மார்கழிப் பனியில் - 02

 சூடிக் கொடுத்த சுடர்க்கொடி

ஸ்ரீ ஆண்டாள் அருளிச்செய்த திருப்பாவை - 02

 

வையத்து வாழ்வீர்காள் நாமும் நம்பாவைக்குச் 

செய்யும் கிரிசைகள் கேளீரோ பாற்கடலுள் 

பையத் துயின்ற பரமனடி பாடி 

நெய்யுண்ணோம் பாலுண்ணோம் நாட்காலே நீராடி 

மையிட்டு எழுதோம் மலரிட்டு நாம் முடியோம் 

செய்யாதன செய்யோம் தீக்குறளைச்சென்றோதோம் 

ஐயமும் பிச்சையும் ஆந்தனையும் கைகாட்டி 

உய்யுமாற் எண்ணி உகந்தேலோர் எம்பாவாய்!..

ஓம் ஹரி ஓம்!..

ஆலய தரிசனம்

திருஅரங்கம்

 பூலோக வைகுந்தம்..

வைணவத்தில் கோயில் என்றால் அது திருஅரங்கம் தான்.

பெருமாள் ஆதிசேஷன் மீது பள்ளிகொண்ட திருக்கோலம்.

மூலவர் - ஸ்ரீ ரங்கநாதப்பெருமாள். தாயார்  - ஸ்ரீரங்கநாயகி.

பச்சைமா மலைபோல் மேனி பவளவாய் கமலச்செங்கண் 
அச்சுதா அமரர் ஏறே ஆயர் தம் கொழுந்தே என்னும் 
இச்சுவை தவிர யான் போய் இந்திரலோகம் ஆளும் 
அச்சுவை பெறினும் வேண்டேன் அரங்கமாநகருளானே!..
                                                                           - தொண்டரடிப்பொடியாழ்வார். 

வருடம் முழுதும் வைபவங்கள் நிகழும் திருத்தலம். எனினும்

லட்சக் கணக்கான பக்தர்கள் திரள - மார்கழியில் வைகுந்த ஏகாதசி வெகு சிறப்பாக நிகழும் திருத்தலம்.

ஸ்ரீ ரங்கநாயகி

21 ராஜகோபுரங்கள். நிறைந்த மண்டபங்கள். சந்நிதிகள். தீர்த்தங்கள்.

ஏழு திருச்சுற்றுகளுடன் விளங்கும் பிரம்மாண்டமான திருக்கோயில். சந்திர தீர்த்தம் திருக்கோயிலின் உள்ளே இருக்கின்றது.

 

உடையவராகிய ஸ்ரீ ராமானுஜர் - இத் திருத்தலத்தில் தான் பலகாலம் தங்கியிருந்தார். அவர் திருநாடு எய்தியதும் இங்கேதான். 

ஆடிப்பெருக்கு வைபவத்தின் போது -  பட்டுப்புடவை, வளையல், மஞ்சள் குங்குமம், தாம்பூலம்  - என அனைத்து மங்கலங்களையும் யானையின் மீது எடுத்து வந்து  -  காவிரி ஆற்றில் மிதக்க விடுவார்கள்.

ஸ்ரீரங்கநாதர் - காவிரிக்கு சீர் வழங்குவதாக ஐதீகம். 

அதேபோல,  ஸ்ரீரங்கநாதர் - சமயபுரம் மாரியம்மனுக்கும்  சீர் வழங்குகின்றார்.

ஓம் ஹரி ஓம்!..