திரு மணிக்குன்றம் 6

  

நாடும் வீடும்

நலம் பெற வேண்டும்

பகையும் பிணியும்

தொலைந்திட வேண்டும்..

***

கடந்த ஞாயிற்றுக் கிழமை (20/3) இரவு..

தஞ்சை ஸ்ரீ மணிக் குன்றப் பெருமாள் ஆலயத்தின் மஹா கும்பாபிஷேகத்திற்கு முதல் நாள்.. 

மாலையில் திருமேனிகளின் பீடங்களில் சாற்றுவதற்காக அஷ்ட பந்தனம் இடிக்கப்பட்டது..

கோயிலுக்கு வந்திருந்தோர் அனைவரும் பங்கேற்றனர்..

பெரியவர்கள் நமது பாரம்பர்யத்தை நினைத்துக் கொள்ள - இன்றைய இளந் தலைமுறையினருக்கு உரலும் உலக்கையும் வேடிக்கையாக இருந்தன.. 

இருப்பினும் ஆர்வமுடன் உலக்கையைப் பற்றி மருந்து இடித்துக் கொடுத்தனர்... நாங்களும் பெருமாள் கைங்கர்யத்தில் பங்கு பெற்றோம்..

இரவு எட்டு மணியைப் போல கருவறைக்குள் அன்பர்கள் அனைவரும் எவ்வித பாகுபாடும் இன்றி அனுமதிக்கப்பட்டனர்..

ஸ்ரீதேவி, பூதேவி, ஸ்ரீ மணிக்குன்றப்பெருமாள்- என, மூல மூர்த்திகளைக் கண்ணாரக் கண்டு  வணங்கித் தொட்டு மகிழ்ந்து அஷ்ட பந்தனம் சாற்றும் பெரும் பேறு எங்களுக்கும் கிட்டியது.. 

தேவ தேவியரின் திருமேனிகளைத் தொட்டபோது எனக்குள் ஏற்பட்ட அதிர்வுகளை விவரிக்கவே இயலாது.. 

அப்போது என் நெஞ்சில் எழுந்த சொல்மாலை இன்றைய பதிவில்!.. 

மாமணிக் குன்றனைக் கண்டேன்..

நின்றானை இருந்தானைக் கிடந்தான் தன்னை

அன்றானை துயர் தீர்க்க வந்தான் தன்னை

சென்றானை தூதனாய் தூயோன் தன்னை

குன்றானை மாமணிக் கோயில் கண்டேன்!.. 1

கன்றான அசுரனைத் தீர்த்தான் தன்னை

குன்றான குடை கொண்டு காத்தான் தன்னை

வென்றானை வெருண்டு வந்த ஆனை தன்னை

நின்றானை மாமணிக் கோயில் கண்டேன்!.. 2

தந்தானை தங்கைக்குத் தன்கை தன்னை

தந்தானை ஏழைக்கு செல்வம் தன்னை

முன்தானை முகம்நின்று மொழிந்தான் தன்னை

குன்றானை மாமணிக் கோயில் கண்டேன்!.. 3

குழல் கொண்டு கோகுலம் கொண்டான் தன்னை

குழல் கொண்ட கோபியர் கொண்டான் தன்னை

அழல் என்று அசுரர்க்கு ஆனான் தன்னை

நிழல் என்று மாமணிக் குன்றில் கண்டேன்!.. 4

குடங்கொண்ட வெண்ணெயைக் கொண்டான் தன்னை

விடங்கொண்ட நல்லரவை வென்றான் தன்னை

இடங்கண்டு மாமணிக் குன்றந் தன்னில்

தடங்கண்டு தாள் மலரைக் கண்டேன் கண்டேன்!.. 5

படங்கொண்ட அரவணையில் பயின்றான் தன்னை

விடங்கொண்ட கொடியவனைக் குடைந்தான் தன்னை

நலங்கொண்ட  திருமகளைக் கொண்டான் தன்னை

வலங்கண்டு மாமணிக் குன்றில் கண்டேன்!.. 6

அடியார்க்கும் ஆழ்வார்க்கும் இனியான் தன்னை

படியார்க்கும் விடியார்க்கும் அரியான் தன்னை

அழுவார்க்கும் தொழுவார்க்கும் அமுதன் தன்னை

தொழுவார் தம் உடனாகிக் குன்றில் கண்டேன்!.. 7

தூணொன்றில்  தான்தோன்றி வந்தான் தன்னை

நாணொன்றில் சரந்தொட்டு வென்றான் தன்னை

மண்கொண்டு விண்ணையும் அளந்தான் தன்னை

கண்கொண்டு மாமணிக் குன்றில் கண்டேன்!.. 8

பூமகளின் துயர் தீர்க்க வந்தான் தன்னை

பொங்கி அவள் தன்னோடு கலந்தான் தன்னை

நாம நலம் ஆயிரம் தந்தான் தன்னை

தங்கி மாமணிக் குன்றில் கண்டேன் கண்டேன்!.. 9

மாமலர் மங்கையுடன் நின்றான் தன்னை

பூமகள் உடனாய புனிதன் தன்னை

கோமளன் கோகுலன் குழகன் தன்னை

மாமணிக் குன்றனைக் கண்டேன் கண்டேன்!.. 10

நாரணி நாயகன் நாரணன் போற்றி 

பூரணி புண்ணியன் பூரணன் போற்றி

தாரணி தஞ்சையின் தாயவன் போற்றி

வாரணி உமைசிவ பங்கினன் போற்றி!.. 11

ஸ்ரீதேவி பூதேவி உடனாய

ஸ்ரீ மணிக்குன்றப் பெருமாள் 

திருவடிகள் போற்றி..

ஓம் ஹரி ஓம்

***