தை வெள்ளி 5

நாடும் வீடும்

நலம் பெற வேண்டும்

பகையும் பிணியும்

தொலைந்திட வேண்டும்..

***

இன்று தை (29)

ஐந்தாவது வெள்ளிக் கிழமை..

அருள் தரும் அம்பிகையை சிந்தித்திருப்பதற்கு

ஸ்ரீ துர்க்கை சித்தர் அருளிய ரோக நிவாரண அஷ்டகத்தில் இருந்து ஒரு பாடலும், துக்க நிவாரண அஷ்டகத்தில் இருந்து ஒரு பாடலும்

ஸ்ரீ அபிராமி பட்டர் அருளிய அபிராமி பதிகத்தில் இருந்து இரண்டு பாடல்களும்

இன்றைய பதிவில்!..

திருமகளானாய் கலைமகளானாய்

மலைமகளானாய் துர்க்கையளே

பெருநிதியானாய் பேரறிவானாய்

பெருவலிவானாய் பெண்மையளே

நறுமலரானாய் நல்லவளானாய்

நந்தினியானாய் நங்கையளே

ரோக நிவாரணி சோக நிவாரணி

தாப நிவாரணி ஜெய துர்க்கா..

மங்கள ரூபிணி மதி அணி

சூலினி மன்மத பாணியளே

சங்கடம் நீங்கிடச் சடுதியில்

வந்திடும் சங்கரி சௌந்தரியே

கங்கண பாணியன் களிமுகம்

கொண்டநல் கற்பகக் காமினியே

ஜெயஜெய சங்கரி கௌரி கிருபாகரி

துக்க நிவாரணி காமாக்ஷி..

-: துர்கை சித்தர் :-

கலையாத கல்வியும் குறையாத வயதும்

ஓர் கபடு வாராத நட்பும்

கன்றாத வளமையும் குன்றாத இளமையும்

கழுபிணி இலாத உடலும்

சலியாத மனமும் அன்பு அகலாத மனைவியும்

தவறாத சந்தானமும்

தாழாத கீர்த்தியும் மாறாத வார்த்தையும்

தடைகள் வாராத கொடையும்

தொலையாத நிதியமும் கோணாத கோலும்

ஒரு துன்பமில்லாத வாழ்வும்

துய்யநின் பாதத்தில் அன்பும் உதவி

பெரிய தொண்டரொடு கூட்டு கண்டாய்

அலையாழி அரிதுயிலும் மாயனது தங்கையே

ஆதிகடவூரின் வாழ்வே!..

அமுதீசர் ஒருபாகம் அகலாத சுகபாணி

அருள்வாமி அபிராமியே!..

சந்திர சடாதரி முகுந்த சோதரி துங்க

சலசு லோசன மாதவி

சம்ப்ரம பயோதரி சுமங்கலி சுலட்சணி

சாற்ற அரும் கருணாகரி

அந்தரி வராகி சாம்பவி அமர தோத்ரி

அமலை செகசால சூத்ரி

அகில ஆத்ம காரணி வினோத சய

நாரணி அகண்ட சின்மய பூரணி

சுந்தரி நிரந்தரி துரந்தரி வரை ராச

சுகுமாரி கௌமாரி உத்துங்க கல்யாணி

புஷ்பாஸ்திராம் புய பாணி தொண்டர்கட்கு அருள் சர்வாணி

வந்து அரி மலர் பிரமராதி துதி

வேத ஒலிவளர் திருக்கடவூரில் வாழ்

வாமி சுபநேமி புகழ் நாமி சிவசாமி மகிழ்

வாமி அபிராமி உமையே!...

-: அபிராமி பட்டர் :-

ஓம் சக்தி ஓம் சக்தி

ஓம் சக்தி ஓம்

***