திருப்பாவை - 17

ஆண்டாள் அருளிய திருப்பாவை 

திருப்பாசுரம் - 17

நந்தகோபாலனும் குல விளக்கும்

அம்பரமே!.. தண்ணீரே!... சோறே!... அறஞ்செய்யும்
எம்பிரான்! நந்தகோபாலா! எழுந்திராய்!
கொம்பனார்க்கெல்லாம் கொழுந்தே! குலவிளக்கே!
எம்பெருமாட்டி! யசோதாய்! அறிவுறாய்!
அம்பரம் ஊடறுத்து  ஓங்கி உலகளந்த
உம்பர் கோமானே! உறங்காது எழுந்திராய்!
செம்பொற் கழலடிச் செல்வா! பலதேவா!
உம்பியும் நீயும் உறங்கேலோர்  எம்பாவாய்!...  

அற்றார்க்கும் அலந்தார்க்கும் பாகுபாடு ஏதும் இன்றி -  

உடுத்திக் கொள்ள நல்ல உடை, அருந்தி மகிழ தூய நீர், உண்டு உயிர் பெற அறுசுவை உணவு - என்ற மூன்று விதமான அறங்களையும் மனம் உவந்து செய்யும் எம்பெருமானே!..ஆயர் குலத் தலைவனே!..நந்தகோபனே!.. துயில் எழுந்தருள்வீராக!.... 

கொம்பு அனைய பெண் கொடிகளுக்கு எல்லாம் கொழுந்து எனும் பேறு பெற்ற புண்ணியமே!.... கொண்டானின் குறிப்பு அறிந்து, ஆற்றும் அறங்களுக்கு எல்லாம் அணியாய்த் திகழும் குணக்குண்றே!... ஆயர் குலத்தின் அணி விளக்கே!... எம்பெருமானின்  தாயாய்  நின்ற   தயாபரி!...  எம்பெருமாட்டி!... தாயே யசோதா!... விழித்தெழுவீராக!...

வாமனன் எனும் வாழ்வாக வந்து, அம்பரம் எனும் பரவெளியின் ஊடாக திரிவிக்ரமனனாக வளர்ந்து - ஓங்கி உயர்ந்து உலகளந்த பெருமானே!.. உத்தமனே!.. வானவர்க்கு அரசே!... இன்னும் உறங்குகின்றாயா?... 

உறங்கா ஒளிச்சுடரே!... எழுந்தருள்வாயாக!.... 

செல்வனே!...பலதேவனே!...

வீரத்தின் விளை நிலமே!... செம்பொன்னால் செய்யப்பட்ட கழல்களைத் திருவடித் தாமரைகளில் அணிந்திருப்பவனே!.. 

செல்வத்தின் செல்வனுக்கு செல்வனாகிய செல்வனே!...பலதேவனே!...துயில் எழுவாயாக!...  

உன் தம்பியும்  நீயும் உறங்கியது போதும்!...துயில் எழுவீர்களாக!.....

நன்றி - ரதி, தேவி