மார்கழிப் பனியில் - 06

சூடிக் கொடுத்த சுடர்க்கொடி 

ஸ்ரீஆண்டாள் அருளிச்செய்த திருப்பாவை - 06

 

புள்ளும் சிலம்பின காண் புள்ளரையன் கோயிலில் 

வெள்ளை விளி சங்கின் பேரரவம் கேட்டிலையோ

பிள்ளாய் எழுந்திராய் பேய்முலை நஞ்சுண்டு 

கள்ளச்சகடம் கலக்கழியக் காலோச்சி 

வெள்ளத்தரவில் துயிலமர்ந்த வித்தினை 

உள்ளத்துக் கொண்டு முனிவர்களும் யோகிகளும் 

மெள்ள எழுந்து அரி என்ற பேரரவம் 

உள்ளம் புகுந்து குளிர்ந்தேலோர் எம்பாவாய்!.. 

ஓம் ஹரி ஓம்

ஆலய தரிசனம்

குமார வயலூர்

திருஅண்ணாமலையில் முருகனின் திருவருள் பெற்று உய்வடைந்த அருணகிரி நாதர் - திருப்புகழ் பாட ஆரம்பித்தது இத்திருத்தலத்தில் தான். 

குமார வயலூர் தொன்மையான சிவஸ்தலம். 

இறைவன் - ஆதிநாதர். அம்பிகை  - புராணேஸ்வரி. 

கைத்தலநிறைகனி எனும் திருப்புகழ் இத்திருக்கோயிலில் உள்ள பொய்யா கணபதியின் பேரில் பாடப்பட்டதகும். 

வாரியார் ஸ்வாமிகள் எம்பெருமானால் ஆட்கொள்ளப்பட்டது இங்கே தான். வாரியார் ஸ்வாமிகள் இத்திருக் கோயிலுக்குத்  திருப்பணிகள்  செய்துள்ளார்.  

திருக்கோயிலின் எதிரில்  சக்தி தீர்த்தம். தலவிருட்சம் - வன்னி மரம். 

திருக்குளத்தின் அருகிலேயே கருப்பஸ்வாமி கோயில் கொண்டுள்ளார். இவரே இத்திருத்தலத்தின் பிரதான காவல் தெய்வம்.

திருச்சி சத்திரம் பேருந்து நிலையத்தில் இருந்து பேருந்து வசதிகள் உள்ளது.

நாத விந்துக லாதீ நமோநம
     வேத மந்த்ரசொ ரூபா நமோநம
          ஞான பண்டித ஸாமீ நமோநம - வெகுகோடி

நாம சம்புகு மாரா நமோநம
     போக அந்தரி பாலா நமோநம
          நாக பந்தம யூரா நமோநம - பரசூரர்

சேத தண்டவி நோதா நமோநம
     கீத கிண்கிணி பாதா நமோநம
          தீர சம்ப்ரம வீரா நமோநம - கிரிராஜ

தீப மங்கள ஜோதீ நமோநம
     தூய அம்பல லீலா நமோநம
          தேவ குஞ்சரி பாகா நமோநம - அருள்தாராய்

ஈத லும்பல கோலா லபூஜையும்
     ஓத லுங்குண ஆசா ரநீதியும்
          ஈர முங்குரு சீர்பா தசேவையு - மறவாத

ஏழ்த லம்புகழ் காவே ரியால்விளை
     சோழ மண்டல மீதே மநோகர
          ராஜ கெம்பிர நாடா ளுநாயக - வயலூரா

ஆத ரம்பயில் ஆரூரர்தோழமை
     சேர்தல் கொண்டவ ரோடே முனாளினில்
          ஆடல் வெம்பரி மீதே றிமாகயி - லையிலேகி

ஆதி யந்த உலா ஆசுபாடிய
     சேரர் கொங்குவை காவூர் நன்னாடதில்
          ஆவி னன்குடி வாழ்வா னதேவர்கள் - பெருமாளே!..

ஆவினன்குடியையும் வயலூரையும் இணைத்துப் பாடப் பெற்ற திருப்புகழ். 

சிவாய திருச்சிற்றம்பலம்.