ஆவி பறக்க இருந்தது. அங்கு இருந்தவர்கள் இதைப் பார்த்ததும் திகைத்துப் போயினர்..  

அந்தத் தொழிலாளியின் பக்தியையும் பிரசாதத்தின் மகிமையையும் புரிந்து கொண்டனர்..

அந்தப் பிரசாதத்தைத் தங்களுக்கும் தந்தருள வேண்டுமென்று அனைவரும் தண்டனிட்டு நின்றனர்.. கேட்டு கேட்டு வாங்கிச் சாப்பிட்டனர். 

ஏழைத் தொழிலாளிக்கு இறைவன் அளித்த நல்லருள் இது - என்று அந்த நாளில் இருந்து  இக் கோயிலில் ஜாதி பேதம் என்று எவரும் மனதாலும் பார்ப்பதில்லை.

பனையறுப்பு பொங்கல்

ஒவ்வொரு ஆண்டும் தை முதல் தேதி அன்று அந்த வருடத்தின் முதல் பனை அறுவடை செய்யப்படுகிறது, 

அன்று செட்டியாபத்து மக்கள் ஊர் கூடி முதலில் அறுவடை செய்த பனை ஓலையை பெரிய சுவாமி சந்நிதியின் முன் வாழை மரம் கட்டுவது போலக் கட்டி 

வைக்கின்றனர்..

மக்கள் கூடி வணங்கி தங்களின் தொழில் வளர்ச்சிக்கு உதவும்படி வேண்டிக் கொள்கிறார்கள். 

மேலும், அன்று கோயிலில் பொங்கல் வைத்ததும் பொங்கல் வைக்கப்பட்டதை ஊருக்கு அறிவிக்கிறார்கள். அதன் பிறகு தான் ஊரில் அனைவரும் பொங்கல் பானை வைக்கின்றார்கள். 

கோயிலில் பொங்கல் வைப்பதற்கு முன் ஊரில் யாரும் பொங்கல் வைப்பதில்லை..

ஸ்ரீ பெரிய பிராட்டி அம்மன்

ஐந்து வீட்டு சுவாமிகள் தரிசனத்திற்கு எந்த சூழ்நிலையிலும் பெண்கள் வரலாம்.. எந்த ஒரு தடையும் இல்லை..

இக்கோயிலில்

கர்ப்பிணிப் பெண்களின்  குழந்தைக்கும் சேர்த்து இரட்டைப் பிரசாதம் என்பது சிறப்பு..

ஸ்ரீ பெரிய சுவாமி

பழிகள் கொலைகள் செய்தாலும் பாவம் 

அதிகம் நினைத்தாலும்

விழிகண் குருடு கால் கைகள் முடக்கம் 

இருந்தால் மனம் உருகி

அழியாதிருக்கும் எட்டெழுத்தை அன்பாய் 

துதித்து வினை தீர்த்து 

தெளிவாய்  மனதில் அருள் புரியும் சிவமாய் 

உதித்த திருமணியே!..

ஸ்ரீ ஆத்தி சுவாமி

அஞ்சும் மூன்றும் எட்டெழுத்து ஹரி ஓம் 

எனும் உயிரெழுத்து

துஞ்சாதிருக்கும் வடவம்பில் தோன்றும் 

சங்கு சக்கரமும்

நெஞ்சில் அடக்கி எட்டெழுத்தை நினைத்தோர் துன்பம் தீர்த்து வைக்கும்

செஞ்சொல் தமிழே தந்தருளும் சிவமாய் 

உதித்த திருமணியே!..

**

இந்த அளவில் ஐந்து வீட்டு சுவாமிகளின் 

தரிசனம் நிறைவு எனக் கொள்வோம்..

ஐந்து வீட்டு சுவாமிகள் நல்லருளால்

நன்மைகள் என்றும் தொடரட்டும்..

ஐந்து வீட்டு 

சுவாமிகளே போற்றி..

***