மார்கழித் தென்றல் - 16

பாலுந் தெளிதேனும் பாகும் பருப்பும் இவை
நாலுங் கலந்துனக்கு நான் தருவேன் - கோலங்செய்
துங்கக் கரிமுகத்துத் தூமணியே நீயெனக்குச்
சங்கத் தமிழ் மூன்றும்தா..
- ஔவையார் - 
* * *

அனைவருக்கும் 
அன்பின் இனிய புத்தாண்டு நல்வாழ்த்துகள்!..
* * *

குறளமுதம்

எல்லார்க்கும் நன்றாம் பணிதல் அவருள்ளும்
செல்வர்க்கே செல்வம் தழைத்து. (0125) 

***

சூடிக்கொடுத்த சுடர்க்கொடி

ஸ்ரீ ஆண்டாள் அருளிச் செய்த திருப்பாவை

திருப்பாடல் - 16

திவ்ய தேசம் - திருக்கோழி
உறையூர் 

எம்பெருமான் - அழகிய மணவாளன் 

உறையூர் வல்லி எனும் கமலவல்லி நாச்சியார்
தனியாக சந்நிதி கொள்ளாமல்
மூலவருடனேயே வீற்றிருக்கின்றாள்.. 

உற்சவர் -  அழகிய மணவாளன்

ஸ்ரீ கமலவல்லி நாச்சியார்

ஸ்ரீ கல்யாண விமானம்
பிரயோக சக்கரத்துடன் நின்ற திருக்கோலம்

வடக்கு நோக்கிய திருமுக மண்டலம்

சோழ மன்னனின் திருமகள் கமலவல்லியை
திருமணம் கொண்டதால்
திருஅரங்கத்தில் பங்குனி உத்திரத் திருவிழாவின் போது
ஆயில்ய நட்சத்திரத்தன்று

அழகிய மணவாளன் உறையூருக்கு எழுந்தருள்கின்றார்..

இத்தலத்தில்

 பங்குனி ஆயில்ய சேர்த்தி வைபவம் சிறப்பானது..

அதிகாலையில் உறையூருக்கு எழுந்தருளும்

அழகிய மணவாளன்

அன்றைய தினம் இரவு 10.30 வரை 
கமலவல்லித் தாயாருடன் சேர்த்தி அருள்கின்றார்.

அதன்பின் - இரு நாட்களும் அங்கே இங்கே என்று உலவி விட்டு
உத்திரத்தன்று திருஅரங்கத்திற்கு எழுந்தருள்கின்றார்..

அங்கே - திருமகள் ஊடல் கொள்ள
மட்டையடி வைபவம் நடக்கின்றது..

நம்மாழ்வார் எழுந்தருளி சமாதானம் செய்து வைக்க
திருஅரங்கத்தில் மஹாலக்ஷ்மியுடன் சேர்த்தி வைபவம்..

திருப்பாணாழ்வாரின் அவதாரத் திருத்தலம்

சேவல் ஒன்று யானையை எதிர்த்து
நின்று விரட்டியடித்ததால்
திருக்கோழி என தலத்திற்குப் பெயர்..

புகழ் பெற்ற சிவாலயமாகிய 
ஸ்ரீ பஞ்சவர்ணேஸ்வரர் திருக்கோயிலும்
உறையூரில் விளங்குகின்றது..

மங்களாசாசனம்
திருமங்கையாழ்வார்
குலசேகராழ்வார்

***

நாயகனாய் நின்ற நந்த கோபனுடைய

கோயில் காப்போனே கொடிதோன்றும் தோரண

வாயில் காப்போனே மணிக்கதவம் தாள்திறவாய்

ஆயர் சிறுமிய ரோமுக்கு அறைபறை

மாயன் மணிவண்ணன் நென்னலே வாய்நேர்ந்தான்

தூயோமாய் வந்தோம் துயில்எழப் பாடுவான்

வாயால் முன்னம் முன்னம் மாற்றாதேநீ

நேயநிலைக் கதவம் நீக்கேலோர் எம்பாவாய்!.. 

ஓம் ஹரி ஓம் 

***

சிவதரிசனம்

திருத்தலம் - திருச்சிராப்பள்ளி 

ஸ்ரீ உச்சிப் பிள்ளையார்

உச்சிமலையில் 
உமை மைந்தன் - ஓங்கார ஸ்வரூபன்
அல்லல் தீர்க்கும் அருட்சுடராக
வீற்றிருக்கின்றார்.. 

இறைவன் -  ஸ்ரீ தாயுமானவர் 

அம்பிகை - ஸ்ரீ மட்டுவார்குழலி 

தீர்த்தம் - பிரம்ம தீர்த்தம், காவிரி

தலவிருட்சம் - வில்வம்

மேற்கு நோக்கிய திருத்தலம்.

ஆதரவற்றுத் தவித்த கர்ப்பிணிக்கு
அவளுடைய பேறு காலத்தில்
தாய் வடிவாக வந்து
எம்பெருமான்
துணையிருந்த திருத்தலம்..

மக்கள் குறை தீர்க்கும்
முறையறியா மன்னனை ஒறுத்து
இத்திருத்தலத்தில்
நீதி நிலை நாட்டப்பட்டது
என்பது தலபுராணம்..

ஸ்ரீ மாணிக்க விநாயகர்

மலையடிவாரத்தில் - மாணிக்க விநாயகர் சந்நிதி..
நடுவே மட்டுவார்குழலியுடன் ஸ்ரீ தாயுமானவர் திருக்கோயில்..
குன்றின் சிகரத்தில் உச்சிப்பிள்ளையார் திருக்கோயில்..

திருமறைக்காட்டில் தோன்றிய
தாயுமான ஸ்வாமிகள் துறவு பூண்டு
வாழ்ந்திருந்த தலம்..

திருப்பதிகம் அருளியோர்
திருஞானசம்பந்தர், அப்பர் பெருமான்,
மாணிக்கவாசகர்.
* * *

ஸ்ரீ திருஞானசம்பந்தர் அருளிச்செய்த

திருக்கடைக்காப்பு

நன்றுடையானைத் தீயதில்லானை நரை வெள்ளேறு
ஒன்றுடையானை உமையொரு பாகம் உடையானை
சென்றடையாத திருவுடையானைச் சிராப்பள்ளிக்
குன்றுடையானைக் கூற என்னுள்ளங் குளிரும்மே!.. (1/98) 

***

ஸ்ரீ மாணிக்கவாசகர் அருளிச் செய்த

திருவாசகம்

திருஅம்மானை

திருப்பாடல் 11 - 12

செப்பார் முலைபங்கன் தென்னன் பெருந்துறையான்

தப்பாமே தாளடைந்தார் நெஞ்சுருக்குந் தன்மையினான்

அப்பாண்டி நாட்டைச் சிவலோகம் ஆக்குவித்த

அப்பார் சடையப்பன் ஆனந்த வார்கழலே

ஒப்பாக ஒப்புவித்த உள்ளத்தார் உள்ளிருக்கும்

அப்பாலைக் கப்பாலைப் பாடுதுங்காண் அம்மானாய்!..

மைப்பொலியுங் கண்ணிகேள் மாலயனோ டிந்திரனும்

எப்பிறவி யுந்தேட என்னையுந்தன் இன்னருளால்

இப்பிறவி ஆட்கொண்டு இனிப்பிறவா மேகாத்து

மெய்ப்பொருட்கண் தோற்றமாய் மெய்யே நிலைபேறாய்

எப்பொருட்குந் தானேயாய் யாவைக்கும் வீடாகும்

அப்பொருளாம் நம்சிவனைப் பாடுதுங்காண் அம்மானாய்!..

ஓம் நம சிவாய சிவாய நம ஓம் 

***